வெங்சர்க்காருக்கு வாழ்நாள் சாதனையாளர் விருது

Source: Tamil CNN.  இந்திய கிரிக்கெட் வாரியத்தின் சார்பில் இந்த ஆண்டுக்கான சி.கே.நாயுடு வாழ்நாள் சாதனையாளர் விருதை இந்திய முன்னாள் கேப்டன் திலிப் வெங்சர்க்கார் பெறுகிறார். 58 வயதான வெங்சர்க்கார் 1976-ம் ஆண்டு முதல் 1991-ம் ஆண்டு வரை இந்திய அணிக்காக விளையாடியவர். 1983-ம் ஆண்டு உலக கோப்பையை வென்ற இந்திய அணியிலும் இடம் பிடித்தவர். 116 டெஸ்டுகளில் பங்கேற்று 17 சதம் உள்பட 6,868 ரன்கள் சேர்த்துள்ளார். அவருக்கு விருது மற்றும் பாராட்டு சான்றிதழுடன் ரூ.25 லட்சம் ரொக்கமும் வழங்கப்படும்.இந்தியாவின் முதல் டெஸ்ட் கேப்டனான சி.கே.நாயுடு பெயரில் வாழ்நாள் சாதனையாளர் விருது 1994-ம் ஆண்டு முதல் வழங்கப்பட்டு வருகிறது. கடந்த ஆண்டு கபில்தேவ் இந்த விருதை வாங்கியது குறிப்பிடத்தக்கது.
2013-14-ம் ஆண்டு சீசனில் இந்தியாவின் சிறந்த சர்வதேச கிரிக்கெட் வீரராக வேகப்பந்து வீச்சாளர் புவனேஷ்வர்குமார் தேர்வு செய்யப்பட்டுள்ளார். 24 வயதான உத்தரபிரதேச மாநிலத்தை சேர்ந்த புவனேஷ்வர்குமார், விருதுக்கு எடுத்துக்கொள்ளப்பட்ட காலக்கட்டத்தில் 7 டெஸ்டில் 22 விக்கெட்டுகளும், 3 அரைசதம் உள்பட 263 ரன்களும், 22 ஒரு நாள் போட்டிகளில் 17 விக்கெட்டுகளும், 7 இருபது ஓவர் போட்டியில் 7 விக்கெட்டுகளும் எடுத்துள்ளார். அவருக்கு பாலி உம்ரிகர் விருதுடன் ரூ.5 லட்சம் பரிசுத்தொகையும் கிடைக்கும்.
2013-14-ம் ஆண்டு ரஞ்சி கிரிக்கெட் தொடரில் அதிக விக்கெட்டுகள் வீழ்த்திய ரிஷிதவான் (49 விக்கெட், இமாச்சலபிரதேச அணி), அதிக ரன்கள் குவித்த கேதர் ஜாதவ் (6 சதத்துடன் 1223 ரன், மராட்டிய அணி) ஆகியோர் மாதவ்ராவ் சிந்தியா விருதையும், ரஞ்சியில் சிறந்த ஆல்-ரவுண்டராக ஜொலித்த பர்வேஸ் ரசூல் (ஜம்மு-காஷ்மீர்), உள்ளூர் முதல்தர ஒரு நாள் போட்டியில் ஆல்-ரவுண்டராக தேர்வான வினய்குமார் (கர்நாடகா) ஆகியோர் லாலாஅமர்நாத் விருதையும் பெறுகிறார்கள். இவர்களுக்கு விருதுடன் தலா ரூ.2½ லட்சமும் ரொக்கமும் வழங்கப்படும்.
விருது வழங்கும் விழா வருகிற 21-ந்தேதி மும்பையில் நடக்கிறது. விழாவில் கலந்து கொண்டு விட்டு அன்றைய தினம் இந்திய அணியினர் ஆஸ்திரேலியாவுக்கு புறப்பட இருப்பது குறிப்பிடத்தக்கது.