ஆஸி. கொடியில் யூனியன் ஜாக் சின்னம் தொடரும்: அமைச்சர் அறிவிப்பு

Source: Tamil CNN
 
இங்கிலாந்தின் காலனித்துவக் குறியீடாக வெளிப்படும் யூனியன் ஜாக் சின்னம் ஆஸ்திரேலியா மற்றும் நியூசிலாந்து நாடுகளின் தேசியக்கொடிகளில் காணப்படுகிறது. தங்கள் கொடியிலிருந்து அச்சின்னம் மாற்றப்பட வேண்டும் என நியூசிலாந்து மக்களில் பெரும்பான்மையானோர் விரும்புகின்றனர்.
இதனைத்தொடர்ந்து வரும் செப்டம்பர் மாதம் நடைபெற உள்ள தேர்தலில் தான் வெற்றி பெற்றால் மக்களிடம் வாக்கெடுப்பு நடத்தி மூன்று வருடங்களுக்குள் கொடியின் அமைப்பை மாற்றுவதாக தற்போதைய நியூசிலாந்து பிரதமர் ஜான் கீ நேற்று தெரிவித்தார். அவரது ஆட்சி மாற்றப்பட்டாலும் கொடியின் சின்னம் மாற்றப்படும் என்று எதிர்க்கட்சித் தலைவர்களும் குறிப்பிட்டுள்ளனர்.
இங்கிலாந்தின் ராணி தற்போதும் ஆஸ்திரேலியாவின் மாநிலத் தலைவியாகவும் இருந்து வருகின்றார். கடந்த வருடம் அப்பதவியில் இருந்து விலக ராணி எலிசபெத் விருப்பம் தெரிவித்துள்ளார். மேலும், இதுகுறித்து அந்நாட்டில் அவ்வப்போது கருத்து விவாதங்கள் நடந்து வந்தது.
ஆஸ்திரேலியாவில் சென்ற வருடம் பொதுத்தேர்தல் சமயத்தில் எடுக்கப்பட்ட கருத்துக் கணிப்பு ஒன்றில் 38 சதவிகிதத்தினர் இங்கிலாந்துடனான முடியாட்சி உறவுகளைக் குறைப்பதற்கு ஆதரவாகவும், 20 சதவிகிதத்தினர் நடுநிலையாகவும் வாக்களித்துள்ளனர்.
இங்கிலாந்து நாட்டில் ஆண்டுதோறும் நடைபெறும் வெளியுறவு மற்றும் பாதுகாப்புத்துறை அமைச்சர்கள் மட்டத்திலான மாநாட்டில் கலந்து கொள்ள வந்த ஆஸ்திரேலிய வெளியுறவுத்துறை அமைச்சர் ஜூலி பிஷப் நியூசிலாந்தின் அறிவிப்பைத் தொடர்ந்து ஆஸ்திரேலிய கொடியிலிருந்து யூனியன் ஜாக் சின்னத்தை அகற்றும் திட்டம் தங்களிடம் இல்லை என தெரிவித்தார்.