Saturday, 14 August 2021

திருப்பீடத்திற்கும் சீனாவுக்கும் இடையே நிலவும் உறவு

 

பல்வேறு தடைகளின் நடுவே, சீனாவில் வாழும் கத்தோலிக்கர்கள் கொண்டிருக்கும் பக்தியும், ஆர்வமும், சீனாவுடன் திருப்பீடம் துவங்கிய உரையாடல்களை, தொடர்ந்து நடத்த, உந்துசக்தியாக அமைந்துள்ளன – கர்தினால் பரோலின்

ஜெரோம் லூயிஸ் - வத்திக்கான் செய்திகள்

2018ம் ஆண்டு சீனாவுடன் திருப்பீடம் நிறைவேற்றிய ஒப்பந்தங்களின் தொடர்ச்சியாக, உரையாடல்கள் இடம்பெற்று வருகின்றன என்றும், கோவிட் பெருந்தொற்றின் தடைகளால் தற்போது நிறுத்திவைக்கப்பட்டுள்ள இந்த உரையாடல் முயற்சிகள் விரைவில் தொடரும் என்று தான் நம்புவதாகவும், திருப்பீடச் செயலர் கர்தினால் பியெத்ரோ பரோலின் அவர்கள் ஊடகத்திற்கு அளித்த ஒரு பேட்டியில் கூறியுள்ளார்.

இத்தாலியின் Trent நகரில், தன் கோடை விடுமுறையை கழித்துவரும் கர்தினால் பரோலின் அவர்கள், அங்கு வெளியாகும் La Voce del Nordest என்ற வார இதழுக்கு அளித்த பேட்டியில், திருப்பீடத்திற்கும் சீனாவுக்கும் இடையே நிலவும் உறவு, திருத்தந்தையின் உடல் நலம், மற்றும் அரசுத்தலைவர் பொறுப்பிலிருந்து ஓய்வுபெறவிருக்கும் இத்தாலிய அரசுத்தலைவர் செர்ஜியோ மத்தரெல்லா அவர்களின் பணிக்காலம் ஆகிய தலைப்புகளில் தன் கருத்துக்களைப் பகிர்ந்துகொண்டார்.

உரையாடல்கள் தொடரும்

சீன அரசுக்கும், கத்தோலிக்கத் திருஅவைக்கும் இடையே துவக்கப்பட்ட உரையாடல், தொடர்ந்து நடைபெறும் என்ற உறுதியை, தன் பேட்டியில் வழங்கிய கர்தினால் பரோலின் அவர்கள், பல்வேறு தடைகளின் நடுவே, சீனாவில் வாழும் கத்தோலிக்கர்கள் கொண்டிருக்கும் பக்தியும், ஆர்வமும், இந்த உரையாடல்களை தொடர்ந்து நடத்த உந்துசக்தியாக அமைந்துள்ளன என்று கூறினார்.

திருத்தந்தையின் உடல்நலம்

இவ்வாண்டு ஜூலை 4ம் தேதி, உரோம் நகரின் ஜெமெல்லி மருத்துவமனையில் அறுவைசிகிச்சை பெற்ற திருத்தந்தை பிரான்சிஸ் அவர்களைப்பற்றி கேள்வி எழுந்தபோது, சிகிச்சைக்குப்பின் உடல் நலனில் இயல்பு நிலைக்குத் திரும்புவது, வயதின் காரணமாக, சற்று மெதுவாக இருந்தாலும், திருத்தந்தையின் உள்ளுணர்வு, எப்போதும்போல், இளமையுடன் இருக்கிறது என்று பதிலளித்தார் கர்தினால் பரோலின்.

திருத்தந்தை பிரான்சிஸ் அவர்கள், தன் புதன் மறைக்கல்வி உரைகளை மீண்டும் துவங்கியுள்ளதிலிருந்தும், செப்டம்பர் மாதம் ஹங்கேரி மற்றும் சுலோவாக்கியா நாடுகளுக்கு பயணம் மேற்கொள்ள ஆவலாய் இருப்பதிலிருந்தும் அவரது உள்ள உறுதியைப் புரிந்துகொள்ளலாம் என்று கர்தினால் பரோலின் அவர்கள் சுட்டிக்காட்டினார்.

இத்தாலிய அரசுத்தலைவரின் ஏழு ஆண்டுகள்

தன் பேட்டியின் இறுதியில், இத்தாலிய அரசுத்தலைவர் செர்ஜியோ மத்தரெல்லா அவர்களைக் குறித்து பேசிய கர்தினால் பரோலின் அவர்கள், மத்தரெல்லா அவர்கள், ஏழு ஆண்டுகளாக அரசுத்தலைவர் பணியை ஆற்றி ஓய்வெடுக்கப்போகும் இவ்வேளையில், அவர், இத்தாலி நாட்டின் மீதும், மக்கள் மீதும் கொண்டுள்ள அன்பை, தன் அர்ப்பண உணர்வின் வழியே காட்டியதற்காக நன்றி கூறினார்.

மேலும், லித்துவானியா நாட்டிற்கு தான் மேற்கொள்ளவிருக்கும் மேய்ப்புப்பணி பயணத்தைக் குறித்தும், உக்ரைன் நாட்டிற்கென நியமிக்கப்பட்டுள்ள புதிய தூதரை ஆயராக அருள்பொழிவு செய்யவிருப்பதைக் குறித்தும் திருப்பீடச் செயலர் கர்தினால் பரோலின் அவர்கள் குறிப்பிட்டார்.


வறியோர் வங்கியை உருவாக்கிய அருள்பணியாளர் மரணம்

 

பங்களாதேஷ், தினாஜ்பூர் மறைமாவட்டத்தின் ஒவ்வொரு பங்கிலும் சிறு சேமிப்பு வங்கிகளைத் துவக்கி, வறியோருக்கு பெருமளவு உதவிகள் செய்த அருள்பணி ஜூலியோ பெருத்தி

ஜெரோம் லூயிஸ் - வத்திக்கான் செய்திகள்

PIME என்றழைக்கப்படும் அயல்நாட்டு மறைப்பணிகளின் பாப்பிறைக் கழகம் என்ற நிறுவனத்தின் மறைப்பணியாளராக பங்களாதேஷ் நாட்டில் பணியாற்றிவந்த அருள்பணி ஜூலியோ பெருத்தி (Giulio Berutti) அவர்கள் கோவிட பெருந்தொற்றினால் பாதிக்கப்பட்டு, ஜூலை 11, இப்புதனன்று இறையடி சேர்ந்தார்.

வட இத்தாலியின் Busto Arsizio எனுமிடத்தில் பிறந்த அருள்பணி பெருத்தி அவர்கள், 1970ம் ஆண்டு தன் 26வது வயதில் அருள்பணியாளராக திருப்பொழிவு பெற்று, அடுத்த ஆண்டு, பங்களாதேஷ் நாடு, விடுதலையடைந்தபின், அந்நாட்டிற்கு மறைப்பணியாளராக சென்றார்.

பங்களாதேஷ் நாட்டின் தினாஜ்பூர் மறைமாவட்டத்தில் பணியாற்றிவந்த அருள்பணி பெருத்தி அவர்கள், அம்மறைமாவட்டத்தின் ஒவ்வொரு பங்கிலும் சிறு சேமிப்பு வங்கிகளைத் துவக்கி, வறியோருக்கு பெருமளவு உதவிகள் செய்து வந்தார்.

அருள்பணி பெருத்தி அவர்கள் ஆற்றிவந்த பணிகளை பாராட்டிப் பேசிய தினாஜ்பூர் ஆயர் செபாஸ்டின் டுடு (Sebastian Tudu) அவர்கள், அருள்பணி பெருத்தி அவர்கள் வறியோருக்காக உருவாக்கிய இந்த வங்கிகளின் வழியே சிறுதொழில்கள், குழந்தைகளின் கல்வி, வீட்டு வசதி என்ற பல்வேறு பயன்களை வறியோர் அடைந்தனர் என்று கூறினார்.

மேலும், அருள்பணி பெருத்தி அவர்கள், பங்களாதேஷ் நாட்டில். புனித வின்சென்ட் தாதியர் நிறுவனத்தின் வழியே, கத்தோலிக்க தாதியர் அமைப்பை முதன் முதலாக உருவாக்கினார் என்றும், மக்களுக்கு மருத்துவ காப்பீடு முறையையும் அறிமுகம் செய்துவைத்தார் என்றும் ஆசிய செய்தி கூறுகிறது.

கோவிட் பெருந்தொற்றினால் பாதிக்கப்பட்ட அருள்பணி பெருத்தி அவர்களுக்கு பங்களாதேஷ் தலைநகர் டாக்காவில் மருத்துவ சிகிச்சைகள் அளிக்கப்பட்டு, அவர் மருத்துவ மனையிலிருந்து வெளியேறியபின், மீண்டும் இந்த பெருந்தொற்றின் பாதிப்புக்கு உள்ளாகி, தன் 77வது வயதில், இறையடி சேர்ந்தார்.

ஆகஸ்ட் 11 இப்புதனன்று இறையடி சேர்ந்த அருள்பணி ஜூலியோ பெருத்தி அவர்களின் உடல், ஆகஸ்ட் 13, இவ்வெள்ளியன்று தினாஜ்பூர் பேராலயத்தில் அடக்கம் செய்யபட்டது என்று, ஆசிய செய்தி கூறுகிறது. (AsiaNews)


பருவநிலை மாற்றங்களுக்கு மனித நடவடிக்கைகளே காரணம்

 

பருவநிலை மாற்றம் குறித்து 200 அறிவியலாளர்களின் உதவியுடன் 3000 பக்க அறிக்கையைத் தயாரித்துள்ளது ஐ.நா. அமைப்பு

கிறிஸ்டோபர் பிரான்சிஸ் - வத்திக்கான் செய்திகள்

மீண்டும் பழைய நிலைக்கு கொண்டுவரமுடியாத அளவில், பருவநிலை பெரிய அளவு சீர்குலைந்த மாற்றங்களைக் கண்டுள்ளதற்கு மனித நடவடிக்கைகள் முக்கியக் காரணம் என, ஐ.நா. நிறுவனம் அண்மையில் வெளியிட்ட அறிக்கை ஒன்று குற்றம் சாட்டுகிறது.

IPCC எனப்படும், பருவ நிலை மாற்றம் குறித்து நாடுகளுக்கிடையே கலந்துரையாடும் ஐ.நா. அமைப்பு, அண்மையில் வெளியிட்டுள்ள 3000 பக்க அறிக்கையின்படி, பருவநிலை மாற்றத்தின் முக்கியக் காரணியாக மனிதர்களின் நடவடிக்கைகள் சுட்டிக்காட்டப்பட்டுள்ளன.

'பருவ நிலை மாற்றம் 2021 : இயற்பியல் அறிவியல் அடிப்படை' என்ற தலைப்பில், 200 அறிவியலாளர்களால் தயாரிக்கப்பட்டுள்ள ஐ.நா. அறிக்கையின்  தொகுப்பில், சுற்றுச்சூழல், கடல், மற்றும் நிலம், வெப்பமாகி வருவதற்கு மனிதர்களே காரணம் என குற்றஞ்சாட்டப்பட்டுள்ளது.

அண்மைய பருவநிலை மாற்றங்கள், மனிதகுலத்திற்கு எச்சரிக்கையை விடுத்துவருகின்றன எனக்கூறும் இவ்வறிக்கை, உலகின் பசுமை நிலையை பாதிக்கும் வாயுக்களின் வெளியேற்றம், காடுகள் அழிப்பு போன்றவை நம் பூமியின் மூச்சை திணறடித்து, பல கோடி மக்களின் வாழ்வுக்கு அச்சுறுத்தலாக உள்ளன என கூறியுள்ளது.

ஒரு காலத்தில் 50 ஆண்டுகளுக்கு ஒருமுறையே இடம்பெற்று வந்த அனல்காற்று வீசுதல், தற்போது, ஒவ்வொரு பத்தாண்டுகளுக்கு ஒருமுறை இடம்பெறுவதாகவும் கவலையை வெளியிடும் இந்த அறிக்கை, தற்காலச் சூறாவளிகளின் பலமும் வேகமும் அதிகரித்துள்ளதையும் சுட்டிக்காட்டுகிறது.

2050ம் ஆண்டிற்குள் ஆர்டிக் பெருங்கடலின் மீதுள்ள பனிக்கட்டிகள் அனைத்தும் கரைந்து காணாமல் போய்விடும் என்ற அச்சத்தையும் வெளியிடுகிறது ஐ.நா. அறிக்கை.

உலகின் சராசரி வெப்ப விகிதத்தைவிட, வடபகுதியின் வெப்பம் இருமடங்கு அதிகரித்துள்ளதாக கவலையை வெளியிடும் இவ்வறிக்கை, உலகம் வெப்பமாகி வருவதால் பனிப்பாறைகள் உருகி, கடலின் நீர்மட்டம் 2 முதல் 3 மீட்டர் வரை உயரும் ஆபத்து உள்ளது என்பதையும் சுட்டிக்காட்டுகிறது.


பழங்குடியின மக்களின் ஞானம், அறிவை, கொண்டாட ஐ.நா. அழைப்பு

 

ஐ.நா. நிறுவனத்தின் பொது அவை, 1994ம் ஆண்டு, டிசம்பர் 23ம் தேதியன்று, பழங்குடிகள் உலக நாளை உருவாக்கியது

மேரி தெரேசா: வத்திக்கான் செய்திகள்

உலகில் வாழ்கின்ற 47 இலட்சத்து 60 ஆயிரத்துக்கு மேற்பட்ட பழங்குடியின மக்கள் எதிர்கொள்ளும் உரிமை மீறல்களை ஏற்கும் அதேவேளை, அம்மக்களின் ஞானம் மற்றும், அறிவைக் கொண்டாடவும், அவர்களோடு உண்மையான ஒருமைப்பாட்டுணர்வு கொள்ளவும், ஐக்கிய நாடுகள் நிறுவனத்தின் தலைமைப் பொதுச்செயலர் அந்தோனியோ கூட்டேரஸ் அவர்கள் அழைப்புவிடுத்துள்ளார்.

ஆகஸ்ட் 09, வருகிற திங்களன்று கடைபிடிக்கப்படும், பழங்குடியினர் உலக நாளுக்கென்று செய்தி வெளியிட்டுள்ள கூட்டேரஸ் அவர்கள், பழங்குடிகளுக்கு இழைக்கப்படும்  கொடுமையான சமத்துவமற்றநிலைகளை முடிவுக்குக் கொணருமாறு, இந்த உலக நாளில், அனைத்துலக சமுதாயத்திடம் தான் விண்ணப்பிப்பதாகக் கூறியுள்ளார்.

இன்றையச் சூழலில், பழங்குடியின மக்களின் நிலங்களும், குடியிருப்புப் பகுதிகளும், அவர்களின் அரசியல் மற்றும், பொருளாதாரத் தன்னாட்சியும், அவர்களின் பிள்ளைகளும்கூட சுரண்டப்பட்டு வருகின்றன என்று கூறியுள்ள கூட்டேரஸ் அவர்கள், இந்நிலை, அவர்களின் மாண்பு, மற்றும், சுதந்திரங்கள் ஆகியவற்றையும் பறித்துவிடுகின்றன என்றும் குறிப்பிட்டுள்ளார்.

பழங்குடிகள் உலக நாள்

“எவரும் ஒதுக்கப்பட்டுவிடக் கூடாது: பழங்குடியின மக்கள், மற்றும், புதியதொரு சமுதாய ஒப்பந்தத்திற்கு அழைப்பு” என்ற தலைப்பில், ஆகஸ்ட் 09, வருகிற திங்களன்று, பழங்குடியினர் உலக நாள் கடைபிடிக்கப்படுகிறது.

1982ம் ஆண்டு, ஆகஸ்ட் 9ம் தேதி, ஐக்கிய நாடுகள் நிறுவனத்தின் பழங்குடி இன மக்கள் பற்றிய பணிக்குழு, தன் முதல் கூட்டத்தை கூட்டியது. 1994ம் ஆண்டு டிசம்பர் 23ம் தேதியன்று, பழங்குடியினர் உலக நாளை உருவாக்கிய ஐ.நா. நிறுவனத்தின் பொது அவை, அதே ஆகஸ்ட் 9ம் தேதியையே, பழங்குடியினர் உலக நாளாகவும் அறிவித்தது.

பழங்குடிகள்

உலகில் 90 நாடுகளில் வாழ்கின்ற பழங்குடியின மக்கள், உலக மக்கள் தொகையில் 6.2 விழுக்காடாகும். இம்மக்கள், தனிச்சிறப்புமிக்க பன்முகக் கலாச்சாரங்கள், மரபுகள், மொழிகள், அறிவு, மற்றும், தாங்கள் வாழ்கின்ற பூமியோடு சிறந்ததோர் உறவு ஆகியவற்றைக் கொண்டிருக்கின்றனர்.   

எண்ணற்ற பழங்குடியினத்தவர், பல்வேறு வடிவங்களில் தன்னாட்சி அமைப்புக்களை உருவாக்கி சிறப்பாக வாழ்ந்து வந்தாலும், அவர்களின் நிலப்பகுதி மற்றும் வளங்களின் மீது அதிகாரம் கொண்டிருக்கும் நடுவண் அரசுகளின் அதிகாரத்தின் கீழே அவர்கள் வாழவேண்டிய நிர்ப்பந்தம் ஏற்பட்டுள்ளது. (UN)


ராஜேந்திர சோழன்: இந்த தமிழ் மன்னன் அப்படி என்ன சாதித்துவிட்டார்? | Rajen...

Tamil Nadu Excavation Sites: தோண்ட தோண்ட கிடைக்கும் பழந்தமிழர் பொருட்...

தேனியிலும் ஒரு கீழடி||Keeladi agalvaraichi in tamil||keezhadi excavation...

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...