அதிகரித்து வரும் குழந்தைத் தொழிலாளர்கள் எண்ணிக்கை

குடும்ப வறுமையினால் அதிகரித்து வரும் குழந்தைத் தொழிலாளர்களின் எண்ணிக்கையைக் குறைக்க ஆரம்ப பள்ளியை விட்டு மாணவர்கள் வெளியேறுவதை அதாவது இடைநிற்றலைத் தவிர்க்க தேவையான நடவடிக்கைகள் மேற்கொள்ளப்பட வேண்டும்

மெரினா ராஜ் – வத்திக்கான்

உலகளவில் 7 முதல் 15 வயதுக்குட்பட்ட சிறார் ஏறக்குறைய 16 கோடி பேரும் இத்தாலியில் 3,36,000 சிறாரும் குழந்தைத் தொழிலில் ஈடுபட்டுள்ளனர் என்றும், 14 முதல் 15 வயதுக்குட்பட்டவர்களில் ஐந்தில் ஒருவர் குழந்தைத் தொழிலாளர்களாக இருக்கின்றனர் என்றும் கூறியுள்ளார் Save the Children அமைப்பின் இயக்குனர் Raffaela Milano.

ஜூன் 9 வெள்ளிக்கிழமை வெளியிடப்பட்ட அதன் அறிக்கையில் இவ்வாறு தெரிவித்துள்ள

Save the Children இத்தாலிய-ஐரோப்பிய செயல்பாடுகளுக்கான இயக்குனர் Raffaela Milano அவர்கள், 58 ஆயிரம் சிறாரின் பள்ளிப்படிப்பு மற்றும் மன நிலை இதனால் பாதிக்கப்டும் அபாயம் இருப்பதாகவும் தெரிவித்துள்ளார்.

குடும்ப வறுமையினால் அதிகரித்து வரும் குழந்தைத் தொழிலாளர்களின் எண்ணிக்கையைக் குறைக்க ஆரம்ப பள்ளியை விட்டு மாணவர்கள் வெளியேறுவதை அதாவது இடைநிற்றலைத் தவிர்க்கத் தேவையான நடவடிக்கைகள் மேற்கொள்ளப்பட வேண்டும் என்றும் வலியுறுத்தியுள்ளார் Raffaela.

போர், ஆயுத மோதல்கள், கோவிட்-19 பெருந்தொற்று, காலநிலை நெருக்கடி ஆகியவற்றின் தாக்கத்தை சமாளிக்க புலம்பெயர்ந்த குடும்பங்கள் மற்றும் வறுமையில் மூழ்கிய குடும்பங்களில் குழந்தைத் தொழிளாளர்களின் எண்ணிக்கை அதிகரித்துள்ளது என்றும், ஐரோப்பாவில் ஒரு வருடத்தில், 2,00,000 க்கும் அதிகமான பெண்கள், சிறுவர்கள் மற்றும் இளம் பருவத்தினர் வறுமையின் விளிம்பிற்கு தள்ளப்பட்டுள்ளனர் என்றும் எடுத்துரைத்துள்ளார் Raffaela.

ஜூன் 12 ஆம் நாள் திங்களன்று சிறப்பிக்கப்படவிருக்கும் 22ஆவது அனைத்துலக குழந்தை தொழிலாளர் எதிர்ப்பு நாளை முன்னிட்டு வெளியிடப்பட்ட இவ்வறிக்கையானது சிறாரின் எதிர்காலத்திற்கு உறுதி அளித்தல், குழந்தைப் பருவம் மற்றும் இளமைப் பருவத்தின் அடிப்படை உரிமை மீறல் குறித்த எச்சரிக்கையையும் எடுத்துரைத்துள்ளது.

ROBERT JOHN KENNEDY: புனித திருத்தந்தை 23ஆம் ஜான்

ROBERT JOHN KENNEDY: புனித திருத்தந்தை 23ஆம் ஜான்:   புனித திருத்தந்தை 23ஆம் ஜான் வயது முதிர்ந்தவராக இருந்தாலும், 23ம் ஜான்தான் அடுத்த திருத்தந்தையென பலர் எதிர்பார்த்தனர். ஏனெனில் அத்தேர்வில்...

 

எருசலேமில் கிறிஸ்தவர்களுக்கு எதிராக யூத ஆர்வலர்கள் வன்முறை!

எருசலேம் என்பது யூதம், கிறிஸ்தவம், இஸ்லாம் ஆகிய மூன்று மதங்களின் பகிரப்பட்ட புனித நகரமாகும் : Jerry Pillay

செல்வராஜ் சூசைமாணிக்கம் - வத்திக்கான்

மே 28, ஞாயிறன்று, எருசலேமில் நிகழ்ந்த நற்செய்தி அறிவிப்பு குறித்த கிறிஸ்தவ நிகழ்வுக்கு எதிராக தீவிர வலதுசாரி யூத ஆர்வலர்கள் நடத்திய வன்முறை எதிர்ப்பைக் கடுமையாகக் கண்டித்துள்ளது WCC எனப்படும் உலகத் திருச்சபைகள் அமைப்பு.

மே 30, இச்செவ்வாயன்று, இந்த வன்முறை எதிர்ப்புக் குறித்து கருத்துதெரிவித்துள்ள உலகத் திருச்சபைகளின்  (WCC) பொதுச் செயலாளர் Jerry Pillay அவர்கள், எருசலேம் மூன்று மதங்களின் பகிரப்பட்ட புனித நகரம் என்பதை உறுதிப்படுத்தியுள்ளதுடன், புனித பூமியில் கிறிஸ்தவர்களுக்கு எதிராக நிகழும் சகிப்புத்தன்மை மற்றும் துன்புறுத்தல் நடவடிக்கைகளில் இதுவும் ஒன்று என்று கவலை தெரிவித்துள்ளார்.

இச்சம்பவத்தின்போது 12-க்கும் மேற்பட்ட தீவிர வலதுசாரி யூத ஆர்வலர்கள் வழிபாட்டில் ஈடுபட்டிருந்த கிறிஸ்தவர்களை அவமதிக்கும் வகையில் நடந்துகொண்டனர் என்றும், அவர்கள்மீது மீது எச்சில் துப்பவும், சன்னல்களை அடித்து உடைத்து, அவர்களை வெளியேறும்படி கத்தவும் செய்னர் என்றும் விவரித்துள்ளார் Jerry Pillay.

மேலும் இந்த வன்முறை நிகழ்வின்போது, கிறிஸ்தவர்கள் வேண்டுமானால், தங்கள் ஆலயங்களில் இறைவேண்டல் செய்யட்டும், ஆனால், யூதர்களின் புனித இடமான எருசலேம் கோவிலின் தெற்கு நுழைவாயிலில் வழிபாடு நடத்தக்கூடாது என்றும் கூச்சலிட்டுக் கத்தியுள்ளனனர் யூத ஆர்வலர்கள் என்றும் செய்திகள் தெரிவிக்கின்றன.

இந்நிலையில் இவ்வன்முறை மற்றும் போராட்டத்தில் ஈடுபட்டவர்களில் 10 பேரை காவல் துறையினர் கைதுசெய்துள்ள வேளை, பிற யூத அமைப்புகள் உட்பட பலரும் இச்சம்பவத்தைக் கண்டித்துள்ளனர்.

 

புனித திருத்தந்தை 23ஆம் ஜான்

வயது முதிர்ந்தவராக இருந்தாலும், 23ம் ஜான்தான் அடுத்த திருத்தந்தையென பலர் எதிர்பார்த்தனர். ஏனெனில் அத்தேர்வில் பங்குபெற்ற 51 கர்தினால்களுள் 24 கர்தினால்கள் இவரைவிட வயதில் பெரியவர்கள்.

கிறிஸ்டோபர் பிரான்சிஸ் – வத்திக்கான்

கடவுளின் வழிகள் மிகவும் வித்தியாசமானவை. நாளை என்ன நடக்கும் என்று எவருக்கும் தெரியாது. நாம் எதிர்பார்ப்பது ஒன்று, நடப்பது ஒன்றாக இருக்கின்றது. அதுபோல்தான் திருத்தந்தை 23ம் ஜானின் வாழ்விலும் நடந்தது. வயதான காலத்தில், அதுவும் பெரிய பின்னணி இல்லாமல் திருத்தந்தையான இவர் என்ன செய்யப்போகிறார், அல்லது இவரால் என்ன செய்ய முடியும் என்ற எதிர்மறை எண்ணங்களே இவர் பொறுப்பேற்றபோது இருந்தது. ஆனால் அனைத்தையும் பொய்யாக்கினார் இத்திருத்தந்தை. திருஅவை ஓட்டத்தில் ஒரு புதிய பாதையைக் காட்டியது மட்டுமல்ல, திருத்தந்தையர்களிலேயே அதிக மக்களால் அன்பு கூறப்பட்டவராக நோக்கப்படுகிறார். திருத்தந்தை புனித இரண்டாம் ஜான் பவுலோ, அதிக நாடுகளுக்குப் பயணம் மேற்கொண்டு மக்களை சென்று பார்வையிட்டு மக்களால் அதிகம் அன்பு கூறப்பட்டவரானார். ஆனால் நம் திருத்தந்தை 23ஆம் ஜானோ, எந்த நாட்டுக்கும் பயணம் மேற்கொள்ளாமலேயே உரோம் நகரில் அமர்ந்துகொண்டே அனைவரையும் தன் அன்பாலும் கருணை உள்ளத்தாலும் கவர்ந்தார். இவர் 1881ஆம் ஆண்டு வடஇத்தாலியின் பெர்கமோ என்னும் பகுதியைச் சார்ந்த சொத்தோ இல் மோந்தே எனும் கிராமத்தில் ஓர் ஏழைக்குடும்பத்தில் 13 குழந்தைகளுள் நான்காவதாகப் பிறந்தார். இவரின் இயற்பெயர் ஆஞ்செலோ ஜூசேப்பே ரொங்காலி. இறையியல் படிப்பை முடித்து, 1904ஆம் ஆண்டு ஆகஸ்ட் மாதம் அருள்பணியாளராக திருநிலைப்படுத்தப்பட்ட இவர், பெர்கமோ மறைமாவட்ட ஆயரின் செயலராகப் பணியாற்றினார். அதே சமயம் பெர்கமோ குருமடத்தில் திருஅவை வரலாறு கற்பித்தார். முதலாம் உலகப்போர் காலத்தில் இராணுவத்தில் ஆன்மிக குருவாக சேவையாற்றினார். 1921ஆம் ஆண்டு திருத்தந்தை 15ஆம் பெனடிக்ட் அவர்கள், இவரை விசுவாசப் பரப்புதல் அவையின் இத்தாலிய தேசிய இயக்குனராக நியமித்தார்.

  திருத்தந்தை 23ஆம் ஜான், அருள்பணியாளராக இருந்தபோது வரலாற்றில் மிகுந்த ஆர்வமுடையவராக இருந்தார். மிலான் நூலகத்தில் இவர் ஆய்வுகளைச் செய்து கொண்டிருந்தபோது, அந்த நூலக பொறுப்பாளர் Ambrogio Damiano Achille Ratti பின்னாளில் திருத்தந்தை 11ஆம் பயஸ் ஆனார். திருத்தந்தை 11ஆம் பயஸ் திருஅவையின் இவ்வுலகத் தலைவராக பதவியேற்றபின், அருள்பணியாளர் ரொங்காலியை அதாவது பின்னாள் திருத்தந்தை 23ம் ஜானை, பேராயராக உயர்த்தி திருப்பீட வெளியுறவுத்துறைப் பணியில் புகுத்தினார். பேராயர் ரொங்காலியும் பல்கேரியா, துருக்கி, கிரேக்கம் ஆகியவைகளில் பணியாற்றினார். தன் பணிக்காலத்தின்போது ஏனைய கிறிஸ்தவ சபைகளுடன் நல்லுறவை வளர்த்துக்கொண்டார். பிரான்சிலும் திருப்பீடப் பிரதிநிதியாக சேவையாற்றியுள்ள இவரை 1953ஆம் ஆண்டு கர்தினாலாக உயர்த்தி, வெனிஸ் நகரின் முதுபெரும் தலைவராகவும் அறிவித்தார் திருத்தந்தை 12ஆம் பயஸ். 1958ஆம் ஆண்டு அக்டோபர் 9ஆம் தேதி திருத்தந்தை 12ஆம் பயஸ் உயிரிழந்தபின், அடுத்த திருத்தந்தையை தேர்ந்தெடுக்க 51 கர்தினால்கள் கூடினர். கம்யூனிச அரசுகள் அனுமதிக்காததால்  இரு கர்தினால்கள் வரமுடியவில்லை. 77 வயதை நெருங்கிக் கொண்டிருந்தாலும், மிகவும் நகைச்சுவையாக உயிர்த்துடிப்புடன் உரையாடும் கர்தினால் ரொங்காலியும் இத்திருத்தந்தை தேர்வில் கலந்துகொண்டார்.

   வயது முதிர்ந்தவராக இருந்தாலும், இவர்தான் அடுத்த திருத்தந்தையென பலர் எதிர்பார்த்தனர். ஏனெனில் அத்தேர்வில் பங்குபெற்ற 51 கர்தினால்களுள் 24 கர்தினால்கள் இவரைவிட வயதில் பெரியவர்கள். திருத்தந்தை 23ம் ஜான், வத்திக்கான் வெளியுறவுத்துறையில் பணியாற்றியுள்ளார். ஏழைக்குடும்பத்தில் பிறந்து ஏழைகளின் துயர் உணர்ந்தவர். பிரெஞ்ச், பல்கேரியன், ருஷ்யம், துருக்கியம், கிரேக்கம் ஆகிய மொழிகள் அவருக்குத் தெரியும். ஆன்மீகப் பலமும் பிறரன்பும் அவரின் சிறப்பு பண்புகளாக இருந்தன. ஆகவே இவர்தான் வருவார் என்ற பலரின் எதிர்பார்ப்பு பொய்க்கவில்லை. கீழை வழிபாட்டுமுறை, மற்றும் மேற்கத்திய திருஅவைகளை மட்டுமல்ல, அனைத்து மக்களையும் அணைத்துச் செல்பவராக திருத்தந்தை 23ஆம் ஜான் இருந்தார். அனைத்துப் பிரிவினரையும் இணைத்துக் கொண்டுவரும் பாலமாக அவர் இருந்தார். அக்டோபர் 28ஆம் தேதி 1958ஆம் ஆண்டு இவர் தேர்வு செய்யப்பட்டபோது 23ஆம் ஜான் என்ற பெயரை எடுத்துக்கொண்டார்.

ஜான் என்ற பெயரை எடுத்துக் கொண்டோமானால் பல ஆச்சரியங்கள் சூழ்ந்திருக்கும். 23ஆம் ஜான் என்ற பெயரில்  ஏற்கனவே ஓர் எதிர் திருத்தந்தை, 1400ஆம் ஆண்டு முதல் 1415 வரை திருத்தந்தையர்கள் 9ஆம் பொனிபாஸ், ஏழாம் இன்னசென்ட், 12ஆம் கிரகரி ஆகியோரை எதிர்த்து தன்னையே திருத்தந்தையாக அறிவித்து நடந்துள்ளார். அது மட்டுமல்ல, திருத்தந்தையர் வரலாற்றில் 20ஆம் ஜான் என்று ஒரு திருத்தந்தையே இல்லை. இப்பெயரை யாரும் பயன்படுத்தவில்லை. மேலும் ஜான் என்ற பெயர்தான் அதிக திருத்தந்தையர்களால் எடுத்துக் கொள்ளப்பட்ட பெயர். யேசுவுக்கு நெருக்கமாயிருந்தவர்களுள் திருமுழுக்கு ஜானும், நற்செய்தியாளர் ஜானும் முக்கியமானவர்கள் என்பது காரணமாக இருக்கலாம்.

இயேசுவுக்கு நெருக்கமாக இருந்தவர்களுள் இரு ஜான் முக்கியமானவர்கள், மற்றும் இப்பெயரே அதிக அளவில் திருத்தந்தையர்களால் தேர்வு செய்யப்பட்டுள்ளது என்பதை நம் திருத்தந்தை 23ம் ஜானும் காரணமாகக் கூறினார். அதேவேளை, சில வரலாற்று ஆசிரியர்கள், திருத்தந்தை 23ஆம் ஜானின் தந்தையின் பெயரும் ஜான், திருத்தந்தை திருமுழுக்குப் பெற்ற கோவிலும் புனித ஜானுக்கு அர்ப்பணிக்கப்பட்டுள்ளது என கூறுகின்றனர். இவர் பொறுப்பேற்று, தூய பேதுரு பெருங்கோவில் முகப்பில் தோன்றியபோது மக்களின் ஆரவாரம் வானைப் பிளந்தது என்கின்றனர். இவரின் முதல் ஆசீர்வாதம் வரலாற்றிலேயே முதன்முறையாக தொலைக்காட்சிவழி ஒளிபரப்புச் செய்யப்பட்டது. புனித சார்லஸ் பொரொமேயோவால் அதிகம் கவரப்பட்டிருந்த இந்த திருத்தந்தை,  அப்புனிதரின் திருவிழாவான நவம்பர் 4ஆம் தேதி பதவியேற்றுக் கொண்டார். தன் முடிசூட்டு விழாவில், பாரம்பரிய வழக்கு முறையில் இருந்து விலகி, இவரே மறையுரையை வழங்கினார். தான் ஒரு நல்ல ஆயனாக செயல்பட விரும்புகிறேன் என்பதை வலியுறுத்திக் கூறினார். அந்த ஆண்டு, அதாவது 1958ஆம் ஆண்டு கிறிஸ்து பிறப்பு விழாவின்போது உரோம் நகரின் சிறைகளைச் சென்று பார்வையிட்டார். சிறைக்கைதிகளோடு உரையாடினார். இந்த பழக்கம் 1870ம் ஆண்டு உரோம் நகர் ஆக்கிரமிக்கப்படும் வரை திருத்தந்தையர்களால் பின்பற்றப்பட்டுவந்த ஒன்றுதான். அப்பழக்கத்திற்கு இத்திருத்தந்தை உயிர்கொடுத்தார். மருத்துவமனைகளுக்குச் சென்று நோயாளிகளைச் சந்தித்தார். புனித வியாழன் வழிபாட்டின்போது இவரே கீழிறங்கிவந்து, இயேசு ஆற்றியதன் நினைவாக, பன்னிருவரின் கால்களைக் கழுவினார். புனித வெள்ளி சிலுவைப்பாதையில் மக்களோடு நடந்து சென்றார். 

  நேயர்களே! இத்திருத்தந்தை 23ஆம் ஜான் புகுத்திய நல்வழிகளைத்தான், பின்னர் வந்த திருத்தந்தை 2ஆம் ஜான் பால் பின்பற்றினார் என்கின்றனர் வல்லுனர்கள். இத்திருத்தந்தை 23ஆம் ஜான் பற்றிப் பேசவேண்டுமானால், நாட்கள் போதாது. அவரின் நிர்வாக மற்றும் பிறரன்புப் பணிகள் குறித்து நம் அடுத்த வார நிகழ்ச்சியில் நோக்குவோம்.

 

இந்தியாவின் ஜபல்பூர் ஆயர்மீது மதமாற்ற குற்றச்சாட்டு!

மத்தியப் பிரதேச மாநிலம் கட்னி மாவட்டத்தில் உள்ள ஆதரவற்றோர் இல்லத்தை ஜபல்பூர் மறைமாவட்டம் நிர்வகித்து வருவதால், இந்த வழக்கில் ஆயரின் பெயர் சேர்க்கப்பட்டுள்ளது.

செல்வராஜ் சூசைமாணிக்கம் - வத்திக்கான்

இந்தியாவின் ஜபல்பூர் கத்தோலிக்கத் தலத்திருஅவை நடத்திவரும் ஆதரவற்றோர்  இல்லமொன்றில் மதமாற்றம் நிகழ்ந்ததாகக் கூறி அம்மறைமாவட்ட ஆயர் Gerald Almeida மீது வழக்குத் தொடுக்கப்பட்டுள்ளதாக யூக்கான் செய்தி நிறுவனம் தெரிவித்துள்ளது.

தேசிய குழந்தைகள் உரிமைகள் பாதுகாப்பு ஆணையத்தின் (NCPCR) தலைவர் Priyank Kanoongo மே 30, இச்செவ்வாயன்று, இந்த வழக்கைத் தொடுத்துள்ள வேளை, அவ்வாதரவற்றோர் இல்லத்தின் நிர்வாகம் இந்து குழந்தைகளை கிறிஸ்தவ மதத்திற்கு மாற்ற முயற்சிப்பதாக அவ்வழக்கில் குற்றம் சுமத்தியுள்ளார் என்றும் அச்செய்தி நிறுவனம் மேலும் தெரிவிக்கிறது.

மத்தியப்பிரதேச மாநிலத்தின் கட்னி மாவட்டத்திலுள்ள இந்த ஆதரவற்றோர் இல்லத்தை ஜபல்பூர் மறைமாவட்டம் நிர்வகித்து வருவதால், இந்த வழக்கில் ஆயரின் பெயரை Kanoongo சேர்த்துள்ளதாகவும் அச்செய்திக் கூறியுள்ளது.

இதுபற்றி கருத்துத் தெரிவித்த இவ்வாதரவற்றோர் இல்லத்தில் பணிபுரிந்து வருபவரும், கார்மேல் அன்னை சபையைச் சேர்ந்தவருமான அருள்சகோதரி ஸ்டெல்லா அவர்கள், "இது முற்றிலும் ஆதாரமற்ற மற்றும் தவறான குற்றச்சாட்டு" என்று யூக்கான் செய்தியிடம் தெரிவித்துள்ளார்.

இக்குற்றச்சாட்டு இந்த ஆதரவற்றோர் இல்லத்தின் நன்மதிப்பைக் கெடுக்கும் வகையில் முன் திட்டமிடப்பட்ட நடவடிக்கையைத் தவிர வேறில்லை என்றும், இந்திய இரயில்வே அதிகாரிகளின் வேண்டுகோளுக்கு இணங்க, 2005-ஆம் ஆண்டு முதல் இந்த மையம் அனைத்து அரசு விதிகளுக்கும் உட்பட்டே செயல்பட்டு வருகிறது என்றும் உரைத்துள்ளார் அருள்சகோதரி ஸ்டெல்லா.

இந்த ஆதரவற்றோர் இல்லம் இப்பகுதியிலுள்ள இரயில் நிலையங்களில் இருந்து மீட்கப்பட்ட 47 குழந்தைகளைக் கவனித்து வருகிறது. மேலும் இங்குதான் அண்மையில் தேசிய குழந்தைகள் உரிமைகள் பாதுகாப்பு ஆணையம் ஆய்வு நடத்தியது. (UCAN)

 

உணவை வீணாக்குவது தவிர்க்கப்பட வேண்டும்

உலகத் தலைவர்கள் உலகளாவிய பட்டினியை அதிகரிக்கச் செய்யும் கொள்கைகளை மறுபரிசீலனை செய்ய வேண்டும் பன்னாட்டுக் காரித்தாஸ் அமைப்பு.

மெரினா ராஜ் - வத்திக்கான்

உணவை வீணாக்குதல், பசியை ஒழித்தல் போன்றவற்றில் நிலையான தீர்வுகளைச் செயல்படுத்த வேண்டுமென்று உலக பசி மற்றும் பட்டினி நாளுக்காக அழைப்பு விடுத்துள்ளது பன்னாட்டுக் காரித்தாஸ் அமைப்பு.

மே 28 ஞாயிற்றுக்கிழமை சிறப்பிக்கப்பட உள்ள உலக பசி மற்றும் பட்டினி நாளை முன்னிட்டு பசி, பட்டினியை முடிவுக்குக் கொண்டு வரவும், நிலையான விவசாயம் மற்றும் உணவு உற்பத்தியை ஊக்குவிக்கவும் வலியுறுத்தியுள்ளது பன்னாட்டுக் காரித்தாஸ் அமைப்பு.

உணவை வீணாக்குவது தவிர்க்கப்பட வேண்டும் எனவும், உள்ளூர் உணவு முறைகள் ஆதரிக்கப்பட வேண்டும் என்று வலியுறுத்தும் பன்னாட்டு காரித்தாஸ் அமைப்பு, இந்நடவடிக்கைகள் பசியை எதிர்த்துப் போராட உதவுவதோடு மட்டுமல்லாமல், எதிர்கால சந்ததியினருக்காக பூமியைப் பாதுகாக்கும் வழிமுறையாக இருக்கும் என்றும் தெரிவித்துள்ளது.

போர் மற்றும் கோவிட் பெருந்தொற்று பாதிப்புக்களால் அதிகரித்து வரும் வாழ்க்கைச் செலவுகள் காரணமாக இலட்சக் கணக்கான மக்கள் ஆரோக்கியமான உணவைப் போதுமான அளவு பெற முடியாமல் துன்புறுகின்றனர் என்று  எடுத்துரைத்துள்ள காரித்தாஸ் அமைப்பு, நிலையான விவசாய நடைமுறைகள், காலநிலை மாற்றத்திற்கு ஏற்ப திறனை உருவாக்குதல், உலகத் தலைவர்கள் உலகளாவிய பட்டினியை அதிகரிக்கச் செய்யும் கொள்கைகள் போன்றவற்றை மறுபரிசீலனை செய்யவும் வலியுறுத்தியுள்ளது.

மைசூரில் இருந்து தமிழகம் வரும் 66,000 தமிழ்க் கல்வெட்டு படிகள்... வரலாறு...