திரிகடுகம்

அச்சத்தைத் தவிர்த்து அறிவையும் திறமையையும் துணிவுடன் வெளிப்படுத்தி, அவற்றை நன்மைக்காகப் பயன்படுத்த வேண்டும் என்பதை திரிகடுகம் உணர்த்துகிறது. நமது கனவுகள் வெறும் கனவுகளாக இல்லாமல், அறிவுடனும் துணிச்சலுடனும் செயல்பட்டு பொது நன்மைக்கான சாதனைகளாக மாறட்டும்.

அருட்பணி. செ. ரெ. வெனி இளங்குமரன்

அச்சத்தைத் தவிர்த்து அறிவை வெளிப்படுத்துவோம்

திரிகடுகத்தில் இணைந்திருக்கும் உங்கள் ஒவ்வொருவருக்கும் எனது நன்றியும் வாழ்த்துகளும். இன்று நாம் திரிகடுகத்தின் ஏழாம் செய்யுளில் இடம்பெறும் மூன்றாவது கருத்தைப் பார்க்கவிருக்கிறோம்.

“வாளை மீன் உள்ளல் தலைப்படலும், ஆள் அல்லான் செல்வக் குடியுள் பிறத்தலும், பல் அவையுள் அஞ்சுவான் கற்ற அருநூலும் – இம்மூன்றும் துஞ்சு ஊமன் கண்ட கனவு.”

வாளை மீனைப் பிடிக்க இயலாத ஒருவர் அதைப் பிடிப்பதாகக் கனவு காண்பதும், தகுதியற்ற ஒருவர் செல்வச் சிறப்புமிக்க குடும்பத்தில் பிறப்பதாகக் கனவு காண்பதும், அறிஞர்கள் கூடிய அவையில் பேசுவதற்கு அஞ்சுகின்ற ஒருவர் அரிய நூல்களைக் கற்று அறிவைப் பெற்றதாகக் கனவு காண்பதும் — இம்மூன்றும் தூங்கும் ஊமை காணும் கனவைப் போன்றவை என்று இச்செய்யுள் கூறுகிறது.

நல்ல அறிஞர்களும் புலவர்களும் சான்றோர்களும் கூடிய அவையில் தான் கற்ற நூல்களின் கருத்துகளை எடுத்துரைக்கத் துணிவில்லாத ஒருவர், எவ்வளவு அரிய நூல்களைக் கற்றிருந்தாலும், அந்த அறிவு முழுமையான பயனைத் தராது.

அறிவைப் பெறுவது மட்டுமல்ல; பெற்ற அறிவைத் தேவையான இடத்தில் துணிவுடன் வெளிப்படுத்தவும் தெரிந்திருக்க வேண்டும். திருவள்ளுவர்,
“மண்ணுயிர் ஓம்பி அருளாள்வார்க்கு இல்லென்ப
தன்னுயிர் அஞ்சும் வினை”
என்று கூறுகிறார்.

இந்த உலகில் உள்ள உயிர்கள் அனைத்தும் நலமாக வாழ வேண்டும் என்று கருதுகின்ற ஒருவருக்கு, தன்னுடைய உயிரைப் பற்றிய அச்சம் இருக்காது. அத்தகையவரே உண்மையான அறிவுடையவர்.

அதனால்தான்,
“அச்சம் என்பது மடமையடா;
அஞ்சாமை தமிழரின் உடமையடா”
என்று நாம் பாடுகிறோம்.

அஞ்சாமை என்பது துணிச்சல் மட்டுமல்ல; நம்மிடம் உள்ள அறிவையும் திறமையையும் நன்மைக்காகப் பயன்படுத்தும் பண்பாகும்.

இதற்கு பகத்சிங் ஓர் எடுத்துக்காட்டு. தூக்குத் தண்டனை நிறைவேற்றப்படுவதற்கு சில நிமிடங்களே இருந்தபோதும், அவர் அச்சமின்றி லெனினின் வாழ்க்கை வரலாற்றைப் படித்துக் கொண்டிருந்தார் என்று கூறப்படுகிறது. உயிர் ஒருநாள் போகத்தான் போகிறது; ஆனால் அது ஒரு உயரிய நோக்கத்திற்காகப் பயன்படுத்தப்பட வேண்டும் என்ற துணிச்சல் அவரிடம் இருந்தது.

அதேபோல், அறிவுடையவர்கள் கூடிய அவையில் பேசுவதற்கும், தாம் கற்றவற்றைப் பகிர்ந்து கொள்வதற்கும் நாம் அஞ்சக்கூடாது. அறிவைப் பெற்றிருப்பதற்கான உண்மையான சான்று, அதைத் தேவையான நேரத்தில் நல்ல முறையில் பயன்படுத்துவதில்தான் இருக்கிறது.

திரிகடுகம் கூறும் இந்த மூன்று எடுத்துக்காட்டுகளும் நமக்கு ஒரு முக்கியமான பாடத்தைத் தருகின்றன. நம்முடைய கனவுகள் வெறும் கனவுகளாக இருக்காமல், அவை செயல்களாக மாற வேண்டும். ஆற்றலும் அறிவும் இல்லாமல் பெரிய சாதனைகளைச் செய்வேன் என்று நினைப்பதும் வெறும் கனவாகிவிடும். அதுபோல, அறிவைப் பெற்றிருந்தும் அதை வெளிப்படுத்தத் துணிவில்லாமல் இருப்பதும் பயனற்றதாகிவிடும். எனவே, அச்சத்தைத் தவிர்த்து, நம்மிடம் உள்ள அறிவையும் ஆற்றலையும் நல்ல நோக்கத்திற்காகப் பயன்படுத்துவோம். நம்முடைய கனவுகள் தனிப்பட்ட விருப்பங்களுக்காக மட்டுமல்லாமல், பொது நன்மையை நோக்கிய கனவுகளாகவும், அவற்றை நனவாக்கும் செயல்களாகவும் அமையட்டும்.

இன்றைய பகுதியில் நாம் அறிந்துகொள்ள வேண்டிய மற்றொரு சொல் “வல்லுநர்”.

“வல்லுநர்” என்பது தமிழ்ச்சொல் அல்ல. தமிழில் அதற்குப் பதிலாக “புலவர்”, “அறிஞர்” போன்ற சொற்களைப் பயன்படுத்தலாம். எனவே, நம் மொழியின் சிறப்பைக் காக்கும் வகையில் பொருத்தமான தமிழ்ச் சொற்களைப் பயன்படுத்துவோம். பொய்யான, பயனற்ற கனவுகளை விடுத்து, உயரிய நோக்கங்களைக் கொண்ட கனவுகளைக் காண்போம். அந்தக் கனவுகளை நனவாக்க அறிவுடனும் துணிச்சலுடனும் செயல்படுவோம். நம்மை உயர்ந்த மனிதர்களாக வாழ அழைக்கும் இந்த திரிகடுக மருந்தை ஏற்று, சுவைத்து, நம் வாழ்வில் செயல்படுத்துவோம்.