Wednesday, 29 August 2012

robert john kennedy: Catholic News in Tamil - 28/08/12

robert john kennedy: Catholic News in Tamil - 28/08/12: 1.திருத்தந்தை , இத்தாலியப் பிரதமர் சந்திப்பு 2. வெனெசுவேலா எண்ணெய் ஆலை தீ விபத்தில் பலியானவர்களுக்கு திருத்தந்தை அனுதாபம் 3. எண்ண...

Catholic News in Tamil - 28/08/12


1.திருத்தந்தை, இத்தாலியப் பிரதமர் சந்திப்பு

2. வெனெசுவேலா எண்ணெய் ஆலை தீ விபத்தில் பலியானவர்களுக்கு திருத்தந்தை அனுதாபம்

3. எண்ணெய்ச் சுத்திகரிப்பு ஆலை தீ விபத்து குறித்து வெனெசுவேலா ஆயர்கள் வேதனை

4. அயர்லாந்தில் கருக்கலைப்புக்கு எதிராகச் செயல்பட முதுபெரும் தலைவர் உறுதி

5. அலெப்போ கத்தோலிக்கப் பேராயர் லெபனனில் தஞ்சம்

6. இரஷ்ய ஆர்த்தடாக்ஸ் சபையுடன் முழு ஒப்புரவு ஏற்படுத்துவதற்குப் போலந்து ஆயர்கள் தீவிரம்

7. புனே ஆயர் : வடகிழக்கு இந்தியர்களுக்கு எதிராக நடந்துவரும் தாக்குதல்கள் அர்த்தமற்றவை

8. சிறிய ஆயுதங்கள் சட்டத்துக்குப் புறம்பே வியாபாரம் செய்யப்படுவதைத் தடை செய்ய ஐ.நா.பொதுச் செயலர் வலியுறுத்தல்

9. பாகிஸ்தானில் தேவநிந்தனைக் குற்றம் சாட்டப்பட்டுள்ள Rimsha Masih 14 வயது நிரம்பியவள் : மருத்துவ ஆய்வு

------------------------------------------------------------------------------------------------------

1.திருத்தந்தை, இத்தாலியப் பிரதமர் சந்திப்பு

ஆக.28,2012. பாப்பிறைகளின் கோடை விடுமுறை இல்லமான காஸ்தெல் கந்தோல்ஃபோவில் இத்தாலியப் பிரதமர் Mario Montiயை இத்திங்கள் மாலை சந்தித்துப் பேசினார் திருத்தந்தை 16ம் பெனடிக்ட்
ஏறத்தாழ 45 நிமிடங்கள் இடம்பெற்ற இச்சந்திப்பில் ஐரோப்பிய சமுதாய அவை எதிர்நோக்கும் சவால்கள், குறிப்பாக, ஐரோப்பாவின் தற்போதைய நிலைமை குறித்தும், ஐரோப்பியர்கள், குறிப்பாக இளைய தலைமுறைகள், அக்கண்டத்தின் மனித மற்றும் ஆன்மீக வளர்ச்சிக்கு எவ்விதத்தில் உதவ முடியும் என்பது குறித்தும் பேசப்பட்டதாகத் திருப்பீட பத்திரிகை அலுவலகம் அறிவித்தது.
தற்போது கடன் நெருக்கடியிலுள்ள இத்தாலியை ஆட்சி செய்வதற்காகக் கடந்த நவம்பரில் அரசுத்தலைவர் Giorgio Napolitano அமைத்த புதிய அரசின் பிரதமரான Monti, கடந்த நவம்பரிலிருந்து பல தடவைகள் திருத்தந்தையைச் சந்தித்துப் பேசியுள்ளார் என்பது குறிப்பிடத்தக்கது.
தற்போதைய ஐரோப்பிய நெருக்கடிகள் குறித்து பெர்லினில் ஜெர்மன் Chancellor Angela Merkelஐ இப்புதனன்று சந்திக்கும் Monti, வருகிற செப்டம்பர் 4ம் தேதி உரோமையில் ப்ரெஞ்ச் அரசுத்தலைவர் Francois Hollandeயையும்  சந்திக்கவுள்ளார்.

2. வெனெசுவேலா எண்ணெய் ஆலை தீ விபத்தில் பலியானவர்களுக்கு திருத்தந்தை அனுதாபம்
ஆக.28,2012. வெனெசுவேலா நாட்டின் மிகப் பெரிய எண்ணெய்ச் சுத்திகரிப்பு ஆலையில் ஏற்பட்ட தீ விபத்தில் பலியானவர்கள் மற்றும் காயம்பட்டவர்களின் குடும்பங்களுக்குத் தனது ஆழ்ந்த அனுதாபங்களைத் தெரிவித்துள்ளார் திருத்தந்தை 16ம் பெனடிக்ட்.
திருத்தந்தையின் பெயரில் திருப்பீடச் செயலர் கர்தினால் தர்ச்சிசியோ பெர்த்தோனே, வெனெசுவேலா நாட்டு ஆயர் பேரவைத் தலைவர் பேராயர் Diego Rafael Padron Sanchezக்கு அனுப்பியுள்ள அனுதாபச் செய்தியில் இவ்வாறு கூறப்பட்டுள்ளது.
இந்தப் பேரிடரில் பாதிக்கப்பட்டுள்ள அந்நாட்டு மக்களுடன் திருத்தந்தை ஆன்மீகரீதியில் ஒருமைப்பாட்டுணர்வு கொள்வதாகவும் அச்செய்தியில் தெரிவிக்கப்பட்டுள்ளது.
வெனெசுவேலாவின் வடமேற்கிலுள்ள Falcón மாநிலத்தின் Amuay எண்ணெய் சுத்திகரிப்பு ஆலையில் இம்மாதம் 25ம் தேதி அதிகாலை ஏற்பட்ட எரிவாயுக் கசிவால் தீப் பற்றிக் கொண்டது. இச்செவ்வாய் காலை நிலவரத்தின்படி இத்தீ விபத்தில் 3 சிறார் உட்பட 48 பேர் இறந்துள்ளனர் மற்றும் 80க்கும் அதிகமானோர் காயமுற்றுள்ளனர்.
கொளுந்து விட்டெரியும் தீயை அணைப்பதற்குத் தீயணைப்புப் படையினர் கடுமையாய் முயற்சித்துவரும்வேளை, அந்த ஆலை இச்செவ்வாயன்று நான்காவது நாளாகத் தொடர்ந்து எரிந்து கொண்டிருக்கின்றது என்று ஊடகங்கள் கூறுகின்றன. 
இந்த Amuay ஆலை உலகின் மிகப்பெரிய எண்ணெய்ச் சுத்திகரிப்பு ஆலைகளுள் ஒன்றாகும். இந்தத் தீ விபத்தில் 209 வீடுகள், 11 கடைகள் எரிந்து நாசமாயின. 13 குடும்பத்தினரின் வீடுகள் முற்றிலும் தரைமட்டமாயின.

3. எண்ணெய்ச் சுத்திகரிப்பு ஆலை தீ விபத்து குறித்து வெனெசுவேலா ஆயர்கள் வேதனை

ஆக.28,2012. வெனெசுவேலா நாட்டின் எண்ணெய்ச் சுத்திகரிப்பு ஆலையில் ஏற்பட்ட தீ விபத்து குறித்து மிகுந்த மனவேதனை அடைந்துள்ள வெனெசுவேலா ஆயர்கள் துயருறும் மக்களுடன் தங்களது ஆழ்ந்த அனுதாபங்களையும் செபங்களையும் பகிர்ந்து கொண்டுள்ளனர். 
மேலும், அந்நாட்டில் 3 நாள்களுக்கு தேசிய துக்க தினத்தைக் கடைப்பிடிக்குமாறு நாட்டு மக்களைக் கேட்டுக்கொண்டுள்ளார் அரசுத் தலைவர் Hugo Chavez.
நல்லவேளையாக இந்தக் கொடூரமான சம்பவம் கட்டுப்படுத்தப்பட்டு விட்டது' என்று கூறியுள்ள அரசுத் தலைவர், இந்த விபத்துக்கான காரணம் குறித்து விரிவான விசாரணைக்கும் உத்தரவிட்டுள்ளார்.
வெனெசுவேலாவில் 40 இலட்சம் பீப்பாய் எரிவாயும் பெட்ரோலியமும் சேமிப்பில் இருப்பதாகவும், தொடர்ந்து ஒரு நாளைக்கு 7,35,000 பீப்பாய்கள் வீதம் இவை உற்பத்தி செய்யப்படுவதாகவும் கூறப்படுகின்றது.
வெனெசுவேலாவின் எண்ணெய்த்துறை அமைச்சர் இரஃபேல் ரமிரெஸ் செய்தியாளர்களிடம் பேசியபோது, ஆலையில் உள்ள ஒரு குழாயில் ஏற்பட்ட எரிவாயுக் கசிவால் தீ விபத்து ஏற்பட்டதாகக் குறிப்பிட்டார்.

4. அயர்லாந்தில் கருக்கலைப்புக்கு எதிராகச் செயல்பட முதுபெரும் தலைவர் உறுதி

ஆக.28,2012. அயர்லாந்து நாட்டில் கருக்கலைப்பைச் சட்டரீதியாக அங்கீகரிப்பதற்கு எடுக்கப்படும் எந்த முயற்சியும் மிகத் தீவிரமாகவும் மக்கள் புரிந்து கொள்ளக்கூடிய விதத்திலும் எதிர்க்கப்படும் என்று அனைத்து அயர்லாந்துக்குமான கத்தோலிக்க முதுபெரும் தலைவர் உறுதியளித்துள்ளார்.
ஐரோப்பிய நீதிமன்றத்தின் 2010ம் ஆண்டின் தீர்ப்புக்கு ஒத்திணங்கிச் செல்லும் வகையில் அயர்லாந்தின் கருக்கலைப்புச் சட்டத்தில் மாற்றம் கொண்டுவருவதற்கு அந்நாட்டு அரசுக்கு எந்தவிதத் தேவையும் ஏற்படவில்லையென முதுபெரும் தலைவர் கர்தினால் Sean Brady கூறினார்.
கருக்கலைப்பைத் தடை செய்வதற்கு அயர்லாந்து அரசுக்கு இருக்கும் அதிகாரத்தை நீதிமன்றம் ஏற்றுக் கொண்டுள்ளதையும் கர்தினால் சுட்டிக் காட்டியுள்ளார்.   
கருக்கலைப்பு குறித்து பொதுவான விவாதம் இடம்பெறும்போது கத்தோலிக்கர்கள் கருக்கலைப்புக்கு எதிரானத் தங்கள் குரல்களைத் துணிவுடன் எழுப்புமாறும் அவர் கேட்டுக் கொண்டுள்ளார்.
                                                                         
5. அலெப்போ கத்தோலிக்கப் பேராயர் லெபனனில் தஞ்சம்

ஆக.28,2012. சிரியா நாட்டு அலெப்போ மெல்கித்தே கத்தோலிக்கப் பேராயர் Jean-Clement Jeanbartன் இல்லம் புரட்சியாளர்களால் சூறையாடப்பட்டதையடுத்து அப்பேராயர் லெபனன் நாட்டில் அடைக்கலம் தேடியுள்ளார் என வத்திக்கானின் பீதெஸ் செய்தி நிறுவனம் அறிவித்தது.
அலெப்போ மாரனைட்ரீதி கத்தோலிக்கப் பேராயர் இல்லத்தின் அலுவலகங்கள், Byzantine கிறிஸ்தவ அருங்காட்சியகம் ஆகியவையும் புரட்சியாளர்களால் சேதப்படுத்தப்பட்டுள்ளதாக அச்செய்தி நிறுவனம் கூறியது.
புரட்சியாளர்களின் இந்த அட்டூழியங்கள் குறித்துக் கண்டனம் தெரிவித்த சிரியா நாட்டுத் தலத்திருஅவையின் பேச்சாளர் ஒருவர், இந்தப் புரட்சியாளர்கள் சமயப் போர் தொடங்குவதற்கு விரும்புவதாகவும், சிரியா மக்களை வகுப்புவாத மோதல்களுக்குள் இட்டுச் செல்வதாகவும் குற்றம் சாட்டினார்.
மேலும், சிரியாவில் தொடர்ந்து இடம்பெற்றுவரும் கடும் சண்டையினால், அந்நாட்டின் இரண்டு இலட்சத்துக்கு மேற்பட்ட அகதிகள், துருக்கி, லெபனன், ஜோர்டன் மற்றும் ஈராக் நாடுகளில் அடைக்கலம் தேடியுள்ளனர் என ஆசியச் செய்தி நிறுவனம் கூறியது.



6. இரஷ்ய ஆர்த்தடாக்ஸ் சபையுடன் முழு ஒப்புரவு ஏற்படுத்துவதற்குப் போலந்து ஆயர்கள் தீவிரம்

ஆக.28,2012. இரஷ்ய ஆர்த்தடாக்ஸ் சபையுடன் முழு ஒப்புரவு ஏற்படுத்தும் நோக்கத்தில் பெரியதொரு திட்டம் வகுத்து வருகின்றனர் போலந்து கத்தோலிக்க ஆயர்கள்.
இரஷ்ய ஆர்த்தடாக்ஸ் சபைக்கும், போலந்து தலத்திருஅவைக்கும் இடையே ஒப்புரவு ஏற்படுவது குறித்து அவ்விரு திருஅவைத் தலைவர்கள் இணைந்து இம்மாதத்தில் கையெழுத்திட்ட முழு அறிக்கையும் போலந்தின் அனைத்துப் பங்குகளிலும் திருப்பலியின்போது வாசிக்கப்பட வேண்டுமென போலந்து ஆயர்கள் வேண்டுகோள் விடுத்துள்ளனர்.
போலந்தின் பாதுகாவலியாகிய Czestochowa அன்னைமரி விழாவை இவ்வார இறுதியில் சிறப்பிக்கும்போது, இந்தத் தங்களது ஆவலை அன்னைமரியிடம் அர்ப்பணிக்கவும் ஆயர்கள் திட்டமிட்டுள்ளனர்.
இரஷ்ய ஆர்த்தடாக்ஸ் சபையின் முதுபெரும் தலைவர் முதலாம் Kirillம், போலந்து கத்தோலிக்க ஆயர் பேரவைத் தலைவர் பேராயர் Józef Michalikம் இம்மாதம் 17ம் தேதி Warsawவில் வரலாற்று சிறப்பு மிக்க ஒப்புரவு ஒப்பந்தத்தில் கையெழுத்திட்டனர்.
இரஷ்யாவுக்கும் போலந்துக்கும் இடையே பல நூற்றாண்டுகளாக நிலவி வந்துள்ள பகைமை உணர்வுகளால் விளைந்துள்ள காயங்களைக் குணமாக்கவும், ஒருவரை ஒருவர் மன்னித்து, ஒப்புரவில் வளரவும் முயற்சிகள் மேற்கொள்ளப்படும் என்று இவ்வொப்பந்தத்தில் கூறப்பட்டுள்ளது.

7. புனே ஆயர் : வடகிழக்கு இந்தியர்களுக்கு எதிராக நடந்துவரும் தாக்குதல்கள் அர்த்தமற்றவை

ஆக.28,2012. வடகிழக்கு இந்தியர்களுக்கு எதிராக நடந்துவரும் தாக்குதல்கள் அர்த்தமற்றவை மற்றும் இவை மத உணர்வுகளுக்கு எதிரானவை என்று புனே ஆயர் Thomas Dabre குறை கூறினார்.
“உலகம் ஒரே குடும்பம்” என்ற (Vasudhaiva Kutumbakam) ஓர் இந்து அரசு-சாரா அமைப்பு நடத்திய பல்சமயக் கூட்டத்தில் பேசிய ஆயர் Dabre, பழிவாங்குவதும், அதற்குப் பதிலடி கொடுப்பதும் மேலும் அதிகப் பதட்டநிலைகளையே உருவாக்கும், மாறாக, மன்னிப்பும் அன்பும் காயங்களைக் குணப்படுத்தும் என்று கூறினார்.
வடகிழக்கு இந்தியர்களுக்கு எதிராக நடந்துவரும் தாக்குதல்களால் புனே நகருக்கு மக்கள் பெருமளவில் வருவது குறித்தும் அவர் குறிப்பிட்டார்.
இன்று மக்களிடம் போதுமான அன்பும் மன்னிப்பு உணர்வும் இல்லை என்றும், இப்பண்புகளே கலவரத்தால் பாதிக்கப்படும் பல்வேறு சமயத்தவரை ஒன்று சேர்க்கும் என்றும் புனே ஆயர் தெரிவித்தார்.
அசாமின் நான்கு மாவட்டங்களில் தொடர்ந்து இடம்பெற்றுவரும் இன மோதல்களில் 88 பேர் இறந்துள்ளனர்.

8. சிறிய ஆயுதங்கள் சட்டத்துக்குப் புறம்பே வியாபாரம் செய்யப்படுவதைத் தடை செய்ய ஐ.நா.பொதுச் செயலர் வலியுறுத்தல்

ஆக.28,2012. ஒவ்வோர் ஆண்டும் ஐந்து இலட்சத்துக்கு மேற்பட்ட மக்களின் உயிர்களைக் காவு கொள்ளும் சிறிய ஆயுதங்களும், சுமந்து செல்லக்கூடிய வெடி கலங்களும் சட்டத்துக்குப் புறம்பே வியாபாரம் செய்யப்படுவதைத் தடுத்து நிறுத்துவதற்கு உறுதியுடன் முயற்சிகள் மேற்கொள்ளப்படுமாறு ஐ.நா.பொதுச் செயலர் பான் கி மூன் கூறினார்.
சண்டை நடக்கும் இடங்கள், சண்டை நடந்து முடிந்த இடங்கள், போதைப்பொருள் வியாபாரிகள், ஆட்கடத்தல் தொழில் செய்வோர், குற்றக் கும்பல்கள் ஆகியவர்களிடம் சிறிய ஆயுதங்கள் சட்டத்துக்குப் புறம்பேத் தாராளமாகப் புழக்கத்தில் உள்ளது தடை செய்யப்பட வேண்டும் என்று மூன் கூறினார்.
சிறிய ஆயுதங்களும், சுமந்து செல்லக்கூடிய வெடி கலங்களும் குறித்த ஐ.நா.ஆய்வுக் கூட்டத்தில் இவ்வாறு பேசினார் மூன்.
பன்னாட்டு அளவில் சட்டத்துக்கு உட்பட்டு வியாபாரம் செய்யப்படும் இவ்வாயுதங்களின் மதிப்பு 850 கோடி டாலர் எனவும், இது 2006ம் ஆண்டைவிட நான்கு மடங்கு அதிகம் எனவும் ஓர் ஆய்வு தெரிவிக்கின்றது.

9. பாகிஸ்தானில் தேவநிந்தனைக் குற்றம் சாட்டப்பட்டுள்ள Rimsha Masih 14 வயது நிரம்பியவள் : மருத்துவ ஆய்வு

ஆக.28,2012. பாகிஸ்தானில் தேவநிந்தனைக் குற்றம் சுமத்தப்பட்டு சிறையில் வைக்கப்பட்டுள்ள Rimsha Masih 14 வயது நிரம்பியவள் என மருத்துவ ஆய்வுக் குழு கூறுவதாகவும், இதனால் அவள் இளம் குற்றவாளிகளுக்குரிய நீதிமன்றத்தில் விசாரிக்கப்பட வேண்டுமென்று இச்செவ்வாயன்று சொல்லப்பட்டுள்ளதாகவும் அச்சிறுமியின் வழக்கறிஞர் Tahir Naveed Chaudhry தெரிவித்தார்.
Rimshaவின் மனநலம் அவளை 14 வயது நிரம்பியவளாகக் காட்டுவதாகவும், அவளது மனநலம், அவளது வயதுக்கு ஒத்ததாக இல்லையெனவும் அவளைப் பரிசோதித்த மருத்துவ ஆய்வுக் குழு கூறுவதாகவும் Chaudhry தெரிவித்தார்.
கடந்த சனிக்கிழமை இராவல்பிண்டி சிறையில் Rimshaவைச் சந்தித்த போது அவள் அழுது கதறினாள் என்றும் Chaudhry கூறினார்.
இதற்கிடையே, ரிம்ஷாவின் விவகாரத்தால் வன்முறைக்குப் பயந்து காடுகளில் வாழ்ந்து வரும் நூற்றுக்கணக்கான கிறிஸ்தவர்கள் மரங்களை வெட்டி கோவில்கள் அமைத்து வருவதாக ஊடகச் செய்தி ஒன்று கூறுகிறது.
Down's syndrome என்ற மனநிலைக் குறைவுள்ள சிறுமி Rimsha, அரேபிய மொழியையும், குரானையும் சொல்லித்தர உதவும் ஒரு நூலின் சில பக்கங்களை எரித்தார் என்று குற்றச்சாட்டப்பட்டு இம்மாதம் 18ம் தேதி சிறையில் வைக்கப்பட்டார்.
Rimsha மீதான இக்குற்றம் நிரூபிக்கப்பட்டால், அச்சிறுமிக்கு ஆயுள்தண்டனை வழங்கப்படும் என்றும் சொல்லப்படுகிறது.



robert john kennedy: Catholic News in Tamil - 27/08/12

robert john kennedy: Catholic News in Tamil - 27/08/12: 1. திருத்தந்தை : நேர்மையின்மை தீயவனின் அடையாளம் 2. திருமணத்தின் புனிதத்தன்மை குறித்த ஸ்காட்லாந்து ஆயர்களின் அறிக்கை 3. அசாமில் அம...

Catholic News in Tamil - 27/08/12

1. திருத்தந்தை : நேர்மையின்மை தீயவனின் அடையாளம்

2. திருமணத்தின் புனிதத்தன்மை குறித்த ஸ்காட்லாந்து ஆயர்களின் அறிக்கை

3. அசாமில் அமைதி நிலவ  பல்சமய செப வழிபாடு

4. தேவ நிந்தனைச் சட்டத்தின் கீழ் கைதுச்செய்யப்பட்டுள்ள பாகிஸ்தான் சிறுமி விடுவிக்கப்பட இந்திய கிறிஸ்தவ தலைவர் அழைப்பு

5. பழங்குடி சிறுமிகளின் கல்வி தொடர கிறிஸ்தவ அமைப்பின் உதவி

6. இரண்டு இலட்சம் சிரிய அகதிகள் அண்மை நாடுகளில் குடிபுகுந்துள்ளனர்

7. டில்லியில் நாள் ஒன்றுக்கு 12 குழந்தைகள் காணாமல் போகின்றன

------------------------------------------------------------------------------------------------------

1. திருத்தந்தை : நேர்மையின்மை தீயவனின் அடையாளம்

ஆக.27,2012. யூதாஸ் இஸ்காரியோத் இயேசு கிறிஸ்துவில் நம்பிக்கை வைப்பதை நிறுத்திய பின்னரும் அவரைத் தொடர்ந்து பின்செல்வதற்கு எடுத்த தீர்மானத்தில் வெளிப்படுவது போன்று, நேர்மை குறைவுபடுவது “தீயவனின் அடையாளமாக” இருக்கின்றது என்று திருத்தந்தை 16ம் பெனடிக்ட் கூறினார்.
காஸ்தெல் கந்தோல்ஃபோ கோடை விடுமுறை இல்ல வளாகத்திலிருந்து வழங்கிய இஞ்ஞாயிறு நண்பகல் மூவேளை செப உரையில் இஞ்ஞாயிறு நற்செய்தி வாசகத்தை மையமாக வைத்துப் பேசிய போது, இயேசுவின் பன்னிரு திருத்தூதர்களில் ஒருவரான யூதாஸ் இஸ்காரியோத்தின் போலித்தனம் பற்றி விளக்கினார் திருத்தந்தை.
இயேசு கப்பர்நாகுமிலுள்ள தொழுகைக்கூடத்தில், விண்ணகத்திலிருந்து இறங்கி வந்த உணவு நானே என்று தன்னை அறிவித்த போது, இதை ஏற்றுக் கொள்வது மிகக் கடினம் என்று சொல்லி அவரைப் பின்சென்றவர்களில் பலர் அவரை விட்டு விலகினர், அன்று முதல் அவர்கள் அவரோடு சேர்ந்து செல்லவில்லை. அப்போது இயேசு பன்னிரு சீடரிடம், நீங்களும் போய்விட நினைக்கின்றீர்களா என்று கேட்டார். அதற்கு புனித பேதுரு, ஆண்டவரே நாங்கள் யாரிடம் போவோம்? நிலைவாழ்வு அளிக்கும் வார்த்தைகள் உம்மிடம்தானே உள்ளன என பன்னிருவர் சார்பாகச் சொன்னார் என நற்செய்தியாளர் யோவான் எழுதியிருக்கிறார். 
இப்பகுதியை விவரித்த திருத்தந்தை, இதில் யூதாஸ் இஸ்காரியோத் விதிவிலக்காக இருந்தார், யூதாஸ் நேர்மையாளராய் இருந்திருந்தால் இவரும் இயேசுவை விட்டு விலகிச் சென்றிருக்க வேண்டும், ஆனால் அவர் இயேசுவோடு இருக்கவே முடிவு செய்தார், இது, யூதாஸ் இயேசு மீது கொண்டிருந்த பற்றுறுதியாலோ அல்லது அன்பாலோ அல்ல, மாறாக, தனது போதகர் மீதி பழிவாங்கும் இரகசிய ஆசையாலே இயேசுவோடு இருந்தார் என்றார்.
ஏனெனில் யூதாஸ், தான் இயேசுவால் ஏமாற்றப்பட்டதாக உணர்ந்தார், அதற்காக அவரை மறுதலிக்கத் தீர்மானித்தார், யூதாஸ் உரோமை ஆதிக்கத்தை வெறுத்த ஒரு தீவிரவாத யூதர், உரோமையருக்கு எதிராகப் புரட்சியைத் தூண்டக்கூடிய வெற்றிகளைக் கொண்டு வரும் மெசியாவை அவர் விரும்பினார், ஆனால் யூதாஸ் தனது அந்த எதிர்பார்ப்புகளால் ஏமாற்றமடைந்தார் என்று விளக்கினார் திருத்தந்தை.
புனித பேதுரு செய்தது போல நாமும் இயேசுவில் பற்றுறுதி கொள்ளவும், அவரோடும் அனைத்து மக்களோடும் எப்போதும் நேர்மையாய் வாழவும் அன்னைமரியின் உதவியை நாடுவோம் என்றும் திருத்தந்தை கூறினார்.
இயேசுவின் போதனைகள்மீது நாம் வைத்திருக்கும் விசுவாசம் சோதிக்கப்பட்டாலும் நாம் என்றும் ஆண்டவருக்குப் பிரமாணிக்கமாக வாழ்வோம் என்றும் மூவேளை செப உரையில் கேட்டுக் கொண்டார்  திருத்தந்தை 16ம் பெனடிக்ட்.


2. திருமணத்தின் புனிதத்தன்மை குறித்த ஸ்காட்லாந்து ஆயர்களின் அறிக்கை

ஆக.27,2012. திருமணம் என்பதற்குப் புது விளக்கம் கொடுக்கவும், ஒரே பாலினத் திருமணங்களைச் சட்டபூர்வமாக அங்கீகரிக்கவும் ஸ்காட்லாந்து அரசு எடுத்துவரும் முயற்சிகள் குறித்து தங்கள் மேய்ப்புப்பணி சுற்றறிக்கையில் கவலையை வெளியிட்டுள்ளனர் அந்நாட்டு ஆயர்கள்.
திருமணத்தின் உண்மைத்தன்மை பாதிக்கப்படும்போது அதைக் காப்பாற்றவேண்டிய பொறுப்பு திருஅவைக்கு உள்ளது என உரைத்துள்ள ஆயர்கள், திருமணத்திற்கு ஆதரவளிக்கும் மற்றும் திருமணத்திற்கான மேய்ப்புப்பணி குறித்த புதிய வழிமுறைகள் கண்டுபிடிக்கப்பட வேண்டியதன் அவசியத்தையும் வலியுறுத்தியுள்ளனர்.
திருமணம் மற்றும் குடும்பத்திற்கென புதிய அவை ஒன்றை உருவாக்கியுள்ளது குறித்த அறிவிப்பையும் வெளியிட்டனர் ஸ்காட்லாந்து ஆயர்கள்.
திருமணத்திற்குப் புதிய அர்த்தங்கள் கொடுக்கும் அரசின் முயற்சிகளுக்கு எதிராக பொதுமக்களின் தொடர்ந்த ஆதரவை நாடும் ஆயர்களின் மேய்ப்புப்பணி சுற்றறிக்கை இஞ்ஞாயிறன்று ஸ்காட்லாந்தின் எல்லாக் கோவில்களிலும் திருப்பலியின்போது வாசிக்கப்பட்டது.


3. அசாமில் அமைதி நிலவ  பல்சமய செப வழிபாடு

ஆக.27,2012. அசாமில் வன்முறைகள் முடிவுக்கு வந்து அமைதி நிலவவேண்டும் என்ற விண்ணப்பத்துடன் தூய பவுல் புதல்வியர் சபை ஏற்பாடு செய்த பல்சமய செப வழிபாடு இச்சனிக்கிழமையன்று Guwahatiயில் இடம்பெற்றது.
மனித சமுதாயத்தைக் கட்டியெழுப்பவும் சமூகத்தில் அமைதியை நிலைநிறுத்தவும் நம்மிடமுள்ள நிதி, அறிவு, ஆர்வம் என அனைத்தையும் பயன்படுத்தவேண்டும் என அறிவித்தார் இச்செபவழிபாட்டிற்கு ஏற்பாடு செய்த இச்சபையின் அருட்சகோதரி. ஃபிலோ ஜோசப்.
இந்தப் பல்சமய செபவழிபாட்டில் கலந்துகொண்ட ‌Guwahatiயின் முன்னாள் பேராயர் தாமஸ் மேனம்பரம்பில், வன்முறைக்குக் காரணமானவர்களின் மனதில் கூட அமைதிக்கான ஏக்கம் இருக்கும் என்று கூறினார்.
அமைதிக்கான விருப்பம் செபத்துடன் இணைக்கப்படும்போது அது மிகவும் சக்தி வாய்ந்ததாக மாறுகிறது எனவும் கூறினார் பேராயர்.
அழிவுக்குக் காரணமானவர்களின் மனதிலும் அமைதியின் தேவை குறித்த உணர்வை உருவாக்க நாம் ஒவ்வொருவரும் உழைக்கவேண்டும் என்ற அழைப்பையும் அனைத்து மத பிரதிநிதிகளிடம் விடுத்தார் பேராயர் மேனம்பரம்பில்.


4. தேவ நிந்தனைச் சட்டத்தின் கீழ் கைதுச்செய்யப்பட்டுள்ள பாகிஸ்தான் சிறுமி விடுவிக்கப்பட இந்திய கிறிஸ்தவ தலைவர் அழைப்பு

ஆக.27,2012. எழுதப்படிக்கத் தெரியாத பாகிஸ்தானிய சிறுமி ஒருவர், இஸ்லாமியர்களின் புனித நூலான திருக்குரானைக் கற்றுக்கொள்ள உதவும் குழந்தைகளுக்கான மதபோதக நூலின் சில பக்கங்களை எரித்தார் என்ற குற்றச்சாட்டின் பேரில் தேவநிந்தனைச் சட்டத்தின் கீழ் கைது செய்யப்பட்டுள்ளது குறித்து கவலையை வெளியிட்டுள்ளார் இந்திய கிறிஸ்தவர்களின் உலக அவையின் தலைவர் Sajan George.
மனநிலைப் பாதிக்கப்பட்டுள்ள ஏழைச் சிறுமி Rimsha Masih, உடனடியாக விடுவிக்கப்படவேண்டும், மற்றும் அச்சிறுமியின் குடும்பத்திற்கு இஸ்லாம் தீவிரவாதிகளிடமிருந்து பாதுகாப்பளிக்க வேண்டும் எனவும் உலகச் சமூகத்தை நோக்கியும் இந்தியாவிற்கான பாகிஸ்தான் தூதர் நோக்கியும் அழைப்பு விடுத்துள்ளார் Sajan.
பாகிஸ்தானில் தேவ‌நிந்த‌னைச் ச‌ட்ட‌ம் எந்த‌ அள‌வுக்குத் த‌வ‌றாகப் ப‌ய‌ன்ப‌டுத்த‌ப்ப‌டுகிற‌து என்ப‌து குறித்து உல‌கின் க‌வ‌ன‌த்தைத் திருப்ப‌ Rimsha Masihன் அண்மை கைது ஒரு வாய்ப்பாக‌ இருக்கிற‌து என‌வும் எடுத்துரைத்தார் அவ‌ர்.
எதிரிக‌ளைப் ப‌ழிவாங்க‌வும், அண்டை வீட்டாருட‌ன் ஆன‌ சிறு ச‌ச்ச‌ர‌வுக‌ளில் வெற்றி காண‌வும், அர‌சிய‌ல் ம‌ற்றும் பொருளாதார‌க் கார‌ண‌ங்க‌ளுக்காக‌வும் தேவ‌நிந்த‌னைச் ச‌ட்ட‌ம் ம‌க்க‌ளால் த‌வ‌றாக‌ப் ப‌ய‌ன்ப‌டுத்த‌ப்ப‌டுகிற‌து என‌ மேலும் கூறினார் இந்திய கிறிஸ்தவர்கள் உலக அவையின் தலைவர் Sajan.
தேவநிந்தனைக் குற்றம் சுமத்தப்பட்டுள்ள சிறுமியின் இவ்வழக்கு இம்மாதம் 31ம் தேதி நீதிமன்ற விசாரணைக்கு வர உள்ளது.


5. பழங்குடி சிறுமிகளின் கல்வி தொடர கிறிஸ்தவ அமைப்பின் உதவி

ஆக.27,2012. இந்தியாவின் மகராஷ்டிரா மாநிலச் சிறுமிகள் தங்கள் கல்வியைத் தொடர உதவும் பொருட்டு, மிதிவண்டிகளை இலவசமாக வழங்கியுள்ளது கிறிஸ்தவ துயர்துடைப்பு நிறுவனமான World Vision.
மகராஷ்டிர மாநிலத்தின் கிராமங்களில் வாழும் பழங்குடி இனங்களிடையே கடந்த ஐந்து ஆண்டுகளுக்கு மேலாகச் சேவையாற்றி வரும் இந்த கிறிஸ்தவ அமைப்பு, சிறுமிகளின் கல்வியில் கவனம் செலுத்துவதுடன், விவசாயிகளுக்குப் பயிரிடத் தேவையானப் பொருட்களையும், கால்நடை வளர்ப்புக்குத் தேவையான உதவிகளையும் வழங்கி வருகிறது.
பள்ளிகளுக்குத் தேவையான இருக்கைகளையும், விளையாட்டுத் துறைக்குத் தேவையானப் பொருட்களையும் கொடுத்து உதவி வருகிறது World Vision கிறிஸ்தவ அமைப்பு.
ஆரம்பக்கல்வியை தங்கள் கிராமங்களில் படிக்கும் மாணவிகள், உயர் நிலைக்கல்வியைத் தொடர தூர இடங்களுக்குச் செல்ல முடியாத நிலையில் அவர்களுக்கு அண்மையில் 65 மிதி வண்டிகளை இலவசமாக வழங்கி, அவர்கள் கல்வியைத் தொடர உதவியுள்ளது இக்கிறிஸ்தவ அமைப்பு.


6. இரண்டு இலட்சம் சிரிய அகதிகள் அண்மை நாடுகளில் குடிபுகுந்துள்ளனர்

ஆக.27,2012. சிரியாவில் மோதல்கள் தொடர்வதால் அந்நாட்டிலிருந்து இரண்டு இலட்சத்திற்கும் மேற்பட்ட மக்கள் அகதிகளாக அண்மை நாடுகளுக்குள் அடைக்கலம் தேடியுள்ளதாக ஐநாவின் அகதிகளுக்கான அமைப்பு அறிவித்துள்ளது.
கடந்த ஏழு நாட்களில் மட்டும் 30 ஆயிரம் பேர் அகதிகளாக துருக்கி, லெபனன், ஜோர்டன் மற்றும் ஈராக் ஆகிய நாடுகளில் அடைக்கலம் தேடியுள்ளதாக உரைத்த ஐநாவின் அதிகாரப்பூர்வப் பேச்சாளர் ஏட்ரியன் எட்வர்ட்ஸ், அகதிகளாக வந்துள்ளோரில் பெருமெண்ணிக்கையினோர் 18 வயதிற்கு உட்பட்டவர்கள் எனவும், பெற்றோர் துணையின்றி வந்துள்ள சிறார்களும் இதில் அடங்குவர் எனவும் தெரிவித்தார்.
அகதிகளுக்கான ஐநா அமைப்பின் கணிப்பின்படி, சிரியாவிற்குள் ஏறத்தாழ 12 இலட்சம் பேர் இடம்பெயர்ந்தவர்களாக வாழ்ந்து வருகின்றனர், மேலும் 25 இலட்சம் பேருக்கு மனிதாபிமான உதவிகள் தேவைப்படுகின்றன.


7. டில்லியில் நாள் ஒன்றுக்கு 12 குழந்தைகள் காணாமல் போகின்றன

ஆக.27,2012. டில்லியில் நாள் ஒன்றுக்கு 12 குழந்தைகள் காணாமல் போகின்றன  எனவும், இதில், பெண் குழந்தைகளே அதிகம்  எனவும், அரசின் புள்ளி விவரங்கள் தெரிவிக்கின்றன.
டில்லியில், இந்த ஆண்டு, இம்மாதம் 15ம் தேதி வரை, 1,652 பெண் குழந்தைகள் உட்பட 3,171 குழந்தைகள் காணாமல் போயுள்ளன எனக்கூறும் அரசின் அறிக்கை, இது கடந்த ஆண்டை விட குறைவே எனவும் தெரிவிக்கிறது.
இந்த ஆண்டு, நாள் ஒன்றுக்கு, 12 குழந்தைகள் காணாமல் போயுள்ள நிலையில், இது 2011ம் ஆண்டில், நாள் ஒன்றுக்கு, 14 குழந்தைகள் என இருந்தது.
கடந்த இரண்டு ஆண்டுகளாக, ஆண் குழந்தைகளை விட, பெண் குழந்தைகள் காணாமல் போவது அதிகரித்துள்ளது எனவும், சிலரால் தவறாக வழிகாட்டப்படுவது, பெற்றோர்கள் அன்பாக நடந்து கொள்ளாதது, படிப்பில் நாட்டம் இல்லாமை, கடத்தப்படுவது போன்றவை, குழந்தைகள் காணாமல் போவதற்கானக் காரணங்களாக, புள்ளி விவரங்களில் தெரிவிக்கப்பட்டுள்ளது.

Monday, 27 August 2012

robert john kennedy: Catholic News in Tamil - 25/08/12

robert john kennedy: Catholic News in Tamil - 25/08/12: 1.கர்தினால் Tauran : கடவுளை மறந்து வாழும் உலகம் மனிதமற்ற உலகம் 2. Rimsha Masih யின் விடுதலையை வலியுறுத்தி ஆக.25ல் லாகூரில் பேரணி ...

Catholic News in Tamil - 25/08/12

1.கர்தினால் Tauran : கடவுளை மறந்து வாழும் உலகம் மனிதமற்ற உலகம்

2. Rimsha Masihயின் விடுதலையை வலியுறுத்தி ஆக.25ல் லாகூரில் பேரணி

3. அனைத்துக் குடிமக்களின் மனித உரிமைகள் மதிக்கப்படுவதற்கு அரசுக்கும் ஐ.நாவுக்கும் பாகிஸ்தான் கிறிஸ்தவர்கள் வேண்டுகோள்

4. இந்தியக் கிறிஸ்தவ மறைசாட்சிகள் தினத்தைக் கடைப்பிடிக்குமாறு மத்திய பிரதேச கிறிஸ்தவ ஒன்றிப்பு அமைப்பு வேண்டுகோள்

5. ஜாம்பியாவை “ஒரு கிறிஸ்தவ நாடு” என்று அறிவிக்கும் பரிந்துரைக்கு ஆயர்கள் எதிர்ப்பு

6. சுற்றுச்சூழலை ஊக்குவிக்கும் விவிலியம் ஓர் இலத்தீன் அமெரிக்க நாட்டில் வெளியிடப்படவிருக்கின்றது

7. இங்கிலாந்தில் 8வது உலக இளம் கிறிஸ்தவத் தொழிலாளர் மாநாடு

8. கொழும்பு : அணுத்தொழில்நுட்பம் தொடர்பான அனைத்துலக மாநாடு



------------------------------------------------------------------------------------------------------

1.கர்தினால் Tauran : கடவுளை மறந்து வாழும் உலகம் மனிதமற்ற உலகம்

ஆக.25,2012. கடவுளை மறந்து வாழும் உலகம் மனிதமற்ற உலகம் என்று திருப்பீட பல்சமய உரையாடல் அவைத் தலைவர் கர்தினால் Jean-Louis Tauran, ரிமினி கூட்டத்தில் கூறினார்.
இத்தாலியின் ரிமினியில் “ஒன்றிப்பும் விடுதலையும்” என்ற பொதுநிலையினர் அமைப்பு நடத்திய கூட்டத்தில், “பன்னாட்டு அரசியலும் சமய சுதந்திரமும்” என்ற தலைப்பில் இடம்பெற்ற அமர்வில் இவ்வெள்ளியன்று உரையாற்றிய கர்தினால் Tauran இவ்வாறு  கூறினார். இவ்வமர்வில் ஐ.நா.பொது அவையின் தலைவர் Nassir Abdulaziz Al-Nasser, இத்தாலிய வெளியுறவு அமைச்சர் Giulio Terzi உட்பட பல தலைவர்கள் பங்கு பெற்றனர்.
மனிதர்கள் தன்னிலே சமயப் பண்பு கொண்டவர்கள் என்பதால் அவர்களின் சமய சுதந்திரத்தைப் பாதுகாப்பதில் நாடுகள் கவனம் செலுத்துமாறும் கர்தினால் கேட்டுக் கொண்டார்.
நைஜீரியாவிலும் பாகிஸ்தானிலும் கிறிஸ்தவர்கள் எதிர்கொள்ளும் துன்பங்கள் குறித்து கவலை தெரிவித்த கர்தினால் Tauran, பாகிஸ்தானில் இந்நாள்களில் தேவநிந்தனைக் குற்றம் சுமத்தப்பட்டுள்ள 11 வயதுச் சிறுமி Rimsha Masihவின் நிலைமை குறித்தும் கவலை தெரிவித்தார்.
இச்சனிக்கிழமையன்று நிறைவடைந்த இக்கூட்டத்தில் இருபதுக்கும் மேற்பட்ட நாடுகளிலிருந்து, அரசியல், மதம், பொருளாதாரம், கலாச்சாரம் எனப் பல துறைகளைச் சார்ந்த ஆயிரக்கணக்கான தலைவர்கள் உட்பட எட்டு இலட்சத்துக்கு மேற்பட்டவர்கள் கலந்து கொண்டனர். திருத்தந்தை 16ம் பெனடிக்டும் இக்கூட்டத்திற்குச் செய்தி அனுப்பியிருந்தார் என்பது குறிப்பிடத்தக்கது. 

2. Rimsha Masihயின் விடுதலையை வலியுறுத்தி ஆக.25ல் லாகூரில் பேரணி

ஆக.25,2012. பாகிஸ்தானில் தேவநிந்தனைக் குற்றம் சுமத்தப்பட்டு சிறையில் வைக்கப்பட்டுள்ள 11 வயதுச் சிறுமி Rimsha Masih விடுதலை செய்யப்படுவதை வலியுறுத்தி இச்சனிக்கிழமையன்று லாகூரில் பேரணி ஒன்று நடத்தப்பட்டது.
பாகிஸ்தானின் அனைத்துக் கிறிஸ்தவர்களும் ஒன்றிணைந்து இந்தச் சிறுமியோடு ஒருமைப்பாட்டுணர்வு கொள்வதற்கு இதுவே தக்க தருணம் என்று இஸ்லாமாபாத்-இராவல்பிண்டி ஆயர் ரூஃபின் அந்தோணி கூறினார்.
மேலும், அனைத்துப் பாகிஸ்தான் சிறுபான்மையினர் கூட்டமைப்பு, நாடாளுமன்ற உறுப்பினர் Tahir Naveed Chaudhry என்ற வழக்கறிஞரை Rimshaவுக்காக வாதிடுவதற்காக நியமித்துள்ளது.
World Vision in Progress என்ற கிறிஸ்தவ அரசு சாரா அமைப்பு இச்சிறுமியின் பிணையலுக்காக மனுக் கொடுத்துள்ளது. இது வருகிற செவ்வாயன்று விவாதிக்கப்படும் எனவும் ஊடகச் செய்தி ஒன்று கூறுகிறது. 
இதற்கிடையே, Rimsha மீது சாட்டப்பட்டுள்ள இக்குற்றம் நிரூபணமானால், பாகிஸ்தான் சட்டத்தின்படி அவள் தண்டிக்கப்பட வேண்டும் என்று அந்நாட்டில் முஸ்லீம்கள் மத்தியில் பரவலான எண்ணம் இருப்பதாகக் கூறப்படுகிறது. 
Down's syndrome என்ற மனநிலைக் குறைவுள்ள 11 வயதுச் சிறுமி Rimsha, அரேபிய மொழியையும், குரானையும் சொல்லித்தர உதவும் ஒரு நூலின் சில பக்கங்களை எரித்தார் என்று குற்றச்சாட்டப்பட்டு இம்மாதம் 18ம் தேதி சிறையில் வைக்கப்பட்டார்.
Rimsha மீது சாட்டப்பட்டுள்ள இக்குற்றம் நிரூபணமானால், அச்சிறுமிக்கு ஆயுள்தண்டனை வழங்கப்படும் என்றும் சொல்லப்படுகிறது.


3. அனைத்துக் குடிமக்களின் மனித உரிமைகள் மதிக்கப்படுவதற்கு அரசுக்கும் ஐ.நாவுக்கும் பாகிஸ்தான் கிறிஸ்தவர்கள் வேண்டுகோள் 

ஆக.25,2012. பாகிஸ்தானில் கிறிஸ்தவர்க்கு எதிராகத் தொடர்ந்து அதிகரித்து வரும் வன்முறைகளில் பல சிறார்கள் பலிகடா ஆக்கப்படுகிறார்கள் என தொமினிக்கன் சபை அருள்தந்தை James Channan குறை கூறினார்.
பல்சமய உரையாடலை ஊக்குவிப்பதற்காக லாகூரில் இயங்கி வரும் அமைதி மையத்தின் இயக்குனர் அருள்தந்தை Channan, ஃபீதெஸ் செய்தி நிறுவனத்திடம்  இவ்வாறு கூறினார்.
பாகிஸ்தானில் வாழும் அனைத்துக் குடிமக்களின் மனித மாண்பும் மனித உரிமைகளும் மதிக்கப்படுவதற்கு உறுதியளிக்கும் வகையில் அரசு கடுமையான நடவடிக்கைகளை எடுக்குமாறு இந்நாட்டுக் கிறிஸ்தவர்கள் வலியுறுத்துவதாகவும் இவர் கூறினார். 
மேலும், சமய சுதந்திரத்துக்கான ஐ.நா.சிறப்புப் பார்வையாளர் சார்பில் பாகிஸ்தானில் ஒரு சிறப்புப்பணி மேற்கொள்ளப்பட வேண்டும், பாகிஸ்தானில் இடம்பெறும் உரிமை மீறல்கள் குறித்து அனைத்துலக சமுதாயம் அறிந்திருக்க வேண்டும் என்று இந்நாட்டுக் கிறிஸ்தவர்கள் விரும்புவதாகவும் அருள்தந்தை Channan கூறினார்.      
கிறிஸ்தவர்களுக்குப் பாகிஸ்தானில் வாழ்வது நாளுக்கு நாள் கடினமாகிக் கொண்டு வருகின்றதெனவும், பல கிறிஸ்தவச் சிறுமிகள் கடத்தப்பட்டு, பாலியல் வன்புணர்ச்சிக்கு உள்ளாக்கப்பட்டு, கட்டாயமாக இசுலாமில் இணைக்கப்படுகின்றனர் எனவும், “பாகிஸ்தானின் 'Maria Goretti” என அழைக்கப்படும் Amariah Masih விவகாரத்தில் நடந்துள்ளது போல சிறுமிகள் கொலையும் செய்யப்படுகின்றனர் எனவும் அவர் தெரிவித்தார்.
தற்போது தேவநிந்தனை சட்டத்தின்கீழும் சிறார் குற்றம் சாட்டப்படுகின்றனர் என்றுரைத்த அருள்தந்தை Channan, இவ்வாறு சிறார்கள் தொடர்ந்து தாக்கப்பட்டு வந்தால், சகிப்பற்றதன்மையினால் செய்யப்படும் உரிமை மீறல்களும், மனிதமற்ற செயல்களும் கட்டுக்கடங்காமல் போய்விடும் என்று கவலை தெரிவித்தார்.


4. இந்தியக் கிறிஸ்தவ மறைசாட்சிகள் தினத்தைக் கடைப்பிடிக்குமாறு மத்திய பிரதேச கிறிஸ்தவ ஒன்றிப்பு அமைப்பு வேண்டுகோள்

ஆக.25,2012. ஆகஸ்ட் 26ம் தேதி இஞ்ஞாயிற்றுக்கிழமையை “இந்தியக் கிறிஸ்தவ மறைசாட்சிகள்” தினமாகக் கடைப்பிடிக்குமாறு இந்தியாவின் அனைத்துக் கிறிஸ்தவர்களுக்கும் வேண்டுகோள் விடுத்துள்ளது மத்திய பிரதேச மாநிலத்தின் கிறிஸ்தவ ஒன்றிப்பு அமைப்பு ஒன்று. 
போபாலை மையமாகக் கொண்டு செயல்படும், மத்திய பிரதேச இசை மகாசங் என்ற கிறிஸ்தவ ஒன்றிப்பு அமைப்பு, திருத்தூதர் தோமையார் தொடங்கி, தங்களது கிறிஸ்தவ விசுவாசத்திற்காக உயிரிழந்தவர்களை நினைவுகூரும் விதமாக ஆண்டுதோறும் மறைசாட்சிகள் தினத்தைக் கடைப்பிடிக்கும் நடவடிக்கையை ஊக்குவித்து வருகிறது.
நான்காண்டுகளுக்கு முன்னர் ஒடிசா மாநிலத்தின் கந்தமால் மாவட்டத்தில் கிறிஸ்தவர்க்கெதிரான வன்முறைகள் இடம்பெற்ற பின்னர் இந்த மறைசாட்சிகள் தினத்தைக் கடைப்பிடிப்பதற்குக் கிறிஸ்தவர்களை ஊக்குவித்து வருகிறது இவ்வமைப்பு. 
போபால் கத்தோலிக்க உயர்மறைமாவட்டத்தின் முயற்சியால் உருவாக்கப்பட்ட இந்த மறைசாட்சிகள் தினத்தில் கிறிஸ்தவர்கள் திருப்பலி ஒப்புக்கொடுத்து இரத்த தான முகாம்களில் இரத்த தானம் செய்யுமாறும் இசை மகாசங் அமைப்பு பரிந்துரை செய்கின்றது. 
5. ஜாம்பியாவை “ஒரு கிறிஸ்தவ நாடு” என்று அறிவிக்கும் பரிந்துரைக்கு ஆயர்கள் எதிர்ப்பு

ஆக.25,2012. ஜாம்பிய நாட்டுப் புதிய அரசியல் அமைப்பின் முன்னுரையில் அந்நாட்டை “ஒரு கிறிஸ்தவ நாடு” என்று அறிவிக்கும் பரிந்துரைக்கு அந்நாட்டு ஆயர்கள் எதிர்ப்பு தெரிவித்துள்ளனர்.   
புதிய அரசியல் அமைப்பு குறித்த தங்கள் பரிந்துரைகளை வெளியிட்டுள்ள ஆயர்கள், ஜாம்பியாவை “ஒரு கிறிஸ்தவ நாடு” என்று அரசியல் அமைப்பில் அறிவிப்பதால் மட்டும் அந்நாடு கிறிஸ்தவ விழுமியஙகளையும் கிறிஸ்தவத்தின் கோட்பாடுகளையும் அனுசரிக்காது என்று சொல்லியுள்ளனர்.
ஜாம்பியா, பல சமயத்தவரைக் கொண்ட நாடு என்பதையும் சுட்டிக் காட்டியுள்ள  ஆயர்கள், அரசும் திருஅவையும் தனித்தனியானவை என்ற கொள்கையை இழக்கக் கூடாது என்றும் கூறியுள்ளனர்.
ஜாம்பியாவில் தற்போது சில குறிப்பிட்ட விவகாரங்களில் கருக்கலைப்பு அங்கீகரிக்கப்பட்டுள்ளது. மரணதண்டனையும் சட்டப்படி அங்கீகரிக்கப்பட்டுள்ளது.
கருக்கலைப்பு, மரணதண்டனை, கருணைக்கொலை ஆகியவற்றுக்குப் புதிய அரசியல் அமைப்பில் ஆதரவளிக்கக் கூடாது எனவும் ஆயர்கள் கேட்டுள்ளனர்.


6. சுற்றுச்சூழலை ஊக்குவிக்கும் விவிலியம் ஓர் இலத்தீன் அமெரிக்க நாட்டில் வெளியிடப்படவிருக்கின்றது

ஆக.25,2012. மறுசுழற்சி செய்யப்பட்ட தாள்களில் காய்கறிகளில் தயாரிக்கப்பட்ட மையால் பதிவுசெய்யப்பட்ட வார்த்தைகளைக் கொண்ட விவிலியம் ஒன்று தென் அமெரிக்க நாடான ஈக்குவதோரில் வெளியிடப்படவிருக்கின்றது.
சுற்றுச்சூழலுடன் நல்லுறவு கொள்வதை ஊக்குவிக்கும் நோக்கத்தில் ஒன்றிணைந்த விவிலியக் கழகங்கள் இந்தத் திட்டத்தைச் செய்து வருகின்றன.
இயற்கைத்தாய் மதிக்கப்படும் ஈக்குவதோரின் Galapagos தீவுகளில் இந்த விவிலியத்தை இம்மாதம் 28ம் தேதி வெளியிடுவதற்குத் திட்டமிட்டுள்ளன இக்கழகங்கள்.
Galapagos தீவுகள் 1979ம் ஆண்டிலிருந்து பாரம்பரிய இயற்கைவளச் சின்னமாக மாறியுள்ளன.
படைப்பின்மீது கடவுள் அக்கறை கொண்டுள்ளதைச் சுட்டிக்காட்டும் பகுதிகள் இந்த விவிலியத்தில் கோடிட்டுக் காட்டப்பட்டுள்ளன என்று கூறப்படுகின்றது.

7. இங்கிலாந்தில் 8வது உலக இளம் கிறிஸ்தவத் தொழிலாளர் மாநாடு

ஆக.25,2012. “வாழ்க்கையின் ஒரு பள்ளியைக் கட்டியெழுப்பு” என்ற தலைப்பில் இங்கிலாந்தின் Altonல் இச்சனிக்கிழமையன்று 8வது உலக இளம் கிறிஸ்தவத் தொழிலாளர் மாநாடு தொடங்கியுள்ளது.
நான்காண்டுகளுக்கு ஒருமுறை நடைபெறும் இம்மாநாட்டில் இளம் தொழிலாளர்கள், மாணவர்கள், வேலையின்றி இருக்கும் இளையோர் என ஏறக்குறைய 50 நாடுகளிலிருந்து இளையோர் கலந்து கொள்கின்றனர்.
இன்றைய இளையோர் எதிர்கொள்ளும் பிரச்சனைகளைப் பன்னாட்டினரின் கவனத்துக்குக் கொண்டு வரவும், இவர்களின் பிரச்சனைகளுக்குத் திருஅவை எவ்வாறு பதில் சொல்கிறது என்பதை அறியவும் இம்மாநாட்டில் முயற்சிகள் மேற்கொள்ளப்படும் என அறிவிக்கப்பட்டுள்ளது.
இச்சனிக்கிழமையன்று தொடங்கியுள்ள 8வது உலக இளம் கிறிஸ்தவத் தொழிலாளர் மாநாடு, வருகிற செப்டம்பர் 5ம் தேதி நிறைவடையும்.

8. கொழும்பு : அணுத்தொழில்நுட்பம் தொடர்பான அனைத்துலக மாநாடு

ஆக.25,2012. அணுத் தொழில்நுட்பம் தொடர்பான அனைத்துலக மாநாடு இலங்கையின் கொழும்பில்,  தலதாரி பயணியர் மாளிகையில் இம்மாதம் 27ம் தேதி தொடங்கவுள்ளது என அறிவிக்கப்பட்டுள்ளது.
விவசாய நிலங்களின் வளத்தை மேம்படுத்துவதைக் கருப்பொருளாகக் கொண்டு இம்மாநாடு நடைபெறவுள்ளது.
சீனா, பாகிஸ்தான், இந்தியா, பங்களாதேஷ், நியூசிலாந்து, வியட்நாம் உள்ளிட்ட 17 நாடுகளைச் சேர்ந்த பிரதிநிதிகள் இந்த அனைத்துலக மாநாட்டில் பங்கேற்க உள்ளனர்.
ஐ.நா. உறுப்பு நாடுகளில் நில வளங்களைச் சரியாகப் பயன்படுத்தாமல் இருப்பதால் ஏற்படக்கூடிய பாதிப்புக்கள் குறித்து இம்மாநாட்டில் விவரிக்கப்படும் எனவும் கூறப்பட்டுள்ளது.

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...