Catholic News in Tamil - 24/07/12

1. உலகுசார் துறவு சபைகளின் அனைத்துலக மாநாட்டுக்குத் திருத்தந்தை வாழ்த்து

2. பொறுப்புள்ள சுற்றுலாக்களுக்குத் திருப்பீடம் அழைப்பு

3. இந்தியாவின் புதிய குடியரசுத் தலைவருக்குச் செபமும் நல்வாழ்த்தும் : இந்திய ஆயர் பேரவைத் தலைவர்

4. கத்தோலிக்கர் தங்கள் உடல்களை இறைவனின் மகிமைக்காகப் பயன்படுத்துமாறு பிரிட்டன், அயர்லாந்து ஆயர்கள் வலியுறுத்தல்

5. சண்டை தீவிரமடைந்துள்ள சிரியாவில் கிறிஸ்தவர்கள் மத்தியில் பயம் அதிகரித்துள்ளது, ஆயர் கவலை

6. சிரியா அகதிகளின் நிலைமை நாளுக்கு நாள் மோசமடைந்து வருகிறது:  லெபனன் காரித்தாஸ் இயக்குனர்

7. சிரியாவில் வேதிய ஆயுதங்கள் பயன்படுத்தக்கூடிய வாய்ப்பு உள்ளது, பான் கி மூன் கவலை

8. மருந்துக்கு கட்டுப்படாத HIV தொற்று அதிகரிக்கிறது

------------------------------------------------------------------------------------------------------

1. உலகுசார் துறவு சபைகளின் அனைத்துலக மாநாட்டுக்குத் திருத்தந்தை வாழ்த்து

ஜூலை,24,2012. உலகுசார் துறவு சபையினர், உலகு மற்றும் திருஅவையின் காயங்களை அன்போடு ஏற்றுக்கொள்ளுமாறு, குறிப்பாக நட்புணர்வு மற்றும் மன்னிக்கும் திறனோடு, முழுமையான மற்றும் மகிழ்வான வாழ்வு வாழுமாறு கேட்டுள்ளார் திருத்தந்தை 16ம் பெனடிக்ட்.

இத்தாலியின் அசிசி நகரில் நடைபெற்று வரும் உலகுசார் துறவு சபைகளின் அனைத்துலக மாநாட்டுக்குத் திருத்தந்தையின் பெயரில் செய்தி அனுப்பியுள்ள திருப்பீடச் செயலர் கர்தினால் தர்ச்சிசியோ பெர்த்தோனே, இச்சபைகளுக்குத் திருத்தந்தை கூறும் கருத்துக்களைத் தெரிவித்துள்ளார்.

தூயஆவி புதியனவற்றைக் கட்டி எழுப்புவதால் இச்சபைகளைச் சேர்ந்தவர்கள் படைப்பாற்றல் மிக்கவர்களாக வாழுமாறும் கேட்டுக் கொண்டுள்ள திருத்தந்தை, இவர்கள் மூன்று முக்கிய விடயங்களில் கவனம் செலுத்துமாறும் பரிந்துரைத்துள்ளார்.

இறைவனே தங்களுக்கு எல்லாமுமாக இருக்கிறார் என்பதைக் கண்டு கொண்ட இவர்கள் தங்களது வாழ்வை முழுமையாக அவருக்குக் கொடுக்க வேண்டும் எனவும், ஆன்மீக வாழ்க்கையிலும் துறவறப் பயிற்சியிலும் கவனம் செலுத்துமாறும் கேட்டுக் கொண்டுள்ளார் திருத்தந்தை.

இந்த மூன்று நாள் அனைத்துலக மாநாடு, இப்புதன்கிழமையன்று நிறைவடையும். அதன்பின்னர் அச்சபைகளின் பொதுப் பேரவையும் நடைபெறும்.

2. பொறுப்புள்ள சுற்றுலாக்களுக்குத் திருப்பீடம் அழைப்பு

ஜூலை,24,2012. சுற்றுலாவைப் பொறுப்புள்ள மற்றும் மதிப்புமிக்க விதத்தில் ஊக்குவித்து வளர்க்குமாறு ஒவ்வொருவருக்கும் அழைப்பு விடுத்துள்ளது திருப்பீட குடியேற்றதாரர் மற்றும் புலம்பெயர்வோர்க்கான மேய்ப்புப்பணி அவை.

வருகிற செப்டம்பர் 27ம் தேதி கடைப்பிடிக்கப்படும் அனைத்துலக சுற்றுலா தினத்திற்கென செய்தி வெளியிட்டுள்ள திருப்பீட குடியேற்றதாரர் மற்றும் புலம்பெயர்வோர்க்கான மேய்ப்புப்பணி அவை, சுற்றுச்சூழலைப் பாதுகாப்பது உள்ளிட்ட மில்லென்யம் வளர்ச்சித்திட்ட இலக்குகளை அடைவதற்குச் சுற்றுலா முக்கியமான அங்கம் வகிக்கின்றது என்று கூறியுள்ளது.

கடந்த பத்தாண்டுகளில் சுற்றுலா குறிப்பிட்டத்தக்க வகையில் முன்னேறியுள்ளது என்றுரைக்கும் இச்செய்தி, பன்னாட்டு அளவில் சுற்றுலாப் பயணிகளின் எண்ணிக்கை நூறு கோடியை எட்டியுள்ளது, இது 2030ம் ஆண்டில் 200 கோடியை எட்டும் என WTO என்ற உலகச் சுற்றுலா நிறுவனம் வெளியிட்ட புள்ளி விபரங்களையும் சுட்டிக் காட்டியுள்ளது.

சுற்றுச்சூழல் பாதுகாப்பில் தற்போது மிகுந்த விழிப்புணர்வு ஏற்பட்டிருக்கின்ற போதிலும், விடுமுறை காலங்களில் சில வசதிகளைத் தேடி மக்கள் தங்களது இந்த விழிப்புணர்வு நடவடிக்கைகளை மறந்து விடுகின்றனர் என்றும் அச்செய்தி கூறுகிறது.

புதிய வாழ்க்கைமுறைகளை அமைத்துக் கொள்வதற்கு கற்றுக் கொள்வதற்குப் பெருமளவில் முயற்சிகள் எடுக்கப்படுமாறும் அச்செய்தி வலியுறுத்துகிறது.    

இச்செய்தியில் திருப்பீட குடியேற்றதாரர் மற்றும் புலம்பெயர்வோர்க்கான மேய்ப்புப்பணி அவைத் தலைவர் கர்தினால் Antonio Maria Vegliò, அதன் செயலர் ஆயர் Joseph Kalathiparambil ஆகிய இருவரும் கையெழுத்திட்டுள்ளனர்.

3. இந்தியாவின் புதிய குடியரசுத் தலைவருக்குச் செபமும் நல்வாழ்த்தும் : இந்திய ஆயர் பேரவைத் தலைவர்

ஜூலை,24,2012.  இந்தியாவின் புதிய குடியரசுத் தலைவராகத் பிரணாப் முகர்ஜி அவர்கள் தேர்ந்தெடுக்கப்பட்டிருப்பது, வாழ்வுக் கலாச்சாரம், அமைதி, நல்லிணக்கம், உரையாடல், பொதுவாழ்வில் ஒருங்கமைவு ஆகிய விழுமியங்களை மீண்டும் உறுதிப்படுத்துவதற்கு நல்ல வாய்ப்பாக இருக்கின்றது என்று இந்திய ஆயர் பேரவைத் தலைவர் கர்தினால் Oswald Gracias கூறினார்.

இப்புதன்கிழமையன்று இந்தியாவின் 13வது குடியரசுத் தலைவராகப் பொறுப்பேற்கவுள்ள பிரணாப் முகர்ஜி அவர்களுக்கு கர்தினால் Gracias அனுப்பியுள்ள நல்வாழ்த்துக் கடிதத்தில், நாட்டில் கத்தோலிக்கத் திருஅவையின் மறைப்பணியின் முக்கிய கூறுகளைக் குறிப்பிட்டுள்ளதோடு, நாட்டைக் கட்டியெழுப்புவதில் இந்தியத் திருஅவைக்கும் அரசுக்கும் இடையே இடம்பெற்று வரும் ஒத்துழைப்பு தொடர்ந்து இடம்பெறுமாறும் கேட்டுள்ளார்.  

நாட்டின் 13வது குடியரசுத் தலைவருக்கு இந்தியத் திருஅவையின் சார்பில் இனிய நல்வாழ்த்துக்களைத் தெரிவிப்பதாகவும், பிரணாப் முகர்ஜி அவர்களின் இந்தத் தேர்தல் முடிவைத் தாங்கள் வரவேற்பதாகவும், புதிய அரசுத்தலைவர் மற்றும் நாட்டின்மீது இறையாசிர் நிரம்பப் பொழியப்படுமாறு செபிப்பதாகவும் உறுதி கூறியுள்ளார் மும்பை பேராயர் கர்தினால் Gracias.

பிரணாப் முகர்ஜி அவர்கள், ஆழமான அரசியல் தலைமைத்துவப் பண்புகளைக் கொண்டவர் மற்றும் நாட்டின் பொதுநலன்மீது மிகுந்த ஆர்வம் உள்ளவர் என்றும் குறிப்பிட்டுள்ளார் இந்திய ஆயர் பேரவைத் தலைவர் கர்தினால் Oswald Gracias.

இந்தியாவில் சுமார் 60 விழுக்காட்டுக் கத்தோலிக்கப் பள்ளிகள் கிராமங்களில் உள்ளன.

76 வயதான பிரணாப் முகர்ஜி அவர்கள், 40 ஆண்டுகளுக்கும் மேலாக நாடாளுமன்ற உறுப்பினராக இருந்துள்ளார்.

4. கத்தோலிக்கர் தங்கள் உடல்களை இறைவனின் மகிமைக்காகப் பயன்படுத்துமாறு பிரிட்டன், அயர்லாந்து ஆயர்கள் வலியுறுத்தல்

ஜூலை,24,2012. கத்தோலிக்கர் தங்கள் உடல்களை “இறைவனின் மகிமை”க்காகப் பயன்படுத்துமாறு வாழ்வு தினச் செய்தியில் வலியுறுத்தியுள்ளனர் பிரிட்டன் மற்றும் அயர்லாந்து ஆயர்கள்.

இவ்வெள்ளிக்கிழமையன்று ஒலிம்பிக்ஸ் மற்றும் வருகிற ஆகஸ்ட் 29ம் தேதி மாற்றுத்திறனாளிக்களுக்கான ஒலிம்பிக்ஸ் இலண்டனில் தொடங்கவிருப்பதைக் குறிப்பிட்டுள்ள ஆயர்கள், அறநெறி விழுமியங்களோடு நலமாக வாழ்வதன் முக்கியத்துவத்தைச் சுட்டிக்காட்டியுள்ளனர்.

“கோடைகால ஒலிம்பிக் விளையாட்டுக்கள் 2012” தொடங்கவிருக்கும் இவ்வேளையில், சுற்றுச்சூழலைப் பாதுகாக்கும் உணர்வுகளுடன், எதிலும் சமநிலை காக்கும் ஒரு வாழ்க்கைமுறையை அமைத்துக் கொள்வதற்கு உதவும் நான்கு இலட்சத்துக்கு மேற்பட்ட துண்டுப் பிரசுரங்களை விநியோகித்திருப்பதாகவும் ஆயர்கள் கூறியுள்ளனர்.

இங்கிலாந்திலும் வேல்சிலும் ஜூலை 29, வருகிற ஞாயிறன்று வாழ்வு தினம் சிறப்பிக்கப்படவிருக்கின்றது.

இவ்வாண்டின் இத்தினம், ஒவ்வொருவரும் நமது உடலை ஒவ்வொரு நிலையிலும் ஒவ்வொரு கட்டத்திலும் பாதுகாக்க வேண்டியதன் அவசியத்தை வலியுறுத்துகின்றது என்று பேராயர் பீட்டர் ஸ்மித் கூறினார். இவர், இங்கிலாந்து மற்றும் வேல்ஸ் ஆயர் பேரவையின் கிறிஸ்தவ ஆணையத் தலைவர்.

5. சண்டை தீவிரமடைந்துள்ள சிரியாவில் கிறிஸ்தவர்கள் மத்தியில் பயம் அதிகரித்துள்ளது, ஆயர் கவலை 

ஜூலை,24,2012. சிரியாவில் சண்டை வலுவடைந்துவரும் நிலையில், தமாஸ்கஸ் மற்றும் அலெப்போவில் வாழும் கிறிஸ்தவர்கள் மத்தியில் பயம் அதிகரித்துள்ளதாக அந்நாட்டின் மூத்த ஆயர் ஒருவர் தெரிவித்தார்.

தமாஸ்கஸ் மற்றும் அலெப்போ நகரங்களில் வாழும் கிறிஸ்தவர்கள் தாங்கள் குறிவைத்து தாக்கப்படுவோம் என்ற அச்சத்தில் வாழ்வதாகக் கூறினார் அலெப்போவின் கல்தேயரீதி கத்தோலிக்க ஆயர் Antoine Audo.

இவ்வாண்டு வசந்த காலத்தில் ஹோம்ஸ் நகரில் கடும் சண்டை இடம்பெற்றபோது கிறிஸ்தவர்கள் வாழ்ந்த பகுதி முழுவதும் கடும் தாக்குதலுக்கு உள்ளானதால் ஏறக்குறைய எல்லாரும், ஒரு இலட்சத்து 20 ஆயிரத்துக்கு மேற்பட்ட மக்கள் அவ்விடத்தைவிட்டு வெளியேறியதைக் குறிப்பிட்டார் ஆயர் Audo.

சண்டை தீவிரமடைந்துவரும் நிலையில் மக்கள் தன்னை அணுகுவதாகவும், தங்களது உடமைகளை விட்டுவிட்டு பாதுகாப்பான இடங்களுக்குச் செல்வதாகவும் ஆயர் தெரிவித்தார்.

6. சிரியா அகதிகளின் நிலைமை நாளுக்கு நாள் மோசமடைந்து வருகிறது:  லெபனன் காரித்தாஸ் இயக்குனர்

ஜூலை,24,2012. சிரியா எல்லைப் பகுதியிலுள்ள லெபனன் அகதிகள்  முகாம்களின் நிலைமை நாளுக்கு நாள் மோசமடைந்து வருவதாகவும், சிரியாவில் இடம்பெறும் சண்டைகளுக்குப் பயந்து தினமும் ஆயிரக்கணக்கான அகதிகள் எல்லைகளைக் கடப்பதாகவும் லெபனன் காரித்தாஸ் இயக்குனர் அருட்பணி Simon Faddoul கூறினார்.

இம்மக்களின் துன்பங்கள் சொல்லும் தரமன்று என ஆசிய செய்தி நிறுவனத்திடம் கூறிய அருட்பணி Faddoul, எங்கு சென்றாலும் ஏமாற்றம், வெறுப்பு, பழிவாங்குதல் போன்ற அழுகைச் சப்தங்களையே கேட்க முடிகின்றது, இவர்களில் பலர் கடவுள் தங்களை கைவிட்டு விட்டதாக உணருகின்றனர் என்று தெரிவித்தார்.

இச்செவ்வாயன்று மட்டும் 8 ஆயிரத்துக்கு மேற்பட்ட மக்கள் எல்லைகளைக் கடந்துள்ளனர், சிரியாவுக்கும் லெபனனுக்கும் இடையே வடக்கிலுள்ள Bekaa பள்ளத்தாக்கு அகதிகள் முகாம்களில் வாழும் 47 ஆயிரத்துக்கு மேற்பட்ட மக்களில் பெரும்பாலானோர் சுன்னி முஸ்லீம்கள். கிறிஸ்தவர்கள் 5 விழுக்காட்டினர் மட்டுமே என்றும் அக்குரு கூறினார்.

மேற்கத்திய நாடுகள் சிரியாவை மறந்து விடாமல் உடனடியான போர் நிறுத்தத்திற்கு அழுத்தம் கொடுக்குமாறும் அருட்பணி Faddoul கேட்டுக் கொண்டார்.

7. சிரியாவில் வேதிய ஆயுதங்கள் பயன்படுத்தக்கூடிய வாய்ப்பு உள்ளது, பான் கி மூன் கவலை

ஜூலை,24,2012. சிரியாவில் இடம்பெற்று வரும் கடும் சண்டையில் வேதிய ஆயுதங்கள் பயன்படுத்தக்கூடிய வாய்ப்பு இருப்பதாகவும், அனைத்துலகச் சமுதாயம் சிரியாவின் நிலைமையை உன்னிப்பாய்க் கவனித்து வருமாறும் ஐ.நா.பொதுச் செயலர் பான் கி மூன் கேட்டுக் கொண்டார்.

வேதிய ஆயுதங்கள் போன்ற பெரும் அழிவை ஏற்படுத்தக்கூடிய ஆயுதங்களைப் பயன்படுத்த யாராவது நினைத்தால், அது கடுமையாகக் கண்டிக்கத்தக்கது என்றும் பான் கி மூன் கூறினார்.

OPCW என்ற வேதிய ஆயுதங்கள் தடை நிறுவனத்தில் சிரியா உறுப்பினர் இல்லை என்பதையும் கவலையோடு குறிப்பிட்ட அவர், வெளிநாட்டுத் தாக்குதலுக்கு எதிராக வேதிய மற்றும் உயிரியல் ஆயுதங்களை சிரியா பயன்படுத்தும் என்று சிரியா அரசு எச்சரித்து வருவதையும் குறிப்பிட்டார்.

சிரியா அரசுத்தலைவர் Bashar al-Assadக்கு எதிராக சுமார் 16 மாதங்களாக இடம்பெற்று வரும் கடும் சண்டையில் 10 ஆயிரத்துக்கு மேற்பட்ட மக்கள் கொல்லப்பட்டுள்ளனர்.

8. மருந்துக்கு கட்டுப்படாத HIV தொற்று அதிகரிக்கிறது

ஜூலை,24,2012. கிழக்கு ஆப்பிரிக்காவில் மருந்துக்கு கட்டுப்படாத HIV நோய்க்கிருமிகள் வேகமாக அதிகரித்துவருவதாக உலக நலவாழ்வு நிறுவனத்தின் ஆய்வு எச்சரித்துள்ளது.

உலக நலவாழ்வு நிறுவனமும் இலண்டன் பல்கலைக்கழகக் கல்லூரியும் இணைந்து செய்த ஆய்வின்படி கிழக்கு ஆப்ரிக்காவில் HIV நோய்க்கிருமியானது மருந்துக்கு கட்டுப்படாத தன்மையை அடைந்து வருவதாக தெரிய வந்திருக்கிறது.

அமெரிக்கா, பிரிட்டன் போன்ற பொருளாதார ரீதியில் வளர்ச்சியடைந்த நாடுகளில் HIV நோய்க்கிருமிகள் பரவியவர்களில் சுமார் 10 விழுக்காட்டுக்கும் குறைவானவர்களுக்கு மட்டுமே மருந்துக்கு கட்டுப்படாத தன்மை காணப்படுகின்றது.

ஆனால் கிழக்கு ஆப்ரிக்காவில் இத்தகையவர்கள் 29 விழுக்காடாக இருப்பதைக் கண்டுபிடித்த ஆய்வாளர்கள் இது ஆண்டுக்கு ஆண்டு வேகமாக அதிரித்துக் கொண்டிருப்பதாகவும் கண்டுபிடித்துள்ளார்கள்.

இந்நிலை நீடித்தால் கடந்த பத்து ஆண்டுகளாக எய்ட்ஸ் மரணங்கள் தொடர்ந்து குறைந்து கொண்டே வரும் நிலைமை மாறி, மீண்டும் எய்ட்ஸ் மரணங்கள் அதிகரிக்கும் ஆபத்து இருப்பதாகவும் இந்த ஆய்வை நடத்தியவர்கள் எச்சரித்துள்ளார்கள்.

Catholic News in Tamil - 23/07/12

1. திருத்தந்தை :  தீயவன் இறைவனின் அமைதியை எப்போதும் சீர்குலைக்கிறான்

2. டென்வர் நகர் திரையரங்கு வன்முறை, அறிவற்ற கொடுஞ்செயல் : திருத்தந்தை

3. ஆயனுக்குத் தேவையான அடிப்படை குணம், கருணை - வத்திக்கான் அதிகாரி

4. 'வடக்கில் குடியரசு இல்லை' : அமெரிக்கத் தூதரிடம் யாழ்ப்பாண ஆயர்

5. இந்தோனேசியாவின் Aceh பகுதியில் நான்கு கத்தோலிக்கக் கோவில்களில் தாக்குதல்கள்

6. பெரு நாட்டில் அமைதிப் பேச்சுவார்த்தைகள் இடம்பெற ஆயர் பேரவைத் தலைவர் அழைப்பு

7. Congo  ஆயர்கள் தலைமையில் 'நம்பிக்கையின் ஊர்வலம்'

8. தலித் மக்களுக்கு எதிரான அடக்குமுறைகள், நவீன அடிமைத்தனம் போல் உள்ளன

9. எயிட்ஸ் நோய் பரவுவதைக் கட்டுப்படுத்தும் முயற்சிகள் வெற்றிபெற்று வருகின்றன‌

------------------------------------------------------------------------------------------------------

1. திருத்தந்தை :  தீயவன் இறைவனின் அமைதியை எப்போதும் சீர்குலைக்கிறான்

ஜூலை,23,2012. மனித இதயங்களிலும், உடலுக்கும் ஆன்மாவுக்கும் இடையேயும், மனிதருக்கும் இறைவனுக்கும் இடையேயும், மனிதர்களுக்கிடையேயான உறவுகளிலும், சமூக மற்றும் அனைத்துலக உறவுகளுக்கு இடையேயும், மனிதருக்கும் படைப்புக்கும் இடையேயும்கூட  தீயவன் பிரிவினைகளை விதைத்து இறைவனின் வேலையை எப்போதும் சீர்குலைப்பதற்கு முயற்சிக்கிறான் என்று திருத்தந்தை 16ம் பெனடிக்ட் கூறினார்.

காஸ்தெல் கந்தோல்ஃபோ பாப்பிறை கோடை விடுமுறை வளாகத்தின் முன்னர் கூடியிருந்த மூவாயிரத்துக்கு மேற்பட்ட விசுவாசிகளுக்கு இஞ்ஞாயிறு நண்பகல் மூவேளை செப உரை வழங்கிய திருத்தந்தை இவ்வாறு கூறினார்.

இயேசு மரிய மகதலாவிடமிருந்து ஏழு பேய்களை விரட்டிய நற்செய்திப் பகுதியைக் குறிப்பிட்டுப் பேசியத் திருத்தந்தை, தீயவன் சண்டையை விதைக்கிறான், இறைவன் அமைதியை உருவாக்குகிறார் என்று கூறினார்.

மேலும், இஞ்ஞாயிறு இறைவார்த்தை, அடிப்படையான மற்றும் எப்போதும் கவர்கின்ற விவிலியக் கருப்பொருள் குறித்து நமக்கு நினைவுபடுத்துகின்றது என்றுரைத்த திருத்தந்தை, இறைவன் மனித சமுதாயத்தின் ஆயர்; அதாவது இறைவன் நமக்கு வாழ்வளிக்கவும், நாம் உண்டு ஓய்வெடுக்க உதவும் நல்ல மேய்ச்சல் நிலத்துக்கு அழைத்துச் செல்லவும் விரும்புகிறார், நாம் தவறி விடவும் இறக்கவும் அவர் விரும்பவில்லை, நம்வாழ்வின் நிறைவான நமது பயணத்தின் இலக்கை நாம் அடைய அவர் விரும்புகிறார், இதுவே ஒவ்வொரு தந்தையும் தாயும் தங்களது பிள்ளைகளுக்கு விரும்புவார்கள், நன்மைத்தனம், மகிழ்ச்சி மற்றும் நிறைவையே விரும்புவார்கள் என்றும் கூறினார்.

இயேசு வழியாக இறைவன் நடத்தும் ஆழமானக் குணப்படுத்தல், உண்மை, முழு அமைதி, ஒருவர் தன்னோடும் பிறரோடும், இறைவனோடும், உலகோடும் கொள்ளும் ஒப்புரவின் கனி ஆகியவற்றில் இருக்கின்றது என்பதை மரிய மகதலா குறித்த நிகழ்வு விளக்குகின்றது என்றும் அவர் தெரிவித்தார்.

இது தீயவன் செய்ய முயற்சிப்பதற்கு எதிரானது என்றுரைத்த திருத்தந்தை, இந்த ஒப்புரவை அடைவதற்கு நல்ல ஆயராம் இயேசு உலகின் பாவங்களைப் போக்கும் இறைவனின் செம்மறியாக மாறினார் என்று கூறினார்.

“உண்மையாகவே, என் வாழ்நாள் எல்லாம் உம் அருள் நலமும் பேரன்பும் எனைப் புடைசூழ்ந்துவரும்; நானும் ஆண்டவரின் இல்லத்தில் நெடுநாள் வாழ்ந்திருப்பேன்” என்று திருப்பாடல் 23,6ல் சொல்லப்பட்டுள்ள வியத்தகு வாக்குறுதியை இவ்வாறு அவர் நிறைவேற்றினார் என்றும் திருத்தந்தை மூவேளை செப உரையில் கூறினார்.

2. டென்வர் நகர் திரையரங்கு வன்முறை, அறிவற்ற கொடுஞ்செயல் : திருத்தந்தை

ஜூலை,23,2012. இலண்டனில் வருகிற வெள்ளிக்கிழமையன்று தொடங்கும்  ஒலிம்பிக் விளையாட்டுக்களுக்கு நல்வாழ்த்துக்களையும் தெரிவித்தார் திருத்தந்தை 16ம் பெனடிக்ட்.

இஞ்ஞாயிறு மூவேளை செப உரைக்குப் பின்னர் ஒலிம்பிக் விளையாட்டுக்களுக்கு நல்வாழ்த்துக்களைத் தெரிவித்த திருத்தந்தை,  “ஒலிம்பிக் விளையாட்டுக்கள் உலகினர் மத்தியில் சகோதரத்துவத்தின் உண்மையான அனுபவத்தைக் கொணரட்டும்; உலகம் முழுவதும் அமைதி மற்றும் ஒப்புரவை  ஊக்குவித்து அவற்றின் கனிகளைத் தரட்டும்; பல நாடுகளின் பல விளையாட்டு வீரர்கள் கலந்து கொள்ளும் நிகழ்வாக இது இருக்கின்றது; எனவே இது ஓர் உறுதியான அடையாள விழுமியத்தைக் கொண்டுள்ளது; இதனாலே கத்தோலிக்கத் திருஅவை இதனை அன்போடும் கவனத்தோடும் நோக்கி வருகின்றது” என்று கூறினார்.

மேலும், அமெரிக்க ஐக்கிய நாட்டு டென்வர் நகர் அவ்ரோரா திரையரங்கில் கடந்த வெள்ளிக்கிழமையன்று நடத்தப்பட்டத் துப்பாக்கிச்சூட்டு வன்முறை அறிவற்ற கொடுஞ்செயல் எனவும், இச்செயதி கேட்டுத் தான் மிகவும் அதிர்ச்சியடைந்ததாகவும் கூறிய திருத்தந்தை, டான்சானிய நாட்டு ஜான்சிபாருக்கு அருகில் படகு கவிழ்ந்து பலர் உயிரிழந்த நிகழ்வு குறித்தும் கவலை தெரிவித்தார்.

இந்த நிகழ்வுகளில் பலியானவர்கள் மற்றும் காயமடைந்தவர்கள் குடும்பத்தினருக்குத் தனது அனுதாபங்களையும் செபங்களையும் தெரிவித்தார் திருத்தந்தை 16ம் பெனடிக்ட்.

அவ்ரோரா திரையரங்கு வன்முறையில் 12 பேர் இறந்தனர் மற்றும் 58 பேர் காயமுற்றனர். ஜான்சிபார் படகு விபத்தில் 68 பேர் இறந்துள்ளனர். பலர் காணாமற்போயுள்ளனர். இவர்கள் நீரில் மூழ்கியிருக்கலாம் எனச் சந்தேகிக்கப்படுகிறது.

3. ஆயனுக்குத் தேவையான அடிப்படை குணம், கருணை - வத்திக்கான் அதிகாரி

ஜூலை,23,2012. ஆயனுக்குத் தேவையான அடிப்படை குணம் கருணை என்பதை இயேசுவின் வாழ்வில் நாம் கற்றுக்கொள்ளலாம் என்று வத்திக்கான் உயர் அதிகாரி ஒருவர் கூறினார்.

மத்திய ஆப்ரிக்கக் குடியரசு நாட்டில் ஒருவார மேய்ப்புப் பணி பயணத்தைக் திருப்பீட விசுவாசப்பரப்புப் பேராயத் தலைவரான கர்தினால் Fernando Filoni, கடந்த புதனன்று துவக்கினார்.

இப்பயணத்தின் ஓர் உச்சகட்டமாக, திருத்தந்தை 16ம் பெனடிக்ட் அவர்களால் மேமாதம் நியமனம் பெற்ற நான்கு ஆயர்களை கர்தினால் Filoni இஞ்ஞாயிறன்று திருநிலைப்படுத்தினார்.

ஐந்து மணி நேரம் நிகழ்ந்த இந்தத் திருநிலைபடுத்தும் நிகழ்வில் மறையுரையாற்றிய கர்தினால் Filoni, மத்திய ஆப்ரிக்கக் குடியரசு, ஆப்ரிக்க நாடுகளுக்கு மட்டுமல்லாமல், அனைத்துலகக் கத்தோலிக்கத் திருஅவைக்கும் ஒளிவிளக்காகத் திகழும் என்ற தன் நம்பிக்கையை வெளியிட்டார்.

அக்டோபர் மாதம் துவங்கவிருக்கும் விசுவாச ஆண்டு நம் அனைவருக்குமே புத்துணர்வும், புதிய விசுவாச வாழ்வும் வழங்கும் ஒரு தருணமாக அமைய வேண்டும் என்ற தன் ஆவலையும் வெளியிட்டார் கர்தினால் Filoni.

இத்திருநிலைப்பாட்டு நிகழ்வில் மத்திய ஆப்ரிக்கக் குடியரசின் அரசுத் தலைவர், பிரதமர், நகர மேயர் உட்பட பல உயர் நிலை அரசு அதிகாரிகளும், மத்திய ஆப்ரிக்கத் திருஅவையின் அனைத்து ஆயர்களும், இன்னும் France, Cameroon, Chad, Ghana, ஆகிய நாடுகளிலிருந்து வந்திருந்த ஆயர்களும் கலந்து கொண்டனர்.

4. 'வடக்கில் குடியரசு இல்லை' : அமெரிக்கத் தூதரிடம் யாழ்ப்பாண ஆயர்

ஜூலை,23,2012. இலங்கையின் வடக்கே யாழ்ப்பாணத்தில் மக்களின் ஜனநாயக உரிமைகள் தொடர்ந்து மறுக்கப்பட்டுவருவதாக யாழ்ப்பாண ஆயர் தாமஸ் சவுந்தரநாயகம் அமெரிக்கத் தூதர் பற்றீஸியா பூட்டனிஸிடம் சுட்டிக்காட்டியுள்ளார்.

உரிமை மீறல், ஆட்கடத்தல், தாக்குதல்,  கொலை, போர், மக்கள் தமது கருத்துக்களை வெளிப்படுத்த அனுமதிக்கப்படாமை, குடியரசு ரீதியாக அவர்கள் தமது மாற்று நிலைப்பாட்டை வெளிப்படுத்துவதற்கு முட்டுக்கட்டைகள் போன்ற குடியரசு விரோதச் செயற்பாடுகள் நிறுத்தப்பட வேண்டும் என்றும் யாழ்ப்பாணத்திற்கு சென்றிருந்த அமெரிக்க தூதரிடம் எடுத்துக்கூறியதாக யாழ்ப்பாண ஆயர் சவுந்தரநாயகம் தெரிவித்தார்.

இலங்கையில் தமது பணியை முடித்துக்கொண்டு வெளியேறவுள்ள இலங்கைக்கான அமெரிக்க தூதர் பற்றீஸியா பூட்டனிஸ் யாழ்ப்பாணத்திற்கு சென்றிருந்தபோது இவ்விருவரிடையேயான சந்திப்பு இடம்பெற்றது.

இனப்பிரச்சனைக்கு ஓர் அரசியல் தீர்வு காணப்பட வேண்டியதன் அவசியம் குறித்து தொடர்ச்சியாக இலங்கை அரசிடம் அமெரிக்கா வலியுறுத்தி வருகின்றபோதிலும், அரசியல் தீர்வு காண்பதற்கு அரசு முன்வரவில்லை என்பது மட்டுமல்ல, போருக்குப் பிந்திய அபிவிருத்திச் செயற்பாடுகளில் மக்கள் திருப்தி அடைந்துவிடுவார்கள் என்ற மாயையில் அரசு நம்பிக்கை கொண்டிருப்பதாகத் தெரிகின்றது என்றும் அமெரிக்க தூதர் தம்மிடம் தெரிவித்ததாக யாழ்ப்பாண ஆயர் கூறினார்.

5. இந்தோனேசியாவின் Aceh பகுதியில் நான்கு கத்தோலிக்கக் கோவில்களில் தாக்குதல்கள்

ஜூலை,23,2012. இந்தோனேசியாவில் சிறுபான்மை மதங்களுக்கு உரிய மதிப்பு வழங்கப்படவில்லை என்றும், இதனால், அம்மதங்களைச் சார்ந்தவர்களுக்குப் பாதுகாப்பும் வழங்கப்படுவதில்லை என்றும் அந்நாட்டின் கிறிஸ்தவத் தலைவர்கள் கூறினர்.

கடந்த மூன்று மாதங்களாக இந்தோனேசியாவின் Aceh பகுதியில் உள்ள நான்கு கத்தோலிக்கக் கோவில்கள் உட்பட 20 கிறிஸ்தவக் கோவில்கள் பல்வேறு தாக்குதல்களுக்கு உள்ளாகி வந்துள்ளன.

இத்தாக்குதல்கள் குறித்து காவல்துறைக்குப் புகார்கள் அளிக்கப்பட்டபோதும், காவல்துறையினர் இதுவரை எவ்வித நடவடிக்கையும் எடுக்காமல் இருப்பது ஏமாற்றத்தையும் வேதனையையும் தருகிறதென்று வட சுமத்ரா கூட்டமைப்பு என்ற அணியினர் இத்திங்களன்று அறிக்கை ஒன்றை அரசுக்குச் சமர்ப்பித்துள்ளனர்.

இஸ்லாமிய அடிப்படைவாதக் குழுக்களால் தொடர்ந்து நிகழ்ந்துவரும் இந்த வன்முறைகளால், அப்பகுதியில் உள்ள பல கிறிஸ்தவ ஆலயங்கள் தங்கள் வழிபாடுகளை நிறுத்திவிட்டு, ஆலயங்களை மூடி வைத்துள்ளனர் என்று ஆசிய செய்தி நிறுவனம் கூறியுள்ளது.

6. பெரு நாட்டில் அமைதிப் பேச்சுவார்த்தைகள் இடம்பெற ஆயர் பேரவைத் தலைவர் அழைப்பு

ஜூலை,23,2012. பெரு நாடு சுதந்திரமடைந்ததன் 191ம் ஆண்டு இவ்வார இறுதியில் சிறப்பிக்கப்பட உள்ளதையொட்டி, நாட்டின் அமைதி கலந்துரையாடலுக்கு சிறப்பு அழைப்பு ஒன்றை விடுத்துள்ளார் அந்நாட்டு ஆயர் பேரவைத் தலைவர்.

இம்மாதம் 28ம் தேதி சிறப்பிக்கப்பட உள்ள பெரு நாட்டு சுதந்திர தினத்தையொட்டி இத்திங்களன்று பத்திரியாளர்களைச் சந்தித்த பேராயர் Salvador Piñeiro, நாட்டில் அமைதி மற்றும் பேச்சுவார்த்தைகள் இடம்பெற, பெரு நாட்டின் அனைத்துக் கோவில்களிலும் சங்கிலித்தொடர் செபங்கள் இடம்பெறும் என்றார்.

Cajamarca  உட்பட நாட்டின் பல்வேறு பகுதிகளில் காணப்படும் சமுதாய முரண்பாடுகள் மற்றும் போராட்டங்கள் குறித்தும் தன் கவலையை வெளியிட்டார் பேராயர் Piñeiro.

7. Congo  ஆயர்கள் தலைமையில் 'நம்பிக்கையின் ஊர்வலம்'

ஜூலை,23,2012. நாட்டைப் பிரிவினையிலிருந்து காப்பாற்றும் நோக்கிலான  'நம்பிக்கைகையின் ஊர்வலம்' ஒன்றிற்கு ஏற்பாடுச் செய்துள்ளனர் Congo நாட்டு ஆயர்கள்.

Congo நாடு பிரிவினைகளை நோக்கிச் செல்லாமல் ஒன்றிப்பில் நிலைத்திருக்க அந்நாட்டு மக்கள் அனைவரும் ஒன்றிணைந்து வந்து, ஆகஸ்ட் மாதம் முதல் தேதி இடம்பெற உள்ள இந்த ஊர்வலத்தில் கலந்துகொள்ளவேண்டும் என அழைப்பு விடுத்துள்ளனர் ஆயர்கள்.

இம்மாதம் முப்பதாம் தேதி, நாட்டின் ஒவ்வொரு கோவிலிலும் துவங்க உள்ள அமைதி மற்றும் ஒன்றிப்பிற்கான செபத்தில் அனைவரும் பங்குகொள்ள வேண்டும் என்ற விண்ணப்பத்தையும் முன்வைத்துள்ள ஆயர்கள், உள்நாட்டுப்போரால் பாதிக்கப்பட்டுள்ள மக்களுக்கு உதவும் நோக்கில் இந்நாட்களில் சிறப்பு நிதி திரட்டல் இடம்பெறும் எனவும் தெரிவித்தனர்.

Congo ஜனநாயக குடியரசின் இன்றைய உண்மையான நிலைகள் குறித்து சர்வதேச சமூகம் அறிந்துகொள்ள உதவும் நோக்கில், ஐக்கிய நாட்டு சபை, ஐரோப்பிய ஐக்கிய அவை மற்றும் ஆப்ரிக்க அவை ஆகியவைகள் மூலம் முயற்சிகள் மேற்கொள்ள உள்ளதாகவும் தங்கள் திட்டங்களை வெளியிட்டுள்ளனர் அந்நாட்டு ஆயர்கள்.

அதேவேளை, Congo நாட்டு குடிமக்கள் ஒவ்வொருவரும், இன்றைய துன்பகரமான சூழல்களிலும் நம்பிக்கையை இழக்காமல் அமைதிக்காக உழைக்க வேண்டும் என்ற அழைப்பை முன்வைத்தார் Congo ஆயர் பேரவை தலைவர் ஆயர் Nicolas Djomo.

இதற்கிடையே, Congoவைச் சுற்றியுள்ளப் பகுதியின் அமைதி வாய்ப்புகள் குறித்து Congo, Rwanda, Burundi  மற்றும் Uganda  நாடுகளின் ஆயர்களும் அந்நாடுகளின் கிறிஸ்தவ மற்றும் ஆர்த்தடாக்ஸ் கிறிஸ்தவ சபைப் பிரதிநிதிகளும் இத்திங்களன்று கென்யாவின் நைரோபியில் கூடி விவாதித்தனர்.

8. தலித் மக்களுக்கு எதிரான அடக்குமுறைகள், நவீன அடிமைத்தனம் போல் உள்ளன

ஜூலை,23,2012. இந்தியாவில் தலித் மக்களுக்கு எதிரான சில சமூகங்களின் அடக்குமுறைகளை நோக்கும்போது, நவீன அடிமைத்தனம் இன்னும் நடைமுறையில் உள்ளது போல் தோன்றுவதாக கவலையை வெளியிட்டுள்ளார் அமெரிக்க ஐக்கியநாட்டு கிறிஸ்தவ மறைபோதகர் ஒருவர்.

இந்திய நாட்டின் மக்கள் தொகையில் ஏறத்தாழ நான்கில் ஒரு பகுதியாக இருக்கும் தலித் இனத்தவர் அடக்குமுறைகளுக்கும் சித்ரவதைகளுக்கும் உட்படுத்தப்பட்டு, அடிமைகளுக்கு இணையாக எவ்வித உரிமைகளும் வாய்ப்புகளும் இன்றி, விலங்குகளைவிட கேவலமாக நடத்தப்படுவதாகத் தெரிவித்தார் கிறிஸ்தவ போதகர் Mathew Cork.

இந்தியாவில் 1கோடியே 50 இலட்சம் சிறார் தொழிலாளர்கள் உட்பட 2கோடி பேர் மிகக் குறைந்த ஊதியத்துடன் கொத்தடிமைகள்போல் நடத்தப்படுவதாகவும் தெரிவித்தார் அவர்.

தலித் மக்களுக்குக் கல்வியை வழங்குவதன் மூலம், அம்மக்களின் விடுதலையையும் மாண்பையும் பெற்றுத்தர முடியும் என்பதை மனதிற்கொண்டு இந்தியாவில் பல கல்விக்கூடங்களை தலித் இன மக்களுக்கென கட்டித்தர திட்டமிட்டுச் செயலாற்றி வருவதாகவும் தெரிவித்தார் Mathew Cork.

9. எயிட்ஸ் நோய் பரவுவதைக் கட்டுப்படுத்தும் முயற்சிகள் வெற்றிபெற்று வருகின்றன‌ 

ஜூலை,23,2012. எயிட்ஸ் நோய்க்கெதிரான நடவடிக்கைகள் ஓரளவு வெற்றிப்பாதையை நோக்கி நடைபோட்டுவரும் இவ்வேளையில் எக்காரணம் கொண்டும் உலக நாடுகள் தங்கள் முயற்சியிலிருந்து பின்வாங்கக்கூடாது என அழைப்பு விடுத்துள்ளனர் அமெரிக்க ஐக்கிய நாட்டில் எயிட்ஸ் குறித்த கருத்தரங்கில் பங்குபெறும் வல்லுனர்கள்.

எய்ட்ஸ் நோயாளிகளைக் காப்பாற்ற வல்ல மருந்துகள் இன்னும் முழுமையாகக் கண்டுபிடிக்கப்படவில்லையெனினும், இந்நோய் பரவுவதைக் கட்டுப்படுத்தும் முயற்சிகள் வெற்றிபெற்று வருவதாக உரைத்த அறிவியலாளர்கள், இந்நோய்க்கு எதிரானப் போராட்டங்கள் எப்படியும் முன்னோக்கி எடுத்துச் செல்லப்படவேண்டும் எனவும் உரைத்தனர்.

புள்ளிவிவரக் கணக்குகளின்படி, இன்று உலகில் 3கோடியே 42 இலட்சம் பேர் HIV நோய்க் கிருமிகளுடன் வாழ்கின்றனர். ஒவ்வோர் ஆண்டும் 25 இலட்சம்பேர் HIV நோய்க் கிருமிகளை புதிதாகப் பெறுகின்றனர். கடந்த ஆண்டில் மட்டும் ஏழை நாடுகளில் எயிட்ஸ் நோய்க்கெதிரான நடவடிக்கைகளுக்கென 1680 கோடி டாலர் செலவிடப்பட்டுள்ளது.

Catholic News in Tamil - 21/07/12

1. டென்வர் திரையரங்குத் துப்பாக்கிச்சூடு நிகழ்வில் வருந்தும் சமூகத்தினருடன் ஆயர்கள் ஒருமைப்பாட்டுணர்வு

2. ஐரோப்பிய ஆயர்கள் : சிரியாவில் அமைதியை ஏற்படுத்துவதற்குத் தாமதிக்க வேண்டாம்

3. பணமும் அதன் ஒளிவுமறைவின்மையும் குறித்த அருள்தந்தை லொம்பார்தியின் கருத்து

4. கொலம்பிய மக்கள் Chiquinquira அன்னைமரியின் நினைவோடு சுதந்திர தினத்தைச் சிறப்பிக்க வத்திக்கான் அதிகாரி அழைப்பு

5. எகிப்தில் கிறிஸ்தவர்களுக்குப் பாதுகாப்பு அளிக்கும் புதிய சட்ட எண் அரசியல் அமைப்பில் இடம்பெற வேண்டும் : Al-Azhar பல்கலைக்கழகம் பரிந்துரை

6. கிறிஸ்தவர்களுக்கு எதிரான வன்முறைகளை நிறுத்துவதற்கு உலகத் தலைவர்கள் முன்னுரிமை அளிக்க வேண்டும் : இத்தாலிய வெளியுறவு அமைச்சர்

7. வாஷிங்டனில் 19வது அனைத்துலக எய்ட்ஸ் கருத்தரங்கு

8. ஆப்ரிக்காவில் புதிதாகக் கண்டுபிடிக்கப்பட்டுள்ள நீர்வளம் நூற்றாண்டுகளுக்கு உதவும்

------------------------------------------------------------------------------------------------------

1. டென்வர் திரையரங்குத் துப்பாக்கிச்சூடு நிகழ்வில் வருந்தும் சமூகத்தினருடன் ஆயர்கள் ஒருமைப்பாட்டுணர்வு

ஜூலை,21,2012. அமெரிக்க ஐக்கிய நாட்டு கொலராடோ மாநிலத்தின் டென்வர் நகர் திரையரங்கு ஒன்றில் இவ்வெள்ளி நள்ளிரவுக் காட்சியில் இடம்பெற்ற துப்பாக்கிச்சூட்டில் இறந்தவர்கள் மற்றும் காயமடைந்தவர்கள் குடும்பத்தினருக்குத் தங்களது ஆழ்ந்த அனுதாபங்களைத் தெரிவிக்கும் செபங்களையும் செய்திகளையும் தெரிவித்துள்ளனர் அந்நாட்டு ஆயர்கள்.

டென்வர் நகரின் Aurora புறநகர்ப் பகுதியிலுள்ள நூற்றாண்டுத் திரையரங்கில் “The Dark Knight Rises” என்ற திரைப்படத்தின் முதல் காட்சி ஒளிபரப்பாகிக் கொண்டிருந்தநேரத்தில், நள்ளிரவு 12.30 மணிக்கு 24 வயதுடைய James Holmes என்ற மனிதர் முகமூடியுடன் நுழைந்து துப்பாக்கியால் சரமாரியாகச் சுட்டதில் 12 பேர் சம்பவ இடத்திலேயே இறந்தனர். 50க்கும் மேற்பட்டோர் காயமடைந்தனர்.

இவ்வன்முறை நிகழ்வு குறித்து அறிக்கை வெளியிட்ட டென்வர் பேராயர்  Samuel J. Aquila மற்றும் துணை ஆயர் James D. Conley, இந்நிகழ்ச்சி தங்களுக்குப் பெரும் அதிர்ச்சியைக் கொடுத்திருப்பதாகவும், அழுவாரோடு தாங்கள் அழுவதாகவும்,  இதைச் செய்த குற்றவாளியின் மனமாற்றத்திற்காகத் தாங்கள் செபிப்பதாகவும் கூறியுள்ளனர். 

இந்தக் குற்றவாளியின் இதயத்தைக் கடந்த இரவில் தீமை ஆட்சி செய்தது, இத்தகைய தீமையின் இருளை இயேசு கிறிஸ்துவால் மட்டுமே வெல்ல முடியும் என்றும் ஆயர்கள் தங்களது அறிக்கையில் குறிப்பிட்டுள்ளனர்.

மேலும், அமெரிக்க ஐக்கிய நாட்டில் கொடிகளை அரைக்கம்பத்தில் பறக்கவிடுமாறு அதிபர் ஒபாமா ஆணையிட்டுள்ளார்.

சந்தேகத்தின்பேரில் கைது செய்யப்பட்டுள்ள குற்றவாளி James Holmes, கடந்த அறுபது நாள்களில் நான்குத் துப்பாக்கிகளையும் ஆறாயிரத்துக்கு மேற்பட்ட துப்பாக்கிக் குண்டுகளையும் வாங்கியிருக்கிறார் என்று Aurora காவல்துறை கூறியுள்ளது.

இந்தத் திரையரங்கு துப்பாக்கிச்சூடு நிகழ்வு, அமெரிக்க ஐக்கிய நாட்டில் கடந்த ஐந்து ஆண்டுகளுக்கு மேற்பட்ட காலத்தில் நடைபெற்றுள்ள மிகக் கொடூரமான நிகழ்வு என்று சொல்லப்படுகின்றது.

2. ஐரோப்பிய ஆயர்கள் : சிரியாவில் அமைதியை ஏற்படுத்துவதற்குத் தாமதிக்க வேண்டாம் 

ஜூலை,21,2012. உரையாடல் இடம்பெற வேண்டிய இடத்தை ஆயுதங்கள் ஆக்ரமித்துள்ள சிரியாவில் வன்முறை கட்டவிழ்த்து விடப்பட்டிருப்பது தங்களுக்கு மிகுந்த வேதனையைத் தருவதாக ஐரோப்பிய ஆயர்கள் கூறியுள்ளனர்.

சிரியாவின் நிலவரம் குறித்து அறிக்கை வெளியிட்டுள்ள ஐரோப்பிய ஆயர் பேரவைகள் கூட்டமைப்பின் நிர்வாகக் குழு, வன்முறையில் ஈடுபட்டுள்ள அனைவரும், தங்களுக்கிடையேயான பகையுணர்வுகளையும் ஆயுதங்களையும் கைவிட்டு உரையாடல், ஒப்புரவு மற்றும் அமைதியின் பாதையைத் தேர்ந்தெடுப்பதற்கு இறைவன் வழிசெய்வார் என்ற நம்பிக்கையைத் தெரிவித்துள்ளது.

சண்டை எப்பொழுதும் தவிர்க்க முடியாத வேதனைகளையும் அழிவையும் கடும் பின்விளைவுகளையுமே நாட்டிற்குக் கொண்டுவரும் எனக் கூறும் அவ்வறிக்கை, வருகிற சில நாள்கள் சிரியா குறித்து ஓர் அறுதியான தீர்மானம் எடுப்பதற்கு முக்கியமான நாள்கள் என்பதால் ஐரோப்பியக் கிறிஸ்தவர்கள் அந்நாட்டுக்காகச் சிறப்பாகச் செபிக்குமாறு கேட்டுள்ளது.

இவ்வறிக்கையில் ஐரோப்பிய ஆயர் பேரவைகள் கூட்டமைப்பின் தலைவர் புடாபெஸ்ட் பேராயர் கர்தினால் Péter ErdőArchbishop, உதவித் தலைவர் ஜெனோவா பேராயர் கர்தினால் Angelo Bagnasco, Przemyśl பேராயர் Józef Michalik ஆகியோர் கையெழுத்திட்டுள்ளனர்.

3. பணமும் அதன் ஒளிவுமறைவின்மையும் குறித்த அருள்தந்தை லொம்பார்தியின் கருத்து

ஜூலை,21,2012. பொருளாதார மற்றும் நிதித்துறைகளில் உருவாகியுள்ள புதியவகைக் குற்றங்களைக் கட்டுப்படுத்தி அதற்கு எதிராய் நடவடிக்கை எடுக்கும் உலகளாவிய அமைப்பில் வத்திக்கான் இணைந்துள்ளது ஒரு நல்ல முயற்சி எனவும் இது உலகளாவியத் திருஅவைக்கு நல்லதோர் எடுத்துக்காட்டாய் இருக்கும் எனத் தான் நம்புவதாகவும் வத்திக்கான் தொலைக்காட்சி இயக்குனர் கூறினார்.

வத்திக்கான் தொலைக்காட்சியின் வார நிகழ்ச்சியில் இவ்வாறு உரைத்த அதன் இயக்குனர் இயேசு சபை அருள்தந்தை பெதரிக்கோ லொம்பார்தி, ஐரோப்பிய அவையின் ஓர் அங்கமான Moneyval என்ற அமைப்பு, வத்திக்கானின் பணப்பரிமாற்ற நிலவரம் குறித்து ஆய்வு செய்து வெளியிட்டுள்ள அறிக்கை  குறித்துப் பேசினார்.

வத்திக்கான் சரியான பாதையில் சென்று கொண்டிருந்தாலும், இன்னும் பல காரியங்கள் செய்ய வேண்டியிருக்கின்றன என்ற அவ்வமைப்பின் அறிக்கை குறித்துப் பேசிய அருள்தந்தை லொம்பார்தி, திருஅவை நிறுவனங்களும் இந்த ஆய்வுப்பாதையில் தங்களைத் தாழ்மையுடன் உட்படுத்துவது சரியானதும், தகுந்ததுமாகவும் இருக்கும் என்றும் பரிந்துரைத்தார்.

பொருளாதார மற்றும் நிதித்துறைகளில் உருவாகியுள்ள புதியவகைக் குற்றங்களைக் கட்டுப்படுத்துவதில் மற்றவர்களைவிட தாங்கள் மிகவும் திறமைசாலிகள் என்று நினைக்க முடியாது, ஏனெனில் மக்கள்மீது நல்ல எண்ணங்களுடன் வைக்கப்படும் நம்பிக்கை, சிலவேளைகளில் அவர்கள் அந்த நம்பிக்கையை இழக்கச் செய்யும் விதத்தில் நடந்து கொள்வதற்கு காரணமாக இருக்கக்கூடும் என்றும் அருள்தந்தை லொம்பார்தி கூறினார்.

4. கொலம்பிய மக்கள் Chiquinquira அன்னைமரியின் நினைவோடு சுதந்திர தினத்தைச் சிறப்பிக்க வத்திக்கான் அதிகாரி அழைப்பு

ஜூலை21,2012. சுதந்திர தினத்தைக் கொண்டாடும் கொலம்பிய  நாடு தனது பாதுகாவலியான Chiquinquira அன்னைமரியை மறக்கக் கூடாது என்று, அந்நாட்டின் சுதந்திர தின விழாவுக்குச் சென்றிருந்த வத்திக்கான் அதிகாரி ஒருவர் கேட்டுக் கொண்டார்.

அன்னைமரியா மீது கொலம்பிய மக்கள் கொண்டிருந்த நம்பிக்கையே அவர்கள் தங்களது துன்பங்களையும் நெருக்கடிகளையும் எதிர்கொள்ள உதவியது என்று, வத்திக்கான் நகர நிர்வாகத்தின் தலைவர் கர்தினால் Giuseppe Bertello கூறினார்.

ஜூலை 20, இவ்வெள்ளியன்று கொலம்பியத் தலைநகர் பொகோட்டாவில் சிறப்பிக்கப்பட்ட திருப்பலியில் திருப்பீடத்துக்கான 25 அரசியல் தூதர்கள் உட்பட பலர் கலந்து கொண்டனர்.

தென் அமெரிக்க நாடான கொலம்பியா, 1810ம் ஆண்டு ஜூலை 20ம் தேதி இஸ்பெயினிடமிருந்து விடுதலை பெற்றது. இது உலகில் பரப்பளவில் 26வது பெரிய நாடாகவும், மக்கள்தொகையில் 27வது பெரிய நாடாகவும், தென் அமெரிக்காவில் நான்காவது பெரிய நாடாகவும் அமைந்துள்ளது.

5. எகிப்தில் கிறிஸ்தவர்களுக்குப் பாதுகாப்பு அளிக்கும் புதிய சட்ட எண் அரசியல் அமைப்பில் இடம்பெற வேண்டும் : Al-Azhar பல்கலைக்கழகம் பரிந்துரை

ஜூலை,21,2012. எகிப்தில் ஷாரியா என்ற இசுலாமியச் சட்டம் ஏற்றுக்கொள்ளப்பட்டால், கிறிஸ்தவர்களுக்குப் பாதுகாப்பு அளிக்கும் ஒரு புதிய சட்ட எண் அந்நாட்டின் அரசியல் அமைப்பில் இடம்பெற வேண்டுமென Al-Azhar பல்கலைக்கழகம் பரிந்துரைத்துள்ளது.

எகிப்தின் புதிய அரசியல் அமைப்பு குறித்து அந்நாட்டின் அடிப்படைவாத இசுலாமியருக்கும், மிதவாத இசுலாமியருக்கும் இடையே காரசாரமான வாக்குவாதங்கள் நடைபெற்றதையடுத்து இவ்வாறு பரிந்துரைத்துள்ளது அந்நாட்டின் Al-Azhar பல்கலைக்கழகம்.

“நாட்டின் மதம் இசுலாம், நாட்டின் அதிகாரப்பூர்வ மொழி அராபியம். ஷாரியா என்ற இசுலாமிய சட்டத்தின் கொள்கைகள் நாட்டின் சட்ட அமைப்புக்கு முக்கிய ஆதாரமாக இருக்க வேண்டும்” என்ற ஒரு சட்ட எண்ணை இம்மாதத் தொடக்கத்தில் எகிப்தின் சட்டசபைக் குழு பரிந்துரை செய்திருந்தது. எனினும், கிறிஸ்தவர்களும் யூதர்களும் அவரவர் மதங்களின் வழிமுறைகளைப் பின்பற்றலாம் என்ற புதிய பகுதியை எகிப்திய சட்டசபை இணைத்துள்ளது என்று ஊடகச் செய்தி ஒன்று கூறுகிறது.

6. கிறிஸ்தவர்களுக்கு எதிரான வன்முறைகளை நிறுத்துவதற்கு உலகத் தலைவர்கள் முன்னுரிமை அளிக்க வேண்டும் : இத்தாலிய வெளியுறவு அமைச்சர்

ஜூலை,21,2012. உலகில் இடம்பெறும் கிறிஸ்தவர்களுக்கு எதிரான வன்முறைகளை நிறுத்துவதற்கு உலகத் தலைவர்கள் முன்னுரிமை அளிக்க வேண்டும் என இத்தாலிய வெளியுறவுத் துறை அமைச்சர் Giulio Terzi  கூறினார்.

மேற்கு ஆப்ரிக்க நாடான நைஜீரியாவில் இவ்வாண்டின் ஆரம்பம் முதல் சுமார் 800 கிறிஸ்தவர்கள் அந்நாட்டின் Boko Haram இசுலாமியத் தீவிரவாத அமைப்பால் கொல்லப்பட்டிருப்பதைச் சுட்டிக்காட்டிப் பேசிய Terzi, உலகில் கிறிஸ்தவர்களுக்கு எதிரான வன்முறை, குறிப்பாக ஆப்ரிக்காவில் பொதுவான நிகழ்வாக இருந்து வருகிறது என்று கூறினார்.

உரோம் நிர்வாகம் மற்றும் இத்தாலிய வெளியுறவு அமைச்சகத்தின் கூட்டு முயற்சியினால் புதிதாக உருவாக்கப்பட்டுள்ள சமய சுதந்திரக் கண்காணிப்பு என்ற அமைப்பின் தொடக்க நிகழ்ச்சியில் இவ்வாரத்தில் பேசியபோது இவ்வாறு பேசினார் Terzi.

உலகில் சமய சுதந்திரத்தை ஊக்குவித்து, சிறுபான்மையினர் உரிமைகளைப் பாதுகாப்பது இத்தாலிய அரசின் வெளியுறவுக் கொள்கையில் முன்னுரிமை பெற்றுள்ளது என்பதையும் அவர் சுட்டிக் காட்டினார்.

7. வாஷிங்டனில் 19வது அனைத்துலக எய்ட்ஸ் கருத்தரங்கு

ஜூலை,21,2012. கடந்த ஆண்டில் உலகில் 3 கோடியே 42 இலட்சம் பேர், எய்ட்ஸ் நோய்க்குக் காரணமாகும் HIV நோய்க்கிருமிகளுடன் வாழ்ந்தனர், இவ்வெண்ணிக்கை அதற்கு முந்தைய ஆண்டைவிட சற்று அதிகம் என்று UNAIDS என்ற ஐ.நா.எய்ட்ஸ் கட்டுப்பாட்டு அமைப்பு வெளியிட்ட புதிய அறிக்கை கூறுகிறது.

வாஷிங்டனில் இத்திங்களன்று ஆரம்பமாகும் எய்ட்ஸ் நோய்க் குறித்த 19வது அனைத்துலக கருத்தரங்கையொட்டி புதிய ஆய்வறிக்கையை வெளியிட்டுள்ள  UNAIDS அமைப்பு, இந்த நோயாளிகளில் 31 இலட்சம் சிறார் உட்பட 2 கோடியே 35 இலட்சம் பேர் ஆப்ரிக்காவின் சஹாராவையடுத்த பகுதிகளில் வாழ்கின்றனர் என்று அறிவித்தது.

"நாம் எல்லாரும் சேர்ந்து எய்ட்ஸ் நோய்க்கு முடிவு கட்டலாம்" என்ற தலைப்பில் இவ்வறிக்கையை வெளியிட்டுள்ளது இந்த ஐ.நா. அமைப்பு.

இதற்கிடையே, இந்தியாவிலுள்ள மொத்த எய்ட்ஸ் நோயாளிகளில் 20 விழுக்காட்டினர் ஆந்திராவில் உள்ளனர் எனப் புள்ளிவிபரங்கள் தெரிவிக்கின்றன.

இந்தியா முழுவதும் எச்.ஐ.வி. கிருமிகளால் பாதிக்கப்பட்டவர்களின் எண்ணிக்கை 24 இலட்சம். இவர்களில் 5 இலட்சம் பேர் ஆந்திராவில் உள்ளனர். 2வது இடத்தில் மகாராஷ்டிராவும் (4.19இலட்சம்), 3வது இடத்தில் கர்நாடகாவும் (2.45இலட்சம்) உள்ளன என்று அப்புள்ளிவிவரங்கள் கூறுகின்றன.

கல்வியறிவின்மை, மோசமான நலவாழ்வு, வேலைவாய்ப்பின்மை, புலம்பெயர்தல், முறையற்ற பாலியல் பழக்கங்கள் போன்றவை எச்.ஐ.வி பரவியதற்கு முக்கிய காரணங்களாகக் கூறப்படுகிறது.

8. ஆப்ரிக்காவில் புதிதாகக் கண்டுபிடிக்கப்பட்டுள்ள நீர்வளம் நூற்றாண்டுகளுக்கு உதவும்

ஜூலை21,2012. ஆப்ரிக்காவின் சஹாராவையடுத்த வறண்ட நாடாகிய நமிபியாவில் புதிதாகக் கண்டுபிடிக்கப்பட்டுள்ள நீர்வளத்தை, அந்நாட்டில் தற்போது தண்ணீர் பயன்படுத்தப்படும் விகிதத்தில் பயன்படுத்தினால் அடுத்த 400 ஆண்டுகளுக்கு அந்நாட்டுக்குப் போதுமான தண்ணீர் அங்கிருந்து கிடைக்கும் என்று அறிவியலாளர்கள் கூறுகின்றனர்.

இந்த நீர்வளம் சுமார் பத்தாயிரம் ஆண்டுகள் பழமையானது, ஆயினும், தற்போதைய பல நவீன நீர்வளங்களைவிட இது குடிப்பதற்குச் சுத்தமான நீரைக் கொண்டுள்ளது என்றும் அறிவியலாளர்கள் கூறுகின்றனர்.

எனினும், அதிகாரப்பூர்வ அனுமதியின்றி அங்கிருந்து தண்ணீர் எடுப்பது புதிய தண்ணீர் விநியோகத்தைப் பாதிக்கும் என்றும் அவர்கள் எச்சரித்துள்ளனர்.

அங்கோலா எல்லைப் பகுதியில் இந்த நீர்வளப் பகுதியில் வாழும் சுமார் 8 இலட்சம் மக்கள் 40 ஆண்டு பழமையுடைய கால்வாய்த் தண்ணீரையே சார்ந்து வாழ்கின்றனர்.