Saturday, 4 September 2021

பொறுப்பிலிருந்து விலகும் எண்ணம் இல்லை - திருத்தந்தை

 

தான் பெற்ற அறுவை சிகிச்சை, ஆப்கானிஸ்தான், சீனா ஆகிய நாடுகளில் நிலவும் சூழல், கருணைக்கொலை, கருக்கலைப்பு, வத்திக்கானில் நிகழும் உயர்மட்ட மாற்றங்கள் போன்ற தலைப்புக்களில், திருத்தந்தையின் வானொலி உரையாடல்

ஜெரோம் லூயிஸ் - வத்திக்கான் செய்திகள்

இஸ்பானியாவின் Radio COPE என்ற வானொலி நிறுவனத்திற்கு, திருத்தந்தை பிரான்சிஸ் அவர்கள் அண்மையில் அளித்த பேட்டியில், இவ்வாண்டு ஜூலை மாதம், உரோம் நகரிலுள்ள ஜெமெல்லி மருத்துவமனையில் தான் பெற்றுக்கொண்ட அறுவைசிகிச்சையைப் பற்றியும், மற்றும் ஆப்கானிஸ்தான், சீனா ஆகிய நாடுகளைப் பற்றியும் பேசினார்.

இஸ்பானிய ஆயர் பேரவையின் செய்தித் தொடர்பாளராகப் பணியாற்றும் Carlos Herrera அவர்களுடன், திருத்தந்தை மேற்கொண்ட 90 நிமிட உரையாடலில், தூக்கியெறியும் கலாச்சாரத்தை கொண்டுள்ள இன்றைய சமுதாயத்தில் நிலவும் கருணைக்கொலை, கருக்கலைப்பு ஆகியவை குறித்தும், வத்திக்கானில் நிகழ்ந்துவரும் உயர்மட்ட மாற்றங்கள் குறித்தும் தன் கருத்துக்களைப் பகிர்ந்துகொண்டார்.

அறுவை சிகிச்சையைப்பற்றிய சிந்தனைகள்

திருத்தந்தை பிரான்சிஸ் அவர்கள் தங்கியிருக்கும் சாந்தா மார்த்தா இல்லத்தில், அவரது மனதுக்குப் பிடித்தமான சிக்கல்களைத் தீர்க்கும் அன்னை மரியாவின் திரு உருவப்படத்திற்குக் கீழ் நடைபெற்ற இந்த உரையாடல் பதிவில், ஜெமெல்லி மருத்துவ மனையில் தான் பெற்ற அறுவை சிகிச்சையைப்பற்றிய சிந்தனைகளை முதலில் பகிர்ந்துகொண்டார்.

தன் குடல் பகுதியில் ஏற்பட்டிருந்த பிரச்சனையை, மருந்தின் வழியே குணமாக்கலாம் என்று, ஒரு சில மருத்துவர்கள் கருத்து தெரிவித்த வேளையில், வத்திக்கான் மருத்துவத்துறையில் 30 ஆண்டுகளுக்கு மேலாகப் பணியாற்றிவரும் ஒரு மருத்துவத் தாதியர் மட்டும், தான் அறுவை சிகிச்சை பெற்றுக்கொள்ளவேண்டும் என்பதை மிகவும் வலியுறுத்தினார் என்று திருத்தந்தை கூறினார்.

1957ம், ஆண்டு, ஒரு மருத்துவ தாதியர் வழியே தன் உயிர் காப்பாற்றப்பட்டதைப் போலவே, இம்முறை, வத்திக்கானில் பணியாற்றும் அனுபவம் மிக்க ஒரு தாதியர் வழங்கிய ஆலோசனை, தன் உயிரை, இரண்டாவது முறை காத்தது என்று கூறிய திருத்தந்தை பிரான்சிஸ் அவர்கள், அவருக்கு தன் சிறப்பான நன்றியை வெளிப்படுத்தினார்.

அறுவைச்சிகிச்சைக்குப்பின் வழக்கம்போல்...

இந்த அறுவைச்சிகிச்சைக்குப்பின் தன் குடலில் 33 சென்டிமீட்டர் குறைந்துவிட்டது என்று கூறிய திருத்தந்தை பிரான்சிஸ் அவர்கள், இருப்பினும், இதனால் தன் உணவிலும், செயல்பாடுகளிலும் பெரும் மாற்றங்கள் இன்றி தன்னால் இயங்க முடிகிறது என்றும் இந்த உரையாடலில் கூறினார்.

தன் உடல்நலக் குறைவையொட்டி, இத்தாலி மற்றும் ஆர்ஜென்டீனா நாளிதழ்களில் தான் தலைமைப்பொறுப்பிலிருந்து விலகுவது குறித்து பேசப்பட்டுள்ளதை சுட்டிக்காட்டிய திருத்தந்தை, பொறுப்பிலிருந்து விலகும் எண்ணம், தனக்கு இதுவரை எழவில்லை என்பதையும் உறுதிப்படுத்தினார்.

ஆப்கானிஸ்தானில் உருவாகியுள்ள நெருக்கடி

இந்த வானொலி உரையாடலில் தன் உடல்நலனைக் குறித்து முதலில் பேசிய திருத்தந்தை பிரான்சிஸ் அவர்கள், தொடர்ந்து, ஆப்கானிஸ்தானில் உருவாகியுள்ள நெருக்கடியைக் குறித்து பேசியபோது, தற்போது திருப்பீடச் செயலராகப் பணியாற்றும் கர்தினால் பியெத்ரோ பரோலின் அவர்கள், பன்னாட்டு உறவுகளில் மிகவும் திறமைவாய்ந்தவர் என்றும், அவர், ஆப்கானிஸ்தான் நெருக்கடியில் ஈடுபட்டுள்ளது, தனக்கு பெரும் பக்கபலமாக உள்ளது என்றும் கூறினார்.

ஒவ்வொரு நாட்டிலும் நிலவும் கலாச்சாரத்தையும், மக்களின் பாரம்பரியத்தையும் மதிக்காமல், அந்நிய நாட்டு படையெடுப்பின் வழியே, ஒரு நாட்டில், குடியரசை நிறுவமுடியும் என்று, அரசுகள் முடிவெடுக்கும் போக்கிற்கு இனி முற்றுப்புள்ளி வைக்கப்படவேண்டும் என்று, ஜெர்மன் நாட்டின் தலைவர் Angela Merkel அவர்கள் கூறியதை தன் உரையாடலில் நினைவுகூர்ந்த திருத்தந்தை பிரான்சிஸ் அவர்கள், இன்றைய அரசியல் உலகில், ஜெர்மன் தலைவர் மீது தான் அதிகம் மதிப்பு கொண்டிருப்பதையும் குறிப்பிட்டார்.

சீனாவுக்கும் திருப்பீடத்திற்கும் இடையே...

சீனாவுக்கும் திருப்பீடத்திற்கும் இடையே ஏற்பட்டுள்ள அதிகாரப்பூர்வ உறவுகளைப் பற்றிய கேள்வி எழுந்தபோது, திருத்தந்தை பிரான்சிஸ் அவர்கள், சீனாவுடன் உறவு கொள்வது எளிதல்ல என்பதையும், இருப்பினும், உரையாடல் வழியே நன்மைகள் செய்யும் முயற்சிகளை திருப்பீடம் தொடர்ந்து மேற்கொள்ளும் என்பதையும் தெளிவுபடுத்தினார்.

திருத்தந்தை புனித 2ம் யோவான் பவுல் அவர்களின் பணிக்காலத்தில் திருப்பீடச் செயலராகப் பணியாற்றிய கர்தினால் அகோஸ்தீனோ காசரோலி (Agostino Casaroli) அவர்கள் வெளியிட்ட கருத்துக்கள், திருப்பீடம் மேற்கொள்ளும் உரையாடல் முயற்சிகளுக்கு பெரும் உந்துசக்தியாக இருந்துவருகின்றன என்பதை, திருத்தந்தை சுட்டிக்காட்டினார்.

கருணைக்கொலை, கருக்கலைப்பு

இதைத் தொடர்ந்து, திருப்பீடத்தின் உயர்மட்ட அளவில் துவக்கப்பட்டிருக்கும் மறுசீரமைப்பு, நிதித்தொடர்பாக வத்திக்கானில் நடைபெறும் வழக்கு, பாலியல் முறையில், சிறார் அடைந்துவரும் துன்பங்களுக்கு பதிலிறுப்பு, கருணைக்கொலை, கருக்கலைப்பு என்ற பல்வேறு தலைப்புக்களில், திருத்தந்தை பிரான்சிஸ் அவர்கள், Radio COPE வானொலியில், தன் எண்ணங்களைப் பகிர்ந்துகொண்டார்.

இம்மாதம் 12ம் தேதி முதல் 15ம் தேதி முடிய ஹங்கேரி நாட்டிற்கும், ஸ்லோவாக்கியா நாட்டிற்கும் செல்வதற்குரிய சக்தி தனக்கு இருப்பதாகக் கூறிய திருத்தந்தை பிரான்சிஸ் அவர்கள், கிளாஸ்கோ நகரில், நவம்பர் மாதம் நடைபெறவிருக்கும் COP26 சுற்றுச்சூழல் உச்சி மாநாட்டிற்குச் செல்லும் திட்டம் தற்போது இருப்பதாகவும், அன்றைய நிலையில் தன் உடல்நலம் அனுமதித்தால், தான் கட்டாயம் அந்தக் கூட்டத்திற்குச் செல்லவிருப்பதாகவும், இந்த உரையாடலில் கூறினார்.

திருஅவையின் மூன்று புதிய இறையடியார்களின் புண்ணிய வாழ்வு ஏற்பு

 


யூதர்களோடு பணிபுரிந்து அவர்களின் உயிரைக் காப்பாற்ற உழைத்ததற்காக, நாத்சி படைகளால் கொடுமைப்படுத்தப்பட்டு 1944ம் ஆண்டு உயிரிழந்த துறவி

கிறிஸ்டோபர் பிரான்சிஸ் - வத்திக்கான் செய்திகள்

ஓர் அருள்பணியாளர், இரண்டு பெண் பொதுநிலையினர் என மூன்று இறையடியார்களின் புண்ணிய வாழ்வு குறித்த சிறப்பு விவரங்கள் திருத்தந்தை பிரான்சிஸ் அவர்களிடம் ஆகஸ்ட் 30, இத்திங்களன்று சமர்ப்பிக்கப்பட்டன.

இன்றைய குரவேஷியா நாட்டில் இருக்கும் Cherso எனுமிடத்தில், 1907ம் ஆண்டு பிறந்து, 1944ம் ஆண்டு இத்தாலியில் உயிரிழந்த, கன்வெஞ்சுவல் பிரான்சிஸ்கன் துறவு சபையின் அருள்பணி Placido Cortese, 1969ம் ஆண்டு இத்தாலியில் பிறந்து அந்நாட்டிலேயே 1995ம் ஆண்டில் உயிரிழந்த குடும்பத் தலைவி, இறையடியார் Maria Cristina Cella Mocellin,  1914ம் ஆண்டு இத்தாலியின் உரோம் நகரில் பிறந்து 2012ம் ஆண்டு அந்நகரிலேயே உயிர்துறந்த பொதுநிலை விசுவாசி Enrica Beltrame Quattrocchi  ஆகிய மூவரின் புண்ணிய வாழ்வு விவரங்களை, புனிதர், மற்றும், அருளாளர்களாக உயர்த்தப்படும் வழிமுறைகளை ஒருங்கிணைக்கும் பேராயத்தின் தலைவர், கர்தினால் மார்செல்லோ செமெராரோ (Marcello Semeraro) அவர்கள், திருத்தந்தை பிரான்சிஸ் அவர்களைச் சந்தித்து சமர்ப்பித்தார்.

இத்தாலியிலுள்ள பதுவை நகர் புனித அந்தோனியார் பெருங்கோவிலில் பணியாற்றிய இறையடியார், அருள்பணி Placido Cortese அவர்கள், இரண்டாம் உலகப்போரின்போது, புலம்பெயர்ந்த மக்களோடு, குறிப்பாக, யூதர்களோடு பணிபுரிந்து அவர்களின் உயிரைக்காப்பற்ற உழைத்ததற்காக, நாத்சி படைகளால் கொடுமைப்படுத்தப்பட்டு 1944ம் ஆண்டு உயிரிழந்தார்.

தற்போது, வீரத்துவ பண்புகளுக்காக ஏற்கப்பட்டுள்ள Enrica Beltrame Quattrocchi அவர்களின் பெற்றோர் Luigi Beltrame Quattrocchiயும், Maria Corsiniயும், ஏற்கனவே திருஅவையில் அருளாளர்களாக அறிவிக்கப்பட்டுள்ளார்கள் என்பது குறிப்பிடத்தக்கது.

இறையடியார் Maria Cristina Cella Mocellin என்பவர், தன் மூன்றாவது குழந்தையை கருவில் சுமந்துகொண்டிருந்தபோது, இடது காலில் ஏற்பட்ட அரிதான ஒருவகை புற்றுநோயால் பாதிக்கப்பட்ட நிலையில், தன் கருவை கலைக்க சம்மதிக்காத தாயாக, தன் 26ம் வயதில்  காலமானார்.


திருத்தந்தை: பங்குத்தளங்களை பணியின் பள்ளிகளாக உருவாக்குங்கள்

 

ஆயர்களின் மேய்ப்புப்பணிகள், பிறரன்பு, மற்றும், நம்பிக்கை ஆகியவற்றால் நிறைந்திருக்குமாறு, இத்தாலிய ஆயர்கள் குழு ஒன்றிடம் திருத்தந்தை கேட்டுக்கொண்டுள்ளார்

மேரி தெரேசா: வத்திக்கான் செய்திகள்

“இன்றையக் காலக்கட்டத்தில் நமக்கு இறைவாக்குத் தேவைப்படுகின்றது, ஆனால் அது உண்மையானதாக இருக்கவேண்டும் என்றும், அற்புதங்கள் பற்றிய ஆர்ப்பாட்டங்கள் தேவையில்லை, மாறாக, கடவுளன்பு நிகழ்த்தும் அற்புதத்தை வெளிப்படுத்தும் வாழ்வே தேவைப்படுகிறது” என்றும், திருத்தந்தை பிரான்சிஸ் அவர்கள், ஆகஸ்ட் 31, இச்செவ்வாயன்று வெளியிட்ட, தன் டுவிட்டர் செய்தியில் கூறியுள்ளார்.

இத்தாலிய ஆயர்களுக்கு செய்தி

மேலும், இத்தாலியின் கிராமப் பகுதிகள் பற்றி ஆயர்கள் நடத்திய ஒரு கூட்டத்திற்கு, செய்தி ஒன்றை அனுப்பியுள்ள திருத்தந்தை பிரான்சிஸ் அவர்கள், ஆயர்கள், தங்கள் மேய்ப்புப்பணிகளை, பிறரன்பு, மற்றும், நம்பிக்கை ஆகியவற்றால் நிறைக்குமாறு கேட்டுக்கொண்டுள்ளார்.

இக்காலத்தில் மேலோங்கி நிற்கும், இன்னல்கள், தன்னலவாதம், மற்றும், புறக்கணிப்பு ஆகியவற்றைக் கண்டு சோர்வுறாமல், கூட்டுப்பண்பு, மற்றும், உடன்பிறப்பு உணர்வைக் கண்டுணர்ந்து, ஒன்றிணைந்து சவால்களை எதிர்கொள்ளுமாறு, ஆயர்களை ஊக்கப்படுத்தினார், திருத்தந்தை பிரான்சிஸ்.

கடந்தகால நிலைகளுக்காக ஏக்கம்கொள்ளாமல், கடினவாழ்வு நிலவும் இடங்களில் மேய்ப்புப்பணி நடவடிக்கைகளைத் துணிவுடன் மேற்கொள்ளுமாறு கூறியத் திருத்தந்தை, பங்குத்தளங்களில் தாழ்ச்சியும், கனிவும் சுடர்விடும் வகையில், அவற்றை, கிறிஸ்தவ வாழ்வின் பயிற்சி மையங்களாகவும், மற்றவருக்குப் பணியாற்றும் பள்ளிகளாகவும் மாற்றுமாறும், இத்தாலிய ஆயர்களைக் கேட்டுக்கொண்டார்.

இச்செய்தியின் இறுதியில், ஆயர்கள் மேற்கொண்ட இம்முயற்சிக்கு தனது பாராட்டுக்களைத் தெரிவித்துள்ள திருத்தந்தை பிரான்சிஸ் அவர்கள், இக்கூட்டத்தில் ஆயர்கள் உருவாக்கும் திட்டங்கள், மக்கள், இயேசுவை அன்போடு சந்திப்பதை ஊக்கப்படுத்தும் என்ற தன் நம்பிக்கையையும் வெளிப்படுத்தியுள்ளார்.

இத்தாலியின் Benevento நகரில், ஏறத்தாழ இருபது ஆயர்கள், ஆகஸ்ட் 30, இத்திங்கள், 31 இச்செவ்வாய் ஆகிய இரு நாள்களில்  நடத்திய இரண்டு நாள் கூட்டத்தில், மக்கள்தொகை குறைவு, புறக்கணிப்பு, மற்றும், பொருளாதாரப் பிரச்சனை ஆகியவை நிலவும் பகுதிகளில், தங்களின் மேய்ப்புப்பணி நடவடிக்கைகளுக்குப் புத்துயிர் அளிக்கும் வழிகள் பற்றி கலந்தாய்வுகளை மேற்கொண்டனர்.

திருவழிபாட்டு நிகழ்வுப் பொறுப்பாளர், ஆயராக நியமனம்

 

பேரருட்திரு குய்தோ மரினி அவர்கள், சட்டத்திலும், குடிமையியல் சட்டத்திலும் முனைவர் பட்டம் பெற்றுள்ளதுடன், சமூகத்தொடர்பின் உளவியல் என்ற துறையிலும் பட்டம் பெற்றுள்ளார்.

கிறிஸ்டோபர் பிரான்சிஸ் - வத்திக்கான் செய்திகள்

திருத்தந்தையின் திருவழிபாட்டு நிகழ்வுகளுக்குப் பொறுப்பாளராக செயல்பட்டுவந்த பேரருட்திரு குய்தோ மரினி (Guido Marini) அவர்களை, வட இத்தாலியின் Tortona மறைமாவட்டத்தின் ஆயராக நியமித்துள்ளார், திருத்தந்தை பிரான்சிஸ்.

2007ம் ஆண்டு முதல், திருத்தந்தையின் வழிபாட்டு நிகழ்வுகளுக்கு பொறுப்பாளராகச் செயல்பட்டுவரும் பேரருட்திரு மரினி அவர்கள், 2019ம் ஆண்டிலிருந்து பெருங்கோவில் பாப்பிறை இசைக்குழுவின் பொறுப்பாளராகவும் இருந்துவருகிறார்.

இத்தாலியின் ஜெனோவா பெருமறைமாவட்ட அருள்பணியாளரான இவர், திருஅவைச் சட்டத்திலும், குடிமையியல் சட்டத்திலும் முனைவர் பட்டம் பெற்றுள்ளதுடன், சமூகத்தொடர்பின் உளவியல் என்ற துறையிலும் பட்டம் பெற்றுள்ளார்.

கர்தினால்கள் Giovanni Canestri, Dionigi Tettamanzi, Tarcisio Bertone ஆகிய மூவருக்கு தனிப்பட்டச்  செயலராகப் பணியாற்றியுள்ள புதிய ஆயர் மரினி அவர்கள், வட இத்தாலியின் பல கல்வி நிலையங்களில் கற்பித்துள்ளதுடன், 2007 முதல், திருத்தந்தையின் திருவழிபாட்டு நிகழ்வுகளைக் கவனிக்கும் பொறுப்பில் இருந்துவந்துள்ளார்.

ஆப்கானிஸ்தானில், மனித உரிமை பற்றி திருப்பீடம் கவலை

 

ஆப்கானிஸ்தானில், வாழ்வுரிமை, மத உரிமை, இடம்விட்டு இடம் செல்லும் உரிமை, அமைதியான முறையில் மக்கள் கூடிவரும் உரிமை போன்ற அடிப்படை உரிமைகள் மதிக்கப்படவேண்டும் – திருப்பீடத்தின் பிரதிநிதி

ஜெரோம் லூயிஸ் - வத்திக்கான் செய்திகள்

ஆப்கானிஸ்தானில், மனித உரிமைகளுக்கு மதிப்பளிக்கப்படவேண்டும் என்பதையும், அனைவரையும் உள்ளடக்கிய ஓர் உரையாடல் இடம்பெறவேண்டும் என்பதையும் வலியுறுத்தி, திருப்பீடத்தின் பிரதிநிதி ஒருவர், ஐ.நா.அவை நடத்திய கூட்டமொன்றில் உரையாற்றினார்.

ஜெனீவாவில் அமைந்துள்ள ஐ.நா. அலுவலகத்தில், ஆகஸ்ட் 24, இச்செவ்வாயன்று, நடைபெற்ற மனித உரிமைகள் கழகத்தின் 31வது அமர்வில் திருப்பீடத்தின் பிரதிநிதியாகப் பங்கேற்ற அருள்பணி John Putzer அவர்கள், ஆப்கானிஸ்தானைக் குறித்து திருப்பீடம் கொண்டுள்ள கவலையை வெளியிட்டார்.

ஆப்கானிஸ்தானில், ஆயுதங்களின் ஓசை குறைந்து, உரையாடலின் வழியே மக்களுக்கு நன்மை தரும் தீர்வுகள் அமைவதற்கு செபிப்போம் என்று திருத்தந்தை பிரான்சிஸ் அவர்கள் தன் மூவேளை செப உரையில் விடுத்த விண்ணப்பத்தை, அருள்பணி Putzer அவர்கள், தன் உரையின் துவக்கத்தில் குறிப்பிட்டார்.

ஒவ்வொரு மனிதரும் மாண்புடையவர் என்பதை உணர்த்தும் அடிப்படை மனித உரிமை ஆப்கானிஸ்தானில் மதிக்கப்பட வேண்டும் என்றும், அத்துடன், வாழ்வுரிமை, மத உரிமை, இடம்விட்டு இடம் செல்லும் உரிமை, அமைதியான முறையில் மக்கள் கூடிவரும் உரிமை போன்ற அடிப்படை உரிமைகளும் மதிக்கப்படவேண்டும் என்றும் அருள்பணி Putzer அவர்கள், இக்கூட்டத்தில் அழைப்பு விடுத்தார்.

ஆப்கானிஸ்தானில் தற்போது உருவாகியுள்ள நெருக்கடி நிலை நீங்குவதற்கு, அனைத்து மக்களின் பிரதிநிதிகளையும் உள்ளடக்கிய ஓர் உரையாடல் இடம்பெறும் என்று திருப்பீடம் நம்புகிறது என்று அருள்பணி Putzer அவர்கள், தன் உரையில் கூறினார்.

மேலும், ஆப்கானிஸ்தானிலிருந்து வெளியேறியுள்ள புலம்பெயர்ந்தோரைக் குறித்து அறிக்கைகள் விடுவதோடு ஒவ்வொரு நாடும் திருப்தியடையாமல், அவர்களை வரவேற்கவும் தயாராக இருக்குமாறு, திருப்பீடம் விழைகிறது என்ற விண்ணப்பத்தோடு, அருள்பணி Putzer அவர்கள், தன் உரையை நிறைவு செய்தார்.

சீனாவில் மாணவர்களுக்கு கற்பிக்கப்படும் கீழடியின் பெருமை | Keezhadi Resea...

கீழடி 7 - ஆம் கட்ட அகழாய்வில் சுடுமண் பொம்மை கண்டெடுப்பு | Keezhadi | Ex...

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...