Friday, 3 April 2015

“ஏப்ரல் முட்டாள்கள் தினம்” - “April Fools’ Day” - எல்லாரையும், எப்போதும் ஏமாற்ற முடியாது

“ஏப்ரல் முட்டாள்கள் தினம்” - “April Fools’ Day” - எல்லாரையும், எப்போதும் ஏமாற்ற முடியாது

கடந்த சில நூற்றாண்டுகளில், “ஏப்ரல் முட்டாள்கள் தினம்” - “April Fools’ Day” - என்ற நாளையொட்டி, பலரையும் ஏமாற்றும் முயற்சிகளை ஊடகங்கள் மேற்கொண்டு வந்துள்ளன. அவற்றில் ஒன்று இதோ:
1976ம் ஆண்டு, ஏப்ரல் முதல் தேதியன்று, பிபிசி (BBC) வானொலியில் விண்வெளி வீரர், Patrick Moore என்பவர் பங்கேற்ற ஒரு பேட்டி ஒலிபரப்பானது. அந்த பேட்டியில், அவர், ஏப்ரல் முதல் தேதியன்று காலை, வான் கோள்களுக்கிடையே ஓர் அதிசயம் நிகழப்போவதாகச் சொன்னார். காலை, சரியாக, 9:47 மணிக்கு, பூமி, வியாழன் (Jupiter), புளூட்டோ (Pluto) ஆகிய மூன்று கோள்களும் ஒரே நேர்கோட்டில் அமையப் போகின்றன என்றும், அதனால், பூமியின் புவி ஈர்ப்பு சக்தி குறைந்துவிடும் என்றும் அவர் கூறினார். சரியாக 9:47 மணிக்கு யாராவது தரையிலிருந்து மேலெழும்பும் வகையில் குதித்தால், அவர்கள், புவி ஈர்ப்பு சக்தியை உணராமல் மிதந்து வரும் அனுபவம் அவர்களுக்குக் கிடைக்கும் என்றும் விண்வெளி வீரர் Moore அவர்கள், தன் பேட்டியில் குறிப்பிட்டார்.
அன்று காலை, 9:47 மணி கடந்தபின், பிபிசி (BBC) வானொலிக்கு நூற்றுக்கணக்கான தொலைபேசி அழைப்புக்கள் வந்தன. அழைத்தவர்கள் அனைவரும், தாங்கள் காற்றில் மிதந்தது போன்ற உணர்வு பெற்றதாகக் கூறினர். அவர்களில் ஓர் இளம்பெண், தானும் தன் தோழிகள் 11 பேரும் தங்கள் அறையில் காற்றில் மிதந்துவந்ததை விவரித்துக் கூறினார். பிபிசி (BBC) நடத்திய அந்தப் பேட்டி முழுவதும், ஏப்ரல் முட்டாள்கள் தின முயற்சி என்று, அடுத்தநாள் தெரிய வந்தது.
"எல்லாரையும் சிலவேளைகளில் ஏமாற்றலாம்; சிலரை, எப்போதும் ஏமாற்றலாம்; ஆனால், எல்லாரையும், எப்போதும் ஏமாற்றமுடியாது" என்று சொன்னவர், முன்னாள் அமெரிக்க அரசுத்தலைவர், ஆபிரகாம் லிங்கன்.

ஆதாரம் : வத்திக்கான் வானொலி
 

செய்திகள்-30.03.15

செய்திகள்-30.03.15
------------------------------------------------------------------------------------------------------

1. திருத்தந்தை : நமக்கான சிறப்புச் சலுகையின் காலம் புனித வாரம்

2. திருத்தந்தை : புனித வாரத்தில் தாழ்ச்சியின் பாதையில் நடைபோடுவோம்

3. திருத்தந்தை : இயேசுவின் மறையுண்மைகளுடன் புனித வாரத்தை வாழுங்கள்

4. உல‌க‌ இளையோர் தின‌ த‌யாரிப்புக‌ள் போல‌ந்தில் முழுவீச்சில் இட‌ம்பெறுகின்றன

5. காஷ்மீரில் கிறிஸ்தவப்போதகர் ஒருவர் கைது

6. எகிப்து க‌ல்வித் திட்ட‌த்தில் அர‌சுட‌ன் இணைந்து ப‌ணியாற்றும் கிறிஸ்த‌வ‌ச் ச‌மூக‌ம்

7. கூட்டு இராணுவப் படை அமைக்க அரபுத் தலைவர்கள் இணக்கம்
----------------------------------------------------------------------------------------------

1. திருத்தந்தை : நமக்கான சிறப்புச் சலுகையின் காலம் புனித வாரம்

மார்ச்,30,2015. ‘இயேசுவின் அருகில் மிக நெருங்கி வருவதற்கு, நாம் சிறப்புச் சலுகைப் பெற்றுள்ள காலம் புனித வாரம். துன்பகரமான நேரங்களில் அவருடன் நாம் கொள்ளும் நட்புணர்வு வெளிப்படுத்தப்படுகின்றது’ என இத்திங்களன்று தன் டுவிட்டர் பக்கத்தில் எழுதியுள்ளார், திருத்தந்தை பிரான்சிஸ்.
மேலும், இத்திங்களன்று திருஅவை உயர் அதிகாரிகள் சிலரை திருப்பீடத்தில் சந்தித்து உரையாடினார், திருத்தந்தை பிரான்சிஸ்.
அர்ப்பண வாழ்வுக்கான திருப்பீட அவையின் செயலர் பேராயர் José Rodríguez Carballo, பொதுநிலையின‌ருக்கான‌ திருப்பீட‌ அவையின் த‌லைவ‌ர் க‌ர்தினால் Stanislaw Rylko,  இத்தாலிய‌ ஆய‌ர் பேர‌வைத்த‌லைவ‌ர் க‌ர்தினால்  Angelo Bagnasco, திருப்பீட நூலகத் தலைவர் பேராயர் Jean-Louis Bruguès, வத்திக்கான நகருக்கான திருத்தந்தையின் பிரதிநிதி கர்தினால் Angelo Comastri, குடுமபங்களுக்கான திருப்பீட அவையின் செயலர் பேராயர் Vincenzo Paglia  ஆகியோரை இத்திங்களன்று காலை திருப்பீடத்தில் தனித்தனியாக சந்தித்து உரையாடினார், திருத்தந்தை பிரான்சிஸ்.

ஆதாரம் : வத்திக்கான் வானொலி

2. திருத்தந்தை : புனித வாரத்தில் தாழ்ச்சியின் பாதையில் நடைபோடுவோம்

மார்ச்,30,2015. இயேசுவின் எளிமையையும் தாழ்ச்சியையும் ஆழ்ந்து தியானித்து, அத‌ற்கு எடுத்துக்காட்டாக‌, இப்புனித‌ வார‌த்தில் செய‌ல்ப‌டுவோம் என‌ இஞ்ஞாயிற‌ன்று அழைப்புவிடுத்தார் திருத்தந்தை பிரான்சிஸ்.
குருத்து ஞாயிற‌ன்று உரோம் ந‌க‌ரின் தூய‌ பேதுரு பேரால‌ய‌ வ‌ளாக‌த்தில் திருப்ப‌லி நிறைவேற்றி ம‌றையுரை வ‌ழ‌ங்கிய‌ திருத்தந்தை பிரான்சிஸ் அவ‌ர்க‌ள், த‌ற்பெருமை, வெளி ஆட‌ம்ப‌ர‌ம் போன்ற உல‌க‌ப்போக்குக‌ளைக் கைவிட்டு, இயேசுவின் தாழ்ச்சியைப் பின்பற்றவேண்டும் என்றார்.
கிறிஸ்த‌வ‌ர்க‌ளுக்குரிய உண்மையான‌ வாழ்வுப்பாதை தாழ்ச்சியே என்ப‌தை இயேசுவின் பாடுக‌ள் ந‌ம‌க்குக் காட்டுகின்ற‌ன‌ என‌ த‌ன் ம‌றையுரையில் உரைத்த‌ திருத்த‌ந்தை, தாழ்ச்சி என்ப‌து இறைவ‌னின் பாதை, அவ‌ர் த‌ன் ம‌க்க‌ளுட‌ன் இணைந்து நட‌க்க‌ தேர்ந்து கொண்ட‌ பாதை, என்றார்.
இயேசு நமக்குக் காட்டிய தாழ்ச்சியின் பாதையை பின்பற்றுவதன் வழியே இவ்வாரம் நமக்கு புனிதமானதாக அமைய முடியும் எனவும் எடுத்துரைத்தார் திருத்தந்தை பிரான்சிஸ்.
தாழ்ச்சி என்பது பிறருக்கான சேவையையும் குறிக்கிறது, ஏனெனில் இறைவனுக்கு நம் இதயத்தில் இடமளிக்க நம்மையே  நாம் வெறுமையாக்க வேண்டியுள்ளது, அவ்வாறு வெறுமையாக்குவது தாழ்ச்சியைக் குறிக்கும் எனவும் எடுத்துரைத்த திருத்தந்தை பிரான்சிஸ் அவர்கள், இதற்கு எதிரானப் பாதைகளாக உலகப் போக்குகளையும் சுட்டிக்காட்டினார்.
நாற்பது நாட்கள் பாலைவனத்தில்  செபத்தில் ஈடுபட்ட இயேசுவுக்கு தீயோன் முன்வைத்த வழிகளே உலகப்போக்குகளின் பாதை என்பதை உணரும் நாம், இயேசுவின் துணையுடன் ஒவ்வொரு நாளும் இச்சோதனைகளை வெல்லவேண்டும் என அழைப்புவிடுத்தார் திருத்தந்தை.
நம்மையே வெறுமையாக்கி, தாழ்ச்சியின் மகிமை உணர்ந்து, பிறருக்கான சேவையில் ஈடுபாடு கொள்ளவேண்டிய நாம், நோயுற்ற நம் உறவினர்கள், முதியோர், மாற்றுத்திறனாளிகள், வீடற்றோர், கிறிஸ்தவ விசுவாசத்திற்காக துன்புறுவோர் ஆகியோரை இவ்வேளையில் நினைவுக் கூர்வோம் என்ற விண்ணப்பத்தையும் முன்வைத்தார் திருத்தந்தை.

ஆதாரம் : வத்திக்கான் வானொலி

3. திருத்தந்தை : இயேசுவின் மறையுண்மைகளுடன் புனித வாரத்தை வாழுங்கள்

மார்ச்,30,2015. ‘இறைத் தந்தையின் இரக்கத்தால் நிரப்பப்படும் ஒவ்வோர் இளையோரும், அதனை தங்கள் சுற்றுப்புறங்களில் பரப்பட்டும்’ என அழைப்புவிடுத்தார் திருத்தந்தை பிரான்சிஸ்.
குருத்து ஞாயிறன்று திருஅவையில் சிறப்பிக்கப்படும் இளையோர் தினம் குறித்து இஞ்ஞாயிறு முவேளை செப உரையில் எடுத்துரைத்த திருத்தந்தை பிரான்சிஸ் அவர்கள், இளையோர் தங்களின் பாதையில் சிறப்புடன் நடைபோட இக்கொண்டாட்டங்கள் உதவட்டும் என்றார்.
வ‌ரும் ஆண்டு போல‌ந்தின் Cracow நகரில் இடம்பெறவிருக்கும் உலக இளையோர் தினத்திற்கு எடுக்கப்பட்டுள்ள தலைப்பான 'இரக்கமுடையோர் பேறுபெற்றோர் ஏனெனில் அவர்கள் இரக்கம் பெறுவர்’ என்பதையும் எடுத்தியம்பிய திருத்தந்தை பிரான்சிஸ் அவர்கள், இரக்கத்தின் ஆண்டை சிறப்பிக்கவிருக்கும் நமக்கு இத்தலைப்பு மிகவும் இயைந்த ஒன்றாக உள்ளது என்றார்.
இயேசுவின் மறையுண்மைகளை சிந்திப்பவர்களாய் இந்த புனித வாரத்தை வாழுங்கள் எனவும் அழைப்புவிடுத்த திருத்தந்தை, ஜெர்மன்விங்ஸ் விமான விபத்தில் கடந்த வாரம் உயிரிழந்தவர்கள் குறித்து தன் அனுதாபங்களையும், அவர்களுக்கான செப உறுதியையும் வழங்கினார்.,

ஆதாரம் : வத்திக்கான் வானொலி

4. உல‌க‌ இளையோர் தின‌ த‌யாரிப்புக‌ள் போல‌ந்தில் முழுவீச்சில் இட‌ம்பெறுகின்றன

மார்ச்,30,2015.  அடுத்த‌ ஆண்டு இட‌ம்பெற‌விருக்கும் உல‌க‌ இளையோர் தின‌த்திற்கான‌ த‌யாரிப்புக‌ள், போல‌ந்தில் முழுவீச்சில் இட‌ம்பெற்றுவ‌ருவ‌தாக‌ த‌ல‌த்திருஅவை அதிகாரிக‌ள் அறிவித்துள்ளன‌ர்.
போலந்து நாட்டின் கிராக்கோவ் (Krakow) நகரில், 2016ம் ஆண்டு நடைபெறவிருக்கும் இளையோர் தின‌ கொண்டாட்ட‌ங்க‌ளுக்கு இன்னும் 16 மாத‌ங்க‌ள் இருப்பினும், புதிய‌ விமான‌ த‌ள‌ம், இர‌யில் ம‌ற்றும் சாலைப்போகுவ‌ர‌த்து மேம்பாடு, இளையோர்க்கென‌ வ‌டிவ‌மைக்க‌ப்ப‌ட்ட‌ விவிலிய‌ப் பிர‌திக‌ள் என‌ ப‌ல்வேறு திட்ட‌ங்க‌ள் செய‌லாக்க‌ம் பெற்று வ‌ருவ‌தாக‌ த‌ல‌த்திருஅவை அதிகாரிக‌ள் தெரிவித்த‌ன‌ர்.
அனைத்துல‌க‌ திருஅவையின்  உல‌க‌ இளையோர் தின‌த்திற்கென‌ ஏற்க‌ன‌வே அமெரிக்க‌ ஐக்கிய‌ நாடு, ஐரோப்பா, தென் அமெரிக்கா ஆகிய‌ நாடுகளிலிருந்து இளைஞ‌ர்க‌ள் த‌ங்க‌ள் பெய‌ர்க‌ளைப் ப‌திவுச் செய்துள்ள‌தாக, இத‌ற்கான‌ ஏற்பாடுக‌ளைக் க‌வ‌னித்துவ‌ரும் போலந்தின் அருள்ப‌ணி Bronislaw Fidelus கூறினார்.
இறை இர‌க்க‌த்தை மைய‌ப்பொருளாக‌க்கொண்டு 2016ம் ஆண்டு ஜூலை 26 முத‌ல் ஆக‌ஸ்ட் முத‌ல் தேதிவ‌ரை இட‌ம்பெற‌ உள்ள உல‌க‌ இளையோர் தின‌த்தில் உல‌கெங்கிலுமிருந்து 20 இல‌ட்ச‌ம்பேர் க‌ல‌ந்துகொள்வார்க‌ள் என‌ எதிர்பார்க்க‌ப்ப‌டுகிற‌து.

ஆதாரம் : CNS/ வத்திக்கான் வானொலி

5. காஷ்மீரில் கிறிஸ்தவப்போதகர் ஒருவர் கைது

மார்ச்,30,2015. இஞ்ஞாயிறு வழிபாட்டில் கலந்து கொண்டிருந்தபோது காஷ்மீர் மாநிலத்தின் காவல் துறையால் கைதுசெய்யப்பட்டுள்ளார், கிறிஸ்தவப் போதகர் ஒருவர்.
இந்தியக் கிறிஸ்தவர்களுக்கான உலக அவையின் காஷ்மீர் ஒருங்கிணைப்பாளர் கிறிஸ்தவப் போதகர் பால் அகஸ்டின், பிரிவினைவாதத்தை தூண்டியதாக குற்றம் சுமத்தப்பட்டு, இஞ்ஞாயிறன்று கைது செய்யப்பட்டார்.
இவ‌ர் மீதான அக்குற்ற‌ச்சாட்டு பொய்யாக‌ இருப்ப‌தால், இவ‌ரின் உயிருக்கு ஆபத்து  இருப்ப‌தாக‌ போத‌க‌ர் அக‌ஸ்டினின் குடும்ப‌த்தின‌ர் அறிவித்த‌ன‌ர்.
இது குறித்து கருத்து தெரிவித்த இந்திய கிறிஸ்தவர்களுக்கான உலக அவையின் தலைவர் Sajan George அவர்கள், பெரும்பான்மையினரின் சட்டம் மேலோங்கியிருக்கும் இடங்களில், சிறுபான்மையினரின் வழிபாட்டு உரிமைகள் மறுக்கப்படுகின்றன என்றார்.

ஆதாரம் : AsiaNews / வத்திக்கான் வானொலி

6. எகிப்து க‌ல்வித் திட்ட‌த்தில் அர‌சுட‌ன் இணைந்து ப‌ணியாற்றும் கிறிஸ்த‌வ‌ச் ச‌மூக‌ம்

மார்ச்,30,2015.  எகிப்து நாட்டில் கல்வியறிவின்மையை ஒழிக்கும் அரசின் திட்டத்தில் அரசுடன் இணைந்து உழைக்க உள்ளதாக கையெழுத்திட்டுள்ளது, அந்நாட்டு காப்டிக் கிறிஸ்தவ  சபை.
எகிப்து அரசால் உருவாக்கப்பட்டு காப்டிக் கிறிஸ்தவ சபையின் முழு ஆதரவைப் பெற்றுள்ள இக்கல்வித் திட்ட ஒத்துழைப்புக் கையெழுத்து, காப்டிக் கிறிஸ்தவ சபையின் தலைமை இல்லத்தில் இடம்பெற்றது.
காப்டிக் முதுபெரும் தந்தை இரண்டாம் Tawadros அவர்கள் முன்னிலையில் இவ்வொப்பந்தம் கையெழுத்திடப்பட்டபோது, அக்கிறிஸ்தவ சபையின் சமூக மேம்பாட்டுத்துறைத் தலைவர்  ஆயர் Ioannis, கிறிஸ்தவ சபைப் பிரதிநிதிகள் மற்றும் அரசுப் பிரதிநிதிகளும் கலந்துகொண்டனர்.

ஆதாரம் : Fides/ வத்திக்கான் வானொலி

7. கூட்டு இராணுவப் படை அமைக்க அரபுத் தலைவர்கள் இணக்கம்

மார்ச்,30,2015. ‘'எதிர்பாராத அச்சுறுத்தல்களை எதிர்கொள்ளும் நோக்கில், அரபுலகத் தலைவர்கள் கூட்டு இராணுவப் படை ஒன்றை உருவாக்க இணங்கியுள்ளதாக எகிப்து அதிபர் அப்துல் ஃபட்டா எல்-ஸீஸீ கூறினார்.
அரபுப்பகுதியில் எதிர்நோக்கப்படும் 'எதிர்பாராத அச்சுறுத்தல்களை எதிர்கொள்ளும் விதத்தில் இந்த திட்டம் முன்வைக்கப்பட்டுள்ளதாக அவர் தெரிவித்தார்.
யேமனில் நிலவும் குழப்பங்கள் தொடர்பாக ஆராயப்பட்ட அரபு லீக் மாநாட்டில் இந்த உடன்பாடு காணப்பட்டுள்ளது.
யேமனில் தற்போது ஹெளதி- ஷியா முஸ்லிம் கிளர்ச்சியாளர்களை இலக்குவைத்து சவுதி அரேபியா தலைமையிலான கூட்டு அரபுப் படையினர் தாக்குதல் நடத்திவருகின்றனர்.
ஹௌதிகள் ஆயுதங்களை கீழே வைத்துவிட்டு தாங்கள் கைப்பற்றியிருக்கும் நிலப்பகுதியிலிருந்து வெளியேறும்வரை படைநடவடிக்கை தொடரும் என்று அரபு லீக் கூறியுள்ளது.

ஆதாரம் : BBC/ வத்திக்கான் வானொலி

செய்திகள்-28.03.15

செய்திகள்-28.03.15
------------------------------------------------------------------------------------------------------

1. புனித அவிலா தெரேசாவின் வாழ்வு அர்ப்பணிக்கப்பட்ட வாழ்வைப் புதுப்பிக்க உதவுகிறது

2. திருத்தந்தை-முதுபெரும் தந்தை Dinkha, ஞானமுள்ள, துணிவுள்ள மேய்ப்பர்  

3. வத்திக்கான் தூய பேதுரு வளாகத்தில் குருத்து ஞாயிறு நிகழ்வுகள்

4. தலைமை நீதிபதிகளின் புனித வெள்ளி கூட்டம் குறித்து CBCI கடிதம்

5. பயங்கரவாதிகளை ஆதரிப்போருக்கு எதிராகச் சட்டங்கள் அவசியம்

6. மத்திய கிழக்கில் கிறிஸ்தவர்கள் பாதுகாக்கப்பட ஐ.நா.வுக்கு அழைப்பு

7. அல்பினிச நோயாளிகள் கொலைக்கு மலாவி ஆயர்கள் கண்டனம்

8. மதத்தீவிரவாதத்தை எதிர்க்க ஐரோப்பிய முஸ்லீம்களின் புதிய இணைய இதழ்

9. விண்வெளி நிலையத்தில் 342 நாள்கள் இரு விண்வெளி வீரர்கள்
------------------------------------------------------------------------------------------------------

1. புனித அவிலா தெரேசாவின் வாழ்வு அர்ப்பணிக்கப்பட்ட வாழ்வைப் புதுப்பிக்க உதவுகிறது

மார்ச்,28,2015. தன்னையே முழுமையாக கடவுளுக்கு அர்ப்பணித்த புனித அவிலா தெரேசாவின் வாழ்வு, இக்காலத்தில் அர்ப்பணிக்கப்பட்ட வாழ்வைப் புதுப்பிப்பதற்கு உதவுகின்ற மாபெரும் சொத்து என்று கூறியுள்ளார் திருத்தந்தை பிரான்சிஸ்.
மார்ச் 28, இச்சனிக்கிழமையன்று அவிலா நகர் புனித தெரேசா அவர்கள் பிறந்ததன் 500ம் ஆண்டு நிறைவு சிறப்பிக்கப்பட்டதை முன்னிட்டு, காலணி அணியாத அனைத்துலக கார்மேல் சபை தலைவர் அருள்பணி Saverio Cannistrà அவர்களுக்கு, திருத்தந்தை பிரான்சிஸ் அவர்கள் அனுப்பியுள்ள கடிதத்தில் இவ்வாறு கூறியுள்ளார்.
புனித அவிலா தெரேசா, முதலில் செபத்தின் ஆசிரியர் என்று விவரித்துள்ள திருத்தந்தை, புனித அவிலா தெரேசாவின் செபம், ஒரு காலத்துக்கு, ஒரு கட்டத்துக்கு மட்டும் ஏற்றது அல்ல, மாறாக, இச்செபம் பல்வேறு தருணங்களில் செபிக்கப்படுகின்றது, இப்புனிதர் இடைவிடாச் செபத்தில் அசையாத பற்றுறுதி கொண்டிருந்தார் என்று கூறியுள்ளார்.
ஆன்ம வறட்சி காலத்திலும், வாழ்வில் துன்பங்களை எதிர்கொள்ளும்போதும் நாம் செபத்தில் உறுதியாய் இருக்குமாறு அழைப்புவிடுக்கும் இப்புனிதர், உண்மையான குழுவாழ்வின் முக்கியத்துவத்தையும் வலியுறுத்துகிறார் என்று கூறியுள்ளார் திருத்தந்தை பிரான்சிஸ்.
அர்ப்பணிக்கப்பட்ட வாழ்வு ஆண்டு கடைப்பிடிக்கப்படும் இவ்வாண்டில் இப்புனிதர் பிறந்ததன் 5ம் நூற்றாண்டு நிறைவு சிறப்பிக்கப்படுவது பொருத்தமாக உள்ளது, கடந்த காலத்தை நன்றியோடு திரும்பிப் பார்த்து சபைகளை ஆரம்பித்தவர்களின் உள்தூண்டுதல்களைக் கண்டுணருவதற்கு இந்நிகழ்வு நல்லதொரு காரணமாக உள்ளது  என்று கூறியுள்ளார் திருத்தந்தை.
இஸ்பெயின் நாட்டின் அவிலாவில் 1515ம் ஆண்டு மார்ச் 28ம் தேதி பிறந்த புனித தெரேசா, தியானயோகி மற்றும் கார்மேல் சபையைச் சீர்திருத்தியவர். இயேசுவின் தெரேசா எனவும் அழைக்கப்படும் இப்புனிதரை 1970ம் ஆண்டில் திருஅவையின் மறைவல்லுனராக அறிவித்தார் முத்திப்பேறு பெற்ற திருத்தந்தை 6ம் பவுல். மிகவும் புகழ்பெற்ற The Interior Castle என்ற ஆன்மீக நூல் உட்பட பல கிறிஸ்தவ ஆன்மீக மற்றும் தியானயோக நூல்களை எழுதியுள்ளார் புனித அவிலா தெரேசா.

ஆதாரம் : வத்திக்கான் வானொலி

2. திருத்தந்தை-முதுபெரும் தந்தை Dinkha, ஞானமுள்ள, துணிவுள்ள மேய்ப்பர்  

மார்ச்,28,2015.  அசீரிய கீழை வழிபாட்டுமுறை முதுபெரும் தந்தை நான்காம் Mar Dinkha அவர்கள் உயிரிழந்ததையொட்டி, கிழக்கின் அசீரியத் திருஅவை முதுபெரும் தந்தை Mar Aprem Locum Tenens அவர்களுக்கு இரங்கல் தந்தி அனுப்பியுள்ளார் திருத்தந்தை பிரான்சிஸ்.
அசீரியத் திருஅவையினர் அனைவருக்கும் தனது ஆழ்ந்த அனுதாபங்களைத் தெரிவித்துள்ள திருத்தந்தை, முதுபெரும் தந்தை Mar Dinkha அவர்கள், அதிகச் சவால்கள் நிறைந்த காலக்கட்டத்தில் தனது சமூகத்தை ஞானத்துடனும் துணிச்சலுடனும் வழிநடத்திய மேய்ப்பர் என்று பாராட்டியுள்ளார்.
கிறிஸ்தவ உலகம் ஒரு முக்கியமான தலைவரை இழந்துள்ளது என்றும், மத்திய கிழக்கில், குறிப்பாக, ஈராக் மற்றும் சிரியாவில் ஒவ்வொரு நாளும் அடக்குமுறைகளால் துன்புறும் கிறிஸ்தவர்கள் மற்றும் சிறுபான்மை மக்கள் குறித்து முதுபெரும் தந்தை Mar Dinkha அவர்கள் அதிகமாகத் துன்புற்றார் என்றும் திருத்தந்தை அச்செய்தியில் குறிப்பிட்டுள்ளார்.
79 வயது நிரம்பிய முதுபெரும் தந்தை கத்தோலிக்கோஸ் Mar Dinkha அவர்கள் இவ்வியாழனன்று மரணமடைந்தார். இவரது அடக்கச்சடங்கு வருகிற ஏப்ரல் 8ம் தேதி இடம்பெறும்.
மேலும், “கிறிஸ்துவின் சீடர்களாக இருக்கும் நாம், மிகவும் நலிந்தவர்களின்  நன்மை குறித்து எப்படி அக்கறை கொள்ளாதிருக்க முடியும்?” என்று திருத்தந்தை பிரான்சிஸ் அவர்கள் இச்சனிக்கிழமையன்று தனது டுவிட்டரில் பதிவு செய்துள்ளார்.

ஆதாரம் : வத்திக்கான் வானொலி

3. வத்திக்கான் தூய பேதுரு வளாகத்தில் குருத்து ஞாயிறு நிகழ்வுகள்

மார்ச்,28,2015. இஞ்ஞாயிறு உரோம் நேரம் காலை 9.30 மணிக்கு வத்திக்கான் தூய பேதுரு வளாகத்தில் ஒலிவ மரக்கிளைகளையும் குருத்தோலைகளையும் ஆசீர்வதித்து,   குருத்து ஞாயிறு திருப்பலியை நிறைவேற்றுகிறார் திருத்தந்தை பிரான்சிஸ்.
கர்தினால்கள், ஆயர்கள், பொதுநிலையினர் ஆகியோருடன் பவனியாகச் சென்று குருத்து ஞாயிறு திருப்பலியை நிறைவேற்றுகிறார் திருத்தந்தை பிரான்சிஸ்.
வத்திக்கான் தூய பேதுரு வளாகத்தில் திருத்தந்தை பிரான்சிஸ் அவர்கள் தலைமையில் நடைபெறும் குருத்தோலைப் பவனியில் பங்குபெறும் கர்தினால்கள், ஆயர்கள், பொதுநிலையினர் என அனைவருக்கும் வழங்குவதற்கென கைவேலைப்பாடுகள் நிறைந்த குருத்தோலைகளை இத்தாலியின் சன்ரேமோ நகர் வழங்குகிறது.
குருத்து ஞாயிறு திருவழிபாட்டுக்கென குருத்தோலைகளை திருத்தந்தைக்கு நன்கொடையாக வழங்கும் பழக்கம், 2003ம் ஆண்டில் சன்ரேமோ குருத்தோலை ஆய்வு  மற்றும் சமூக மையத்தால் தொடங்கப்பட்டது. திருத்தந்தைக்கு வழங்கப்படும் கைவண்ண குருத்தோலை மூவொரு கடவுளைக் குறிக்கும் விதத்தில்  தயாரிக்கப்பட்டுள்ளது.
மேலும், இப்புனித நாளில் வத்திக்கான் வளாகத்திலும் மற்ற இடங்களிலும் வைக்கப்படும் ஒலிவ மரங்களையும், விசுவாசிகளுக்கு விநியோகிக்கப்படும் ஒலிவக் கிளைகளையும் தென் இத்தாலியின் Puglia மாநிலத்தின் Cerignola-Ascoli Satriano மறைமாவட்டம் வழங்குகிறது. இது அம்மறைமாவட்ட ஆயர் Felice di Molfetta அவர்களின் முயற்சியாகும்.

ஆதாரம் : வத்திக்கான் வானொலி

4. தலைமை நீதிபதிகளின் புனித வெள்ளி கூட்டம் குறித்து CBCI கடிதம்

மார்ச்,28,2015. இந்தியாவின் அனைத்து தலைமை நீதிபதிகளுக்கும் புனித வெள்ளியன்று மூன்று நாள் கூட்டம் ஒன்று தொடங்கவிருப்பது குறித்து தனது கவலையைத் தெரிவித்து இந்திய தலைமை நீதிபதி H L Dattu அவர்களுக்கு கடிதம் அனுப்பியுள்ளது இந்திய ஆயர் பேரவை.
இந்தியாவில் நூற்றாண்டளவாக காக்கப்பட்டுவரும் அனைத்து மதத்தவரின், குறிப்பாக, சிறுபான்மை மதத்தவரின் புனித நாள்கள் குறித்த விசுவாசத்தை இந்நடவடிக்கை கேள்விக்கு உள்ளாக்கியுள்ளது என்று அக்கடிதத்தில் கூறப்பட்டுள்ளது.
உலகிலுள்ள அனைத்துக் கிறிஸ்தவர்களுக்கும் ஆண்டின் மிக முக்கிய நாள்களில் ஒன்றான புனித வெள்ளியன்று, இயேசு கிறிஸ்து மனித சமுதாயத்தின் மீட்புக்காகத் தம்மையே தியாகம் செய்த மிக உன்னத செயல் மிகுந்த பக்தியோடு நினைவுகூரப்படுகின்றது என்று அக்கடிதம் கூறுவதாக, CBCI என்ற இந்திய ஆயர் பேரவையின் உதவிப் பொதுச் செயலர் அருள்பணி Joseph Chinnayyan அவர்கள் கூறினார்.
கிறிஸ்மஸ் நாளை நல்லாட்சி தினமாக இந்திய அரசு மாற்றுவதற்கு எடுக்கப்பட்டுள்ள தீர்மானம் இந்தியா முழுவதும் கிறிஸ்தவர்கள் மத்தியில் அச்சத்தை ஏற்படுத்தியுள்ளவேளை, கிறிஸ்மஸ், புனித வெள்ளி, உயிர்ப்புப் பெருவிழா ஆகிய நாள்களின் முக்கியத்துவத்தை வேண்டுமென்றோ அல்லது அவ்வாறு இல்லாமலோ குறைத்து மதிப்பிடுவது கிறிஸ்தவ சமூகத்தின் உணர்வுகளைப் புண்படுத்துவதாக இருக்கும் என்று எச்சரித்தார் அருள்பணி Chinnayyan. 

ஆதாரம் : CBCI / வத்திக்கான் வானொலி

5. பயங்கரவாதிகளை ஆதரிப்போருக்கு எதிராகச் சட்டங்கள் அவசியம்

மார்ச்,28,2015. பயங்கரவாதிகளை ஆதரிக்கும் நாடுகள் மற்றும் தனிநபர்களுக்கு எதிராகக் கடுமையான சட்டங்கள் கொண்டுவரப்பட வேண்டும் என்று ஐ.நா. பாதுகாப்பு அவையை கேட்டுக்கொண்டார் பாக்தாத் கல்தேய வழிபாட்டுமுறை முதுபெரும் தந்தை லூயிஸ் இரஃபேல் சாக்கோ.
ஈராக்கிலும், மத்திய கிழக்குப் பகுதி முழுவதிலும் நசுக்கப்படும் கிறிஸ்தவர்கள் மற்றும் சிறுபான்மை சமூகங்கள் குறித்து, பிரான்ஸ் நாட்டின் முயற்சியால், இவ்வெள்ளியன்று நடைபெற்ற ஐ.நா. பாதுகாப்பு அவையில் உரையாற்றிய முதுபெரும் தந்தை சாக்கோ அவர்கள் இவ்வாறு வலியுறுத்தினார்.
பயங்கரவாதத்தை எதிர்க்கும் புனித நூல்கள் குறித்த சீர்திருத்த கல்விக்கு ஆதரவான நடவடிக்கைகள் தேவை என்று கேட்டுக்கொண்ட முதுபெரும் தந்தை சாக்கோ அவர்கள், ஈராக் மற்றும் குர்திஸ்தான் அதிகாரிகளுக்கு ஆதரவாக அனைத்துலக சமுதாயம் செயல்படும் என்ற தனது நம்பிக்கையையும் தெரிவித்தார்.
அரபு வசந்தம் என்ற எழுச்சி, அமைதி, உறுதியான தன்மை, முன்னேற்றம் ஆகியவற்றை ஏற்படுத்தாமல், ஈராக் மக்கள்மீது எதிர்மறைத் தாக்கங்களை ஏற்படுத்தியுள்ளது என்பதையும் சுட்டிக்காட்டினார் முதுபெரும் தந்தை சாக்கோ.

ஆதாரம் : AsiaNews / வத்திக்கான் வானொலி

6. மத்திய கிழக்கில் கிறிஸ்தவர்கள் பாதுகாக்கப்பட ஐ.நா.வுக்கு அழைப்பு

மார்ச்,28,2015. மத்திய கிழக்குப் பகுதியில் கிறிஸ்தவர்கள் உயிர்வாழ்வதற்கான அச்சத்தை எதிர்கொள்வதால், இவர்களைப் பாதுகாப்பதற்கு ஐ.நா. நடவடிக்கை எடுக்க வேண்டும் என திருப்பீடம் வேண்டுகோள் விடுத்துள்ளது.
“மத்திய கிழக்கில், இன அல்லது மதத்தின் அடிப்படையில் தாக்குதல்களுக்கும் உரிமை மீறல்களுக்கும் பலியாகும் மக்கள்” என்ற தலைப்பில், ஐ.நா. பாதுகாப்பு அவையில் இவ்வெள்ளியன்று நடைபெற்ற பொது விவாதத்தில் இவ்வாறு தனது வேண்டுகோளை முன்வைத்தார் பேராயர் Bernardito Auza.
ஐ.நா.வுக்கான திருப்பீடத்தின் நிரந்தரப் பார்வையாளரான பேராயர் Auza அவர்கள், இன அல்லது மதத்தின் அடிப்படையில் மக்கள் மேலும் தாக்குதல்களுக்கும், உரிமை மீறல்களுக்கும் பலியாகாமல் தடுப்பதற்கு, அனைத்துலக சமுதாயம் தன்னால் இயன்ற அனைத்தையும் செய்யுமாறு கேட்டுள்ளார். 
இனப்படுகொலை, போர்க் குற்றங்கள், மானுடத்துக்கு எதிரான குற்றங்கள், இன அழிப்பு, இன அழிப்பைத் தூண்டும் நடவடிக்கைகள் ஆகியவற்றைத் தடுப்பதற்குக் காலம் தாழ்த்தாது உடனடியாகச் செயல்படுமாறு, மத்திய கிழக்குப் பகுதியிலும், உலகெங்கிலும் வாழும் நன்மனம் கொண்ட தலைவர்களையும், மக்களையும் கேட்டுக் கொண்டுள்ளார் பேராயர் Auza.
ஒரு நாடு தனது மக்களை இத்தகைய குற்றங்களிலிருந்து பாதுகாப்பதற்கு இயலாமல் அல்லது அதில் விருப்பம் காட்டாமல் இருந்தால், ஐ.நா. ஒப்பந்தத்துக்கு ஒத்தவகையில் நடவடிக்கை எடுப்பதற்கு அனைத்துலக சமுதாயம் தயாராக இருக்க வேண்டுமெனவும் கூறினார் பேராயர் Auza.

ஆதாரம் : வத்திக்கான் வானொலி

7. அல்பினிச நோயாளிகள் கொலைக்கு மலாவி ஆயர்கள் கண்டனம்

மார்ச்,28,2015. மலாவி நாட்டில் அல்பினிசம் எனப்படும் வெண்மைத் தோல் நோயால் பாதிக்கப்பட்டவர்களைக் கடத்தி கொலைசெய்யும் நடவடிக்கைகள் மிகுந்த கவலை தருவதாக அந்நாட்டின் கத்தோலிக்க ஆயர்கள் கூறியுள்ளனர்.
ஆப்ரிக்க நாடான மலாவியில், செல்வ வளம், பணம் போன்ற ஆசைகளால் தவறாக வழிகாட்டப்பட்டு, அல்பினிச நோயாளிகள் கொலை செய்யப்படுகின்றனர் என்றுரைக்கும் அந்நாட்டு ஆயர் பேரவையின் நீதி மற்றும் அமைதி அவை, இக்கொலைகளை எக்காரணங்கள் கொண்டும் நியாயப்படுத்த முடியாது என்று கூறியுள்ளது.
தங்களின் உடல் உறுப்புக்களில் புதிரான அல்லது மந்திர சக்திகளைக் கொண்டிருக்கும் அல்பினிச நோயாளிகள், யாராவது ஒருவரை செல்வந்தராக்க முடியும் என்ற மூட நம்பிக்கையில் மலாவி நாட்டில் இந்நோயாளிகள் கொலை செய்யப்படுகின்றனர்.
மேலும், அல்பினிச நோயாளிகளைத் தாக்குவோருக்கு எதிராக கடுமையான கண்டனத்தை வெளியிட்டுள்ள மலாவி அரசுத்தலைவரைப் பாராட்டியுள்ள ஐ.நா. மனித உரிமைகள் அலுவலகம், இக்குற்றவாளிகள் உடனடியாக கைது செய்யப்பட்டு அல்பினிச நோயாளிகள் பாதுகாக்கப்படுமாறு வலியுறுத்தியுள்ளது.
மலாவியில் கடந்த வாரத்தில் மட்டும் கடத்தப்பட்ட 3 பேர் உட்பட, கடந்த ஆறு மாதங்களில் குறைந்தது 15 அல்பினிச நோயாளிகள் கடத்தப்பட்டு காயப்படுத்தப்பட்டனர் அல்லது கொலை செய்யப்பட்டனர்.
அல்பினிசம் எனப்படும் வெண்மைத் தோல் நோய், குறைபாடுடைய நிறமிகள் தோலில் தோன்றுவதால் ஏற்படுகிறது. இது ஒரு மரபணுக் குறைபாட்டு நோய். இவர்களுக்கு வெண்பொன் நிறமான தலைமயிர், பார்வைக் குறைபாடு, ஒளி வெறுப்பு போன்ற தன்மைகள் ஏற்படும். இவர்களது தோலில் அதிக அளவு சூரிய ஒளியால் புற்றுநோய்ப் புண்கள் தோன்ற வாய்ப்புண்டு.

ஆதாரம் : UN / வத்திக்கான் வானொலி

8. மதத்தீவிரவாதத்தை எதிர்க்க ஐரோப்பிய முஸ்லீம்களின் புதிய இணைய இதழ்

மார்ச்,28,2015. மதத்தீவிரவாதத்தை எதிர்க்கும் நோக்கத்தில் ஐரோப்பா முழுவதிலும் உள்ள 120க்கும் மேற்பட்ட முஸ்லிம் தலைவர்கள் இணைந்து ஓர் இணைய இதழைத் தொடங்கியுள்ளனர்
இலண்டனில் கூட்டம் நடத்திய இத்தலைவர்கள், இஸ்லாம் மதத்தின் பெயரால் தவறாக நடத்தப்படும் கொடுஞ்சயல்களுக்கு எதிராக, தங்களின் கண்டனத்தையும் தெரிவித்தனர். 
இக்கூட்டத்தில் இத்தலைவர்கள் தொடங்கியுள்ள இந்த இணைய இதழ், மதத் தீவிரவாதத்தில் ஈடுபடும் ஐஎஸ் இஸ்லாமிய அரசு போன்ற குழுக்களுக்கு எதிராக எடுக்கப்படும் முயற்சிகளின் ஒரு பகுதியாக அமைந்துள்ளது.
Imamsonline.com எனப்படும் இந்த இணையதளம் மூலம் தொடங்கப்பட்டுள்ள 'Haqiqah' அல்லது 'The Truth', என்று அழைக்கப்படும் இணைய இதழின் நோக்கம் மதத்தீவிரவாத இயக்கங்கள் குறித்த உண்மையை இளைய தலைமுறையினருக்கு அறிவுறுத்துவதேயாகும்.
இணையதளத்தில் தீவிரவாத பிரச்சாரத்தின் தாக்கம் குறித்து தாங்கள் கவலையடைந்திருப்பதாகவும், இதனால் உருவாகின்ற தீய முறைகேடான மனநிலையை சரிசெய்ய இந்தப் புதிய இணைய இதழ்தான் ஒரேவழி என்றும் அத்தலைவர்கள் இலண்டன் கூட்டத்தில் கூறினர்.

ஆதாரம் : BBC/ IANS / வத்திக்கான் வானொலி

9. விண்வெளி நிலையத்தில் 342 நாள்கள் இரு விண்வெளி வீரர்கள்

மார்ச்,28,2015. பூமியைச் சுற்றி வலம் வந்துகொண்டிருக்கும் பன்னாட்டு விண்வெளி நிலையத்தில் தொடர்ந்து 12 மாதங்கள் தங்கவிருக்கும் இருவர் உட்பட மூன்று விண்வெளி வீரர்களை இரஷ்யாவின் சோயுஸ் விண்கலம் அந்த விண்வெளி நிலையத்தில் கொண்டுபோய்ச் சேர்த்துள்ளது.
அமெரிக்க ஐக்கிய நாட்டவரான 51 வயது Scott Kellyயும், இரஷ்யரான 54 வயது Mikhail Kornienkoவும் அடுத்த ஆண்டு மார்ச் மாதம் வரையில், 342 நாள்களுக்கு, பன்னாட்டு விண்வெளி நிலையத்திலேயே தங்கியிருப்பார்கள்.
பொதுவாக விண்வெளி நிலையத்தில் ஆறு மாதங்களுக்குத்தான் ஒருவர் தங்கவைக்கப்படுவார். ஆனால் புவியீர்ப்பு விசையின் தாக்கம் குறைவதால் உடலில் ஏற்படக்கூடிய மாற்றங்கள் பற்றி ஆராய்வதற்காக இவர்கள் அதிக காலம் தங்க வைக்கப்படுகின்றனர்.
விண்ணில் உடல் எடை உணரப்படாததால் கெல்லி அவர்களுக்கு ஏற்படும் மாற்றங்கள், அவருடன் இரட்டையராகப் பிறந்தவருக்கு இங்கே பூமியில் உடலில் ஏற்படும் மாற்றங்களோடு ஒப்பிடப்படும்.
எதிர்காலத்தில் செவ்வாய்க் கிரகத்துக்கு மனிதரை அனுப்பும் திட்டத்திற்கான தகவல் சேகரிப்புக்காக நாசா இந்தச் சோதனையை நடத்துகிறது.

ஆதாரம் : BBC/ வத்திக்கான் வானொலி

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...