Tuesday, 11 September 2012

Catholic News in Tamil - 04/09/12

1. லெபனன் மக்கள் வேறுபாடுகளைக் களைந்து திருத்தந்தையை வரவேற்குமாறு மாரனைட்ரீதி தலைவர் வேண்டுகோள்

2. அமெரிக்க ஐக்கிய நாட்டில் தேசிய அளவில் பொருளாதாரப் புதுப்பித்தல் இடம்பெறுமாறு ஆயர்கள் வேண்டுகோள்

3. ஆப்ரிக்கக் கருத்தரங்கு : நற்செய்தி அறிவிப்பின் சவால்களை ஆராய்ந்து வருகிறது

4. ஆசியத் திருஅவை டிஜிட்டல் உலகத்தில் நற்செய்தி அறிவிக்க வேண்டும்

5. Rimsha Masih கடவுளின் திருவருளால் காப்பாற்றப்பட்டுள்ளார் : லாகூர் அமைதி மைய இயக்குனர்

6. சட்டத்தின் சலுகைகளை அனுபவிக்க ஏழ்மை தடையாய் இருக்கக் கூடாது – ஐ.நாஅதிகாரி

7. வளரும் நாடுகளில் நகர்ப்புறமயமாதலைக் குறைப்பதற்கு கொள்கைகள் வகுக்கப்படுமாறு ஐ.நா.அதிகாரி வலியுறுத்தல்

8. இலங்கை அகதிகளைத் திருப்பி அனுப்ப முடியாது : ஆஸ்திரேலிய அரசு


------------------------------------------------------------------------------------------------------

1. லெபனன் மக்கள் வேறுபாடுகளைக் களைந்து திருத்தந்தையை வரவேற்குமாறு மாரனைட்ரீதி தலைவர் வேண்டுகோள்

செப்.04,2012. லெபனன் மக்கள் தங்களுக்கிடையே நிலவும் வேறுபாடுகளைக் களைந்து,  அன்பு மற்றும் உண்மையுடன் தங்கள் நாட்டுக்குத் திருப்பயணம் மேற்கொள்ளும் திருத்தந்தையை வரவேற்குமாறு கேட்டுள்ளார் அந்நாட்டு மாரனைட்ரீதி கத்தோலிக்க முதுபெரும் தலைவர் Bechara Rai.
லெபனன் மக்களுக்கிடையே நிலவும் வேறுபாடுகள், அந்நாட்டுக்குத் இம்மாதம் 14 முதல் 16 வரை திருப்பயணம் மேற்கொள்ளும் திருத்தந்தை 16ம் பெனடிக்ட் அவர்களை வரவேற்பதற்குத் தடையாய் இருக்கக் கூடாது என்றும் கூறியுள்ளார் முதுபெரும் தலைவர் Rai.
வத்திக்கானில் 2010ம் ஆண்டு அக்டோபரில் நடைபெற்ற மத்திய கிழக்கு நாடுகள் பற்றிய சிறப்பு ஆயர் மாமன்றத்தின் தீர்மானத்தொகுப்பை வெளியிடுவது திருத்தந்தையின் இத்திருப்பயணத்தின் முக்கிய நோக்கம் என்பதையும் அவர் குறிப்பிட்டார்.
லெபனன் மக்கள் தொகையில் ஏறக்குறைய 59.7 விழுக்காட்டினர் முஸ்லீம்கள். 21 விழுக்காட்டினர் மாரனைட்ரீதி கத்தோலிக்கர். 8 விழுக்காட்டினர் கிரேக்க ஆர்த்தடாக்ஸ் சபையினர். 5 விழுக்காட்டினர் கிரேக்கரீதிக் கத்தோலிக்கர். 7 விழுக்காட்டினர் பிற கிறிஸ்தவ சபையினர். இவர்களில் அர்மேனிய ரீதிக் கிறிஸ்தவர்கள் 4 விழுக்காட்டினர்.

2. அமெரிக்க ஐக்கிய நாட்டில் தேசிய அளவில் பொருளாதாரப் புதுப்பித்தல் இடம்பெறுமாறு ஆயர்கள் வேண்டுகோள்

செப்.04,2012. அமெரிக்க ஐக்கிய நாட்டில் கடுமையாக உழைக்கும் ஒரு கோடிக்கு மேற்பட்ட குடும்பங்கள் தங்களது அடிப்படைத் தேவைகளை நிறைவேற்ற முடியாத அளவுக்கு மிகக் குறைந்த ஊதியத்தைப் பெறுகின்றன என்று அந்நாட்டு ஆயர்கள் கவலை தெரிவித்துள்ளனர்.
இத்திங்களன்று அமெரிக்க ஐக்கிய நாட்டில் கடைப்பிடிக்கப்பட்ட தேசிய தொழிலாளர் தினத்தையொட்டி செய்தி வெளியிட்ட அந்நாட்டு ஆயர் பேரவையின் நீதி மற்றும் மனித முன்னேற்ற ஆணையத் தலைவர் ஆயர் Stephen E. Blaire, தற்போதைய பொருளாதார நெருக்கடியினால் பலர் வேலையிழந்திருப்பதையும், அதனால் குடும்பங்கள் கடுமையாய்ப் பாதிக்கப்பட்டிருப்பதையும் சுட்டிக் காட்டியுள்ளார்.
அந்நாட்டில் ஒரு கோடியே 20 இலட்சத்துக்கு மேற்பட்ட தொழிலாளர்கள் வேலை தேடுவதாகவும், இலட்சக்கணக்கானவர்கள் வேலை தேடுவதையே நிறுத்தி விட்டதாகவும், 4 கோடியே 60 இலட்சத்துக்கு மேற்பட்ட மக்கள் வறுமையில் வாழ்வதாகவும், ஒரு கோடியே 60 இலட்சத்துக்கு மேற்பட்ட சிறார் வறுமையிலே வளர்வதாகவும் அச்செய்தி கூறுகிறது.
நாட்டின் பொருளாதார வாழ்வில் தொழிலாளர்களையும், அவர்களது குடும்பங்களையும் மையப்படுத்தும் நாடு தழுவிய பொருளாதாரப் புதுப்பித்தல் இடம்பெறுமாறும் அமெரிக்க ஆயரின் செய்தி வேண்டுகோள் விடுத்துள்ளது.
3. ஆப்ரிக்கக் கருத்தரங்கு : நற்செய்தி அறிவிப்பின் சவால்களை ஆராய்ந்து வருகிறது

செப்.04,2012. இன்றைய ஆப்ரிக்காவில் இயேசு கிறிஸ்துவின் நற்செய்திக்குச் சாட்சிகளாய் இருப்பது என்ற தலைப்பில் திருப்பீட பொதுநிலையினர் அவை காமரூன் நாட்டு யவுண்டேயில் கருத்தரங்கு ஒன்றை இச்செவ்வாயன்று தொடங்கியுள்ளது.
ஆப்ரிக்காவின் எல்லா நாடுகளிலிருந்தும் பிரதிநிதிகள் பங்கு கொள்ளும் இக்கருத்தரங்கு குறித்துப் பேசிய திருப்பீட பொதுநிலையினர் அவைத் தலைவர் கர்தினால் Stanislaw Rylko, இந்தப் பெரிய ஆப்ரிக்கக் கண்டத்தில் நற்செய்தியை அறிவிப்பதில் பொதுநிலையினருக்கு இருக்கும் முக்கிய பணி இக்கருத்தரங்கில் வலியுறுத்தப்படும் என்று கூறினார்.
ஆப்ரிக்காவின் சமய, சமூக, கலாச்சார, பொருளாதார மற்றும் அரசியல் துறைகளில் இயேசு கிறிஸ்துவின் நற்செய்தியை அறிவிப்பதில் துன்பங்கள் நிறைந்த சவால்களை எதிர்நோக்க வேண்டியுள்ளது என்று குறிப்பிட்ட கர்தினால் Rylko, பொதுநிலையினர் இந்தச் சவால்களைச் சந்திப்பதற்கு கருத்துக்களும் ஆலோசனைகளும் இக்கருத்தரங்கில் வழங்கப்படும் என்று கூறினார்.
இக்கருத்தரங்கு வருகிற ஞாயிறன்று நிறைவடையும்.

4. ஆசியத் திருஅவை டிஜிட்டல் உலகத்தில் நற்செய்தி அறிவிக்க வேண்டும்

செப்.04,2012. ஆசியத் திருஅவை டிஜிட்டல் உலகத்தில் நற்செய்தி அறிவிப்பதற்கு, இந்தத் துறையில் முன்னேறியுள்ள வத்திக்கான் வானொலியிலிருந்து கற்றுக் கொள்ள வேண்டும் என்று பாங்காக் புனித யோவான் பல்கலைக்கழகத் துணைவேந்தர் முனைவர் Chainarong Monthienvichienchai கூறினார்.
தாய்லாந்து நாட்டின் பாங்காக்கில் நடைபெற்றுவரும் ஆசிய ஆயர் பேரவைகளின் கூட்டமைப்பின் BISCOM என்ற சமூகத்தொடர்பு ஆணையம் நடத்தும் 8வது கூட்டத்தில் உரையாற்றிய Chainarong, டிஜிட்டல் கலாச்சாரத்தில் ஒவ்வொருவரது கருத்தும் மதிப்புமிக்கது என்று கூறியதாக, இக்கூட்டத்தில் பங்கு கொள்ளும் வத்திக்கான் வானொலியின் இயேசு சபை அருள்தந்தை Joseph Paimpalli செய்தி அனுப்பியுள்ளார்.
இணையதளத்தில் ஒருவர் தனது கருத்துக்களைப் பதிவு செய்தால் அவற்றுக்கு மற்றவர்கள் நேர்மறையாகவோ எதிர்மறையாகவோ கருத்துக்களைப் பதிவு செய்கின்றனர், எனவே டிஜிட்டல் கலாச்சாரத்தில் ஒவ்வொருவரது கருத்தும் மதிப்புமிக்கது என்று Chainarong தெரிவித்தார். 
சிற்றலை, பண்பலை போன்ற பாரம்பரியத் தொழில்நுட்பங்களிலிருந்து புதிய வகை தொழில்நுட்பங்களை வளர்க்க வேண்டிய காலம் கனிந்துள்ளது என்று வத்திக்கான் வானொலி இயக்குனர் இயேசு சபை அருள்தந்தை பெதரிக்கோ லொம்பார்தி அண்மையில் கூறியதைக் குறிப்பிட்டுப் பேசிய Chainarong, கடந்த ஜூலை முதல் தேதியிலிருந்து வத்திக்கான் வானொலியின் வரலாற்றில் புதிய அத்தியாயம் திறக்கப்பட்டிருப்பதையும் சுட்டிக்காட்டினார். 
வருகிற வெள்ளிக்கிழமைவரை நடைபெறும் இக்கூட்டத்தில் 12 தெற்கு ஆசிய நாடுகளிலிருந்து 14 ஆயர்கள் உட்பட 45 பேர் கலந்து கொள்கின்றனர்.

5. Rimsha Masih கடவுளின் திருவருளால் காப்பாற்றப்பட்டுள்ளார் : லாகூர் அமைதி மைய இயக்குனர்

செப்.04,2012. பாகிஸ்தானில் தேவநிந்தனை சட்டத்தின்கீழ் பலிகடா ஆக்கப்பட்டுள்ள மனநலம் குறைபாடுள்ள சிறுமி Rimsha Masih, கடவுளின் திருவருளால் காப்பாற்றப்பட்டுள்ளார் என்று லாகூர் அமைதி மைய இயக்குனர் அருள்தந்தை James Channan கூறினார்.
சிறுமி Rimsha, குர்-ஆனின் பக்கங்களை எரித்ததன் மூலம் இஸ்லாத்தை இழிவுபடுத்திவிட்டார் என்று குற்றம்சாட்டப்பட்டு சிறை வைக்கப்பட்டுள்ள நிலையில், அவளது பையிலிருந்து எடுக்கப்பட்ட எரிந்த சில காகிதங்களுடன் இருந்த குர்ஆனின் பக்கங்களை Hafiz Mohammed Khalid Chishti என்ற இசுலாமிய மதபோதகர் வைத்ததாக நீதிபதியிடம் ஒருவர் சாட்சி சொன்னதைத் தொடர்ந்து அந்த மதபோதகர் கைது செய்யப்பட்டுள்ளார்.
இது குறித்து ஃபீதெஸ் செய்தி நிறுவனத்திடம் கருத்து தெரிவித்த அருள்தந்தை Channan, இச்சிறுமியின் விவகாரத்தில் நீதி கிடைத்து அவள் விடுதலை செய்யப்படுவாள் என்ற தனது நம்பிக்கையை வெளியிட்டார்.
பாகிஸ்தானில் சிறுபான்மையினர் எவ்வாறு தவறாகக் குற்றம் சாட்டப்படுகிறார்கள் என்பதற்கு சிறுமி Rimsha Masihன் கைதே சான்று எனவும் அக்குரு கூறினார்.
Down's syndrome என்ற மனநிலைக் குறைவுள்ள 14 வயதுச் சிறுமி Rimsha, அரேபிய மொழியையும், குரானையும் சொல்லித்தர உதவும் ஒரு நூலின் சில பக்கங்களை எரித்தார் என்று குற்றச்சாட்டப்பட்டு இம்மாதம் 18ம் தேதி சிறையில் வைக்கப்பட்டார்.
இதற்கிடையே, கைது செய்யப்பட்டுள்ள இசுலாமிய மதகுரு Khalid Chishtiவும் தேவநிந்தனை சட்டத்தின்கீழ் தண்டிக்கப்பட வேண்டுமென ரிம்ஷியின் வழக்கறிஞர் கூறினார்.

6. சட்டத்தின் சலுகைகளை அனுபவிக்க ஏழ்மை தடையாய் இருக்கக் கூடாது – ஐ.நாஅதிகாரி

செப்.04,2012. வறுமைக்கு எதிராகப் போராடுவது முக்கியமான மனித உரிமை என்று சொல்லி, ஏழைகளுக்கு நீதி கிடைப்பதற்கான வழிமுறைகள் மேம்படுத்தப்பட வேண்டுமென ஐ.நா.வல்லுனர் ஒருவர் உறுப்பு நாடுகளைக் கேட்டுக் கொண்டுள்ளார்.
நீதி கிடைப்பதற்கு வழிசெய்வது தன்னிலே மனித உரிமையாகும் மற்றும் வறுமையை ஒழிப்பதற்கு முக்கியமானதாகும் என்றுரைத்த, கடும் ஏழ்மை ஒழிப்பு குறித்த ஐ.நா. சிறப்புப் பிரதிநிதி Magdalena Sepúlveda, வறுமையில் வாடும் மக்களுக்கு நீதி கிடைப்பதற்கு வழிசெய்யாமல் இருக்கும் சட்ட ஒழுங்குகள் அர்த்தமற்றவை என்று குறை கூறினார்.
சட்ட ஒழுங்குகள் குறித்த ஐ.நா. உயர்மட்ட அளவிலான கூட்டம் இம்மாதம் 24ம் தேதி நடைபெறவிருப்பதையொட்டி உறுப்பு நாடுகளுக்கு இந்தப் பரிந்துரையை முன்வைத்துள்ளார் Sepúlveda.
சட்ட ஒழுங்குகளை அனுபவிப்பதற்கு ஏழ்மை ஒருபோதும் தடையாய் இருக்கக் கூடாது எனவும், சமூகத்தில் ஓரங்கட்டப்பட்டவர்களுக்கும் ஏழைகளுக்கும் நீதி கிடைப்பதற்கான வாய்ப்புகள் வழங்கப்பட வேண்டுமெனவும் Sepúlveda கேட்டுள்ளார்.

7. வளரும் நாடுகளில் நகர்ப்புறமயமாதலைக் குறைப்பதற்கு கொள்கைகள் வகுக்கப்படுமாறு ஐ.நா.அதிகாரி வலியுறுத்தல்

செப்.04,2012. வளரும் நாடுகளில் வேகமாக வளர்ந்து வரும் நகர்ப்புறமயமாதலைக் குறைப்பதற்கு கொள்கைகள் வகுக்கப்படுமாறு ஐ.நா.அதிகாரி ஒருவர் வலியுறுத்தியுள்ளார்.
இத்தாலியின் நேப்பில்ஸ் நகரில் நடைபெற்றுவரும் கூட்டத்தில் உரையாற்றிய ஐ.நா.குடியிருப்பு நிறுவன இயக்குனர் Joan Clos, வளரும் நாடுகளில் வேகமாக வளர்ந்து வரும் நகர்ப்புறமயமாதலைச் சுனாமிக்கு ஒப்பிட்டுப் பேசி, இந்த நிலை, அந்த நகரத்தை நிர்வகிப்பதற்குரிய திறமைகளையும் விஞ்சிவிடும் என்று எச்சரித்தார்.
உலகின் தெற்கே, வளர்ச்சியோடு நகர்ப்புறமயமாதலும் வேகமாக வளருவதைக் காண முடிகின்றது என்றுரைத்த க்ளோஸ், நகரங்கள் எதிர்கொள்ளும் சவால்களைச் சந்திப்பதற்கு நகரங்கள் மீண்டும் வடிவமைக்கப்பட வேண்டுமெனக் கேட்டுக் கொண்டார்.
நகரங்களுக்கென வகுக்கப்படும் திட்டங்கள் குடிமக்களுக்கு வேலைவாய்ப்புக்களையும் வளமையையும் நாடுகளுக்கு உதவ வேண்டுமெனக் கூறிய அவர், வளரும் நாடுகளில் நகர்ப்புறமயமாதலைக் களைவதற்கு கொள்கைகள் வகுக்கப்படுமாறு வலியுறுத்தினார்.

8. இலங்கை அகதிகளைத் திருப்பி அனுப்ப முடியாது : ஆஸ்திரேலிய அரசு

செப்.04,2012. இலங்கையில் இருந்து ஆஸ்திரேலியாவில் அடைக்கலம் கேட்கும் அனைவரையும் இலங்கைக்கே திருப்பி அனுப்பிவிட வேண்டும் என்று ஆஸ்திரேலிய எதிர்க்கட்சியினர் கூறியிருப்பதை அந்நாட்டின் அரசும், அகதிகளுக்காக குரல்கொடுப்பவர்களும் வன்மையாகக் கண்டித்திருக்கின்றனர் எனச் செய்திகள் கூறுகின்றன.
இலங்கை அகதிகள் ஆஸ்திரேலிய சட்ட விதிமுறைகளுக்குள் வருவதற்கு முன்னரே, அவர்களை நாட்டுக்குத் திருப்பி அனுப்புவதற்கு வசதியாக இலங்கை அரசுடன் ஆஸ்திரேலிய அரசு ஓர் ஒப்பந்தத்தைச் செய்துகொள்ள வேண்டும் என்று எதிர்க்கட்சிக் கூட்டமைப்பு கூறியுள்ளது.
இலங்கையிலிருந்து தஞ்சம் கோருபவர்கள், பொருளாதார நோக்கத்தைக் கொண்டிருக்கின்றனர் என்பதால் அவர்கள் அகதிகள் அல்ல என்று எதிர்க்கட்சி துணைத்தலைவரான ஜூலி பிசப் கூறியுள்ளார்.
ஆயினும், ஆஸ்திரேலிய எதிர்க்கட்சியினரின் கூற்றுக்குப் பதிலளித்த அந்நாட்டு குடியேற்றதாரர் துறையின் அமைச்சர் கிறிஸ் போவன், ஆஸ்திரேலியாவில் அடைக்கலம் கேட்கும் இலங்கை மக்களின் கோரிக்கைகளை ஐநாவின் அகதிகளுக்கான விதிமுறையின் அடிப்படையில் கையாள வேண்டிய கடமை ஆஸ்திரேலிய அரசுக்கு உள்ளது என்று தெரிவித்துள்ளார்.
அதேவேளை, ஆஸ்திரேலிய கிறிஸ்தவசபைகளின் கூட்டமைப்பும், அகதிகளை ஏற்பதை அந்நாடு மேலும் அதிகரிக்க வேண்டும் என்று கோரியுள்ளது.
எதிர்க்கட்சிகளின் இந்தத் திட்டம் மனித உரிமைகளை மீறுவதாக உள்ளது என்று அகதிகளுக்காகக் குரல் கொடுக்கும் மற்ற ஆர்வலர்களும் கூறியுள்ளனர்.
நடுக்கடலில் படகில் தவித்த இலங்கையர்கள் 50 பேர் இந்தோனேசிய மீனவர்களால் மீட்கப்பட்டதாக வந்த செய்திகளையடுத்து, ஜூலி பிசப் இலங்கை அகதிகள் குறித்த தனது கருத்தை இவ்வாறு தெரிவித்துள்ளார் எனக் கூறப்படுகிறது.
குழந்தைகள், பெண்கள் உட்பட இந்தப் படகில் வந்தவர்கள் நடுக்கடலில் பசியுடனும், நீர்ச்சத்து குறைந்தும் துன்புற்றனர் எனவும் கூறப்படுகிறது. 

robert john kennedy: Catholic News in Tamil - 03/09/12

robert john kennedy: Catholic News in Tamil - 03/09/12: 1. கர்தினால் கார்லோ மரிய மர்த்தினியின் அடக்கச் சடங்கில் திருத்தந்தையின் இரங்கல் செய்தி 2. போலியான மத உணர்வுக்கு எதிராகத் திருத்தந்தை எ...

Catholic News in Tamil - 03/09/12

1. கர்தினால் கார்லோ மரிய மர்த்தினியின் அடக்கச் சடங்கில் திருத்தந்தையின் இரங்கல் செய்தி

2. போலியான மத உணர்வுக்கு எதிராகத் திருத்தந்தை எச்சரிப்பு

3. நற்செய்திப்பணியின் புதிய முறைகளில் சமூகத்தொடர்பு சாதனங்களின் பங்கு குறித்த ஆசிய ஆயர்கள் கூட்டம்

4. உயிரை எடுப்ப‌த‌ற்கு எவ‌ருக்கும் உரிமையில்லை : பிரசில் கர்தினால்

5. மானுட விழுமியங்களைப் பாதுகாக்க வேண்டியது ஊடகங்களின் தார்மீகப் பொறுப்பாகும்: கர்தினால் மால்கம் இரஞ்சித்

6. இலங்கை அரசு மீது ஆம்னஸ்டி மனித உரிமைகள் கழகம் குற்றச்சாட்டு

7. சிறுமிக்கு எதிராகப் பொய்க் குற்றச்சாட்டு :  பாகிஸ்தான் இமாம் கைது

8. ஆபத்தில் உதவுபவர்கள் ஏழைகளே: அமெரிக்க ஆய்வில் தகவல்

9. குழந்தை பிறப்புக்கால இறப்பில் தமிழகத்தில் நீலகிரி முதலிடம் : சென்னையில் குறைவு

------------------------------------------------------------------------------------------------------

1. கர்தினால் கார்லோ மரிய மர்த்தினியின் அடக்கச் சடங்கில் திருத்தந்தையின் இரங்கல் செய்தி

செப். 03, 2012. இத்தாலியின் மிலான் மாநகர முன்னாள் பேராயர் கர்தினால் கார்லோ மரிய மர்த்தினியின் மறைவால் துன்புறும் அந்த உயர் மறைமாவட்ட விசுவாசிகள், அவர் சார்ந்திருந்த இயேசு சபை அங்கத்தினர்கள் மற்றும் அவரின் உறவினர்களுக்கு திருத்தந்தையின் ஆழ்ந்த அனுதாபங்களை வெளியிடும் இரங்கற் செய்தி, இத்திங்கள் மாலை 4 மணிக்குத் தொடங்கிய கர்தினாலின் அடக்கச்சடங்கு திருப்பலியின்போது திருத்தந்தையின் பிரதிநிதி கர்தினால் ஆஞ்சலோ கொமாஸ்திரியால் வாசித்தளிக்கப்பட்டது.
'என் காலடிக்கு உம் வாக்கே விளக்கு! என் பாதைக்கு ஒளியும் அதுவே!' என்ற திருப்பாடல் வரிகள், கர்தினால் மரிய மர்த்தினியின் வாழ்வை எடுத்துக்காட்டுபவைகளாக உள்ளன என தன் செய்தியில் கூறியுள்ள திருத்தந்தை, இந்தக் கர்தினால் விவிலியத்தில் மேற்படிப்பு படித்தவர் மட்டுமல்ல, அதையே தன் வாழ்வின் ஒளியாக்கியவர் எனப் பாராட்டியுள்ளார். ஏழைகள், துன்புறுவோர் ஆகியவர்களை மேய்ப்புப்பணி அக்கறையுடனும் ஆழமான பிறரன்புடனும் அணுகியவர் கர்தினால் மரிய மர்த்தினி என தன் இரங்கற் செய்தியில் மேலும் குறிப்பிட்டுள்ளார் திருத்தந்தை.

2. போலியான மத உணர்வுக்கு எதிராகத் திருத்தந்தை எச்சரிப்பு

செப்.03,2012. மதத்தை இரண்டாம்தர நிலைக்குக் குறைத்துப் பார்க்கும் ஆபத்து ஒவ்வொரு மதத்திலும், ஏன் கிறிஸ்தவத்திலும் பரவியிருப்பதைக் காண முடிகின்றது என்று இஞ்ஞாயிறன்று எச்சரித்தார் திருத்தந்தை 16ம் பெனடிக்ட்.
உரோமைக்குத் தென்கிழக்கே 15 மைல் தூரத்தில் அல்பானோ ஏரிக்கு மேலேயுள்ள குன்றுகளில் அமைந்துள்ள காஸ்தெல் கந்தோல்ஃபோவில் இஞ்ஞாயிறு நண்பகல் மூவேளை செப உரை வழங்கிய திருத்தந்தை, நமது மகிழ்ச்சியையும் பாதுகாப்பையும் இவ்வுலகப் பொருள்களிலும் அதிகாரத்திலும் மற்ற கண்கவர்ப் பொருள்களிலும் வைக்கும் போலியான சமய உணர்வை எச்சரித்தார்.
கடவுளின் திருச்சட்டத்தைத் தமது வாழ்வில் ஏற்று அதனை முழுமையாய் வாழும் ஒவ்வொருவருக்கும் அச்சட்டம் விடுதலையைக் கொண்டு வருகிறது என்றும் கூறினார் திருத்தந்தை.
இஞ்ஞாயிறு நற்செய்தி வாசகத்தை மையமாக வைத்து  மூவேளை செப உரை வழங்கிய திருத்தந்தை, மனிதரை வாழ்வின் பாதையில் வழிநடத்தி, தன்னல அடிமைத்தனத்தினின்று விடுதலை செய்து, உண்மையான சுதந்திரம் மற்றும் வாழ்வின் பூமியை அவருக்கு அறிமுகம் செய்யும் கடவுளின் திருவார்த்தையே கடவுளது  திருச்சட்டமாகும் என்றும் கூறினார்.
இதனாலே திருச்சட்டம் விவிலியத்தில், அதிகப்படியான வரையறையைக் கொண்டுள்ள சுமையாகப் பார்க்கப்படவில்லை, ஆனால் அது நம் ஆண்டவரது மிக விலையுயர்ந்த கொடையாகவும், அவரது தந்தைக்குரிய அன்புக்குச் சான்றாகவும், தமது மக்களோடு நெருங்கி இருந்து அன்பு வரலாறு எழுதுவதற்கான அவரது ஆவலாகவும் இருக்கின்றது என்றும் திருத்தந்தை தெரிவித்தார்.
அதேநேரம், கடவுளின் திருச்சட்டமும், மதமும் தங்களது உண்மையான அர்த்தத்தை இழப்பது குறித்த ஆபத்தைச் சுட்டிக்காட்டிய திருத்தந்தை, கடவுளின் திருச்சட்டத்தை வாழ்வதன் உண்மையான பொருள் கடவுளுக்குச் செவிமடுத்து வாழ்வதாகும் எனக் கூறினார்.
மேலும், இம்மூவேளை செபத்தின் இறுதியில் அங்குச் சென்றிருந்த லெபனன் திருப்பயணிகளைப் ப்ரெஞ்ச் மொழியில்  வாழ்த்திய திருத்தந்தை 16ம் பெனடிக்ட், இம்மாதம் 14 முதல் 16 வரை அந்நாட்டுக்குத் தான் திருப்பயணம் மேற்கொள்ளவிருப்பதைக் குறிப்பிட்டு அந்நாட்டு அரசுத்தலைவருக்குத் தனது நல்வாழ்த்தையும் தெரிவித்தார்.
  
3. நற்செய்திப்பணியின் புதிய முறைகளில் சமூகத்தொடர்பு சாதனங்களின் பங்கு குறித்த ஆசிய ஆயர்கள் கூட்டம்

செப்.03,2012. “நவீன ஊடகத்துறை : ஆசிய சமூகத்தொடர்புப் பணிக்கு முன்வைக்கும் சவால்களும் வாய்ப்புகளும்” என்ற தலைப்பில் தாய்லாந்து நாட்டு பாங்காக்கில் இத்திங்களன்று கூட்டம் ஒன்றைத் தொடங்கியுள்ளனர் ஆசிய ஆயர்கள்.
FABC என்ற ஆசிய ஆயர் பேரவைகளின் கூட்டமைப்பின் சமூகத்தொடர்பு பணிக்குழுவான BISCOM ஏற்பாடு செய்துள்ள இக்கூட்டத்தில் திருப்பீட சமூகத்தொடர்பு அவைத் தலைவர் பேராயர் Claudio Maria Celli இச்செவ்வாயன்று உரை நிகழ்த்துவார்.
இம்மாதம் 9ம் தேதிவரை நடைபெறும் BISCOMன் இந்த 8வது கூட்டத்தில் நற்செய்திப்பணியின் புதிய முறைகளில், இணையத்தளம், Blogging, Twitter போன்ற நவீன சமூகத்தொடர்புச் சாதனங்களின் பங்கு குறித்து ஆசிய ஆயர்கள் கலந்துரையாடவுள்ளனர் என அறிவிக்கப்பட்டுள்ளது.
FABC என்பது 16 ஆசிய நாடுகளின் 19 ஆயர் பேரவைகளின் கூட்டமைப்பாகும்.

4. உயிரை எடுப்ப‌த‌ற்கு எவ‌ருக்கும் உரிமையில்லை : பிரசில் கர்தினால்

செப்.03,2012. கருணைக்கொலை குறித்து பிரசில் மருத்துவக்கழகத்தால் முன்மொழியப்பட்ட‌ தீர்மான‌ம் புதிய‌ ச‌ட்ட‌மும் அல்ல‌, க‌ருணைக் கொலைக்கான‌ அனுமதியும் அல்ல‌ என‌ எடுத்துரைத்துள்ளார் அந்நாட்டு க‌ர்தினால் ரெய்முந்தோ ட‌ம‌சேனோ அசிஸ்.
க‌ருணைக்கொலை குறித்த‌ ம‌ருத்துவ‌க்க‌ழ‌க‌த்தின் தீர்மான‌ம் குறித்து ப‌த்திரிகையாள‌ர்க‌ள் கேட்ட‌க் கேள்விக்கு ப‌தில‌ளித்த‌ க‌ர்தினால், குண‌ப்ப‌டுத்த‌ முடியா நிலையில் இருக்கும் நோயாளிக‌ள் ந‌ட‌த்த‌ப்ப‌ட‌வேண்டிய‌ வ‌ழிமுறைக‌ளை அது காட்டுகின்ற‌தேயொழிய‌, க‌ருணைக் கொலையை அனும‌திக்க‌வில்லை என்றார். ஒவ்வொரு மனித‌னும் த‌ன் வாழ்வில் முத‌ன்முத‌லாக‌ப் பெறும் கொடையான‌ உயிரை எடுப்ப‌த‌ற்கு எவ‌ருக்கும் உரிமையில்லை என்ற‌ க‌ர்தினால், வாழ்வின் துவ‌க்கம் முத‌ல் இய‌ற்கையான‌ ம‌ர‌ண‌ம் வ‌ரை அது பாதுகாக்க‌ப்ப‌ட‌ வேண்டும் என்ற திருஅவை படிப்பினைகளையும் சுட்டிக்காட்டினார்.
ஒரு நோயாளியின் விருப்பப்படியோ அல்ல‌து அவ‌ரின் ச‌ட்ட‌ப் பிர‌திநிதியின் விண்ண‌ப்ப‌த்தின் பேரிலேயோ எந்த‌ நோயாளியின் உயிரும் ப‌றிக்க‌ப்ப‌ட‌க்கூடாது என்ப‌து ம‌ட்டும‌ல்ல‌, முடிந்த‌ அள‌வு அனைத்து வ‌ள‌ங்க‌ளையும் ப‌ய‌ன்ப‌டுத்தி ஒவ்வோர் உயிரும் காப்பாற்ற‌ப்ப‌ட‌வேண்டும் என்ற‌ விண்ண‌ப்ப‌த்தையும் முன்வைத்தார் க‌ர்தினால் ட‌ம‌சேனோ அசிஸ்.

5. மானுட விழுமியங்களைப் பாதுகாக்க வேண்டியது ஊடகங்களின் தார்மீகப் பொறுப்பாகும்: கர்தினால் மால்கம் இரஞ்சித்

செப்.03,2012. கொழும்பில் நடைபெற்ற, உலகளாவிய கத்தோலிக்க சமூகத்தொடர்பு அமைப்பான Signis 36வது விருது வழங்கும் விழாவில் கலந்து கொண்டு உரையாற்றிய கர்தினால் மால்கம் இரஞ்சித், மனித உரிமை மற்றும் மானுட விழுமியங்களுக்கு கொஞ்சமும் மதிப்பளிக்காது சில ஊடகவியலாளர்கள் செயற்படுகின்றனர் என கவ‌லையை வெளியிட்டதோடு, ஊடகங்கள் இழிவான எண்ணங்களுக்கு அடிபணியக் கூடாது எனவும் கேட்டுக்கொண்டார்.
மானுட விழுமியங்களை பாதுகாக்க வேண்டியது ஊடகங்களின் தார்மீகப் பொறுப்பாகும் எனவும் கர்தினால் இரஞ்சித் தெரிவித்தார்.
வர்த்தக நோக்கங்களினால், ஊடக விதிகள் ஒழுக்க முறைமைகளுக்கு முரணான செயற்படும் வாய்ப்புகளும் காணப்படுகின்றன என‌ உரைத்த‌ க‌ர்தினால், இல‌ங்கையில் ஊடகவியலாளர்களைக் கடத்தியுள்ள‌ மற்றும் கொலை செய்த நபர்களுக்குத் தண்டனை விதிக்கப்பட வேண்டுமென கேட்டுக்கொண்டார்.
கடந்த காலங்களில் ஊடகவியலாளர்கள் கொலை செய்யப்பட்டதுடன், சில ஊடகவியலாளர்கள் காணாமல் போயுள்ளனர்.

6. இலங்கை அரசு மீது ஆம்னஸ்டி மனித உரிமைகள் கழகம் குற்றச்சாட்டு

செப்.03,2012. மனித உரிமை மீறல்கள் குறித்து இலங்கை நடவடிக்கைகளை எடுக்கத் தவறியதால், அங்கு குற்றவாளிகள் தண்டனை இன்றி தமது நடவடிக்கைகளைத் தொடருவதற்கான நிலையை ஏற்படுத்தியுள்ளதாக ஆம்னஸ்டி இன்டர்நேஷனல் மனித உரிமைகள் கழகம் குற்றஞ்சாட்டியுள்ளது.
நூற்றுக்கணக்கான ஆட்களை குற்றம் எதுவும் சுமத்தாமல், அவர்களுக்கு எதிராக வழக்குகளை நடத்தாமல் தடுத்து வைப்பதற்கு அரசு இன்னமும் பயங்கரவாதத் தடைச்சட்டத்தைப் பயன்படுத்துவதாகவும், இதனைப் பயன்படுத்தி, மாற்றுக்கருத்தாளர்களை வாய் மூடச்செய்து, கருத்து வெளிப்பாட்டுச் சுதந்திரத்துக்கும் தடை விதிக்கப்படுவதாகவும் அது குற்றஞ்சாட்டியுள்ளது.
விடுதலைப்புலிகளுடனான போர் முடிந்து மூன்று வருடங்கள் கடந்துவிட்ட போதிலும் இந்த மனித உரிமை மீறல்கள் குறித்த முறைப்பாடுகள் தொடர்ந்து கொண்டிருப்பதாகவும் குற்றஞ்சாட்டப்பட்டுள்ளது.
நல்லிணக்க ஆணைக்குழுவின் பரிந்துரைகளை அமல்படுத்துவதற்கான இலங்கை அரசாங்கத்தின் செயற்திட்டத்திலும் பல குறைகள் காணப்படுவதாகவும் ஆம்னஸ்டி இன்டர்நேஷனல் மனித உரிமைகள் கழகம் கூறியுள்ளது.

7. சிறுமிக்கு எதிராகப் பொய்க் குற்றச்சாட்டு :  பாகிஸ்தான் இமாம் கைது

செப்.03,2012. பாகிஸ்தானில் 14 வயது கிறிஸ்தவச் சிறுமி Rimsha Masih,  குர்-ஆனின் பக்கங்களை எரித்ததன் மூலம் இஸ்லாத்தை இழிவுபடுத்திவிட்டார் என்று குற்றம்சாட்டப்பட்டு சிறை வைக்கப்பட்டுள்ள நிலையில், அச்சிறுமி மீது குற்றச்சாட்டு எழக் காரணமாக இருந்த இசுலாமிய மதபோதகர் ஒருவர் ஆதாரத்தைப் புனைந்தார் என்ற குற்றச்சாட்டின் பேரில் தற்போது கைதாகியுள்ளார்.
காலித் சிஷ்டி என்ற இந்த மதபோதகர், அந்தப் பெண்ணிடம் இருந்து எடுக்கப்பட்ட ஒரு பையில் எரிந்த சில காகிதங்களுடன் குர்ஆனின் பக்கங்களையும் வைத்ததாக சாட்சி ஒருவர் நீதிபதியிடம் கூறியதைத் தொடர்ந்து இக்கைது இடம்பெற்றுள்ளது.
தனிப்பட்ட ரீதியில் தனக்குப் பிடிக்காதவர்களைப் பழிவாங்குவதற்கும், அடுத்தவர் சொத்தை அபகரிப்பதற்கும், பாகிஸ்தானின் மத சிறுபான்மையினர் மீது தாக்குதல் தொடுப்பதற்கும் தேவநிந்தனைச் சட்டத்தை தவறான முறையில் சிலர் பயன்படுத்துவதாகப் பலமுறை குற்றம்சாட்டுக்கள் எழுந்துள்ள நிலையில், கிறிஸ்தவர்களைப் பாகிஸ்தானின் ஹைதராபாத் பகுதியிலிருந்து வெளியேற்ற இந்த உத்தியை இசுலாமிய இமாம் காலித் சிஷ்டி பயன்படுத்தியதாகச் சாட்சிகள் உரைத்துள்ளனர்.
மதநிந்தனைச் சட்ட வழக்குகள் பலவற்றில் சக முஸ்லிம்களும் குற்றம்சாட்டப்படுள்ளனர் என்றாலும், தங்களை இலக்குவைத்துதான் இந்தச் சட்டம் அளவுக்கு அதிகமாகப் பயன்படுத்தப்படுகிறது என்று கிறிஸ்தவர்கள் தொடர்ந்து குறை கூறி வருகின்றனர்.

8. ஆபத்தில் உதவுபவர்கள் ஏழைகளே: அமெரிக்க ஆய்வில் தகவல்

செப். 03, 2012. ஆபத்து காலத்தில் உடனடியாக உதவுவது ஏழைகளே என்பது, அமெரிக்க ஐக்கிய நாட்டின் கலிபோர்னியா மாநிலத்தில் மேற்கொள்ளப்பட்ட பேரிடர் தொடர்பான ஆய்வில் தெரிய வந்துள்ளது.
இயற்கைப் பேரழிவு ஏற்பட்டால், ஏழைகளே ஒருவருக்கு ஒருவர் அதிகம் உதவி செய்து, பிறரைக் காப்பாற்றும் முயற்சியில் ஈடுபடும் வேளை, வசதி படைத்த பணக்காரர்களோ, தமது உடைமைகளைப் பாதுகாக்கும் முயற்சியில்தான் அதிகம் ஈடுபடுகின்றனர் எனக்கூறும் இவ்வாய்வு, பேரிடர் ஏற்படும் ஆபத்துக் காலத்தில், பணக்காரர்களோ,  மேலும் மேலும் பணத்தைக் குவிக்க வேண்டும் என்ற எண்ணத்தில் இருக்கின்றனர், ஆனால் ஏழைகளோ, தமது நண்பர்களுடனும், மனதுக்குப் பிடித்தவர்களுடனும் பொழுதைக் கழிப்பதில் ஈடுபாடு காட்டுகின்றனர் எனவும் தெரிவிக்கின்றது.
கூடுதல் சம்பளம் கிடைத்தாலும், நாட்டின் பிற பகுதிகளுக்குச் சென்று வேலை செய்ய, ஏழைகள் விரும்புவதில்லை. ஆனால், "உறவுகள் போனாலும், நட்புப் போனாலும் கவலையில்லை; பணமே முக்கியம்; அதற்காக எங்கும் செல்லலாம்'' என்று, வசதி படைத்தோர் நினைக்கின்றனர் எனவும், கலிபோர்னியா மாநிலத்தில் மேற்கொள்ளப்பட்ட, பேரிடர் தொடர்பான ஆய்வு முடிவில் மேலும் கூறப்பட்டுள்ளது.

9. குழந்தை பிறப்புக்கால இறப்பில் தமிழகத்தில் நீலகிரி முதலிடம் : சென்னையில் குறைவு

செப்.03,2012. குழந்தை பிறப்புக்கால இறப்புகளில், நீலகிரி மாவட்டம் முதலிடத்தில் உள்ளது எனவும், இதைக் குறைக்க, மருத்துவத்துறை திட்டம் வகுத்துள்ளதாகவும் அறிவிக்கப்பட்டுள்ளது.
குழந்தை பிறப்புக்கால இறப்பு, 2007ல், ஒரு இலட்சத்திற்கு, 200 என்ற விகிதத்தில் இருந்ததை, வரும் 2015ல், 107 ஆக குறைக்கத் திட்டமிடப்பட்டுள்ளது.
உலகம் முழுவதும், 2000ம் ஆண்டில், 5.29 இலட்சம் பெண்கள், குழந்தை பிறப்பின்போது இறந்துள்ளதில், 95 விழுக்காடு, ஆசியா, ஆப்பிரிக்க நாடுகளில் இடம்பெற்றுள்ளது எனவும் தெரிவிக்கப்பட்டுள்ளது.
இந்தியாவில், ஆண்டிற்கு ஒரு இலட்சம் பேர் குழந்தை பிறப்புக்காலத்தில் இறக்கின்றனர்; உலக அளவில், இந்தியாவில், 20 சதவீத இறப்பு உள்ளது. தமிழகத்தில் குழந்தை பிறப்புக்கால இறப்பு குறைந்து வருகின்றபோதிலும், ஆண்டிற்கு, 1,100 பெண்கள் குழந்தை பிறப்பின்போது பல்வேறு மருத்துவக் காரணங்களால் இறக்கின்றனர் எனக் கூறப்பட்டுள்ளது.
குழந்தை பிறப்பின்போது இடம்பெறும் இறப்புகளைக் குறைக்க, தமிழ்நாடு சுகாதாரத் திட்டம் சார்பில், விழிப்புணர்வு பிரச்சாரம் மேற்கொள்ளப்படவும், குழந்தை பிறப்புக்காலத்தில் மேற்கொள்ள வேண்டிய பாதுகாப்பு முறை குறித்துப் பெண்களுக்கு பயிற்சி அளிக்கவும் திட்டமிடப்பட்டுள்ளது.
 

Saturday, 1 September 2012

robert john kennedy: cATHOLIC nEWS IN tAMIL - 01/09/12

robert john kennedy: cATHOLIC nEWS IN tAMIL - 01/09/12: 1. கர்தினால் கார்லோ மரிய மர்த்தினியின் இறப்புக்குத் திருத்தந்தை இரங்கல் 2. கர்தினால் கார்லோ மரிய மர்த்தினி தனது 85வது வயதில் இறைபதம் அ...

cATHOLIC nEWS IN tAMIL - 01/09/12

1. கர்தினால் கார்லோ மரிய மர்த்தினியின் இறப்புக்குத் திருத்தந்தை இரங்கல்

2. கர்தினால் கார்லோ மரிய மர்த்தினி தனது 85வது வயதில் இறைபதம் அடைந்தார் 

3. கர்தினால் கார்லோ மரிய மர்த்தினியின் இறப்புக்குத் தலைவர்களின் இரங்கல் செய்திகள்

4. டாக்கா உயர்மறைமாவட்டத்தின் 125ம் ஆண்டைச் சிறப்பிப்பதற்குத் திருத்தந்தையின்  பிரதிநிதி கர்தினால் O’Connor

5. Genfest அனைத்துலக இளையோர் கூட்டத்துக்குத் திருத்தந்தை செய்தி

6. உலகில் மரணதண்டனைகள் நிறுத்தப்பட ஐ.நா.கோரிக்கை

7. வரதட்சணை கேட்போருக்கான தண்டனை உயர்கிறது


------------------------------------------------------------------------------------------------------

1. கர்தினால் கார்லோ மரிய மர்த்தினியின் இறப்புக்குத் திருத்தந்தை இரங்கல்

செப்.01,2012. இத்தாலியின் மிலான் உயர்மறைமாவட்டத்தின் பேராயராக 22 ஆண்டுகள் பணியாற்றிய இயேசு சபை கர்தினால் கார்லோ மரிய மர்த்தினி தனது 85வது வயதில் இவ்வெள்ளி (ஆகஸ்ட் 31) பிற்பகலில் இறைபதம் அடைந்தார். 
கர்தினால் மர்த்தினி அவர்களின் இறப்பையொட்டி மிலானின் தற்போதைய பேராயர் கர்தினால் Angelo Scola அவர்களுக்குத் திருத்தந்தை 16ம் பெனடிக்ட் அனுப்பியுள்ள இரங்கல் தந்தியில், "புனித லொயோலா இஞ்ஞாசியாரின் அன்புப் புதல்வராகிய இந்த அன்புச் சகோதரர், நற்செய்திக்கும் திருஅவைக்கும் தாராள உள்ளத்துடன் பணியாற்றியவர்" என்று குறிப்பிட்டுள்ளார்.
கர்தினால் மர்த்தினி, சிறந்த ஆசிரியர், விவிலிய நிபுணர், உரோம் கிரகோரியன் பாப்பிறை பல்கலைக்கழகம் மற்றும் பாப்பிறை விவிலிய நிறுவனத்தின் அன்புக்குரிய அதிபர் என்றெல்லாம் தனது தந்திச் செய்தியில் நினைவு கூர்ந்துள்ள திருத்தந்தை, அம்புரோசியன் மறைமாவட்டத்தின் ஞானமுள்ள மற்றும் ஊக்கம் தளராத பேராயர் என்றும் பாராட்டியுள்ளார்.
உண்மையுள்ள ஊழியர் மற்றும் தகுதியுடைய ஆயரை நம் ஆண்டவர் விண்ணக எருசலேமுக்குள் அழைத்துக் கொள்ள வேண்டுமென்று புனித கன்னிமரியின் பரிந்துரை மூலம் செபிக்கின்றேன் எனவும், கர்தினால் மர்த்தினியின் இறப்பால் வருந்தும் அனைவருக்கும் தனது ஆறுதலை கனிவோடு அளிப்பதாகவும் அச்செய்தியில் குறிப்பிட்டுள்ளார் திருத்தந்தை 16ம் பெனடிக்ட்.
கர்தினால் மர்த்தினியின் இறப்போடு திருஅவையில் மொத்த கர்தினால்களின் எண்ணிக்கை 206 ஆகவும், இவர்களில் திருத்தந்தையைத் தேர்ந்தெடுக்கும் தகுதியுடைய 80 வயதுக்கு உட்பட்ட கர்தினால்களின் எண்ணிக்கை 118 ஆகவும் மாறியது.

2. கர்தினால் கார்லோ மரிய மர்த்தினி தனது 85வது வயதில் இறைபதம் அடைந்தார் 

செப்.01,2012. 1927ம் ஆண்டு பிப்ரவரி 15ம் தேதி இத்தாலியின் தூரின் நகரில் பிறந்த கர்தினால் மர்த்தினி, தனது 17வது வயதில் 1944ம் ஆண்டு இயேசு சபையில் சேர்ந்தார். 1952ம் ஆண்டில் குருவானார். உலகப் புகழ்பெற்ற விவிலிய நிபுணரான இவர், உரோம் கிரகோரியன் பாப்பிறை பல்கலைகழகம் மற்றும் பாப்பிறை விவிலிய நிறுவனத்தின் விவிலியத்துறையின் தலைவராகப் பணியாற்றினார். 1969ம் ஆண்டு முதல் 1978ம் ஆண்டுவரை இவ்விரண்டு நிறுவனங்களின் அதிபராகவும் இருந்தார். விவிலிய நிபுணர் என்ற வகையில், பல விவிலியத் தலைப்புக்களிலும், புனித இலெயோலா இஞ்ஞாசியாரின் ஆன்மீகம் பற்றியும் பல நூல்களை எழுதியுள்ளார். இவரின் நூல்கள் பல மொழிகளில் மொழி பெயர்க்கப்பட்டுள்ளன. உலகின் மிகப்பெரிய உயர்மறைமாவட்டங்களில் ஒன்றான மிலான் பேராயராக 1979ம் ஆண்டில் அருளாளர் திருத்தந்தை 2ம் ஜான் பால் அவர்களால் நியமிக்கப்பட்டார். திருஅவைக்கும் நவீன உலகுக்கும் இடையே உரையாடலை ஊக்குவித்ததில் சிறந்தவர் என்று ஊடகங்களால் பாராட்டப்படுகிறார் கர்தினால் கார்லோ மரிய மர்த்தினி. விவிலியத்தின் மீது தணியாத் தாகம் கொண்ட கர்தினால் மர்த்தினி, 2002ம் ஆண்டு ஜூலை 11ம் தேதி பணி ஓய்வு பெற்ற பின்னர் எருசலேம் சென்றார். பார்க்கின்சன் நோய் முற்றியதும் 2008ம் ஆண்டில் எருசலேமிலிருந்து இத்தாலி திரும்பி கல்லராத்தே என்ற நகரில் இயேசு சபையினரின் இல்ல்த்தில் வாழ்ந்து வந்தார். இவர் 16 ஆண்டுகள் பார்க்கின்சன் நோயால் துன்புற்று ஆகஸ்ட் 31ம் தேதி பிற்பகல் 03.45 மணிக்கு குடும்பத்தினர் மற்றும் நண்பர்கள் சூழ்ந்து நிற்க தனது ஆவியை ஆண்டவரிடம் ஒப்படைத்தார் கர்தினால் கார்லோ மரிய மர்த்தினி.   

3. கர்தினால் கார்லோ மரிய மர்த்தினியின் இறப்புக்குத் தலைவர்களின் இரங்கல் செய்திகள்

செப்.01,2012. கர்தினால் கார்லோ மரிய மர்த்தினியின் இறப்பு, இத்தாலியத் தலத்திருஅவைக்கும் அகில உலகக் கத்தோலிக்கத் திருஅவைக்கும் மட்டுமல்லாமல் இத்தாலி நாட்டுக்கும் பெரும் இழப்பு என்று இத்தாலிய அரசுத்தலைவர் Giorgio Napolitano தனது இரங்கல் செய்தியில் தெரிவித்துள்ளார்.
தனது இத்தாலிய நாட்டுக்கு மகனாகவும், தனது வாழ்வின் பெரும் பகுதியை போதிப்பதிலும் அர்ப்பணத்துடன் செயல்நடுவதிலும் செலவழித்த கர்தினால் மர்த்தினி தனது மேய்ப்புப்பணியின் மூலம் சமூக வாழ்வில் மிகுந்த தாக்கத்தை விட்டுச் சென்றுள்ளார் என்றும் நாப்போலித்தானோ கூறியுள்ளார்.
கர்தினாலின் ஞானமும் உலகளாவிய கண்ணோட்டமும் கிறிஸ்தவத்தின் மிகப்பரந்த தன்னமையைக் காட்டி மதங்களுக்குள் புதுப்பிக்கப்பட்ட உரையாடலுக்குப் பாதை அமைத்தன என்றும், அவர் தனது இறுதிக் காலத்தில் நோயால் துன்புறும்போதும்கூட தனது மிகச்சிறந்த அறிவுக்கூர்மை மற்றும் நன்னெறி வாழ்வால் இத்தாலியர்களிடம் பேசி வந்தார் எனவும் அவர் பாராட்டியுள்ளார்.
கர்தினால் மர்த்தினியுடன் நடத்திய பல தனிப்பட்ட சந்திப்புக்களையும் இத்தாலிய அரசுத்தலைவர் Giorgio Napolitano நினைவுகூர்ந்துள்ளார்.
மேலும், கர்தினால் மர்த்தினியின் இறப்பு, பெரியதொரு மிலான் உயர்மறைமாவட்டத்தையும் கடந்து பலரின் உள்ளத்தைப் பெரிதும் தொட்டுள்ளது என்று திருப்பீடப் பேச்சாளர் இயேசு சபை அருள்தந்தை பெதரிக்கோ லொம்பார்தி கூறினார். 
இன்னும், இத்தாலிய ஆயர் பேரவைத் தலைவர் கர்தினால் Angelo Bagnasco, புனிதபூமி காவலர் பிரான்சிஸ்கன் சபை அருள்தந்தை Pierbattista Pizzaballa, மிலான் யூதமதத் தலைவர் பேராசிரியர் Giuseppe LARAS, MEIC என்ற இத்தாலிய கத்தோலிக்க கலாச்சார இயக்கம், கத்தோலிக்க இயக்கம் எனப் பல இத்தாலிய தேசிய இயக்கங்கள் ஆகிய அனைவரும் கர்தினால் மர்த்தினியின் இறப்பு குறித்து இரங்கல் தெரிவித்துள்ளனர்.
கர்தினால் மர்த்தினியின் அடக்கச்சடங்கு திருப்பலி செப்டம்பர் 3, வருகிற திங்களன்று மிலான் பேராலயத்தில் உள்ளூர் நேரம் மாலை 4 மணிக்கு நடைபெறும்.

4. டாக்கா உயர்மறைமாவட்டத்தின் 125ம் ஆண்டைச் சிறப்பிப்பதற்குத் திருத்தந்தையின்  பிரதிநிதி கர்தினால் O’Connor

செப்.01,2012. பங்களாதேஷ் தலைநகர் டாக்கா உயர்மறைமாவட்டம் உருவாக்கப்பட்டதன் 125ம் ஆண்டைச் சிறப்பிப்பதற்கு, தனது சிறப்புப் பிரதிநிதியாக இங்கிலாந்தின் வெஸ்ட்மின்ஸ்டரின் முன்னாள் பேராயர் கர்தினால் Cormac Murphy-O’Connorஐ இச்சனிக்கிழமையன்று நியமித்துள்ளார் திருத்தந்தை 16ம் பெனடிக்ட்.
டாக்கா உயர்மறைமாவட்டம் உருவாக்கப்பட்டதன் 125ம் ஆண்டு மற்றும் பங்களாதேஷில் நற்செய்தி அறிவிக்கப்பட்டதன் 400ம் ஆண்டுக் கொண்டாட்டங்களில் திருத்தந்தையின் சிறப்புப் பிரதிநிதியாக கர்தினால் O’Connor கலந்து கொள்வார்.
இக்கொண்டாட்டங்கள் வருகிற நவம்பர் 9, 10 தேதிகளில் நடைபெறும் என அறிவிக்கப்பட்டுள்ளது.
1850ம் ஆண்டு திருத்தந்தை 9ம் பத்திநாதரால் கிழக்கு வங்காளத்தின் அப்போஸ்தலிக்கப் பகுதியாக உருவாக்கப்பட்ட டாக்கா உயர்மறைமாவட்டம், 1886ம் ஆண்டு செப்டம்பர் முதல் தேதி மறைமாவட்டமாக அறிவிக்கப்பட்டது. 1887ம் ஆண்டில் டாக்கா மறைமாவட்டம் எனவும் பெயரிடப்பட்டது. 1950ம் ஆண்டு ஜூலை 15ம் தேதி திருத்தந்தை 12ம் பத்திநாதரால் உயர்மறைமாவட்ட நிலைக்கு உயர்த்தப்பட்டது. 1982ம் ஆண்டு அக்டோபர் 19ம் தேதி இதனை டாக்கா உயர்மறைமாவட்டமாக அறிவித்தார் திருத்தந்தை அருளாளர் 2ம் ஜான் பால்.

5. Genfest அனைத்துலக இளையோர் கூட்டத்துக்குத் திருத்தந்தை செய்தி

செப்.01,2012. ஹங்கேரி நாட்டு புடாபெஸ்ட் நகரில் இவ்வெள்ளிக்கிழமையன்று தொடங்கியுள்ள Genfest 2012 என்ற Focolare இயக்கம் நடத்தும் அனைத்துலக இளையோர் மாநாட்டுக்குச் செய்தி அனுப்பியுள்ளார் திருத்தந்தை 16ம் பெனடிக்ட். 
“பாலம் அமைப்போம்” என்ற தலைப்பில் புடாபெஸ்ட் நகரில் நடைபெற்றுவரும் இந்தக் கொண்டாட்டங்களுக்கு இந்த புடாபெஸ்ட் நகரே இளையோருக்குப் பல விதங்களில் நல்ல தூண்டுதல்கள் தரும் அடையாளங்களைக் கொண்டுள்ளது என்று திருத்தந்தை குறிப்பிட்டுள்ளார்.
திருத்தந்தையின் பெயரில் திருப்பீடச் செயலர் கர்தினால் தர்ச்சிசியோ பெர்த்தோனே அனுப்பியுள்ள இச்செய்தியில் திருத்தந்தையின் இக்கருத்துக்கள் கூறப்பட்டுள்ளன.
புடா மற்றும் பெஸ்ட்டின் முன்னாள் குடியிருப்புக்களை இணைக்கும் எண்ணற்ற  பாலங்கள் இரண்டாம் உலகப்போரின்போது அழிக்கப்பட்டுவிட்டன, எனினும் அந்தக் கொடும் சண்டையில் மிஞ்சிய சாம்பல்களிலிருந்து உண்மையான அடித்தளங்கள் மீதான நிலையான அமைதியைக் கட்டி எழுப்புவதற்கு எடுக்கப்பட்ட உறுதி, Focolare இயக்கத்தை ஆரம்பிப்பதற்குத் தூண்டுதலாக இருந்தது என்றும் அச்செய்தியில் கூறப்பட்டுள்ளது.
கிழக்கு ஐரோப்பாவின் பெரும் பகுதியுடன் புடாபெஸ்டும் சேர்ந்து சர்வாதிகார ஆட்சியில் அதிகம் தொடர்ந்து துன்புற்றது, எனினும், பனிப்போர் முடிந்த பின்னர் சுதந்திரத்துக்கும் சகோதரத்துவத்துக்கும் புதிய நம்பிக்கை வாய்ப்புக்கள் உருவாகியுள்ளன எனவும் அச்செய்தியில் மேலும் கூறப்பட்டுள்ளது.
இந்த அழகான நம்பிக்கையின் அடையாளம் இளையோரிலும் தூண்டுதலை ஏற்படுத்தும் என்ற திருத்தந்தையின் நம்பிக்கையும் அதில் குறிப்பிடப்பட்டுள்ளது.
இஞ்ஞாயிறன்று நிறைவடையும் Genfestன் இந்தப் பத்தாவது மாநாட்டில் நூற்றுக்கும் மேற்பட்ட நாடுகளிலிருந்து சுமார் 12,500 பேர் கலந்து கொள்கின்றனர். இம்மாநாட்டுக்கு மூவாயிரம் தன்னார்வப் பணியாளர்களும் உதவி வருகின்றனர்.

6. உலகில் மரணதண்டனைகள் நிறுத்தப்பட ஐ.நா.கோரிக்கை

செப்.01,2012. காம்பியா, ஈராக், தென்சூடான் ஆகிய நாடுகளில் அண்மையில் மரணதண்டனைகள் நிறைவேற்றப்பட்டுள்ளது, உலகில் பல நாடுகளில் மரணதண்டனைகள் நிறைவேற்றப்படுவதில் தீவிரம் காட்டப்படுவதை வெளிப்படுத்துகின்றன என்று ஐ.நா.மனித உரிமைகள் நிறுவனம் தனது கவலையை வெளியிட்டுள்ளது.
மரணதண்டனை நிறைவேற்றுவதைச் சட்டத்திலிருந்து நீக்குவதற்கு இதுவரை  ஆப்ரிக்கக் கண்டத்தில் முன்னணியில் நின்ற காம்பிய நாடு தனது நிலைப்பாட்டை மாற்றிக் கடந்த வாரத்தில் ஒன்பது கைதிகளுக்கு மரணதண்டனை நிறைவேற்றியதைக் குறிப்பிட்டுள்ளார் ஐ.நா.மனித உரிமைகள் நிறுவனப் பேச்சாளர் Rupert Colville.
காம்பியாவிலுள்ள அனைத்து மரணதண்டனை கைதிகளுக்கும் இந்த செப்டம்பர் பாதிக்குள் அத்தண்டனை நிறைவேற்றப்பட்டிருக்க வேண்டுமென அந்நாட்டு அரசுத்தலைவர் Yahya Jammeh அறிவித்த சில நாள்களுக்குள் ஒன்பது கைதிகளுக்கு மரணதண்டனை நிறைவேற்றப்பட்டுள்ளது என்றும் அவர் கூறினார்.
ஈராக்கில் இந்த 2012ம் தொடங்கியதிலிருந்து 96 பேருக்கு மரணதண்டனை நிறைவேற்றப்பட்டுள்ளது எனவும் இந்த ஆகஸ்டில் மட்டும் 26 பேருக்கு இத்தண்டனை நிறைவேற்றப்பட்டுள்ளது எனவும் Colville கூறினார்.
ஐ.நா.வின் 150 உறுப்பு நாடுகள் சட்டத்தில் அல்லது நடைமுறையில் மரணதண்டனைகளை இரத்து செய்துள்ளன அல்லது தண்டனை காலத்தை மாற்றியுள்ளன என உரைத்த Colville, உலகில் மரணதண்டனைகள் முழுவதுமாக நிறுத்தப்படுமாறு மீண்டும் ஐ.நா. கோரிக்கை விடுப்பதாக தெரிவித்தார்.
உலக அளவில் பார்க்கும்போது இத்தண்டனை வழங்குவது குறைந்துள்ளது எனவும் அவர் தெரிவித்தார்.
7. வரதட்சணை கேட்போருக்கான தண்டனை உயர்கிறது
 
செப்.01,2012. இந்தியாவில் வரதட்சணை கேட்டுக் கொடுமைப்படுத்துவோருக்கானத் தண்டனையை, ஐந்தாண்டிலிருந்து, ஏழு ஆண்டாக உயர்த்த மத்திய அரசு திட்டமிட்டுள்ளது எனக் கூறப்படுகிறது.
வரதட்சணை கொடுமை ஒழிப்புச் சட்டத்தில், சில திருத்தங்களைக் கொண்டு வர மத்திய அரசு நடவடிக்கை எடுத்துள்ளது எனவும், இதன்படி, திருமணத்தின் போது அன்பளிப்பாக கொடுக்கப்படும், தங்க நகைகள் மற்றும் பிற பொருட்கள் குறித்த பட்டியல் தயாரிக்கப்பட்டு, இரு தரப்பினரும் கையெழுத்திட்டு, இதற்கென நியமிக்கப்படும் வரதட்சணை ஒழிப்பு அதிகாரியிடம், ஒப்படைக்க வேண்டும் எனவும், இதைச் செய்யத் தவறும்பட்சத்தில், ஆறு மாதம் முதல், ஓர் ஆண்டுவரைச் சிறைத் தண்டனை வழங்கப்படும் எனவும் அறிவிக்கப்பட்டுள்ளது.
அதேசமயம், வரதட்சணை கேட்டு கொடுமைப்படுத்தும் குற்றத்துக்கான சிறைத்தண்டனை, ஐந்தாண்டிலிருந்து, ஏழு ஆண்டாக உயர்த்தப்படும். ஆனால், வரதட்சணை தருவோருக்கான தண்டனையை, ஐந்தாண்டிலிருந்து, ஒரு ஆண்டாக குறைப்பதற்கு வகை செய்யப்பட்டுள்ளது எனவும் அறிவிக்கப்பட்டுள்ளது.
பெண்ணின் பெற்றோரே அதிகம் பாதிக்கப்படுவோராக இருப்பதால், இந்த நடவடிக்கை எடுக்கப்பட்டு உள்ளது என்றும், வரதட்சணை ஒழிப்புச் சட்டத்தின்கீழ் புகார் செய்யும் பெண், அதற்கான நிவாரணம் பெறவும்  வழிவகை செய்யப்படும் என்றும் மேலும் அறிவிக்கப்பட்டுள்ளது.
 

Simple Birthday Celebration - 31/08/12













Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...