Thursday, 1 March 2012

கத்தோலிக்க செய்திகள்: 29 பெப்ரவரி 2012

1. மிலான் நகரில் நடைபெறும் அகில உலக குடும்பங்கள் மாநாட்டில் திருத்தந்தை கலந்து கொள்வார்

2. அக்டோபர் மாதம் நடைபெற உள்ள ஆயர்கள் மாமன்றத்தின் முக்கியக் கருப்பொருளாக குடும்பங்கள் அமையும்

3. திருப்பீடப் பிரதிநிதிகளும், வியட்நாம் அரசின் பிரதிநிதிகளும் இணைந்து வெளியிட்ட அறிக்கை

4. பிலிப்பின்ஸ் அரசுத் தலைவருக்கு ஆயர் பேரவை விடுத்த அழைப்பு

5. புனித பூமியில் கடும் குளிரில் வாடும் வறியோருக்கு உதவிகள்

6. நகரங்களில் பல கோடி குழந்தைகள் அடிப்படைத் தேவைகள் இன்றி வாடும் நிலை அதிகரித்துள்ளது - ஐ.நா. அறிக்கை

7. தமிழக முதல்வருடன் கூடங்குளம் எதிர்ப்புக் குழு சந்திப்பு

8. உலகச் சேவையின் 80 ஆண்டு நிறைவு : சிறப்பு ஒலிபரப்பு

------------------------------------------------------------------------------------------------------

1. மிலான் நகரில் நடைபெறும் அகில உலக குடும்பங்கள் மாநாட்டில் திருத்தந்தை கலந்து கொள்வார்

பிப்.29,2012. இவ்வாண்டு மேமாதம் 30ம் தேதி முதல் ஜூன் மாதம் 3ம் தேதி வரை மிலான் நகரில் நடைபெறும் அகில உலக குடும்பங்கள் மாநாட்டில் திருத்தந்தை 16ம் பெனடிக்ட் கலந்து கொள்வார் என்று மிலான் பேராயர் கர்தினால் Angelo Scola அறிவித்தார்.
திருத்தந்தை மிலான் நகருக்கு வருகை தந்து, ஜூன் மாதம் 1ம் தேதியிலிருந்து 3ம் தேதி வரை மாநாட்டில் கலந்து கொள்வது வரலாற்று சிறப்பு மிக்க செய்தி என்று, இந்த மாநாட்டைப் பற்றி செய்தியாளர்களிடம் பேசுகையில் கர்தினால் Scola கூறினார்.
"குடும்பம்: வேலை மற்றும் கொண்டாட்டம்" என்ற மையக் கருத்துடன் நடைபெறும் இந்த மாநாட்டிற்கான ஏற்பாடுகள் முழு மூச்சுடன் நடைபெறுகிறதென்று கூறிய கர்தினால் Scola, ஒவ்வொரு குடும்பத்திலும் வேலைகளையும், கொண்டாட்டங்களையும் இணைத்துச் செல்வதற்கு குடும்பங்களுக்குத் தேவையான பாடங்கள் இந்த மாநாட்டில் விவாதிக்கப்படும் என்று கர்தினால் Scola விளக்கினார்.
அருளாளர் இரண்டாம் ஜான்பால் மிலான் நகருக்கு வருகை தந்து 27 ஆண்டுகள் கடந்துவிட்ட நிலையில், தற்போது திருத்தந்தை 16ம் பெனடிக்ட் அந்நகருக்கு மூன்று நாட்கள் வருகை தருவது மிலான் நகரின் வரலாற்றில் முக்கியமான ஒரு நிகழ்வு என்று மிலான் பேராயர் கர்தினால் Angelo Scola எடுத்துரைத்தார்.


2. அக்டோபர் மாதம் நடைபெற உள்ள ஆயர்கள் மாமன்றத்தின் முக்கியக் கருப்பொருளாக குடும்பங்கள் அமையும்

பிப்.29,2012. இவ்வாண்டு அக்டோபர் மாதம் நடைபெற உள்ள ஆயர்கள் மாமன்றத்தின் முக்கியக் கருப்பொருளாக குடும்பங்கள் அமையும் என்று வத்திக்கான் அறிக்கை ஒன்று கூறுகிறது.
ஆயர்கள் மாமன்றத்தின் செயற்குழு இத்திங்களன்று வெளியிட்ட ஓர் அறிக்கையில், விசுவாசத்தின் அடிப்படையாக அமைவது குடும்பங்களே என்பதால், இளையோருக்கு விசுவாசத்தைப் புகட்டும் ஒரு முக்கிய கருவியாக குடும்பங்கள் அமையவேண்டும் என்று கூறப்பட்டுள்ளது.
உலகின் பல நாடுகளிலிருந்தும் தெரிவு செய்யப்பட்டுள்ள அனுபவம் மிக்க அருள்பணியாளர்கள், கர்தினால் Francis George தலைமையில் உருவாக்கி வரும் ஒரு முக்கிய கட்டுரை, ஆயர் மாமன்றத்தின் விவாதங்களுக்கு மையமாக இருக்கும் என்று அறிவிக்கப்பட்டுள்ளது.
இவ்வாண்டு அக்டோபர் மாதம் திருத்தந்தையால் அறிவிக்கப்பட உள்ள விசுவாச ஆண்டு, வரும் ஆண்டு நவம்பர் வரை நீடிக்கும். இந்த விசுவாச ஆண்டின் ஒரு முக்கிய நிகழ்வாக ஆயர்களின் இந்த மாமன்றம் நடைபெறும்.


3. திருப்பீடப் பிரதிநிதிகளும், வியட்நாம் அரசின் பிரதிநிதிகளும் இணைந்து வெளியிட்ட அறிக்கை

பிப்.29,2012. திருஅவையின் செயல்பாடுகளுக்கு வியட்நாம் அரசு அளித்துள்ள ஒத்துழைப்பு பாராட்டுக்குரியது என்றும், சிறப்பாக, 2010ம் ஆண்டு வியட்நாம் திருஅவை தன் ஜுபிலி கொண்டாட்டங்களை நடத்துவதற்கு அரசு அளித்த அனுமதிகள் பாராட்டுக்குரியது என்று வத்திக்கான் அறிக்கை ஒன்று கூறுகிறது.
இத்திங்கள் மற்றும் செவ்வாய் ஆகிய இரு நாட்கள் வியட்நாமின் Hanoi நகரில் திருப்பீட பிரதிநிதிகளுக்கும், வியட்நாம் அரசின் பிரதிநிதிகளுக்கும் இடையே நடைபெற்ற கலந்துரையாடலின் இறுதியில் திருப்பீடப் பிரதிநிதிகளும், வியட்நாம் அரசின் பிரதிநிதிகளும் இணைந்து வெளியிட்ட ஓர் அறிக்கையில் இவ்வாறு கூறப்பட்டுள்ளது.
2010ம் ஆண்டு நடைபெற்ற ஜுபிலி கொண்டாட்டங்களின்போது திருப்பீடத்தின் சிறப்புப் பிரதிநிதியாக அந்நாட்டிற்கு பயணம் மேற்கொண்ட பேராயர் Leopoldo Girelli, வியட்நாமில் தொடர்ந்து திருப்பீடத்தின் சார்பில் தன் பயணங்களை மேற்கொள்ள வியட்நாம் அரசு அனுமதி வழங்கியுள்ளது.
நாடுகளுக்கான உறவுகளின் திருப்பீட அவை துணைச் செயலர் பேராயர் Ettore Balestrero தலைமையில் இந்தக் கலந்துரையாடலில் ஈடுபட்டிருந்த திருப்பீடப் பிரதிநிதிகள், தங்கள் கூட்டத்திற்குப் பின், அந்நாட்டின் அமைச்சர்கள் சிலரையும், அரசு அதிகாரிகளையும் சந்தித்தனர் என்று வத்திக்கான் செய்திக் குறிப்பொன்று கூறுகிறது.


4. பிலிப்பின்ஸ் அரசுத் தலைவருக்கு ஆயர் பேரவை விடுத்த அழைப்பு

பிப்.29,2012. அக்டோபர் மாதத்தில் அருளாளர் Pedro Calungsod புனிதராக உயர்த்தப்படும் வேளையில், பிலிப்பின்ஸ் அரசுத் தலைவர் Benigno Aquino அங்கிருந்தால், தங்களுக்குப் பெருமையும், மகிழ்வும் அளிக்கும் என்று பிலிப்பின்ஸ் ஆயர் பேரவைத் தலைவர் பேராயர் Jose Palma கூறினார்.
ஆயர் பேரவையின் சார்பில் பேராயர் Palmaவும், முன்னாள் பேராயர் கர்தினால் Ricardo Vidalம் இப்புதனன்று பிலிப்பின்ஸ் அரசுத் தலைவரைச் சந்தித்தபின், செய்தியாளர்களிடம் பேசுகையில், பேராயர் Palma அரசுத் தலைவருக்கு ஆயர் பேரவை விடுத்துள்ள இந்த அழைப்பைப் பற்றி குறிப்பிட்டார்.
மேலும், பிலிப்பின்ஸ் நாட்டின் இரண்டாவது புனிதராக உயர்த்தப்படும் Pedro Calungsodக்காக நவம்பர் மாதம் Cebu நகரில் நடைபெற உள்ள ஒரு பெரும் விழாவுக்கும் அரசுத் தலைவரை அழைத்திருப்பதாக பேராயர் அறிவித்தார்.
2012ம் ஆண்டுக்கான பயணத் திட்டங்களை அரசுத் தலைவர் Aquino ஏற்கனவே தீர்மானித்துவிட்டதால், இந்தப் பயணத்தை மேற்கொள்ள முடியாதென்று அவர் கூறியதாக கர்தினால் Vidal அறிவித்தார்.


5. புனித பூமியில் கடும் குளிரில் வாடும் வறியோருக்கு உதவிகள்

பிப்.29,2012. ‘புனித பூமியின் நண்பர்கள்’ என்ற பெயரில் இயங்கி வரும் ஒரு கிறிஸ்தவ பிறரன்பு நிறுவனமும், ‘பூமியின் மக்கள்’ என்ற கழகமும் இணைந்து புனித பூமியில் உள்ள 500க்கும் அதிகமான வறியோருக்கு உதவிகள் செய்துள்ளனர்.
புனித பூமியில், உறைவிடமும், உணவும் இன்றி, கடும் குளிரில் வாடும் வயது முதிர்ந்த 90 பேருக்கும், 450 குழந்தைகளுக்கும் 17 இலட்சத்து 50 ஆயிரம் ரூபாய் மதிப்புள்ள உணவு, உடைகள், மற்றும் கம்பளிப் போர்வைகளை இவ்வமைப்பினர் வழங்கினர்.
பிறரன்புப் பணிகள் மூலம் கிறிஸ்தவச் சமுதாய வாழ்வை வலுப்படுத்துவதே புனித பூமியின் நண்பர்கள் என்ற அமைப்பின் தலையாய நோக்கம் என்று இவ்வமைப்பின் உதவித் தலைவர் Peter Rand கூறினார்.
2009ம் ஆண்டு ஆரம்பிக்கப்பட்ட புனித பூமியின் நண்பர்கள் என்ற இவ்வமைப்பு தற்போது இங்கிலாந்தில் 50க்கும் மேற்பட்ட இடங்களில் செயல்படுகிறதென்றும், இவ்வமைப்பின் முதல் நோக்கம் புனித பூமியில் உள்ளவர்களுக்கு உதவிகள் செய்வது என்றாலும், ஏனையப் பிறரன்புப் பணிகளிலும் இவ்வமைப்பு ஈடுபட்டு வருகிறதென்றும் ICN கத்தோலிக்கச் செய்தி நிறுவனம் கூறியது.


6. நகரங்களில் பல கோடி குழந்தைகள் அடிப்படைத் தேவைகள் இன்றி வாடும் நிலை அதிகரித்துள்ளது - ஐ.நா. அறிக்கை

பிப்.29,2012. நகரங்களில் வளரும் பல கோடி குழந்தைகள் அடிப்படைத் தேவைகள் இன்றி, வறுமையில்  வாடும் நிலை அதிகரித்துள்ளது என்று ஐ.நா.வின் அறிக்கை ஒன்று கூறுகிறது.
குழந்தைகளின் கல்வி மற்றும் கலாச்சார மேம்பாட்டிற்கென உருவாக்கப்பட்டுள்ள UNICEF என்ற ஐ.நா. அமைப்பு, ‘2012ம் ஆண்டில் உலகக் குழந்தைகளின் நிலை’ என்ற அறிக்கையை இச்செவ்வாயன்று வெளியிட்டது. இந்த அறிக்கையில் நகர் வாழ் குழந்தைகளின் பிரச்சனைகள் வெளிச்சத்திற்குக் கொண்டுவரப்பட்டுள்ளன.
நலவாழ்வுக்கு எதிராக, மிகவும் மோசமானச் சூழல்களில் குழந்தைகள் வாழ்வதால், நோய்கள் எளிதில் அவர்களைத் தாக்குவதாகவும், இந்த நோய்களில் பல அவர்கள் வாழ்வு முழுவதும் பாதிப்புக்களை உருவாக்குவதாகவும் இவ்வறிக்கை விவரிக்கிறது.
உலகின் பல நகரங்களில் தற்போது வாழும் குழந்தைகளின் எண்ணிக்கை 100 கோடி என்று கூறும் இவ்வறிக்கை, இக்குழந்தைகளில் பெரும்பான்மையானோருக்கு அடிப்படை வசதிகள் இல்லை என்பதையும் சுட்டிக்  காட்டுகிறது.
நலவாழ்வு கிட்டாமல் வாடும் இக்குழந்தைகளில் பல கோடி பேர், அடிப்படை கல்வி வசதிகளும் இல்லாமல் வாழ்கின்றனர் என்று இவ்வறிக்கை மேலும் கூறுகிறது.


7. தமிழக முதல்வருடன் கூடங்குளம் எதிர்ப்புக் குழு சந்திப்பு

பிப்.29,2012. கூடங்குளம் அணுமின்உலை குறித்து மாநில அரசின் வல்லுனர் குழு இச்செவ்வாயன்று அரசிடம் அறிக்கை சமர்ப்பித்துள்ள நிலையில், கூடங்குளம் எதிர்ப்புக்குழு இப்புதனன்று முதலமைச்சர் ஜெயலலிதாவைச் சந்தித்துப் பேசியது.
கூடங்குளம் அணுமின்உலை இறுதிகட்டப் பணிகள் எட்டியிருந்த நிலையில், உதயகுமார் தலைமையிலான எதிர்ப்புப் போராட்டக்குழுவினர் பல்வேறு தொடர் போராட்டங்களை நடத்தி வருகின்றனர். இதற்குத் தீர்வு காணும் வகையில், மத்திய, மாநில அரசு சார்பில் குழு அமைக்கப்பட்டது. ஆனால், இம்முயற்சி பலனளிக்கவில்லை.
இந்நிலையில், தமிழக அரசு சார்பில் கூடங்குளம் மக்களின் கருத்துகளை அறிய டாக்டர் இனியன் தலைமையிலான வல்லுனர் குழு அமைக்கப்பட்டது. பிப்ரவரி 18ம் தேதி முதல் கூடங்குளம் அணுஉலையை ஆய்வு செய்த இக்குழு, இச்செவ்வாயன்று தனது அறிக்கையை மாநில அரசிடம் வழங்கியது.
கூடங்குளம் எதிர்ப்புக்குழு போராட்டத்திற்கு வெளிநாடுகளில் செயல்பட்டு வரும் அரசுசாரா அமைப்புகள் நிதியுதவி செய்து வருவதாக பிரதமர் மன்மோகன் சிங் சமீபத்தில் கூறியிருந்தார். இதற்கு உதயகுமார் குழுவினர் மறுப்பு தெரிவித்துள்ளனர்.
உதயகுமார் குழுவினர் இப்புதனன்று முதலமைச்சர் ஜெயலலிதாவைச் சந்தித்தபோது, மாநில அரசின் வல்லுனர் குழு சமர்ப்பித்துள்ள அறிக்கைக்கு எதிராக மனு ஒன்றை அளித்துள்ளனர்.
முதலமைச்சருடன் சந்திப்பை முடித்தபின் பத்திரிகையாளர்களைச் சந்தித்த உதயகுமார் குழுவினர், டாக்டர் இனியன் தலைமையிலான குழுவின் அறிக்கை ஒருதலைப்பட்சமாக உள்ளது என்றும் முதல்வரிடம் இருந்து சாதகமான பதில் வரும் என எதிர்பார்ப்பதாகவும் தெரிவித்தனர்.


8. உலகச் சேவையின் 80 ஆண்டு நிறைவு : சிறப்பு ஒலிபரப்பு

பிப்.29,2012. பிபிசி உலகச் சேவை ஆரம்பிக்கப்பட்டு 80 ஆண்டுகள் நிறைவடைவதை முன்னிட்டு, அதன் பன்மொழிச் சேவைகளில் பல சிறப்பு நிகழ்ச்சிகள் தற்போது ஒலிபரப்பப்படுகின்றன.
வத்திக்கான் வானொலி ஆரம்பிக்கப்பட்டு ஓராண்டுக்குப் பின், அதாவது, 1932ம் ஆண்டு டிசம்பர் மாதம் ஆரம்பமான பிபிசி வானொலி சேவை, தன் 80 ஆண்டு நிறைவை இப்புதனன்று துவக்கியது. உலகச் சேவையின் தலைமையகமான 'புஸ் ஹவுஸ்'ன் (Bush House) முற்றத்தில் பெரிய கூடாரம் அமைக்கப்பட்டு, அங்கிருந்து இந்த ஒலிபரப்புகள் நேரடியாக நடத்தப்படுகின்றன.
உலகெங்கும் உள்ள பிபிசியின் நேயர்கள் இந்நிறுவனத்தின் கடந்தகால உலகச் சேவையைத் திரும்பிப்பார்க்கும் வகையில் இந்த நிகழ்ச்சிகள் வடிவமைக்கப்பட்டுள்ளன.

 

robert john kennedy: கத்தோலிக்க செய்திகள்: 28 பெப்ரவரி 2012

robert john kennedy: கத்தோலிக்க செய்திகள்: 28 பெப்ரவரி 2012: 1. உண்மையைக் கண்டறியும் குழுவின் பரிந்துரைகளை செயல்படுத்த இலங்கை ஆயர்கள் வேண்டுகோள் 2. மதச் சுதந்திரத்தைப் பாதுகாக்க ஸ்காட்லாந்து கர்த...

கத்தோலிக்க செய்திகள்: 28 பெப்ரவரி 2012

 
1. உண்மையைக் கண்டறியும் குழுவின் பரிந்துரைகளை செயல்படுத்த இலங்கை ஆயர்கள் வேண்டுகோள்

2. மதச் சுதந்திரத்தைப் பாதுகாக்க ஸ்காட்லாந்து கர்தினால் அழைப்பு

3. அச்சம் காரணமாக அகமதாபாத் கிறிஸ்தவர்கள் குடிபெயர்வு

4. தென்கொரிய ஆயர்: புலம்பெயர்ந்தோரின் குழந்தைகள் தென் கொரியக் குழந்தைகளுக்கு ஈடான உரிமைகளைப் பெறுவதற்கு திருஅவை எப்போதும் பாடுபடும்

5. ஒலிம்பிக் பந்தயங்களின்போது இலண்டன் மாநகரில் மனித வர்த்தகம் அதிகமாகும் ஆபத்து பெருகியுள்ளது

6. இரண்டாயிரம் தமிழ் குடும்பங்களுக்கு உலர் உணவு உதவி திடீர் நிறுத்தம்

7. அப்பாவி மக்களை மனநலம் சரியில்லாதவர்கள் என்று மனநல காப்பகத்தில் அடைத்து வைக்கும் சீன அரசு

------------------------------------------------------------------------------------------------------

1. உண்மையைக் கண்டறியும் குழுவின் பரிந்துரைகளை செயல்படுத்த இலங்கை ஆயர்கள் வேண்டுகோள்

பிப்.28,2012. அரசுத்தலைவரின் 'உண்மையைக் கண்டறியும் ஆணைக்குழுவின்' பரிந்துரைகள் முழுமையாக அமுல்படுத்தப்பட வேண்டுமென இலங்கை ஆயர் பேரவை வேண்டுகோள் விடுத்துள்ளது.
உண்மையைக் கண்டறியும் ஆணைக்குழு அறிக்கை கூறும் பரிந்துரைகளை அமுல்படுத்துவதே சர்வதேச குற்றச்சாட்டுக்களுக்கு சிறந்த பதிலாக அமையும் என ஆயர் பேரவைத்தலைவர் கர்தினால் மால்கம் இரஞ்சித் மற்றும் செயலர் ஆயர் நார்பர்ட் அந்த்ராடி கையெழுத்திட்டு வெளியிடப்பட்டுள்ள அறிக்கை கூறுகிறது.
'உண்மையைக் கண்டறியும் ஆணைக்குழுவின்' ப‌ரிந்துரைக‌ள், வ‌ருங்கால‌த்திற்கான‌ ந‌ம்பிக்கைக‌ளைத் தாங்கிய‌வைக‌ளாக‌ உள்ள‌ன‌ என்று கூறும் இல‌ங்கை ஆய‌ர்க‌ளின் அறிக்கை, தேசிய‌ ஒப்புர‌வை நோக்கி மேற்கொள்ளப்படும் முய‌ற்சியில் இப்ப‌ரிந்துரைக‌ள் ஒரு ந‌ல்ல‌ அடித்த‌ள‌த்தை வ‌ழ‌ங்க‌ முடியும் என‌வும் ந‌ம்பிக்கையை வெளியிட்டுள்ள‌து.
பழைய காயங்களை அகற்றுவதுடன், போரில் பாதிக்கப்பட்டோருடன் ஒப்புரவை உருவாக்குவதன் மூலம் தேசிய ஒன்றிப்பு, அமைதி மற்றும் இணக்க வாழ்வுக்குச் சிறப்புப் பங்காற்ற முடியும் எனவும் இலங்கை ஆயர்கள் தங்கள் அறிக்கையில் கூறியுள்ளனர்.
அமைதியும் ஒப்புரவுமே இன்றைய இலங்கையின் உடனடித் தேவை என்பதை மனதிற்கொண்டு, உண்மையைக் கண்டறியும் ஆணைக்குழு அறிக்கை கூறும் பரிந்துரைகளைச் செயல்படுத்த அரசு உடனடியாக முன்வர வேண்டும் என ஆயர்கள் அரசை மேலும் விண்ணப்பித்துள்ளனர்.


2. மதச் சுதந்திரத்தைப் பாதுகாக்க ஸ்காட்லாந்து கர்தினால் அழைப்பு

பிப்.28,2012. மதச் சுதந்திரத்தைப் பாதுகாக்கும் நோக்கில் ஒவ்வொருவரும், பாகிஸ்தான் நாட்டு அரசியல்வாதியும் மனித உரிமை நடவடிக்கையாளருமான Shahbaz Bhattiயின் கொலைக்கு நீதி கிடைக்க உழைக்க முன்வரவேண்டும் என்றார் ஸ்காட்லாந்து கர்தினால் Keith Patrick O’Brien.
கடந்த ஆண்டு மார்ச் மாதம் 2ம் தேதி கொல்லப்பட்ட Shahbaz Bhattiயின் முதலாம் ஆண்டு நினைவு மார்ச் 10ம் தேதி, சனிக்கிழமையன்று இலண்டனில் அமைதி ஊர்வலத்துடன் சிறப்பிக்கப்பட உள்ளதையொட்டி அனுப்பியுள்ள செய்தியில் இவ்விண்ணப்பத்தை முன்வைத்துள்ளார் கர்தினால்.
மத உரிமைக்காக அவர் விடுத்த அழைப்பு, மனித மாண்பில் அக்கறையுடைய ஒவ்வொருவரும் பின்பற்றவேண்டிய ஒன்று எனக் கூறும் கர்தினால் Patrick O’Brienன் செய்தி, Shahbaz Bhattiயின் சாட்சிய வாழ்விலிருந்து நாம் கற்றுக்கொள்ளவேண்டியது நிறைய இருக்கின்றது எனக் கூறுகிறது.
கத்தோலிக்கர்களுக்காக மட்டுமல்ல, மதநிந்தனைச் சட்டத்தின் துணைகொண்டு பொய்யான குற்றச்சாட்டுக்கு உள்ளாகும் அனைத்து மத சிறுபான்மையினருக்காகவும் Shahbaz Bhatti குரல் எழுப்பினார் என கர்தினாலின் செய்தியில் மேலும் கூறப்பட்டுள்ளது.


3. அச்சம் காரணமாக அகமதாபாத் கிறிஸ்தவர்கள் குடிபெயர்வு

பிப்.28,2012. சுவரால் சூழப்பட்ட அகமதாபாத் நகரில் வாழ்ந்து வந்த கிறிஸ்தவர்கள், அச்சம் காரணமாக அந்நகரின் மேற்குப்பகுதியில் குடியேறி வருவதாக தலத்திருஅவை தெரிவிக்கின்றது.
குஜராத்தின் கோத்ரா தாக்குதல்களுக்குப் பின், கடந்த 10 ஆண்டுகளில் ஏறத்தாழ 65 விழுக்காட்டு கிறிஸ்தவர்கள் அகமதாபாத் நகருக்குள்ளேயே மேற்கு பகுதியில் குடிபெயர்ந்துள்ளதாக  அறிவிக்கப்பட்டுள்ளது.
அகமதாபாத் நகரின் சில பகுதிகளில் அவ்வப்போது கலகங்கள் வெடிப்பதால், தங்கள் குழந்தைகளும் வன்முறைகளைப் பின்பற்றக்கூடும் என்று அஞ்சும் கிறிஸ்தவர்கள், நகரின் மேற்கு பகுதிக்குக் குடிபெயர்ந்து வருவதாக ஹன்சோல் பங்கு குரு Joseph Appaeoo கூறினார்.
அகமதாபாத்தின் புனித ஜோசப் காலனி, கோம்டிபூர் மற்றும் மிர்சாபூர் ஆகிய பகுதிகளில் பெரும்பான்மையினராக வாழ்ந்து வந்த கிறிஸ்தவர்கள் தற்போது அச்சம் காரணமாக நகரின் மேற்கு பகுதிக்கு குடிபெயர்ந்துள்ளதாக தலத்திருஅவை அதிகாரிகள் தெரிவித்தனர்.


4. தென்கொரிய ஆயர்: புலம்பெயர்ந்தோரின் குழந்தைகள் தென் கொரியக் குழந்தைகளுக்கு ஈடான உரிமைகளைப் பெறுவதற்கு திருஅவை எப்போதும் பாடுபடும்

பிப்.28,2012. கொரியாவுக்குப் புலம்பெயர்ந்த பிறநாட்டினரின் குழந்தைகள் இறைவன் இந்த நாட்டிற்கு வழங்கிய கொடைகள் என்றும், அவர்கள் கொரியாவுக்கும் உலகிற்கும் தேவைப்படும் முக்கியமானவர்கள் என்றும் தென்கொரிய ஆயர் ஒருவர் கூறினார்.
தென் கொரியாவுக்குப் புலம் பெயர்ந்துள்ள குடும்பங்கள் சந்திக்கும் பல பிரச்சனைகளைப் பற்றி எடுத்துரைத்த கொரிய ஆயர் பேரவையின் புலம்பெயர்ந்தோர் பணிக்குழுவின் தலைவரும் Daejeon மறைமாவட்டத்தின் ஆயருமான Lazarus You Heung-sik, புலம்பெயர்ந்தோர் மட்டில் திருஅவை காட்டும் அக்கறையை அரசும் காட்டவேண்டும் என்ற வேண்டுகோளை விடுத்தார்.
கொரிய ஆயர் பேரவையின் புலம்பெயர்ந்தோர் பணிக்குழு ஒவ்வோர் ஆண்டும் நான்கு முறை ஆலோசனைக் கூட்டங்கள் நடத்துவதைச் சுட்டிக்காட்டிப் பேசிய ஆயர் Heung-sik, இந்த அவை புலம்பெயர்ந்தோருக்குச் செய்யும் கல்விப் பணி, மருத்துவ உதவிகள், ஆகியவற்றை எடுத்துரைத்தார்.
தென் கொரியாவுக்குப் புலம் பெயர்ந்தோரிடையே, சீனா, பிலிப்பின்ஸ், வியட்நாம் மற்றும் வடகொரியா ஆகிய நாடுகளில் இருந்து வந்தவர்களே அதிகம் என்பதைச் சுட்டிக் காட்டிய  ஆயர் Heung-sik, புலம்பெயர்ந்தோரின் குழந்தைகள் தென் கொரியக் குழந்தைகளுக்கு ஈடான உரிமைகளைப் பெறுவதற்கு திருஅவை எப்போதும் பாடுபடும் என்பதை வலியுறுத்திக் கூறினார்.


5. ஒலிம்பிக் பந்தயங்களின்போது இலண்டன் மாநகரில் மனித வர்த்தகம் அதிகமாகும் ஆபத்து பெருகியுள்ளது

பிப்.28,2012. இலண்டன் மாநகரில் நடைபெற உள்ள ஒலிம்பிக் பந்தயங்களின்போது அந்நகரில் மனித வர்த்தகம் அதிகமாகும் ஆபத்து பெருகியுள்ளது என்று இங்கிலாந்து மற்றும் வேல்ஸ் ஆயர் பேரவையின் ஆலோசகர் ஒருவர் கூறினார்.
இவ்வாண்டு ஜூலை மற்றும் ஆகஸ்ட் மாதங்களில் நடைபெறவுள்ள ஒலிம்பிக் பந்தயங்கள், அதைத்தொடர்ந்து, ஆகஸ்ட் மற்றும் செப்டம்பர் மாதங்களில் நடைபெறவுள்ள மாற்றுத் திறனாளிகளின் ஒலிம்பிக் பந்தயங்களின்போது, இலண்டன் நகரில் மனித வர்த்தகங்கள் அதிகரிக்கும் ஆபத்து உள்ளதென்று ஆயர் பேரவையின் ஆலோசகர் Cecilia Taylor-Camara கூறினார்.
இந்த ஆபத்தைத் தடுக்கும் ஒரு முயற்சியாக, ஆயர் பேரவையின் ஆலோசகர், ஐரோப்பிய காரித்தாஸ் அமைப்பின் பொதுச்செயலர் Jorge Nuño Mayerஐ அண்மையில் சந்தித்துப் பேசினார்.
இங்கிலாந்து மற்றும் வேல்ஸ் ஆயர் பேரவையும், இலண்டன் மாநகரக் காவல்துறையும் இணைந்து இந்தப் பிரச்னையை எதிர்கொள்ள முயற்சிகளை மேற்கொண்டு வருவதாக, ICN கத்தோலிக்கச் செய்தி நிறுவனம் கூறியுள்ளது.
கத்தோலிக்கத் திருஅவை மக்கள்மீது காட்டி வரும் அக்கறையை, ஆயர் பேரவையின் இந்த முயற்சி சுட்டிக்காட்டுகிறது என்று காரித்தாஸ் பொதுச்செயலர் Mayer எடுத்துரைத்தார்.


6. இரண்டாயிரம் தமிழ் குடும்பங்களுக்கு உலர் உணவு உதவி திடீர் நிறுத்தம்

பிப்.28,2012. திரிகோணமலை மாவட்டத்தின் மூதூரில் அகதி முகாம்களில் தங்கியுள்ள சம்பூரைச் சேர்ந்த சுமார் இரண்டாயிரம் குடும்பங்களுக்கு உலக உணவுத் திட்டத்தின் கீழ் வழங்கப்பட்டு வந்த உலர் உணவு உதவி நிறுத்தப்பட்டுள்ளதால் மக்கள் பட்டினியால் அவதியுறுவதாக தெரிவிக்கப்பட்டுள்ளது.
கடந்த 2006ம் ஆண்டில் தமிழீழ விடுதலைப் புலிகளுக்கும் அரசுப் படையினருக்கும் இடையே போர் நடந்த பொழுது, சம்பூர் பகுதியிலிருந்து இடம்பெயர்ந்த இந்த மக்கள் கடந்த ஆறு வருடங்களுக்கு மேலாக தமது சொந்த இடங்களுக்குச் செல்ல அனுமதி மறுக்கப்பட்டு மூதூர் பகுதியில் அகதி முகாம்களில் தங்க வைக்கப்பட்டுள்ளனர்.
தமது சொந்த இடங்களில் மாத்திரமே மீள்குடியேறுவோம் என்று மக்கள் தொடர்ச்சியாக தெரிவித்து வருகின்ற நிலையில், மக்களுக்கான உலர் உணவு நிறுத்தப்பட்டுள்ளமை குறிப்பிடத்தக்கது.
மாற்றிடங்களில் குடியேற சம்மதிக்கவில்லையெனில் உலர் உணவு நிறுத்தப்படும் என்று இந்த மக்களுக்கு முன்பு எச்சரிக்கை விடுக்கப்பட்டதற்கிணங்க தற்பொழுது உலக உணவுத் திட்டத்தை அரசு நிறுத்தியுள்ளது.
இந்நிலையில், வேறு இடங்களில் குடியேறுவதற்கு மக்கள் தொடர்ந்து சம்மதிக்க மறுத்தால், மூதூர் அகதி முகாங்களில் இயங்கும் தற்காலிகப் பள்ளிகளும் அடுத்து மூடப்படுமென அரசு தரப்பு எச்சரித்துள்ளது.


7. அப்பாவி மக்களை மனநலம் சரியில்லாதவர்கள் என்று மனநல காப்பகத்தில் அடைத்து வைக்கும் சீன அரசு

பிப்.28,2012. சீனாவில் குற்றமற்ற அப்பாவி மக்களை மனநலம் சரியில்லாதவர்கள் என்று கூறி, அவர்களை மன நல காப்பகத்தில் அடைத்து வைக்கும் அரசின் போக்கைக் கண்டித்து, அந்நாட்டில் உள்ள மனித உரிமைகள் அமைப்பு ஒன்று அறிக்கை ஒன்றை வெளியிட்டுள்ளது.
வருகிற மார்ச் மாதம் சீனாவில் ஆட்சியில் இருக்கும் அரசியல் கட்சியின் உயர்மட்டக் கூட்டம் நடைபெற உள்ள இச்சூழலில், Civil Rights and Livelihood Watch என்ற மனித உரிமைகள் அமைப்பு இந்த அறிக்கையை வெளியிட்டுள்ளது.
அரசின் இந்தப் போக்கு அண்மைய காலங்களில் அதிகமாகி வருவதைப் புள்ளிவிவரங்கள் கூறுகின்றன என்பதைச் சுட்டிக் காட்டிய இவ்வமைப்பின் பேச்சாளர் Liu Feiyue, அரசின் செயல்பாடுகளை விமர்சிக்கும் பலரும் இத்தகையக் கொடுமைகளுக்கு உட்படுத்தப்படுகின்றனர் என்று கூறினார்.
அரசின் இந்த அடக்கு முறையால், அப்பாவி பொதுமக்களின் வாழ்வு சீர்குலைவதொடு, அவர்கள் இந்தக் காப்பகங்களில் இருந்து திரும்பி வந்த பிறகும் அவர்களை சமுதாயம் சரிவர நடத்துவதில்லை என்று Liu Feiyue எடுத்துரைத்தார்.
சீனாவில் தற்போது 1 கோடியே 60 இலட்சம் மக்கள் மனநலம் பாதிக்கப்பட்டிருப்பதாகவும், இந்த எண்ணிக்கை, அந்நாட்டின் நல வாழ்வு துறைக்கு பெரும் பாரமாக அமைந்துள்ளது என்றும்  WHO எனப்படும் உலக நலவாழ்வு நிறுவனம் கூறியுள்ளது.



robert john kennedy: கத்தோலிக்க செய்திகள்: 27 பெப்ரவரி 2012

robert john kennedy: கத்தோலிக்க செய்திகள்: 27 பெப்ரவரி 2012: 1. திருத்தந்தையின் மூவேளை செப உரை 2. வாழ்வைப் பாதுக்காக்க அழைப்பு விடுக்கும் ஹொன்டுராஸ் ஆயர்களின் அறிக்கை 3. திருப்பீடத்திற்கும் வியட்நாமு...

கத்தோலிக்க செய்திகள்: 27 பெப்ரவரி 2012

1. திருத்தந்தையின் மூவேளை செப உரை

2. வாழ்வைப் பாதுக்காக்க அழைப்பு விடுக்கும் ஹொன்டுராஸ் ஆயர்களின் அறிக்கை

3. திருப்பீடத்திற்கும் வியட்நாமுக்கும் இடையே அதிகாரப்பூர்வமான உறவுகளை நிறுவுவது குறித்த பேச்சு வார்த்தை ஆரம்பம்

4. கோவாவில் அருட்பணியாளர், மற்றும் 1500 கத்தோலிக்கர்கள் மீது கொலைமுயற்சி வழக்கு

5. நைஜீரியாவில் ஞாயிறு திருவழிபாடு நடைபெற்ற கிறிஸ்துவக் கோவிலில் தாக்குதல்

6. டெல்லியின் தூய இதய பேராலயம், நற்செய்தி அறிவிப்புப்பணியில் மிக முக்கிய பங்காற்றியுள்ளது

7. ஜாம்பியா நாட்டு வருங்காலம் குறித்து நம்பிக்கை பிறந்துள்ளதாக ஐ.நா. பொதுச்செயலர்

------------------------------------------------------------------------------------------------------

1. திருத்தந்தையின் மூவேளை செப உரை

பிப்.27,2012. யோர்தான் ஆற்றில் தூய திருமுழுக்கு யோவானிடமிருந்து திருமுழுக்கு பெற்றபின், இயேசு பாலைவனத்தில் சோதிக்கப்பட்டதை இத்தவக்காலத்தின் முதல் ஞாயிறு திருப்பலி வாசகத்தில் காண்கிறோம் என தன் ஞாயிறு மூவேளை செப உரையைத் துவக்கினார் திருத்தந்தை 16ம் பெனடிக்ட்.
பாலைவனம் என்பது பல்வேறு அர்த்தங்களை நமக்குத் தரலாம் என்ற பாப்பிறை, கைவிடப்படல், தனிமை என்ற நிலைகளைக் குறிப்பதாகவும், சோதனை, பலம்பெறும் மனிதனின் பலவீனத்தைக் குறிப்பதாகவும் காட்டப்படலாம் என்றார்.
பாலைவனத்தை ஒரு புகலிடமாகவும் நோக்கலாம் என்ற பாப்பிறை, எகிப்தின் அடிமைத்தளையிலிருந்து தப்பிய இஸ்ரயேல் மக்கள், பாலைவனத்தில் அடைக்கலம் தேடியதைச் சுட்டிக்காட்டி, அங்கு இறைப்பிரசன்னத்தை நாம் தனிப்பட்ட விதத்தில் உணரமுடியும் என்றார்.
இயேசு பாலைவனத்தில் சாத்தானால் சோதனைக்கு உட்படுத்தப்பட்ட இந்த நிகழ்வு, நமக்குக் கற்றுத்தருவது என்ன என்ற கேள்வியையும் முன்வைத்த திருத்தந்தை, பொறுமை மற்றும் உண்மையான தாழ்ச்சி மூலம் நாம் நம் எதிரிகளைவிட பலம்பொருந்தியவர்களாக மாறமுடியும் என்றார்.
இஞ்ஞாயிறு திருப்பலி வாசகத்தில் இயேசு விடுக்கும் 'மனம் மாறி நற்செய்தியை நம்புங்கள்' என்ற அழைப்பு, நாம் இத்தவக்காலத்தில் தினசரி செபம், ஒறுத்தல் மற்றும் சகோதரத்துவ பிறரன்பு செயல்கள் மூலம் இறைவனுடன் நாம் கொள்ளும் உறவை புதுப்பித்து மேம்படுத்த அழைப்பு விடுப்பதாக உள்ளது என தன் ஞாயிறு மூவேளை செப உரையில் மேலும் கூறினார் திருத்தந்தை.


2. வாழ்வைப் பாதுக்காக்க அழைப்பு விடுக்கும் ஹொன்டுராஸ் ஆயர்களின் அறிக்கை

பிப்.27,2012. இறைவனிடமிருந்து வரும் கொடையாக வாழ்வை ஏற்றுக்கொள்ளவும், வாழ்வை அச்சுறுத்தும் அனைத்தையும் ஒதுக்கித் தள்ளவும் இயேசு கிறிஸ்து நமக்கு அழைப்பு விடுக்கிறார் என்கிறது ஹொண்டுராஸ் ஆயர்களின் வாழ்வுக்கு ஆதரவான அண்மை அறிக்கை.
'வாழ்வைப் பாதுகாப்பதற்கு' என்ற தலைப்பில் ஆயர்கள் வெளியிட்டுள்ள அறிக்கை, மனித வாழ்வும் மாண்பும் எவராலும் மீறமுடியாத அடிப்படை உரிமை என்கிறது.
அண்மையில் ஹொண்டுராஸ் சிறையில் இடம்பெற்ற பெருவிபத்தில் எறத்தாழ 360 பேர் இறந்தது குறித்து தங்கள் அறிக்கையில் கவலையை வெளியிட்டுள்ள ஆயர்கள், இது குறித்த முழுவிசாரணைகள் இடம்பெற வேண்டும் எனவும், சிறையில் பாதுகாப்பு மற்றும் சுகாதார வசதிகள் மேம்படுத்தப்படவேண்டும் எனவும் அழைப்பு விடுத்துள்ளனர்.
சிறைகளில் கைதிகளின் எண்ணிக்கை அதிகரிப்பு, போதிய சுகாதாரமின்மை, உணவின்மை ஆகியவைகளையும் தாண்டி, வன்முறை, கொலை, இலஞ்ச ஊழல், சித்ரவதை, மனஅழுத்தம், போதைப்பொருள் அடிமைத்தனம், ஒழுக்கமின்மை, சட்டத்திற்கு புறம்பானவை ஆகிய பிரச்னைகளும் நோக்கப்படவேண்டும் எனவும் ஆயர்களின் அறிக்கை அழைப்பு விடுக்கிறது.
இன்றைய ஹொண்டுராஸ் சமூகத்தின் உண்மை நிலைகளை எதிர்நோக்கும் தலத்திருஅவை, வாழ்விற்கான மதிப்பு மற்றும் அமைதிக் கலாச்சாரத்திற்காக உழைப்பதற்கு ஏற்ற பரிந்துரைகளை ஏற்கனவே முன்வைத்துள்ளதையும் ஆயர்களின் அறிக்கைச் சுட்டிக்காட்டுகிறது.


3. திருப்பீடத்திற்கும் வியட்நாமுக்கும் இடையே அதிகாரப்பூர்வமான உறவுகளை நிறுவுவது குறித்த பேச்சு வார்த்தை ஆரம்பம்

பிப்.27,2012. திருப்பீடத்திற்கும் வியட்நாம் நாட்டிற்கும் இடையே அதிகாரப்பூர்வமான உறவுகளை நிறுவுவது குறித்த பேச்சு வார்த்தை இத்திங்களன்று வியட்நாம் நாட்டின் Hanoi நகரில் ஆரம்பமாகியது.
பன்னாட்டு உறவுகளுக்கான திருப்பீட அவையின் துணைச் செயலர் பேராயர் Ettore Balestrero, திருப்பீடத்தின் சார்பில் அந்நாட்டிற்குச் சென்றுள்ள பிரதிநிதிகள் குழுவுக்கு தலைமை வகிக்கிறார். பன்னாட்டு உறவுகளின் இணை அமைச்சர் Bui Thanh Son, வியட்நாம் அரசுக் குழுவின் தலைவராகச் செயல்படுகிறார்.
இத்திங்கள் மற்றும் செவ்வாய் ஆகிய இருநாட்கள் நடைபெறும் இக்கூட்டம் வெற்றிகரமாக அமைவதற்கு தலத் திருஅவை சிறப்பான செபங்களை எழுப்பி வருகிறதென்று ஆசிய செய்தி நிறுவனம் கூறியுள்ளது.
வியட்நாமில் பெரும்பாலான பகுதிகளில் அரசுக்கும் திருஅவைக்கும் நேரடி மோதல்கள் இல்லையெனினும், மலைப் பகுதிகளிலும் இன்னும் பிற கிராமங்களிலும் பணியாற்றும் இறைபணியாளர்களுக்கு அரசு பல வழிகளில் பிரச்சனைகளை உருவாக்கி வருகிறதென்றும், இறைபணியாளர்களுக்கு எதிராக அரசே நேரடியாகச் செயல்படாமல், உள்ளூர் ரௌடிகளின் வழியாக தாக்குதல்களை நடத்தி வருகின்றது என்றும் ஆசிய செய்திக் குறிப்பொன்று கூறுகிறது.
பிப்ரவரி 26, தவக்காலத்தின் முதல் ஞாயிறன்று வியட்நாமின் பல்வேறு கோவில்களில் மக்கள் கூடிவந்து, அந்நாட்டில் அமைதியும், நீதியும் நிலைநிறுத்தப்படவும், வத்திக்கானுடன் ஆரம்பமாகியுள்ள பேச்சு வார்த்தைகள் வெற்றிகரமாக அமையவும் செபங்களை எழுப்பினர் என்று இச்செய்திக் குறிப்பு மேலும் கூறுகிறது.


4. கோவாவில் அருட்பணியாளர், மற்றும் 1500 கத்தோலிக்கர்கள் மீது கொலைமுயற்சி வழக்கு

பிப்.27,2012. காவல்துறை குழு ஒன்றை கொலைச் செய்ய முயற்சித்ததாக அருட்பணியாளர் ஒருவர் மீதும், ஏறத்தாழ 1500 கத்தோலிக்கர்கள் மீதும் வழக்கு ஒன்றைப் பதிவுச் செய்துள்ளது கோவா காவல்துறை.     
ஏற்கனவே தவறான தகவலின் அடிப்படையில் வெலிம் நகர் புனித பிரான்சிஸ் சேவியர் பங்குத்தளத்தில் சோதனை நடத்தி பின்னர் மன்னிப்பு கேட்ட வரிவிதிப்புத்துறையின் செயலால் கோபமுற்றிருந்த மக்கள், சனியன்று இரவு அப்பங்குதளத்தில் புகுந்த காவல்துறை குழு ஒன்றைத் தாக்கியுள்ளது.
ஐந்து காவல்துறையினரும் ஒரு பொதுநிலையினரும் படுகாயமுற்ற நிலையில் மருத்துவமனையில் அனுமதிக்கப்பட்டுள்ளதைத் தொடர்ந்து, அப்பங்குத்தள குரு மீதும் ஏறத்தாழ 1500 பங்குதள மக்கள் மீதும் கொலைமுயற்சி வழக்கொன்றைப் பதிவுச் செய்துள்ளது கோவா காவல்துறை.
கோவா தலைநகர் பனாஜிக்கு அருகேயுள்ள வெலிம் பங்குதளக்குரு ரொமானோ கொன்சால்வசை சனி இரவு 9மணிக்கு மேல் சந்திக்க வந்த இந்த காவல்துறை குழு, அந்த பங்குதள மக்கள், வரும் மார்ச் 3ந்தேதி தேர்தலில் எந்தக் கட்சிக்கு ஆதரவளிக்கப் போகிறார்கள் என்பதை அறிய விரும்பியதாகவும் அதனைத் தொடர்ந்து இந்த மோதல் இடம்பெற்றதாகவும் அந்த பங்குத்தள வட்டாரங்கள் தெரிவிக்கின்றன.


5. நைஜீரியாவில் ஞாயிறு திருவழிபாடு நடைபெற்ற கிறிஸ்துவக் கோவிலில் தாக்குதல்

பிப்.27,2012. ஆப்ரிக்காவின் நைஜீரியாவில் ஞாயிறு திருவழிபாடு நடைபெற்ற கோவிலில் தற்கொலைப் படையினரால் நடத்தப்பட்ட ஒரு தாக்குதலில் ஒரு குழந்தை உட்பட, மூவர் கொல்லப்பட்டனர், மற்றும் 38 பேர் காயமுற்றனர்.
வெடிகுண்டுகள் பொருத்தப்பட்ட ஒரு வாகனத்தை Jos என்ற ஊரில் உள்ள கிறிஸ்துவின் ஆலயத்தில் இடித்து, இந்தத் தாக்குதல் நடைபெற்றுள்ளது.
இத்தாக்குதலுக்கு இதுவரை எந்த ஒரு குழுவும் பொறுப்பு ஏற்கவில்லை எனினும், இத்தாக்குதலின் அம்சங்களை நோக்கும்போது, இது Boko Haram குழுவினரால் மேற்கொள்ளப்பட்டிருக்கலாம் என்று ஊகிக்கப்படுகிறது.
இத்தாக்குதலைத் தொடர்ந்து, அப்பகுதியில் இருந்த இளையோர் வன்முறைகளில் ஈடுபட்டதால், அப்பகுதியில் நிறுத்தப்பட்டிருந்த பல வாகனங்கள் சேதமடைந்துள்ளன என்றும் செய்திகள் கூறுகின்றன.


6. டெல்லியின் தூய இதய பேராலயம், நற்செய்தி அறிவிப்புப்பணியில் மிக முக்கிய பங்காற்றியுள்ளது

பிப்.27,2012. டெல்லியில் உள்ள இயேசுவின் தூய இதய பேராலயம், நற்செய்தி அறிவிப்புப்பணியில் மிக முக்கியப் பங்கை ஆற்றியுள்ளது என தன் பாராட்டுக்களை வெளியிட்டார் டெல்லி பெருமறைமாவட்டப் பேராயர் வின்சென்ட் கொன்செசாவோ.
டெல்லி பேராலயம் திருநிலைப்படுத்தப்பட்டு 75 ஆண்டுகள் நிறைவுற்றுள்ளதையொட்டி, இந்தியாவிற்கான திருப்பீடத்தூதுவர் பேராயர் சால்வத்தோரே பென்னாக்கியோ, பிஜ்னோரின் ஓய்வு பெற்ற ஆயர் கிரேசியன் முண்டாடன், ஆக்ரா பேராயர் ஆல்பர்ட் டி சூசா,  டெல்லி துணை ஆயர் ஃபிராங்கோ மூலக்கல் ஆகியோருடன் இணைந்து 75ம் ஆண்டு விழாத்திருப்பலியை நிறைவேற்றிய பேராயர் கொன்செசாவோ, நம் முன்னோர்களிடமிருந்து நமக்கு விசுவாசம் வழங்கப்பட்டதன் அடையாளமாக நிற்கும் டெல்லி தூய இதய பேராலயம், விசுவாசத்தை, அடுத்த தலைமுறைக்கும் வழங்கவேண்டும் என்பதனை நினைவுறுத்தி நிற்கின்றது என்றார்.
வழிபடவும் உண்மையான மன அமைதியைப் பெறவும் எண்ணற்றோர் ஒவ்வொரு நாளூம் இப்பேராலயத்திற்கு வந்துசெல்வதாக அதன் பங்குரு மரிய சூசை தெரிவித்தார்.
1929ம் ஆண்டு அடிக்கல் நாட்டப்பட்ட இப்பேராலயம், 1935ம் ஆண்டு டிசம்பர் 8ம் தேதி திறந்து வைக்கப்பட்டது.


7. ஜாம்பியா நாட்டு வருங்காலம் குறித்து நம்பிக்கை பிறந்துள்ளதாக ஐ.நா. பொதுச்செயலர்

பிப்.27,2012. மக்களாட்சிக் கொள்கைகள், மனித உரிமைகள் மற்றும் கல்வியில் ஜாம்பியா நாட்டு இளைஞர்களின் ஆர்வத்தைக் காணும்போது, அந்நாட்டு வருங்காலம் குறித்த புது நம்பிக்கைகள் பிறந்துள்ளதாக அறிவித்தார் ஐ.நா. பொதுச்செயலர் பான் கி மூன்.
ஜாம்பியா நாட்டிற்கான தன் முதல் பயணத்தை இஞ்ஞாயிறன்று முடித்து, அங்கோலா செல்லும் முன் பத்திரிகையாளர்களைச் சந்தித்த ஐ.நா. பொதுச்செயலர், ஜாம்பியாவில் இளையதலைமுறை மீது நம்பிக்கைக்கொண்டு அரசு அதிக அளவில் முதலீடு செய்துள்ளதைக் காணமுடிகிறது என்றார்.
நாட்டின் குழந்தைகள் மீது அக்கறை காட்டி, அவர்களின் வளர்ச்சியில் கவனம் செலுத்தும்போது, அந்நாடு எப்படியும் வலிமை மிக்கதாகவே இருக்கும் என்றார் ஐ.நா. பொதுச்செயலர் பான் கி மூன்.

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...