கத்தோலிக்க செய்திகள்: 03 பெப்ரவரி 2012

 

1. திருத்தந்தை 16ம் பெனடிக்ட் : கடவுளோடு கொண்டிருக்கும் உறுதியான பிணைப்பு, துறவு வாழ்வின் பண்பை விளக்குகின்றது

2. MISEREOR இயக்குனர்: இந்தியத் திருஅவை சமுதாய நல்வாழ்வுப் பணிகளை ஊக்குவிக்க வேண்டும்

3. சிறந்ததோர் இந்தியா உருவாக்கப்பட உரையாளர்களின் பரிந்துரைகள்

4. இயேசுவை, “கம்யூனிச புரட்சிவாதி” என்று சித்தரித்திருப்பதற்கு கேரளத் திருஅவைத் தலைவர்கள் கண்டனம்

5. ஐரோப்பியக் கிறிஸ்தவர்கள், கிறிஸ்தவத்தின் நேர்மறையான தாக்கத்தை வெளிப்படுத்த அழைப்பு

6. பிப்ரவரி 13, அனைத்துலக வானொலி தினம்

7. மலேரியாவால் இடம் பெறும் இறப்புக்களின் எண்ணிக்கை 2020க்குப் பின்னர் குறையும் – புதிய அறிக்கை

8. குவைத்தில் முதலாளிகளின் நிர்ப்பந்தத்தில் சீரழியும் இலங்கைப் பெண்கள்

------------------------------------------------------------------------------------------------------

1. திருத்தந்தை 16ம் பெனடிக்ட் : கடவுளோடு கொண்டிருக்கும் உறுதியான பிணைப்பு, துறவு வாழ்வின் பண்பை விளக்குகின்றது

பிப்.03,2012. சாட்சிய வாழ்வு வாழ்வதற்கும், நற்செய்தி அறிவிப்புக்கும், விசுவாச ஆண்டு துறவிகளுக்குச் சிறப்பான வாய்ப்பை வழங்குகிறது என்று திருத்தந்தை 16ம் பெனடிக்ட் கூறினார்.

அனைத்துலக துறவியர் தினமான பிப்ரவரி 2ம் தேதி இவ்வியாழன் மாலை, வத்திக்கான் தூய பேதுரு பசிலிக்கா பேராலயத்தில், ஆயிரக்கணக்கான இருபால் துறவியருடன் சேர்ந்து மாலை திருப்புகழ்மாலை செபித்து மறையுரையாற்றிய  திருத்தந்தை, வருகிற அக்டோபரில் தொடங்கும் விசுவாச ஆண்டு, அனைத்து விசுவாசிகளுக்கும், சிறப்பாக, துறவியருக்கு, அகப்புதுப்பித்தலுக்கு ஏற்ற காலமாக இருக்கின்றது என்று கூறினார்.

இறைவனோடு தனக்குள்ள உறவை வலுப்படுத்துவது, ஒருவரது வாழ்க்கையில் மிகுந்த முக்கியத்துவம் பெற வேண்டும் எனவும், இது, துறவற வாழ்க்கையின் தன்மையை மிக அதிகமாக விளக்குவதாகவும் இருக்கின்றது எனவும் கூறினார் திருத்தந்தை.

உலகெங்கும் வாழ்கின்ற அனைத்து இருபால் துறவியரின் விசுவாசத்தின் சான்றுக்கு இந்நாள் அதிகக் கவனம் செலுத்துகின்றது என்று மறையுரையாற்றிய அவர், துறவிகள் தங்களையே இறைவனுக்குக் கையளிப்பதற்கு அவர்களுக்கு இருக்கும் எண்ணங்களையும் உணர்வுகளையும் மீண்டும்  தூண்டுவதாக இத்தினம் அமைகின்றது என்றும் தெரிவித்தார்.

ஏழ்மை, கன்னிமை, பணிவு ஆகிய நற்செய்தி அறிவுரைகள், நம்பிக்கை, பற்றுறுதி, பிறரன்பு ஆகியவற்றை உறுதிப்படுத்தி, மக்களை இறைவனிடம் நெருக்கமாகக் கொண்டு வருகின்றன என்றும் கூறினார் திருத்தந்தை.

துறவிகள் தங்களது சபைகளின் தனிவரம் மூலம், திருஅவைக்கும் இன்றைய உலகுக்கும் நம்பத்தகுந்த சாட்சிகளாகத் திகழுமாறும் கேட்டுக் கொண்ட திருத்தந்தை, திருஅவையின் போதனைகளுக்கு விசுவாசமாக இருக்கவும், விசுவாசத்திற்குச் சான்றுகளாக இருக்கவும் அவர்களை வலியுறுத்தினார். 

இயேசு ஆலயத்தில் காணிக்கையாக அர்ப்பணிக்கப்பட்டது, கிறிஸ்துவே உலகின் ஒளி என்பதை வெளிப்படுத்துகின்றது என்றுரைத்த திருத்தந்தை, கிறிஸ்துவே உலகின் ஒளி என்ற கருத்தானது கிறிஸ்மஸ் விழாக்களில் வெளிப்படுத்தப்பட்டு திருக்காட்சி விழாவில் நிறைவை எட்டியது என்றும் கூறினார்.

பிப்ரவரி 2ம் தேதியன்று இயேசு ஆலயத்தில் காணிக்கையாக அர்ப்பணிக்கப்பட்ட நிகழ்வு சிறப்பிக்கப்படுகின்றது. அருளாளர் திருத்தந்தை 2ம் ஜான் பால், இந்நாளை, அனைத்துலக துறவியர் தினமாக அறிவித்து, 1997ம் ஆண்டில் முதன் முறையாக இத்தினத்தைச் சிறப்பித்தார்.

2. MISEREOR இயக்குனர்: இந்தியத் திருஅவை சமுதாய நல்வாழ்வுப் பணிகளை ஊக்குவிக்க வேண்டும்

பிப்.03,2012. இந்தியத் திருஅவை, மேற்கொள்ளும் மறைப்பணியில், சமுதாய நல்வாழ்வுப் பணிகளுக்கு இன்னும் அதிக முக்கியத்துவம் கொடுக்கப்படுமாறு ஜெர்மன் தலத்திருஅவை அதிகாரி ஒருவர் கேட்டுக் கொண்டார்.

இம்மாதம் ஒன்றாந்தேதி முதல் பெங்களூருவில் நடைபெற்று வரும் இந்திய கத்தோலிக்க ஆயர் பேரவையின் பொதுக்கூட்டத்தில் உரையாற்றிய, ஜெர்மன் கத்தோலிக்க ஆயர் பேரவையின் வளர்ச்சித்திட்ட ஒத்துழைப்பு நிறுவனமான MISEREOR இயக்குனர் பேருட்திரு Josef Sayer இவ்வாறு கேட்டுக் கொண்டார்.

இயேசு கிறிஸ்துவின் நற்செய்தியில் ஆழமாக வேரூன்றப்பட்டுள்ள இந்தியத் திருஅவை, இந்தியச் சமுதாயத்துக்கு எண்ணற்ற சேவைகளைச் செய்து வருகின்றது என்றும் பாராட்டினார் பேருட்திரு Sayer.

MISEREOR ஜெர்மன் பிறரன்பு நிறுவனம், கடந்த ஐம்பது ஆண்டுகளுக்கும் மேலாக, ஆப்ரிக்கா, ஆசியா, இலத்தீன் அமெரிக்கா ஆகிய பகுதிகளில் வறுமை ஒழிப்பு நடவடிக்கைகளில் ஈடுபட்டுள்ளது. இந்தியாவில் கடந்த பத்தாண்டுகளில் 1,600 சமூகநலத் திட்டங்களுக்கு உதவியுள்ளது.

3. சிறந்ததோர் இந்தியா உருவாக்கப்பட உரையாளர்களின் பரிந்துரைகள்

பிப்.03,2012. பெங்களூரு புனித ஜான் தேசிய நலவாழ்வு நிறுவனத்தில் 30வது பொதுக்கூட்டத்தை நடத்தும், இந்திய ஆயர்களுக்கு உரையாற்றிய புகழ்பெற்ற சமூக ஆர்வலர் பேராசிரியர் T.K.Oomen, இந்தியத் திருஅவை, ஏழைகள் மற்றும் ஓரங்கட்டப்பட்டோரின் வாழ்வு மேம்படுவதற்காக உழைக்குமாறு பரிந்துரைத்தார்.

சந்தை, குடிமக்கள் சமுதாயம், நாடு ஆகியவற்றுக்கு இடையே இருக்கும் தொடர்பு பற்றி விளக்கிய Oomen, ஏழைகள் தங்களது நிலத்தையும், சமத்துவத்துக்கும் மாண்புக்குமான சட்டரீதியான உரிமைகளையும் இழந்து விடாமல் இருப்பதற்குத் திருஅவை, அரசையும் சமுதாயக் குழுக்களையும் முடுக்கி விடுமாறு கேட்டுக்கொண்டார்.

இந்தியாவில் மதமாற்றம் செய்வதில் புத்தமதம் முதலிடத்தில் இருந்த போதிலும், கிறிஸ்தவமே, மக்களை மதமாற்றும் முத்திரையைப் பெற்றுள்ளது என்றும் கூறிய அவர், இந்தக் குற்றச்சாட்டுக்களுக்குப் பதில் சொல்லுவதற்குத் திருஅவை ஏதாவது செய்ய வேண்டும் எனக் கேட்டுக்கொண்டார்.

இந்தியாவில் 22 மொழிகள் அதிகாரப்பூர்வமாக ஏற்றுக்கொள்ளப்பட்டுள்ளன, இத்தகைய பன்மைத்தன்மை கொண்ட சமுதாயம் பேணிப் பாதுகாக்கப்பட வேண்டும் எனவும் Oomen கூறினார்.

மேலும், இக்கூட்டத்தில் உரையாற்றிய இந்திய தேர்தல் ஆணையத்தின் முன்னாள் தலைவரான Naveen Chawla,  கல்வி மற்றும் நலவாழ்வுத் துறைகளில் செய்து வரும் நற்பணிகளைத் தொடர்ந்து ஆற்றுமாறு திருஅவைத் தலைவர்களைக் கேட்டுக் கொண்டார்.  

அன்னை தெரேசா வாழ்க்கை வரலாற்றை எழுதியவரும், அன்னை தெரேசாவோடு  20க்கும் மேற்பட்ட ஆண்டுகளாகத் தொடர்பு வைத்திருந்தவருமான Chawla, அன்னை தெரேசாவின் அன்புப் பணிகளைத் தொடர்ந்து நடத்துமாறும் வலியுறுத்தினார்.

இந்தியத் திருஅவையின் 170 ஆயர்கள் கலந்து கொள்ளும் இக்கூட்டம் இம்மாதம் 8ம் தேதியன்று முடிவடையும்.

4. இயேசுவை, “கம்யூனிச புரட்சிவாதி” என்று சித்தரித்திருப்பதற்கு கேரளத் திருஅவைத் தலைவர்கள் கண்டனம்

பிப்.03,2012. அடுத்த வாரத்தில் தொடங்கவுள்ள இந்திய கம்யூனிச கட்சி வரலாறு குறித்த அருங்காட்சியகத்தில் இயேசுவை, “கம்யூனிச புரட்சிவாதி” என்று சித்தரித்திருப்பதற்கு கத்தோலிக்கத் திருஅவைத் தலைவர்கள் தங்களது கண்டனத்தை வெளியிட்டுள்ளனர்.

“Marx மட்டுமே சரி” என்ற தலைப்பில் தயாரிக்கப்பட்டுள்ள இவ்வருங்காட்சியகத்தின் ஒரு பிரிவில், “மறைசாட்சியம், கிறிஸ்துவிலிருந்து சே” என்ற தலைப்பும் இடம் பெற்றுள்ளது. அடுத்த வாரத்தில் திருவனந்தபுரத்தில் தொடங்கும் அக்கட்சியின் மாநிலக் கருத்தரங்கின் போது இது திறக்கப்படும்.

இந்நடவடிக்கைக்கு எதிர்ப்பு தெரிவித்துள்ள, கேரள இலத்தீன் ரீதி ஆயர் பேரவைத் தலைவர் பேராயர் மரிய காலிஸ்ட் சூசைபாக்கியம், இதில் அரசியல் உள்நோக்கம் இருப்பதாகக் குறை கூறியுள்ளார்.

கம்யூனிசவாதிகள், இயேசுவின் போதனை மீதான தங்கள் புறக்கணிப்பை எப்போதுமே காட்டியுள்ளனர் என்றும், தற்போதைய இந்நடவடிக்கை, திருஅவைத் தலைவர்களைக் கேவலப்படுத்துவதற்காகவே இடம் பெற்றுள்ளது என்றும் பேராயர் சூசைபாக்கியம் மேலும் கூறியுள்ளார்.

“சே(Che)” என்பது அர்ஜென்டின நாட்டின் கம்யூனிச புரட்சிவாதியான எர்னஸ்த்தோ சே குவாராவைக் குறிப்பதாகும். 

கேரளாவின் 3 கோடியே 20 இலட்சம் மக்களில் 22 விழுக்காட்டினர் கிறிஸ்தவர்கள்.

5. ஐரோப்பியக் கிறிஸ்தவர்கள், கிறிஸ்தவத்தின் நேர்மறையான தாக்கத்தை வெளிப்படுத்த அழைப்பு

பிப்.03,2012. ஐரோப்பிய சமுதாயத்தில் கிறிஸ்தவத்தின் நேர்மறையான தாக்கத்தை அக்கண்டத்தின் கிறிஸ்தவர்கள் வெளிப்படுத்துமாறு ஐரோப்பிய ஆயர் பேரவைகள் அவையும், ஐரோப்பிய கிறிஸ்தவ சபைகளின் அவையும் கேட்டுள்ளன.

கிறிஸ்தவ சபைகளுக்கு அறிவு சார்ந்த விவாதங்களில் ஈடுபடுவதற்கு வாய்ப்புக்கள் இருப்பதைச் சுட்டிக் காட்டியுள்ள கிறிஸ்தவ சபைகளின் அவைகள், அவ்விவாதங்களின் போது, கிறிஸ்தவ விசுவாசம் சமுதாயத்திற்குச் செய்யக்கூடிய நன்மைகள் பற்றி எடுத்துக் கூறுமாறு கேட்டுள்ளன.

கடந்த மாத இறுதியில் சுவிட்சர்லாந்து நாட்டின் ஜெனீவாவில் நடைபெற்ற கூட்டத்திற்குப் பின்னர் இவ்வேண்டுகோளை முன்வைத்துள்ளன ஐரோப்பிய கிறிஸ்தவ சபைகள்.

6. பிப்ரவரி 13, அனைத்துலக வானொலி தினம்

பிப்.03,2012. பிப்ரவரி 13ம் தேதியை அனைத்துலக வானொலி தினமாக அறிவித்துள்ளது யுனெஸ்கோ.

வானொலி ஒலிபரப்பு, வானொலி ஒலிபரப்பாளர்கள் மத்தியில் சர்வதேச அளவில் ஒத்துழைப்பு, சமுதாய வானொலிகள் உட்பட அனைத்து வானொலிகள் மூலமாகத் தகவல்கள் பெறும் வழிகளை உருவாக்கி ஊக்குவித்தல் போன்ற நோக்கங்களுக்காக, அனைத்துலக வானொலி ஒலிபரப்பு தினத்தைச் சிறப்பிக்கத் தீர்மானித்திருப்பதாக யுனெஸ்கோ அறிவித்துள்ளது.

இவ்வனைத்துலக வானொலி தினத்தை, மாநில, தேசிய, மற்றும் சர்வதேச அளவில் சிறப்பிக்குமாறும், ஐ.நா.வின் கல்வி, அறிவியல் மற்றும் கலாச்சார நிறுவனமான யுனெஸ்கோ கேட்டுக்கொண்டுள்ளது.

7. மலேரியாவால் இடம் பெறும் இறப்புக்களின் எண்ணிக்கை 2020க்குப் பின்னர் குறையும் – புதிய அறிக்கை

பிப்.03,2012. உலக அளவில் மலேரியாவால் இடம் பெறும் இறப்புக்களின் எண்ணிக்கை, 2020ம் ஆண்டுக்குப் பின்னர்தான் குறையும் என்று புதிய அறிக்கை ஒன்று கூறுகிறது.

The Lancet என்ற பிரிட்டன் மருத்துவ இதழில் வெளியான அறிக்கையின்படி, மலேரியாவால் இடம் பெற்ற இறப்புக்கள், 1980ம் ஆண்டில் 9 இலட்சத்து 95 ஆயிரமாகவும், 2004ம் ஆண்டில் 18 இலட்சத்து 20 ஆயிரமாகவும், 2010ம் ஆண்டில் 12 இலட்சத்து 40 ஆயிரமாகவும் இருந்தது என்று தெரிய வந்துள்ளது.

எனினும், 2020ம் ஆண்டுக்குப் பின்னர்தான் இவ்வெண்ணிக்கை ஒரு இலட்சமாகக் குறையும் என்றும் அவ்வறிக்கை கூறுகிறது.

8. குவைத்தில் முதலாளிகளின் நிர்ப்பந்தத்தில் சீரழியும் இலங்கைப் பெண்கள்

பிப்.03,20102. இலங்கையிலிருந்து குவைத் நாட்டுக்கு வேலைவாய்ப்புக்காகச் செல்லும் பணிப்பெண்கள், அந்நாட்டு வீட்டுத் தலைவர்களால் தகாத தொழிலுக்கு ஏலம் விடப்படுவதாக அங்கிருந்து நாடு திரும்பிய பெண்கள் தெரிவித்துள்ளனர் என்று ஊடகச் செய்தி ஒன்று கூறுகிறது.

மத்திய கிழக்கு நாடுகளில் நிர்க்கதியான நிலைக்குள்ளான பணிப்பெண்களில் மற்றுமொரு பிரிவினர் இவ்வியாழன் காலை நாடு திரும்பியுள்ளனர்.

விமானம் மூலம் சுமார் 70 பணிப்பெண்கள் இலங்கையை வந்தடைந்தனர். இவ்வாறு நாடு திரும்பியப் பணிப்பெண்களில் அதிகமானோர், குவைத் மற்றும் சவுதி அரேபிய நாடுகளில் பணியாற்றியவர்கள் எனக் கூறப்படுகின்றது.

உரிய ஊதியம் வழங்கப்படவில்லை என்பதுடன் வேலைவாய்ப்பு நிலையத்தினால் உறுதியளிக்கப்பட்டவாறு தாங்கள் நடத்தப்படவில்லை என்றும் பணிப்பெண்கள் கவலை தெரிவித்தனர்.

நாட்டிற்குத் திரும்பியவர்களை அவர்களது வீடுகளுக்கு அனுப்பிவைக்க வெளிநாட்டு வேலைவாய்ப்புப் பணியகம் நடவடிக்கை எடுத்துள்ளதாகவும் ஊடகச் செய்தி கூறுகின்றது.

robert john kennedy: கத்தோலிக்க செய்திகள்: 02 பெப்ரவரி 2012

robert john kennedy: கத்தோலிக்க செய்திகள்: 02 பெப்ரவரி 2012: 1. இந்திய கத்தோலிக்க ஆயர் பேரவை மேற்கொள்ளும் விவாதங்களும் , எடுக்கும் முடிவுகளும் நல்ல பலனைத் தரவேண்டும் - திருத்தந்தை 2. இறையடி சேர்ந்த கர...

கத்தோலிக்க செய்திகள்: 02 பெப்ரவரி 2012

1. இந்திய கத்தோலிக்க ஆயர் பேரவை மேற்கொள்ளும் விவாதங்களும், எடுக்கும் முடிவுகளும் நல்ல பலனைத் தரவேண்டும் - திருத்தந்தை

2. இறையடி சேர்ந்த கர்தினால் Anthony J.Bevilacquaக்கு திருத்தந்தை அனுப்பிய இரங்கல் தந்தி

3. இறைவாக்கினரைப் போல செயலாற்றுவது கத்தோலிக்கத் திருஅவையின் முக்கியப் பணி

4. கடந்த 15 ஆண்டுகளில் 10 இலட்சம் கருக்கள் வாழ்வதற்கான அடிப்படை உரிமையை இழந்துள்ளனர் - தென்னாப்ரிக்க ஆயர் பேரவை

5. இங்கிலாந்து மற்றும் வேல்ஸ் பகுதிகளில் உள்ள கத்தோலிக்கர்களுக்கு விசுவாச அட்டைகள்

6. குஜராத்தில் பழமை வாய்ந்த கல்லறைத் தோட்டம் தரைமட்டமாக்கப்பட்டுள்ளதற்கு வன்மையான கண்டனம்

7. மியான்மார் உள்நாட்டுப் போரினால் புலம் பெயர்ந்துள்ள 60,000க்கும் அதிகமான மக்களுக்கு தலத்திருஅவை உதவி

8. கொழும்பு தேயிலை மாநாடும் தேயிலைத் தொழிலாளர்களும்

------------------------------------------------------------------------------------------------------

1. இந்திய கத்தோலிக்க ஆயர் பேரவை மேற்கொள்ளும் விவாதங்களும், எடுக்கும் முடிவுகளும் நல்ல பலனைத் தரவேண்டும் - திருத்தந்தை

பிப்.02,2012. இந்திய சமுதாயத்தின் முன்னேற்றத்தை மையப்படுத்தி இந்திய கத்தோலிக்க ஆயர் பேரவை மேற்கொள்ளும் விவாதங்களும், எடுக்கும் முடிவுகளும் நல்ல பலனைத் தரவேண்டும் என்று திருத்தந்தை 16 ம் பெனடிக்ட் கூறினார்.

இப்புதனன்று பெங்களூருவில் ஆரம்பமான இந்திய கத்தோலிக்க ஆயர் பேரவையின் 30வது பொதுக்குழு கூட்டத்திற்கு திருத்தந்தையின் பெயரால் திருப்பீடச் செயலர் கர்தினால் தர்சிசியோ பெர்தோனே அனுப்பியுள்ள செய்தி இந்தப் பேரவையின் துவக்க அமர்வில் வாசிக்கப்பட்டது.

இப்பொதுக்குழு கூட்டத்தின் ஆரம்பத் திருப்பலியை இப்புதன் காலை தலைமையேற்று நடத்திய திருப்பீடத் தூதர் பேராயர் Salvatore Pennacchio, இந்தியாவின் அனைத்து மக்களுக்கும் நல்லதொரு எதிர்காலத்தை உருவாக்கும் தீர்க்கமான எண்ணத்துடன் கிறிஸ்துவ சமுதாயம் உழைக்க வேண்டும் என்று கூறினார்.

திருப்பலிக்குப் பின்னர் நடைபெற்ற துவக்க விழாவில் தலைமை உரையாற்றிய கத்தோலிக்க ஆயர் பேரவையின் தலைவர் கர்தினால் ஆஸ்வல்ட் கிரேசியஸ், இந்திய சமுதாயத்தின் மனசாட்சியாக கத்தோலிக்கத் திருஅவை செயல்படுகிறது என்று கூறினார்.

செல்வர்களுக்கும், ஏழைகளுக்கும் இடையே நாளுக்கு நாள் அதிகரித்து வரும் இடைவெளியே இந்தியாவின் மிகப் பெரிய பிரச்சனை என்றும், இந்தியாவின் பெரும்பாலான வளங்கள் செல்வந்தர்களை மட்டும் சேர்வது வருத்தத்திற்குரிய ஒரு நிலை என்றும் கர்தினால் கிரேசியஸ் எடுத்துரைத்தார்.

இத்துவக்க விழாவில் சிறப்புரை யாற்றிய நீதி மற்றும் அமைதிக்கான திருப்பீட அவையின் தலைவர் கர்தினால் பீட்டர் டர்க்சன், கிறிஸ்துவத் தலைவர்கள் கடவுளுக்கும், மக்களுக்கும் நம்பிக்கைக்கு உரிய ஊழியர்களாகச் செயல்பட வேண்டும் என்று அழைப்பு விடுத்தார்.

இத்துவக்கவிழா அமர்வின்போது, அண்மையில் திருத்தந்தையால் கர்தினாலாக நியமனம் பெற்றுள்ள சிரோ மலபார் திருஅவையின் தலைமைப்பேராயர் ஜார்ஜ் ஆலஞ்சேரிக்கு சிறப்பான வாழ்த்துக்களை அனைத்து ஆயர்களும் தெரிவித்தனர்.

2. இறையடி சேர்ந்த கர்தினால் Anthony J.Bevilacquaக்கு திருத்தந்தை அனுப்பிய இரங்கல் தந்தி

பிப்.02,2012. அமெரிக்காவில் இச்செவ்வாய் இரவு இறையடி சேர்ந்த கர்தினால் Anthony Joseph Bevilacqua அவர்களின் மறைவுக்கு தன் ஆழந்த வருத்தத்தை வெளியிட்டு, திருத்தந்தை 16ம் பெனடிக்ட் இப்புதனன்று தந்தி அனுப்பியுள்ளார்.

அமெரிக்காவின் பிலடெல்பியா உயர்மறைமாவட்டப் பேராயர் கர்தினால் Charles Chaputக்கு அனுப்பியுள்ள இந்தச் செய்தியில், மறைந்த கர்தினால் Bevilacqua குடியேற்றதாரர் மட்டில் கொண்டிருந்த சிறப்பான அக்கறையைத் திருத்தந்தை நினைவு கூர்ந்தார்.

1923ம் ஆண்டு அமெரிக்காவின் நியூயார்க் நகரில் பிறந்த Anthony Bevilacqua, 1949ம் ஆண்டு குருவாகவும், 1980ம் ஆண்டு ஆயராகவும் திருநிலைபடுத்தப்பட்டார். திருஅவைச் சட்டங்களில் பட்டம் பெற்று, அத்துறையில் பேராசிரியராகப் பணிபுரிந்த Bevilacqua, 1991ம் ஆண்டு அருளாளர் திருத்தந்தை இரண்டாம் ஜான் பால் அவர்களால் கர்தினாலாக உயர்த்தப்பட்டார்.

1988ம் ஆண்டு முதல் 2003ம் ஆண்டு வரை பிலடெல்பியா உயர்மறைமாவட்டத்தின் பேராயராகப் பணிபுரிந்த கர்தினால் Anthony Bevilacqua, புற்றுநோயால் உடல் நலம் குன்றி, இச்செவ்வாய் இரவு தனது 88வது வயதில் இறையடி சேர்ந்தார்.

கர்தினால் Anthony Bevilacquaன் மறைவை அடுத்து தற்போது, கத்தோலிக்கத் திருஅவையில் உள்ள கர்தினால்களின் எண்ணிக்கை 191ஆக குறைந்துள்ளது. இவர்களில் 80க்கும் குறைவான வயதுடைய 107 கர்தினால்கள் திருத்தந்தையைத் தேர்ந்தெடுக்கும் உரிமை பெற்றவர்கள்.

3. இறைவாக்கினரைப் போல செயலாற்றுவது கத்தோலிக்கத் திருஅவையின் முக்கியப் பணி

பிப்.02,2012. இன்றைய இந்தியாவுக்கு இயேசு வருகை தந்தால், அவர் இந்த நாட்டின் முன்னேற்றத்திற்கு என்னென்ன முயற்சிகள் எடுப்பார் என்பதை கத்தோலிக்கத் திருஅவை சிந்திக்க வேண்டும் என்று இயேசு சபை குரு Rudolf Heredia கூறினார்.

பெங்களூருவில் பிப்ரவரி 1 முதல் 8ம் தேதி வரை நடைபெற்றுவரும் இந்திய கத்தோலிக்க ஆயர் பேரவையின் பொதுக் குழு கூட்டத்தில் இவ்வியாழனன்று சிறப்புரையாற்றிய சமூகவியல் சிந்தனையாளரான அருள்தந்தை Heredia, இயேசுவின் காலத்திய வழிமுறைகளுக்கும், இன்றைய இந்தியாவுக்குத் தேவையான வழிமுறைகளுக்கும் உள்ள வேறுபாடுகளை நாம் கண்டறிய வேண்டும் என்று எடுத்துரைத்தார்.

நீதியான சமுதாயத்தை உருவாக்குவது இன்று இந்தியாவில் ஆட்சியில் இருப்பவர்களுக்கு முக்கியமான நோக்கமாக இருப்பதாகத் தெரியவில்லை என்று கூறிய அருள்தந்தை Heredia, குடியாட்சியின் மீது நம்பிக்கை இழந்துள்ள மக்கள் மத்தியில், ஓர் இறைவாக்கினரைப் போல செயலாற்றி, உண்மையை எடுத்துரைப்பது கத்தோலிக்கத் திருஅவையின் முக்கியப் பணி என்று வலியுறுத்தினார்.

இந்தியாவின் அனைத்து மக்களின் முழுமையான வளர்ச்சியில் நாம் அக்கறை கொண்டுள்ளோமா அல்லது, கத்தோலிக்க மக்கள், கிறிஸ்துவ மக்களின் வளர்ச்சியில் மட்டும் நாம் அக்கறை கொண்டுள்ளோமா என்பதை ஆயர்கள் ஆய்வு செய்யவேண்டும் என்ற கேள்வியையும் இந்திய கத்தோலிக்க ஆயர் பேரவையின் பொதுக்குழு கூட்டத்தில் கலந்து கொண்டுள்ள 170 ஆயர்கள் முன் வைத்தார் இயேசு சபை குரு Heredia.

4. கடந்த 15 ஆண்டுகளில் 10 இலட்சம் கருக்கள் வாழ்வதற்கான அடிப்படை உரிமையை இழந்துள்ளனர் - தென்னாப்ரிக்க ஆயர் பேரவை

பிப்.02,2012. தென்னாப்ரிக்காவில் கருக்கலைப்பு சட்டப் பூர்வமாக்கப்பட்ட பின்னர், கடந்த 15 ஆண்டுகளில் 10 இலட்சம் கருக்கள் வாழ்வதற்கான அடிப்படை உரிமையை இழந்துள்ளன என்று தென்னாப்ரிக்க ஆயர் பேரவையின் ஓர் அறிக்கை தெரிவிக்கிறது.

15 ஆண்டுகளுக்கு முன் தென்னாப்ரிக்காவில் சட்டத்திற்குப் புறம்பான, ஆபத்தான கருக்கலைப்புகள் நடைபெற்று வந்ததைத் தடுக்கும் வண்ணம் இந்தச் சட்டம் நிறைவேற்றப்பட்டாலும், இந்தச் சட்டத்தால், உண்மையான பயன்கள் விளைந்துள்ளனவா என்ற கேள்வியை எழுப்பி, Johannesburg பேராயரும், தென்னாப்ரிக்க ஆயர் பேரவையின் தலைவருமான பேராயர் Buti Tlhagale, ஆயர்கள் சார்பில் அறிக்கையொன்றை வெளியிட்டுள்ளார்.

கருக்கலைப்பு சட்டப்பூர்வமாக்கப்பட்டாலும், கத்தோலிக்கத் திருஅவையின் கண்ணோட்டத்தில் அது எப்போதும் நன்னெறிக்கு முரணானது என்பதை ஆயர்களின் இவ்வறிக்கை தெளிவுபடுத்துகிறது.

கருக்கலைப்பு அவரவர் தனிப்பட்ட உரிமை என்று வலியுறுத்தும் அரசு, கருக்கலைப்பு மனசாட்சிக்கு எதிரானது என்று உணரும் ஒருவர் அந்தச் செயலில் ஈடுபட மறுக்கும்போது, அதையும் அரசு ஒருவரது அடிப்படை உரிமை என்று மதிக்க வேண்டும் என்று பேராயர் Tlhagale சுட்டிக்காட்டினார்.

5. இங்கிலாந்து மற்றும் வேல்ஸ் பகுதிகளில் உள்ள கத்தோலிக்கர்களுக்கு விசுவாச அட்டைகள் 

பிப்.02,2012. நமது அடையாளங்களை உறுதிப்படுத்தும் பல்வேறு அட்டைகளை நாம் எப்போதும் சுமப்பதுபோல், நமது விசுவாசத்தை உறுதிப்படுத்தும் ஓர் அடையாள அட்டையையும் நாம் சுமக்க வேண்டும் என்று இங்கிலாந்து ஆயர் Kieran Conry கூறினார்.

திருத்தந்தை 16ம் பெனடிக்ட் அறிவித்திருக்கும் விசுவாச ஆண்டு 2012ம் ஆண்டு அக்டோபர் மாதம் முதல் துவங்கவிருப்பதால், தங்கள் விசுவாசத்தை அறிக்கையிடும் ஆறு அம்சங்கள் அடங்கிய ஓர் அட்டையை கத்தோலிக்கர்கள் எப்போதும் தங்களுடனேயே வைத்திருக்கும்படி இத்திட்டம் வகுக்கப்பட்டுள்ளது என்று ஆயர் Conry விளக்கம் அளித்தார்.

இங்கிலாந்து மற்றும் வேல்ஸ் பகுதிகளில் உள்ள 24 கத்தோலிக்க மறைமாவட்டங்களில் வாழும் கத்தோலிக்கர்கள் தங்கள் பைகளில் சுமந்து செல்லும் வண்ணம் 10 இலட்சம் அட்டைகளை வழங்க இங்கிலாந்தின் நற்செய்திப் பணிக் குழு தீர்மானித்துள்ளது என்று ஆயர் Conry கூறினார்.

பிப்ரவரி மற்றும் மார்ச் மாதங்களில் இந்த 10 இலட்சம் அட்டைகளையும் இங்கிலாந்து மற்றும் வேல்ஸ் பகுதிகளில் உள்ள மறைமாவட்டங்களில் வழங்கத் தீர்மானித்திருப்பதாக ICN கத்தோலிக்கச் செய்திக் குறிப்பொன்று கூறுகிறது.

6. குஜராத்தில் பழமை வாய்ந்த கல்லறைத் தோட்டம் தரைமட்டமாக்கப்பட்டுள்ளதற்கு வன்மையான கண்டனம்

பிப்.02,2012. குஜராத்தின் அகமதாபாத் நகருக்கருகே சபர்மதியில் இருந்த பழமை வாய்ந்த கல்லறைகள் இயந்திரங்கள் கொண்டு தரைமட்டமாக்கப்பட்டுள்ளதை அகில இந்திய கிறிஸ்தவ கழகம் வன்மையாக எதிர்த்துள்ளது.

குடியரசு நாளன்று நடைபெற்ற இந்த வன்முறைச் செயலுக்கு எதிர்ப்பு தெரிவித்து, இப்புதனன்று ஊர்வலம் மேற்கொண்ட கிறிஸ்தவக் கழகம், சபர்மதி காவல் துறை நிலையத்தில் முறையீடு செய்துள்ளது.

இயந்திரங்கள் கொண்டு நடத்தப்பட்ட இந்த வன்முறைச் செயலுக்குப் பின்புலத்தில் ஒரு குழுவே இயங்கியிருக்க வேண்டும் என்றும், ஆக்கிரமிக்கப்பட்ட பகுதி வாகனங்கள் நிறுத்துமிடமாகப் பயன்படுத்தப்பட்டிருப்பது கிறிஸ்தவ உணர்வுகளைப் புண்படுத்தியுள்ளது என்றும் இக்குழுவைச் சார்ந்தவர்கள் கூறினர்.

அகமதாபாத் பகுதியில் ஆங்கிலேயர்கள் இருந்தபோது, அங்கிருந்த ஏழு கிறிஸ்தவ சபைகளுக்குப் பொதுவாக இந்த கல்லறைத் தோட்டம் வழங்கப்பட்டது என்று Fides செய்திக் குறிப்பொன்று கூறுகிறது.

7. மியான்மார் உள்நாட்டுப் போரினால் புலம் பெயர்ந்துள்ள 60,000க்கும் அதிகமான மக்களுக்கு தலத்திருஅவை உதவி

பிப்.02,2012. மியான்மார் இராணுவத்திற்கும், கச்சின் பகுதி விடுதலைப் படைகளுக்கும் இடையே நடைபெற்று வரும் உள்நாட்டுப் போரினால் புலம் பெயர்ந்துள்ள மக்களுக்கு தலத்திருஅவை செய்து வரும் முயற்சிகளில், அவர்களுக்கு உணவு வழங்குவதே பெரும் பிரச்சனையாக உள்ளது என்று மியான்மார் அருள்பணியாளர் ஒருவர் கூறினார்.

2011ம் ஆண்டு ஜூன் மாதம் முதல் நடைபெற்று வரும் இந்த உள்நாட்டுப் போரினால் இதுவரை புலம் பெயர்ந்துள்ள 60,000க்கும் அதிகமான மக்கள் பங்குத் தளங்களிலும், பல்வேறு கிறிஸ்தவ நிறுவனங்களிலும் தங்க வைக்கப் பட்டுள்ளனர் என்று பங்குத்தந்தை Luke Kha Li கூறினார்.

கச்சின் பகுதியின் தன்னாட்சிக்காகப் போராடும் குழுக்கள் மியான்மார் அரசுடன் அரசியல் பேச்சு வார்த்தைகள் நடைபெறும்வரை போராட்டத்தைக் கைவிடப் போவதில்லை என்று கூறி வருவதாக ஆசிய செய்தி நிறுவனம் கூறுகிறது.

8. கொழும்பு தேயிலை மாநாடும் தேயிலைத் தொழிலாளர்களும்

பிப்.02,2012. கொழும்பில் பிப்ரவரி 1 முதல் 3ம் தேதி வரை நடைபெற்றுவரும் பன்னாட்டு தேயிலை மாநாட்டில் 25 நாடுகளைச் சேர்ந்த சுமார் 170 பிரதிநிதிகள் கலந்துகொள்கின்றனர்.

‘உலகிலேயே தலைசிறந்த தேயிலை இலங்கையில் தான் கிடைக்கிறது’ என்பதை நிருபிப்பது தான் இந்த பன்னாட்டு மாநாட்டின் முக்கிய நோக்கம் என்று இம்மாநாட்டு ஏற்பாட்டுக் குழுவின் தலைவர் மைக்கல் ஜேடி சொய்சா பிபிசி ஊடகத்திடம் கூறினார்.

கடந்த ஆண்டு தேயிலை விற்பனையில் இலங்கை 1.5 பில்லியன் டாலர்கள் அளவுக்கு வருமானம் ஈட்டியதாகக் கூறிய ஜேடி சொய்சா, பல ரகங்களில் பல சுவைகளில் கிடைக்கும் இலங்கைத் தேயிலைக்கு உலகச் சந்தையில் இருக்கும் தேவையை இன்னும் அதிகரிப்பதற்கு இந்த பன்னாட்டு மாநாடு உதவும் என்று சொய்சா மேலும் தெரிவித்தார்.

நிலைமை இப்படி இருக்க, மறுபுறம் இலங்கை அரசின் இந்த வருமானத்திற்குக் காரணமாக இருக்கின்ற தேயிலை தோட்டத் தொழிலாளர்கள் பல ஆண்டுகளாக குடியிருப்பு, குடிநீர், மின்சாரம் உள்ளிட்ட அடிப்படை வசதிகள் உரிய முறையில் உறுதிப்படுத்தப்படாத நிலையில் பின்தங்கிய நிலையில் இருந்துவருகின்றார்கள் என்று பிபிசி சுட்டிக்காட்டுகிறது

robert john kennedy: கத்தோலிக்க செய்திகள்: 01 பெப்ரவரி 2012

robert john kennedy: கத்தோலிக்க செய்திகள்: 01 பெப்ரவரி 2012: 1. வெனிஸ் உயர்மறைமாவட்டத்தின் புதிய முதுபெரும் தலைவர் 2. திருத்தந்தை மெக்சிகோ மற்றும் க்யூபா நாடுகளுக்கு மேற்கொள்ளவிருக்கும் திருப்பயணத்தி...

கத்தோலிக்க செய்திகள்: 01 பெப்ரவரி 2012

 1. வெனிஸ் உயர்மறைமாவட்டத்தின் புதிய முதுபெரும் தலைவர்

2. திருத்தந்தை மெக்சிகோ மற்றும் க்யூபா நாடுகளுக்கு மேற்கொள்ளவிருக்கும் திருப்பயணத்தின் விவரங்கள்

3. இந்தியக் கத்தோலிக்க ஆயர்கள் பேரவையின் 30வது பொதுக்குழு கூட்டத்தைப் பற்றிய விவரங்கள்

4. காஷ்மீரில் Sharia நீதி மன்றம் விடுத்துள்ள அறிக்கையை எதிர்த்து எந்த அரசியல் கட்சியும் குரல் எழுப்பாமல் இருப்பது வியப்பாக உள்ளது - கர்தினால் கிரேசியஸ்

5. பாகிஸ்தான் முன்னேறுவதற்கு கல்வி மிகவும் முக்கியம் - ஆயர் Anthony Rufin

6. அமெரிக்க அரசுத் தலைவர் அண்மையில் வெளியிட்டுள்ள நலவாழ்வு திட்டங்களுக்கு அமெரிக்க ஆயர்கள் எதிர்ப்பு

7. ஹாங்காங் பகுதியில் கத்தோலிக்கர்களின் எண்ணிக்கையும், அருள்பணியாளர்கள் எண்ணிக்கையும் அதிகரித்துள்ளன

8. மனித உரிமைகள் ஆணையர் ஆனந்த மெண்டிஸ் பதவி விலகல்

------------------------------------------------------------------------------------------------------

1. வெனிஸ் உயர்மறைமாவட்டத்தின் புதிய முதுபெரும் தலைவர்

பிப்.01,2012. இத்தாலி நாடும், ஐரோப்பாவும் தற்போது சந்தித்து வரும் நிதி நெருக்கடியை வெறும் பொருளாதார நெருக்கடியாகப் பார்ப்பதைக் காட்டிலும் ஒரு கலாச்சார மற்றும் மனித இன நெருக்கடியாகப் பார்ப்பது முக்கியம் என்று இத்தாலிய ஆயர் ஒருவர் கூறினார்.

இச்செவ்வாயன்று திருத்தந்தை 16ம் பெனடிக்ட் அவர்களால் வெனிஸ் உயர்மறைமாவட்டத்தின் முதுபெரும் தலைவராக நியமிக்கப்பட்டுள்ள ஆயர் Francesco Moraglia, வத்திக்கான் வானொலிக்கு வழங்கிய ஒரு பேட்டியில், தன்னைத் திருத்தந்தை இப்பொறுப்பில் நிறுவியதைக் கேட்டதும் தனக்குள் உருவான அச்சத்தையும் குறிப்பிட்டார்.

375,000க்கும் அதிகமான கத்தோலிக்கர்களைக் கொண்ட வெனிஸ் உயர்மறை மாவட்டத்தின் பொறுப்பு, திருஅவையில் ஒரு முக்கியப் பொறுப்பு என்று கருதப்படுகிறது.

58 வயது நிரம்பிய ஆயர் Moraglia, இத்தாலியின் ஜெனோவாவில் பிறந்தவர். இவர் 1977ம் ஆண்டு குருவாகவும், 2008ம் ஆண்டு ஆயராகவும் திருநிலைப்படுத்தப்பட்டார்.

பத்தாம் பத்திநாதர், 23ம் ஜான், மற்றும் முதலாம் ஜான் பால் என்ற பெயர்களைத் தாங்கி, இருபதாம் நூற்றாண்டில் திருஅவையை வழிநடத்திய மூன்று திருத்தந்தையர் வெனிஸ் உயர்மறைமாவட்டத்தின் முதுபெரும் தலைவர்களாக இருந்தவர்கள் என்பது குறிப்பிடத் தக்கது.

2. திருத்தந்தை மெக்சிகோ மற்றும் க்யூபா நாடுகளுக்கு மேற்கொள்ளவிருக்கும் திருப்பயணத்தின் விவரங்கள்

பிப்.01,2012. வருகிற மார்ச் மாதம் 23 முதல் 29 வரை திருத்தந்தை 16ம் பெனடிக்ட் மெக்சிகோ மற்றும் க்யூபா நாடுகளுக்கு மேற்கொள்ளவிருக்கும் திருப்பயணத்தின் விவரங்களை இச்செவ்வாயன்று வத்திக்கான் வெளியிட்டுள்ளது.

மார்ச் 23 வெள்ளியன்று காலை உரோம் நகர் லியோனார்தோ த வின்சி பன்னாட்டு விமானத்தளத்திலிருந்து கிளம்பும் திருத்தந்தை, முதலில் மெக்சிகோ நாட்டிற்குச் செல்கிறார்.

மார்ச் 24, 25 ஆகிய இரு நாட்கள் மெக்சிகோவில் திருப்பயணம் மேற்கொள்ளும் திருத்தந்தை, மார்ச் 26 மாலையில்  க்யூபா சென்றடைகிறார். மார்ச் 27 மற்றும் 28 ஆகிய இருநாட்கள் அந்நாட்டில் திருப்பயணம் நிகழ்த்தியபின், 29ம் தேதி காலை மீண்டும் உரோம் நகர் வந்தடைவார் என்று அறிவிக்கப்பட்டுள்ளது.

இவ்விரு நாடுகளின் திருப்பயணங்களில் திருத்தந்தை பத்து இடங்களில் உரையாற்றுவார் என்று தெரிகிறது.

3. இந்தியக் கத்தோலிக்க ஆயர்கள் பேரவையின் 30வது பொதுக்குழு கூட்டத்தைப் பற்றிய விவரங்கள்

பிப்.01,2012. இந்திய சமுதாயத்தை முன்னேற்றும் முயற்சிகளில் கத்தோலிக்கத் திரு அவை பெருமளவில் ஈடுபட்டுள்ளது என்றும், இந்தியாவில் தற்காலத்திற்கு ஏற்ற கல்வி முறையையும், மருத்துவ முறையையும் நிறுவிய பெருமை திருஅவையையேச் சாரும் எனவும் கர்தினால் ஆஸ்வல்ட் கிரேசியஸ் கூறினார்.

'சிறந்ததொரு இந்தியாவை உருவாக்க திரு அவையின் பங்கு' என்ற மையக்கருத்துடன் இப்புதனன்று பெங்களூருவில் ஆரம்பமாகியுள்ள இந்தியக் கத்தோலிக்க ஆயர்கள் பேரவையின் 30வது பொதுக்குழு கூட்டத்தைப் பற்றி இச்செவ்வாயன்று செய்தியாளர்களிடம் பேசிய கத்தோலிக்க ஆயர் பேரவையின் தலைவர் கர்தினால் கிரேசியஸ், இப்பேரவையின் விவரங்களை வெளியிட்டார்.

பிப்ரவரி 1ம் தேதி முதல் 8ம் தேதி வரை நடைபெறும் இக்கூட்டத்தில், நீதி மற்றும் அமைதிக்கான திருப்பீட அவையின் தலைவர் கர்தினால் பீட்டர் டர்க்சன், Misereor என்ற அகில உலக பிறரன்பு அமைப்பின் இயக்குனர் முனைவர் Josef Sayer, மற்றும் இந்திய தேர்தல் ஆணையத்தின் முன்னாள் தலைவர் Navin Chawla, ஆகியோர் உட்பட, பல அறிஞர்கள் வழங்கும் முக்கிய உரைகள் இடம்பெறும் என்றும் கர்தினால் கிரேசியஸ் கூறினார்.

பெங்களூருவில் உள்ள புனித ஜான் மருத்துவ ஆய்வு தேசிய நிறுவனத்தில் நடைபெறும் இக்கூட்டத்தில், கத்தோலிக்கத் திருஅவை இன்னும் என்னென்ன வழிகளில் இந்திய சமுதாயத்தை உயர்த்தமுடியும் என்ற விவாதங்கள் மேற்கொள்ளப்படும் என்று கர்தினால் கிரேசியஸ் எடுத்துரைத்தார்.

இந்தியாவில் கிறிஸ்தவர்களின் எண்ணிக்கை 2.32 விழுக்காடே ஆயினும், இந்திய நாட்டின் உண்மையான முன்னேற்றத்திற்கு தலத்திருஅவையின் பங்களிப்பு எவ்விதத்திலும் குறைவுபடாது என்று ஆயர் பேரவையின் தலைவர் வலியுறுத்திக் கூறினார்.

நிருபர்களுடன் நடைபெற்ற இக்கூட்டத்தில், பெங்களூரு பேராயர் Bernard Moras, இந்திய கத்தோலிக்க ஆயர் பேரவையின் செயலர் பேராயர் Albert D’Souza உட்பட பலரும் கலந்து கொண்டு பல தகவல்களை வழங்கினர்.

4. காஷ்மீரில் Sharia நீதி மன்றம் விடுத்துள்ள அறிக்கையை எதிர்த்து எந்த அரசியல் கட்சியும் குரல் எழுப்பாமல் இருப்பது வியப்பாக உள்ளது - கர்தினால் கிரேசியஸ்

பிப்.01,2012. காஷ்மீரில் இருந்து கிறிஸ்தவ குருக்களும் போதகர்களும் வெளியேற வேண்டும் என்று Sharia நீதி மன்றம் விடுத்துள்ள அறிக்கையை எதிர்த்து எந்த அரசியல் கட்சியும் குரல் எழுப்பாமல் இருப்பது வியப்பாக உள்ளது என்று கர்தினால் ஆஸ்வல்ட் கிரேசியஸ் கூறினார்.

காஷ்மீரில் நிலவும் பதட்ட நிலை குறித்து இச்செவ்வாயன்று செய்தியாளர்கள் கேள்விகள் எழுப்பியபோது, கர்தினால் கிரேசியஸ் இவ்வாறு கூறினார்.

மக்களை வலுக்கட்டாயமாக மத மாற்றத்தில் ஈடுபடுத்துவது கத்தோலிக்கத் திருஅவைக்கு புறம்பான ஒரு செயல் என்று விளக்கிய கர்தினால் கிரேசியஸ், அதே நேரம், மனமுவந்து ஒருவர் மதமாற்றம் அடைவதைத் தடுப்பதும் ஒருவரது அடிப்படை உரிமைக்கு எதிரான செயல் என்று சுட்டிக் காட்டினார்.

Sharia நீதி மன்றம் எடுத்துள்ள இந்த முடிவு பிற மதங்களைக் கட்டுப்படுத்தும் சக்தி பெற்றதல்ல என்றும், இது போன்ற அமைப்புக்களை வளரவிடுவது குடியரசு நாட்டின் அதிகாரத்தைப் பாதிக்கும் என்றும் அவர் தெளிவு படுத்தினார்.

கத்தோலிக்கத் திருஅவை அல்லாமல், பிற கிறிஸ்தவ சபைகளும் காஷ்மீரில் கல்விப் பணியில் ஈடுபட்டுள்ளன என்பதைச் சுட்டிக்காட்டிப் பேசிய கத்தோலிக்கக ஆயர் பேரவையின் பேச்சாளர் அருள்தந்தை பாபு ஜோசப், பிற சபைகள் மேற்கொள்ளும் மதமாற்ற முயற்சிகளுக்கு கத்தோலிக்கத் திருஅவை பொறுப்பேற்காது என்பதையும் எடுத்துரைத்தார்.

5. பாகிஸ்தான் முன்னேறுவதற்கு கல்வி மிகவும் முக்கியம் - ஆயர் Anthony Rufin

பிப்.01,2012. சமுதாயத்தில் நடப்பவற்றை அறிவுப்பூர்வமாகவும், தெளிவாகவும் கண்டுணர கல்வி மிகவும் அவசியம் என்பதால், பாகிஸ்தான் முன்னேறுவதற்கு கல்வி மிகவும் முக்கியம் என்று பாகிஸ்தான் ஆயர் ஒருவர் கூறினார்.

பாகிஸ்தானில் இஸ்லாமாபாத் ராவல்பிண்டி மறைமாவட்டத்தின் ஆயர் Anthony Rufin இவ்வாரம் முழுவதும் தன் மறைமாவட்டத்தில் உள்ள பள்ளிகளைப் பார்வையிட்டு, கல்வியின் முக்கியத்துவம் குறித்து பேசி வருவதாக ஆசிய செய்தி நிறுவனத்திற்கு அளித்த பேட்டியொன்றில் கூறியுள்ளார்.

எந்த ஒரு நாட்டிலும் கலாச்சாரத்தைச் சரிவர புரிந்துகொள்வதற்கு கல்வி ஒரு முக்கிய கருவி என்பதால், நாட்டின் பல்வேறு கலாச்சாரங்களையும் பயின்று, மற்றவர்களைப் புரிந்து கொள்வதற்கு கல்விக் கூடங்கள் மிகவும் அவசியம் என்று ஆயர் Rufin மாணவர்களிடமும், ஆசிரியர்களிடமும் கூறி வருவதாக இப்பேட்டியில் குறிப்பிட்டார்.

சமுதாயத்தின் விளிம்பில் உள்ள கிறிஸ்தவர்களுக்கு கல்வியின் அவசியம் மிக அதிகம் உள்ளது என்பதையும் ஆயர் Rufin வலியுறுத்தினார்.

18 கோடி மக்களைக் கொண்ட பாகிஸ்தானில், 2 கோடியே 50 இலட்சம் குழந்தைகள் கல்வி அறிவு பெறும் உரிமையை இழந்துள்ளனர் என்று ஆசிய செய்திக் குறிப்பொன்று கூறுகிறது.

6. அமெரிக்க அரசுத் தலைவர் அண்மையில் வெளியிட்டுள்ள நலவாழ்வு திட்டங்களுக்கு அமெரிக்க ஆயர்கள் எதிர்ப்பு

பிப்.01,2012. அமெரிக்க அரசுத் தலைவர் பராக் ஒபாமா அண்மையில் வெளியிட்டுள்ள நல வாழ்வு பேணும் திட்டங்கள் கத்தோலிக்க மனசாட்சிக்கு எதிரானவை என்றும் இவைகளை அரசு மாற்ற வேண்டும் என்பதில் அமெரிக்க கத்தோலிக்க ஆயர்கள் முழு மூச்சுடன் ஈடுபடுவர் என்றும் நியூயார்க் பேராயர் Timothy Dolan தெரிவித்தார்.

அமெரிக்க அரசு அண்மையில் வெளியிட்டுள்ள இத்திட்டத்தில் கருக்கலைப்புக்குத் தேவையான முறைகளும், மருந்துகளும் மக்கள் வரிப்பணத்திலிருந்து ஒதுக்கப்படும் என்று தெரிவதால், இது கத்தோலிக்கர்களின் மனசாட்சிக்கு எதிராக அமைந்துள்ளது என்பதை அண்மையில் திருத்தந்தையால் கர்தினாலாக அறிவிக்கப்பட்டுள்ள பேராயர் Dolan சுட்டிக் காட்டினார்.

அமெரிக்காவின் 197 மறைமாவட்டங்களில் உள்ள ஆயர்களில் இதுவரை 126 ஆயர்கள் இத்திட்டத்திற்கு எதிராகத் தங்கள் கருத்துக்களைப் பதிவு செய்துள்ளனர் என்று அமெரிக்காவின் American Papist blog என்ற வலைத்தளம் கூறியுள்ளது.

7. ஹாங்காங் பகுதியில் கத்தோலிக்கர்களின் எண்ணிக்கையும், அருள்பணியாளர்கள் எண்ணிக்கையும் அதிகரித்துள்ளன

பிப்.01,2012. ஹாங்காங் பகுதியில் கத்தோலிக்கர்களின் எண்ணிக்கையும், அருள்பணியில் ஈடுபட முன்வருவோரின் எண்ணிக்கையும் அண்மைய ஆண்டுகளில் அதிகரித்துள்ளன என்று அண்மையில் வெளியான ஓர் அறிக்கை கூறுகிறது.

ஹாங்காங் கத்தோலிக்கத் திருஅவையின் புள்ளி விவரங்களின் படி, 1954ம் ஆண்டிலிருந்து 2010ம் ஆண்டு வரை கத்தோலிக்கர்களின் எண்ணிக்கை வளர்ந்து வந்துள்ளது என்றும், கடந்த பத்தாண்டுகளில் இந்த எண்ணிக்கை மூன்று மடங்காக உயர்ந்துள்ளது என்றும் தெரிகிறது.

2010ம் ஆண்டின் கணக்கெடுப்பின்படி, 70 இலட்சம் மக்களைக் கொண்ட ஹாங்காங் பகுதியில், 350,000 பேர் கத்தோலிக்கர்கள் என்றும், பிலிப்பீன்ஸ் நாட்டிலிருந்து அங்கு பணிகள் செய்வதற்கு வந்திருப்போரையும் சேர்த்தால், இவ்வெண்ணிக்கை 5,30,000 ஆக உயரும் என்றும் கூறப்பட்டுள்ளது.

அருள்பணியில் இணையும் இளையோரின் எண்ணிக்கை கூடினாலும், மக்களின் தேவைகளுக்கு ஏற்ற அளவு திருப்பணியாளர்கள் இல்லை என்றும் இவ்வறிக்கையில் கூறப்பட்டுள்ளது.

8. மனித உரிமைகள் ஆணையர் ஆனந்த மெண்டிஸ் பதவி விலகல்

பிப்.01,2012. இலங்கையில் மனித உரிமைகள் ஆணைக்குழுவின் ஆணையர்களில் ஒருவராக இருந்த கலாநிதி ஆனந்த மெண்டிஸ் தனது பதவியிலிருந்து விலகுவதாக அறிவித்துள்ளார்.

நடுநிலையோடு, அச்சமின்றி நடவடிக்கைகளை எடுக்கக் கூடிய நிலைமை மனித உரிமைகள் ஆணைக்குழுவுக்குள் இல்லை என்ற காரணத்தால், தான் இந்தத் தீர்மானத்திற்கு வர நேரிட்டதாக மெண்டிஸ் பிபிசி ஊடகத்திடம் தெரிவித்தார்.

மனித உரிமைகளுக்கான மிகச்சிறந்த ஆணைக்குழுவொன்றை உருவாக்க வேண்டும் என்ற நோக்கத்துடனேயே இலங்கை அரசுத்தலைவரின் கோரிக்கையின் பேரில் தான் ஆணைக்குழுவில் இணைந்து கொண்டதாகவும், ஆனால் அந்த இலக்கை அடைய முடியாதபடி பல்வேறு இடையூறுகள் தனக்கு இருந்ததாகவும் அவர் பிபிசியிடம் தெரிவித்தார்.

ஆணைக்குழுவுக்குள் இருக்கும் தன்னால் பெயர் குறிப்பிட்டுக் கூற முடியாத நபர்களின் செயல்பாடுகளே தனது பணிகளுக்கு இடையூறாக இருந்ததாகவும் தனது பதவி விலகல் அரசுத்தலைவரால் ஏற்றுக்கொள்ளப்பட்டுள்ளதாகவும் இலங்கை மனித உரிமைகள் ஆணைக்குழுவின் ஆணையாளர்களில் ஒருவராக இருந்த கலாநிதி ஆனந்த மெண்டிஸ் பிபிசியிடம் குறிப்பிட்டார்.

 

robert john kennedy: கத்தோலிக்க செய்திகள்: 31ஜனவரி 2012

robert john kennedy: கத்தோலிக்க செய்திகள்: 31ஜனவரி 2012: 1. இந்திய ஆயர் பேரவைக்கூட்டம் பங்களூருவில் இப்புதனன்று துவங்குகிறது 2. சீனாவில் மேலும் ஐந்து குருக்கள் கைது 3. கிறிஸ்தவர்களுக்கு அதிக...