Wednesday, 22 July 2020

கடவுள், பெற்றோர், மற்றும், குழந்தைகள் மீது காட்டப்படும் அன்பு

வத்திக்கான் கோடை முகாமில் சிறாருடன் திருத்தந்தை

திருத்தந்தை : சிறார்கள் அனைவரும் தங்களுக்கு மேலும் புதிய நண்பர்களை உருவாக்கிக்கொள்ள வேண்டும், ஏனெனில், தனியாக நின்று விளையாட விரும்புபவர்கள் சுயநலவாதிகள்
கிறிஸ்டோபர் பிரான்சிஸ் - வத்திக்கான் செய்திகள்
கடவுள் மீதும், பெற்றோர்மீதும், குழந்தைகள் மீதும் காட்டப்படும் அன்பிற்கு இடையே இருக்கும் தொடர்பு, மற்றும், அது வழங்கும் கனிகள் குறித்து ஜூலை 21, இச்செவ்வாயன்று வெளியிட்ட டுவிட்டர் செய்தியில் எழுதியுள்ளார், திருத்தந்தை  பிரான்சிஸ்.
'பெற்றோர்களுக்கும் குழந்தைகளுக்கும் இடையே உள்ள அன்பு, இறைவன் மீது கொள்ளும் அன்பால் தூண்டப்பட்டு தூய்மையடையும்போது, அது முற்றிலும் கனி தருவதாக மாறி, குடும்பத்திற்குள்ளும், அதைத் தாண்டியும், நற்கனிகளைத் தருகிறது', என்ற சொற்கள் திருத்தந்தையின் டுவிட்டர் செய்தியில் பதிவாகியிருந்தன.
இதற்கிடையே, வத்திக்கானில் இம்மாதத்தில் இடம்பெற்றுவரும், கோடைகால சிறார் முகாமிற்கு, முன்னறிவிப்பின்றி சென்ற திருத்தந்தை, அங்கு பயிற்சி பெறும் சிறார்களை ஆச்சரியத்தில் ஆழ்த்தினார்.
இத்திங்கள் காலை, சிறார்கள் சிற்றுண்டி அருந்திக்கொண்டிருந்தபோது, வத்திக்கான் புனித திருத்தந்தை ஆறாம் பவுல் அரங்கிற்குள் சென்ற திருத்தந்தை பிரான்சிஸ் அவர்கள், ஒவ்வொரு சாப்பாட்டு மேசைக்கும் சென்று சிறார்களுடன் உரையாடியதுடன், அவர்களுக்கு ஒரு சிறு உரையும் நிகழ்த்தினார்.
சிறார்கள் அனைவரும் இம்முகாம் நேரத்தில், புதிய நண்பர்களை உருவாக்கிக்கொள்ள வேண்டும், ஏனெனில், தனியாக விளையாட விரும்புபவர்கள், சுயநலவாதிகளாகவே இருக்கமுடியும் எனவும் சிறார்களிடம் கூறினார் திருத்தந்தை பிரான்சிஸ்.
சிறார்களைச் சந்தித்தபின், அவர்களுக்குப் பயிற்சி வழங்கும் தன்னார்வப் பணியாளர்களையும்  தனியாகச் சந்தித்து, தன் பாராட்டுக்களையும் நன்றியையும் வெளியிட்டார் திருத்தந்தை.
திருத்தந்தை கேட்டுக்கொண்டதன்பேரில், வத்திக்கான் பணியாளர்களின் குழந்தைகளுக்காக இம்மாதத் துவக்கத்தில் உருவாக்கப்பட்ட இந்தக் கோடை முகாமில், 5 வயதிற்கும் 14 வயதிற்கும் உட்பட்ட ஏறத்தாழ 100 சிறார்கள் கலந்துகொள்கின்றனர்.
இவர்கள், வத்திக்கான் தோட்டம், வத்திக்கான் ஹெலிகாப்டர் தளம் புனித திருத்தந்தை ஆறாம் பவுல் அரங்கம் ஆகியவற்றில், நீச்சல், டென்னிஸ், கால்பந்து, கூடைப்பந்து போன்ற விளையாட்டுக்கள், கல்வி கற்றல், செபித்தல், போன்ற செயல்பாடுகளில் ஈடுபட்டு கோடை விடுமுறையை செலவிட்டு வருகின்றனர்.
வத்திக்கான் காவல்துறையின் ஆன்மீக குருவாக இருக்கும் அருள்பணி Franco Fontana அவர்களின் கண்காணிப்பில், தொன்போஸ்கொவின் சலேசியத் துறவுசபையின் ஒத்துழைப்புடன், இந்த சிறார் கோடை முகாம், வத்திக்கானுக்குள் நடத்தப்படுகிறது.

கொரோனா கிருமியுடன் போராட, போர்நிறுத்தம் தேவை

ஜூலை 15 சிரியாவில் நிகழ்ந்த வான்வழித் தாக்குதலால் சிதைந்த பகுதி

இலட்சக்கணக்கான உயிர்களைக் கொன்றுள்ள கொரோனா தொற்றுக்கிருமியுடன் போராடி வெற்றிபெறுவதற்கு, மக்களின் உயிர்களைப் பலிவாங்கும் போர்கள் உடனடியாக முடிவுக்கு வரவேண்டும் - திருத்தந்தை
ஜெரோம் லூயிஸ் - வத்திக்கான் செய்திகள்
இலட்சக்கணக்கான மக்களின் உயிர்களைக் கொன்றுள்ள கொரோனா தொற்றுக்கிருமியுடன் போராடி வெற்றிபெறுவதற்கு, இவ்வுலகில், மக்களின் உயிர்களைப் பலிவாங்கும் போர்கள் உடனடியாக முடிவுக்கு வரவேண்டும் என்று திருத்தந்தை மீண்டும் ஒருமுறை அழைப்பு விடுத்துள்ளார்.
புனித பேதுரு பெருங்கோவில் வளாகத்தில் கூடியிருந்தோருக்கு, ஜூலை 19, இஞ்ஞாயிறன்று, மூவேளை செப உரை வழங்கியபின், உலகெங்கும் கொரோனா கொள்ளை நோயால் பாதிக்கப்பட்டோர் மற்றும் உயிரிழந்தோர் அனைவருடன், குறிப்பாக, இந்தக் கொள்ளை நோய் காலத்திலும் உள்நாட்டு மோதல்களைச் சந்தித்துவரும் மக்களுடன் தான் ஒன்றித்திருப்பதாக திருத்தந்தை கூறினார்.
உலகெங்கும் போர் நிறுத்தம் நடைபெறுவதற்கு, ஐ.நா.வின் பாதுகாப்பு அவை, ஜூலை மாதத் துவக்கத்தில் மீண்டும் ஒருமுறை அழைப்பு விடுத்துள்ளதை தன் உரையில் குறிப்பிட்டத் திருத்தந்தை பிரான்சிஸ் அவர்கள், கொரோனா கிருமியால் உலகெங்கும் ஐந்து இலட்சத்திற்கும் அதிகமான மக்கள் இறந்துள்ள வேளையில், மக்களைக் கொல்லும் போர்கள் இன்னும் தொடர்வது, பெரும் கொடுமை என்று கூறினார்.
ஆர்மேனியா மற்றும் அசர்பைஜான் நாடுகளுக்கிடையே அண்மையில் உருவாகியுள்ள மோதல்கள், ஒரு போராக உருவாகும் ஆபத்து உள்ளது என்பதை குறிப்பிட்ட திருத்தந்தை பிரான்சிஸ் அவர்கள், இவ்விரு நாடுகளுக்கிடையிலும் அமைதி நிலவ அழைப்பு விடுத்தார்.

உள்ளத்தில் நம்பிக்கையூட்டும் கடவுளின் பொறுமை

திருத்தந்தையின் உரையைக் கேட்க, சமுதாய விலகல் விதியைக் கடைபிடித்து, பேதுரு வளாகத்தில் கூடியிருக்கும் மக்கள்

பயிர்களும், களைகளும் என்ற உவமை, இறைவனின் பொறுமையைப் பறைசாற்றி, நம் உள்ளங்களில் நம்பிக்கையை விதைக்கின்றது - திருத்தந்தை பிரான்சிஸ்
ஜெரோம் லூயிஸ் - வத்திக்கான் செய்திகள்
பயிர்களும், களைகளும் என்ற உவமை, இறைவனின் பொறுமையைப் பறைசாற்றி, நம் உள்ளங்களில் நம்பிக்கையை விதைக்கின்றது என்று திருத்தந்தை பிரான்சிஸ் அவர்கள் இஞ்ஞாயிறன்று வழங்கிய மூவேளை செப உரையில் கூறினார்.
பயிர்கள் நடுவே களைகள் உவமை
ஜூலை 19, இஞ்ஞாயிறன்று, புனித பேதுரு பெருங்கோவில் வளாகத்தில் கூடியிருந்த மக்களுக்கு நண்பகல் மூவேளை செப உரை வழங்கிய திருத்தந்தை, பயிர்கள் நடுவே களைகள் விதைக்கப்பட்டன என்பதைக் கூறும் உவமையை மையப்படுத்தி, தன் கருத்துக்களைப் பகிர்ந்துகொண்டார்.
களைகளை அகற்றுவதற்கு அவசரம் காட்டிய பணியாளர்களிடம், அறுவடை நாள் வரை பொறுமையைக் கடைபிடிக்கச் சொன்ன நில உரிமையாளரைப்போல, கடவுளும் பொறுமைகாட்டுகிறார் என்பதை, திருத்தந்தை, தன் மூவேளை செப உரையில் சுட்டிக்காட்டினார்.
களைக்கொல்லிகளால் பூமிக்கு நேரும் ஆபத்து
களைகளை அகற்றுவதற்கு, இன்றைய உலகில் பயன்படுத்தப்படும் களைக்கொல்லிகள், பூச்சிக்கொல்லிகள் ஆகிய வேதியியல் நஞ்சுகளால், இந்த பூமிக்கும், பயிர்களுக்கும், நமக்கும் நாம் விளைவிக்கும் ஆபத்துக்களை நாம் சிந்திக்கவேண்டும் என்று திருத்தந்தை பிரான்சிஸ் அவர்கள், வளாகத்தில் கூடியிருந்த மக்களிடம் கேட்டுக்கொண்டார்.
நல்ல குணங்கள், நற்செயல்கள் நிறைந்த உலகில், பொறாமையின் காரணமாக தீமைகளை விதைக்கும் அலகையின் செயல்பாடுகளை, இன்றும் நம் நடுவே காணமுடிகிறது என்று கூறிய திருத்தந்தை, ஒன்றுபட்டு வாழும் ஒரு குடும்பத்தில், பொறாமையின் காரணமாக, அவதூறுகள் விதைக்கப்பட்டு, அக்குடும்பம் பிளவுபடுவதை நாம் காண்கிறோம் என்ற எடுத்துக்காட்டையும் முன்வைத்தார்.
அவசரக் கண்ணோட்டம், பொறுமை கண்ணோட்டம்
தீமையை அகற்றுவதில் பணியாளர் காட்டும் அவசரத்திற்கும், தொலைதூரப் பார்வையுடன், பொறுமை காத்து, பயிர்களையும் களைகளையும் வளரவிடும் கடவுளின் பொறுமைக்கும் உள்ள வேறுபாடுகள் குறித்து, திருத்தந்தை, தன் உரையில் விளக்கிக் கூறினார்.
நில உரிமையாளரின் கண்ணோட்டத்திற்கும், பணியாளரின் கண்ணோட்டத்திற்கும் உள்ள வேறுபாடுகள், வாழ்விலும், வரலாற்றிலும் உள்ள இருவேறு கண்ணோட்டங்கள் என்று கூறிய திருத்தந்தை பிரான்சிஸ் அவர்கள், பணியாளர்களின் கண்ணோட்டம், களைகளின் அழிவை மையப்படுத்தி இருந்ததையும், உரிமையாளரின் கண்ணோட்டம், பயிர்களின் பாதுகாப்பை மையப்படுத்தி இருந்ததையும் சுட்டிக்காட்டினார்.
நல்லவர்களுக்கு நிறைவாழ்வளிப்பதும், தீயோரைத் தண்டிப்பதும், இறைவனை மட்டுமே சார்ந்தது என்று கூறி, திருத்தந்தை தன் மூவேளை செப உரையை நிறைவு செய்தார்.

திருத்தந்தையரின் தலைமைத்துவம், தவறாவரம்

திருத்தூதர்கள் பேதுரு, அந்திரேயா

திருத்தூதர் பேதுருவும், அவரின் வழிவருபவர்களும், திருஅவை ஒன்றிப்பின் காணக்கூடிய அடித்தளம். திருத்தந்தையரின் அதிகாரம், அனைவரின் மீட்புக்காக, திருத்தூதர் பேதுரு மற்றும், அவரின் வழிவருபவர்களுக்கு வழங்கப்பட்டது - திருத்தந்தை 9ம் பயஸ்
மேரி தெரேசா: வத்திக்கான் செய்திகள்
உலகளாவிய திருஅவையில் திருத்தந்தையரின் தலைமைத்துவம், திருத்தந்தையரின் அதிகாரப்பூர்வ அறிக்கைகளின் தவறாவரம் ஆகியவை குறித்த கோட்பாடுகள், முதலாம் வத்திக்கான் பொதுச்சங்கத்தில் அங்கீகரிக்கப்பட்டதன் 150ம் ஆண்டு நிறைவு, ஜூலை 18, இச்சனிக்கிழமையன்று நினைவுகூரப்படுகின்றது.
1869ம் ஆண்டு டிசம்பர் மாதம் 8ம் தேதி துவங்கிய இந்த முதலாம் வத்திக்கான் பொதுச்சங்கத்தில், நீண்ட நேரம் இடம்பெற்ற விவாதத்திற்குப் பின், இந்த இரு கோட்பாடுகளும் நிறைவேற்றப்பட்டன. இந்த இரு கோட்பாடுகளை விவரிக்கும் Pastor Aeternus என்ற கொள்கை விளக்கம், 1870ம் ஆண்டு ஜூலை 18ம் தேதி  வெளியிடப்பட்டது.
இது வெளியிடப்பட்ட 150ம் ஆண்டு நிறைவை நினைவுகூரும் இவ்வேளையில், அந்த இரு கோட்பாடுகளும் திருஅவைக்கு எவ்வளவு முக்கியத்துவம் வாய்ந்தவை என்பதை, வத்திக்கான் செய்தித்துறை விரிவாக அலசியுள்ளது.
திருத்தந்தை புனித 6ம் பவுல் அவர்கள், 1969ம் ஆண்டில் பொது மறைக்கல்வியுரையில் கூறியதுபோன்று, இந்த கொள்கை விளக்கம், நீண்ட, தீவிர உணர்வு நிறைந்த, மற்றும், மிகக் கடுமையான வாக்குவாதங்கள் இடம்பெற்றபின், அதில் பங்குகொண்ட 535 பொதுச்சங்கத் தந்தையரால் ஒரே மனதாக ஏற்றுக்கொள்ளப்பட்டது. எனினும், இந்த வாக்கெடுப்பில் 83 பொதுச்சங்கத் தந்தையர் பங்கெடுக்கவில்லை.
Pastor Aeternus என்ற கொள்கை விளக்கத்தில், திருத்தந்தை 9ம் பயஸ் அவர்கள், திருத்தந்தையரின் தலைமைத்துவம் பற்றிய கோட்பாட்டை அறிவிப்பதற்குமுன், நாம் இருவரும் ஒன்றாய் இருப்பதுபோன்று, தம் சீடர்களும் ஒன்றாய் இருக்குமாறு, இயேசு தம் இறுதி இரவு உணவில் தம் இறைத்தந்தையிடம் செபித்ததைக் குறிப்பிட்டார்.
திருத்தூதர் பேதுருவும், அவரின் வழிவருபவர்களும், திருஅவை ஒன்றிப்பின் காணக்கூடிய அடித்தளம் என்றும் கூறிய திருத்தந்தை 9ம் பயஸ் அவர்கள், திருத்தந்தையரின் அதிகாரப்பூர்வ அறிக்கைகளின் தவறாவரம் பற்றிக் கூறுகையில், இந்த அதிகாரம், அனைவரின் மீட்புக்காக, திருத்தூதர் பேதுரு மற்றும், அவரின் வழிவருபவர்களுக்கு வழங்கப்பட்டது என்று விளக்கினார்.
திருத்தந்தை 9ம் பயஸ் அவர்கள், 1912ம் ஆண்டு, பொது மறைக்கல்வியுரையில் கூறுகையில், இந்த இரு கோட்பாடுகளையும் கடந்து, அனைவரும், திருத்தந்தையரை அன்புகூரவேண்டும் மற்றும், அவர்களுக்கு கீழ்ப்படியவேண்டும், இவ்வாறு இடம்பெறவில்லையெனில், தான் மிகவும் வேதனையடைவதாகக் கூறினார்.
முன்னாள் திருத்தந்தை 16ம் பெனடிக்ட் அவர்கள், 2006ம் ஆண்டு மே மாதம் 27ம் தேதி  போலந்து நாட்டின் கிரக்கோவ் நகரில் சந்தித்தபோது, திருஅவை மீதும், திருஅவையோடும் உங்கள் வாழ்வைக் கட்டியெழுப்ப அஞ்சவேண்டாம் என்றும், திருத்தூதர் பேதுரு மற்றும், அவரிடம் ஒப்படைக்கப்பட்ட திருஅவையை அன்புகூர்வது குறித்து நீங்கள் அனைவரும் பெருமிதம் கொள்ளுங்கள் என்றும் கூறினார்.
திருத்தந்தை 9ம் பயஸ் அவர்களால் கூட்டப்பட்ட முதலாம் வத்திக்கான் பொதுச்சங்கம், 1869ம் ஆண்டு டிசம்பர் மாதம் 8ம் தேதி முதல் 1870ம் ஆண்டு அக்டோபர் 20ம் தேதி வரை நடைபெற்றது. திரிதெந்தின் பொதுச்சங்கத்திற்குப்பின், மூன்று நூற்றாண்டுகள் சென்று நடைபெற்ற இந்தப் பொதுச்சங்கம், திருத்தந்தையரின் தவறாவரம் குறித்து தெளிவான விளக்கம் அளித்தது. இதில் 744 திருஅவை உறுப்பினர்கள் பங்குபெற்றனர்.

நற்செய்தி அறிவிப்புப்பணியில் பங்குதள சமூகத்தின் இடம்

பிரேசில் நாட்டு பங்குதள திருப்பலியின்போது

பழைய விதிகளை சிறப்பான வகையில் செயல்படுத்துவதற்குரிய வழிமுறைகளைக் காட்டும் புதிய ஏடு - அருள்பணியாளர்களுக்குரிய திருப்பீடப் பேராயத்தின் வெளியீடு
கிறிஸ்டோபர் பிரான்சிஸ் : வத்திக்கான் செய்திகள்
நற்செய்தி அறிவிப்புப்பணியில் பங்குத்தளங்களின் பணி குறித்து, புதிய ஏடு ஒன்றை இத்திங்களன்று வெளியிட்டுள்ளது, அருள்பணியாளர்களுக்குரிய திருப்பீடப் பேராயம்.
“திருஅவையின் நற்செய்தி அறிவிப்புப்பணியில் பங்குத்தள சமூகத்தின் மேய்ப்புப்பணிக்குரிய மாற்றங்கள்”, என்ற தலைப்பில் வெளியிடப்பட்டுள்ள இந்த புதிய ஏட்டில் புதிய சட்டங்கள் எதுவும் குறிப்பிடப்படவில்லை, மாறாக, பழைய விதிகளை சிறப்பான வகையில் செயல்படுத்துவதற்குரிய வழிமுறைகள் காட்டப்பட்டுள்ளன.
திருமுழுக்குப் பெற்ற அனைவரின் கடமைகளை வலியுறுத்தும் இந்த ஏடு, பங்குத்தளங்களிடையே நிலவ வேண்டிய ஒத்துழைப்பையும் சுட்டிக்காட்டி நிற்கிறது.
11 பிரிவுகளைக் கொண்டுள்ள இந்த ஏடு, முதல் ஆறு பிரிவுகளில், மேய்ப்புப்பணி சார்புடைய மாற்றங்கள் குறித்தும், இன்றைய நவீன உலகில் மறைப்பணி, மற்றும், பங்குத்தளங்களின் மதிப்பு ஆகியவை குறித்தும் விளக்கமளிக்கிறது.
7 முதல் 11 வரையுள்ள பிரிவுகளில், பங்குத்தளப் பிரிவுகள், பங்குத்தளத்தில் உள்ள வெவ்வேறு சமூகங்களின் பொறுப்புகள் போன்றவை குறித்து விவாதிக்கப்பட்டுள்ளது.
பங்குத்தள அமைப்புமுறைகளில் மறைப்பணி புதுப்பித்தலின் அவசியம் குறித்து வலியுறுத்தும் இந்த ஏடு, இறைவனை அறிவித்தல், அருளடையாள வாழ்வை வாழ்தல், பிறரன்பிற்கு சான்று பகிர்தல் போன்றவை வழியாக இடம்பெறவேண்டிய மாற்றங்களை சுட்டிக்காட்டுகிறது.
பிறரன்பு நடவடிக்கைகள் வழியாக நம் விசுவாசத்திற்கு சான்றுபகரவேண்டிய அவசியம் குறித்தும் விவரிக்கிறது இந்த புதிய ஏட்டின் முதல் பகுதி.
இவ்வேட்டின் இரண்டாவது பகுதியில், பங்குதளத்தின் பல்வேறு பிரிவுகளில் காணப்படவேண்டிய ஒத்துழைப்பு, அருள்பணியாளரின் இடம் ஆகியவை குறித்து விவாதிக்கப்பட்டுள்ளது.
எட்டாவது பிரிவில், திருத்தொண்டர்களின் கடமை குறித்தும் எடுத்துரைக்கப்பட்டுள்ளது. வார்த்தை வழிபாட்டிலும், அருள்பணியாளர்களின் பற்றாக்குறை இருக்கும் இடங்களிலும், பொதுநிலையினரின் பங்கு குறித்தும் விவாதிக்கப்பட்டுள்ளது.
அருளடையாளங்களை நிறைவேற்றுதல் குறித்து விவாதிக்கும் இவ்வேட்டின் இறுதிப் பிரிவு, எந்த அருளடையாளமும் இலவசமாக வழங்கப்பட வேண்டும் எனவும், அருள்பணியாளர்களின் நிதி நிர்வாகம் வெளிப்படையானதாக இருப்பதைப் பார்க்கும் பங்குத்தள மக்கள், தாங்களே முன்வந்து, தங்கள் பங்குத்தளத்தை நடத்துவதற்குரிய உதவிகளை ஆற்றவேண்டிய உணர்வைப் பெறுவர் எனவும் இவ்வேட்டில் கூறப்பட்டுள்ளது.

ஏழை நாடுகளின் கடன்கள் இரத்து செய்யப்பட காரித்தாஸ்

திருத்தந்தை பிரான்சிஸ், கர்தினால் தாக்லே

ஏழை நாடுகள், தங்களின் கடன்களை செலுத்துவதை, தற்காலிகமாக நிறுத்திவைப்பதைவிட, அவை நிரந்தரமாக இரத்துசெய்யப்படுவதற்கு உறுதியான செயல்திட்டங்களை உருவாக்குவதே இன்றையத் தேவை - காரித்தாஸ் அமைப்பு
மேரி தெரேசா: வத்திக்கான் செய்திகள்
இந்த பூமிக்கோளம், கோவிட்-19 கொள்ளைநோயால் அடுக்கடுக்காய் சவால்களைச் சந்தித்துவரும் இவ்வேளையில், உலக அளவில் போர்நிறுத்தம் இடம்பெறவும், வறிய நாடுகளின் வெளிநாட்டு கடன்கள் இரத்து செய்யப்படவும், நடவடிக்கைகளை மேற்கொள்ளுமாறு, உலகளாவிய காரித்தாஸ் நிறுவனம், G20 நாடுகளுக்கு அழைப்பு விடுத்துள்ளது.
உலகின் பொருளாதாரத்தைச் சீர்தூக்கிப் பார்ப்பது மற்றும், நீடித்த நிலையான பொருளாதாரத்தை மீட்டெடுக்கும் நடவடிக்கையில் ஒத்துழைப்பு வழங்குவது குறித்து  ஜூலை 18, இச்சனிக்கிழமையன்று,  சவுதி அரேபியாவின் ஜெட்டா (Jeddah) நகரில், G20 நாடுகளின் நிதி அமைச்சர்கள் மற்றும், மத்திய வங்கியின் மேலாளர்கள், மெய்நிகர் உச்சி மாநாட்டைத் துவக்கவிருப்பதை முன்னிட்டு, காரித்தாஸ் நிறுவனம், இவ்வாறு அழைப்பு விடுத்துள்ளது.
கொரோனா கொள்ளைநோயால் இலட்சக்கணக்கான மக்களின் துன்பங்கள் மேலும் அதிகரித்துள்ள இவ்வேளையில், உலக அளவில் போர்நிறுத்தம் இடம்பெறுமாறு திருத்தந்தை பிரான்சிஸ் அவர்கள் விடுத்துள்ள விண்ணப்பத்திற்கு, உலகை முக்கியமாக  இயக்குபவர்களும், போரில் ஈடுபட்டுள்ளவர்களும் செவிகொடுக்குமாறு கேட்டுக்கொண்டுள்ளது, காரித்தாஸ் நிறுவனம்.
கடந்த ஏப்ரல் மாதத்தில், உலக வங்கியும், G20 நாடுகளும், கொரோனா கொள்ளைநோய் உருவாக்கியுள்ள நெருக்கடிநிலையால், அதிக அளவு துன்புறும் மிக வறிய நாடுகள், தங்களின் கடன்களை செலுத்துவதை, தற்காலிகமாக நிறுத்திவைப்பதைற்கு இசைவு தெரிவித்திருந்தன.
இதை தன் ஆண்டறிக்கையில் குறிப்பிட்டுள்ள காரித்தாஸ் அமைப்பு, கடன்கள் செலுத்தப்படுவதை தற்காலிகமாக நிறுத்திவைப்பதைவிட, அவை நிரந்தரமாக இரத்துசெய்யப்படுவதற்கு உறுதியான செயல்திட்டங்களை உருவாக்குவதே இன்றையத் தேவை என்று, ஜி20 நாடுகளின் நிதி அமைச்சர்களை வலியுறுத்தியுள்ளது.
கத்தோலிக்கத் திருஅவையின் மனிதாபிமான அமைப்பான உலகளாவிய காரித்தாஸ் நிறுவனம் வெளியிட்டுள்ள ஆண்டறிக்கையில், இவ்வாறு கேட்டுக்கொண்டுள்ளார், அதன் பொதுச்செயலர் அலாய்சியஸ் ஜான்.
உலக அளவில் காரித்தாஸ் அமைப்பு திரட்டிய ஒரு கோடியே 20 இலட்சத்திற்கு அதிகமான யூரோக்கள் பணத்தைக் கொண்டு, இந்த கொள்ளைநோய் காலத்தில், ஒரு கோடியே 50 இலட்சம் முதல், ஒரு கோடியே 60 இலட்சம் மக்கள் வரை உதவ முடிந்தது என்றும், ஜான் அவர்கள் கூறினார்.
ஜெட்டா (Jeddah) நகரில் ஜூலை 18,19 அதாவது இச்சனி, ஞாயிறு ஆகிய இரு நாள்கள், G20 நாடுகளின் நிதி அமைச்சர்கள் மற்றும், மத்திய வங்கியின் மேலாளர்கள், வலைத்தளம் வழியே, மெய்நிகர் உச்சி மாநாட்டை நடத்துகின்றனர்.

பாலியல் முறைகேடுகளை கையாள புதிய கையேடு

விசுவாசக் கோட்பாட்டு பேராயத்தின் தலைவர், கர்தினால் லூயிஸ் இலதாரியா

பாலியல் முறைகேடுகளை கையாளும் வழிமுறைகளைத் தொகுத்து, விசுவாசக் கோட்பாட்டு பேராயம், ஒரு கையேட்டை, ஜூலை 16 இவ்வியாழனன்று வெளியிட்டது
ஜெரோம் லூயிஸ் - வத்திக்கான் செய்திகள்
சிறுவர், சிறுமியர் மீதும், வலுவற்றவர்கள் மீதும் அருள்பணியாளர், மற்றும், திருஅவை அதிகாரிகளால் உருவாகும் பாலியல் முறைகேடுகளை கையாளும் வழிமுறைகளைத் தொகுத்து, விசுவாசக்கோட்பாட்டு பேராயம், ஒரு கையேட்டை, ஜூலை 16 இவ்வியாழனன்று வெளியிட்டது.
உலகின் அனைத்து நாடுகளின் ஆயர் பேரவைத் தலைவர்களுடன், 2019ம் ஆண்டு பிப்ரவரி மாதம், திருத்தந்தை பிரான்சிஸ் அவர்கள் வத்திக்கானில் மேற்கொண்ட ஒரு சந்திப்பைத் தொடர்ந்து, வெளியிடப்பட்டுள்ள இந்த கையேடு, 9 பிரிவுகளையும், 30 பக்கங்களையும் கொண்டுள்ளது.
ஆயர் பேரவைத் தலைவர்களுடன் திருத்தந்தை மேற்கொண்ட சந்திப்பில் அவர் வழங்கிய 21 கருத்துக்களை அடிப்படையாகக் கொண்டு இந்த கையேடு உருவாக்கப்பட்டுள்ளது என்று விசுவாசக்கோட்பாட்டு பேராயம் அறிவித்துள்ளது.
இந்தப் பிரச்சனையை கையாளும் ஒவ்வொரு மறைமாவட்ட அதிகாரிகளுக்கும் உதவியாக இருக்கும் வண்ணம் உருவாக்கப்பட்டுள்ள இந்த கையேடு, முதல் பிரதி என்றும், ஒவ்வொரு மறைமாவட்டத்திலிருந்தும் வழங்கப்படும் ஆலோசனைகள், இந்தப் பிரதியில் அவ்வப்போது இணைக்கப்பட்டு, இந்தக் கையேடு தொடர்ந்து புதிய பதிப்புக்களைக் காணும் என்றும் கூறப்பட்டுள்ளது.
பாலியல் முறைகேடுகளை ஒழிப்பதற்கு, 2001ம் ஆண்டு திருத்தந்தை புனித இரண்டாம் யோவான் பவுல் அவர்களாலும், 2010ம் ஆண்டு முன்னாள் திருத்தந்தை 16ம் பெனடிக்ட் அவர்களாலும் வெளியிடப்பட்ட motu proprio ஏடுகளை கருத்தில் கொண்டு இந்தக் கையேடு உருவாக்கப்பட்டுள்ளது.
இந்தப் பிரச்சனையால் பாதிக்கப்பட்டோருக்கு, ஒவ்வொரு நாட்டின் சட்டங்களின்படி தகுந்த நீதி கிடைப்பது தலையாய கடமை என்பதையும், அதேவேளை, இத்தகையக் குற்றச்சாட்டுக்கள் குறித்து முழு உண்மை வெளிவருவதும் முக்கியம் என்பதையும் இந்தக் கையேடு வலியுறுத்துகிறது.
இலத்தீன் மொழியில் Vademecum என்றழைக்கப்படும் இந்த கையேட்டினை, விசுவாசக் கோட்பாட்டு பேராயத்தின் தலைவர், கர்தினால் லூயிஸ் இலதாரியா அவர்கள் வெளியிட்டார்.

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...