Saturday, 3 July 2021

Flying Car: 2.15 நிமிடத்தில் விமானமாக மாறும் கார்; இனி எதிர்கால பயணம் இப...

கொடுமணல் மறைக்கபட்ட தமிழர் நாகரிகம்..புதைந்து கிடக்கும் தொழில் நகரம்../ ...

Keezhadi Excavation | Keeladi |Sivagangai | Ilanthakarai |IBC

அறிவியல், அமைதியைக் கட்டியெழுப்ப மிகப்பெரும் வளம்

 


மாறிவரும் உலகத்திற்கு, அறிவின் புதிய சீடர்கள் தேவைப்படுகின்றனர். அறிவியலாளர்கள், அமைதியை உருவாக்கும் புதிய தலைமுறையின் ஆசிரியர்கள் -திருத்தந்தை பிரான்சிஸ்

மேரி தெரேசா: வத்திக்கான் செய்திகள்

அமைதிக் கலாச்சாரத்தை ஊக்குவிக்கும், அறிவியல் சார்ந்த அறிவைப் பகிர்ந்துகொள்ளுமாறு, “அமைதிக்காக அறிவியல்” என்ற தலைப்பில் நடைபெறும் பன்னாட்டு கூட்டம் ஒன்றில் பங்குகொள்ளும் அனைத்து அறிவியலாளர்களுக்கும், அழைப்புவிடுத்துள்ளார், திருத்தந்தை பிரான்சிஸ்.

ஜூலை 02, இவ்வெள்ளி, 03, இச்சனி ஆகிய இருநாள்களில், திருப்பீட அறிவியல் கழகம் நடத்தும் பன்னாட்டு கூட்டத்தில் கலந்துகொள்ளும், இத்தாலிய, மற்றும், ஐரோப்பிய அறிவியல் ஆய்வகங்கள், மற்றும், நிறுவனங்களின் பிரதிநிதிகளிடம், இவ்வெள்ளியன்று காணொளிச் செய்தி வழியாகப் பேசியுள்ள திருத்தந்தை, பெருந்தொற்றுக்குப் பின்வரும் காலத்தில், உலகைக் கட்டியெழுப்ப, புதிய வழிமுறைகளைக் காணுமாறு கேட்டுக்கொண்டார்.

நம்பிக்கையின் கொடை

இந்த பன்னாட்டு கூட்டம், மனித சமுதாயத்திற்கு, நம்பிக்கையின் மிகப்பெரும் கொடையாக அமைந்துள்ளது எனவும், இன்றையச் சமுதாயம் எதிர்கொள்ளும் சவால்கள் குறித்த அறிவியல் ஆய்வுகள், எக்காலத்தையும்விட இக்காலத்தில் அதிகம் தேவைப்படுகின்றன எனவும், மதநம்பிக்கைக்கும், அறிவியலுக்கும் இடையே எவ்வித முரண்பாடும் இருக்கமுடியாது என்பதை, இக்கூட்டம் தொடர்ந்து உறுதி செய்கின்றது எனவும், திருத்தந்தை கூறியுள்ளார்.

அனைவரும் உடன்பிறந்தோர் (Fratelli tutti) என்ற தன் திருமடலில் வலியுறுத்தியுள்ள கருத்துக்களை இக்காணொளிச் செய்தியில் நினைவுபடுத்திய திருத்தந்தை பிரான்சிஸ் அவர்கள், ஒன்றிணைந்து உலகைக் கட்டியெழுப்புதல் அவசரத் தேவையாக உள்ளது என்றும், அறிவியலாளர்கள், தங்களின் பணிகளை, அனைவருக்கும் ஏற்றதாக அமைக்குமாறும் கூறியுள்ளார்.

எவ்வித அறிவியல் சார்ந்த அறிவும், தன்னிறைவு பெற்றதாக கருதப்படமுடியாது எனவும், அனைத்து மனிதரின் மாண்பு, மற்றும், வளர்ச்சியை ஊக்குவிப்பதன் வழியாக, சமுதாயத்தைக் கட்டியெழுப்பும் புதிய கலாச்சாரத்தை வளர்ப்பதற்கு அறிவியல் ஆய்வு உதவவேண்டும் எனவும், திருத்தந்தை பிரான்சிஸ் அவர்கள் கேட்டுக்கொண்டார்.  

அமைதியைக் கட்டியெழுப்ப அறிவியல்

அறிவியல், அமைதியைக் கட்டியெழுப்புவதற்கு மிகப்பெரும் வளமாக உள்ளது என்றுரைத்த திருத்தந்தை, அறிவியல் ஆய்வுகளை மேற்கொள்வதற்கு, புதிய தலைமுறைகளை உற்சாகப்படுத்தி, அவர்களின் உருவாக்குதலில் உடன்பயணிக்குமாறு அறிவியலாளர்களிடம் விண்ணப்பித்தார்.

நேர்மையோடு ஆய்வுகளை மேற்கொள்பவர், உண்மையைக் கண்டுகொள்வார் என்றும், மாறிவரும் உலகத்திற்கு, அறிவின் புதிய சீடர்கள் தேவைப்படுகின்றனர் என்றும், அறிவியலாளர்கள், அமைதியை உருவாக்கும் புதிய தலைமுறையின் ஆசிரியர்கள் என்றும், திருத்தந்தை பிரான்சிஸ் அவர்கள், அறிவியலாளர்களை ஊக்கமூட்டினார்.

வியாகுலங்களின் புனித கபிரியேல் திருத்தலம் அமைந்துள்ள Gran Sasso மலையடிவாரத்தில், அப்புனிதரின் யூபிலியை முன்னிட்டு, இந்த பன்னாட்டு அறிவியலாளர் கூட்டம் நடைபெற்றது. இந்த இடத்தில், இத்தாலியின் தேசிய அணு இயற்பியல் ஆய்வகங்கள் அமைந்துள்ளன.

மேலும், இந்த பன்னாட்டு கூட்டத்தில், திருப்பீட அறிவியல் கழகத்தின் உதவி சான்சிலர் அருள்பணி Dario Edoardo Vigano அவர்களும் உரையாற்றினார்.


Friday, 2 July 2021

L’Osservatore Romano - 160 ஆண்டுகள் நிறைவு

 

L’Osservatore Romano வத்திக்கான் நாளிதழை ஒவ்வொரு நாளும் வாசித்து வருவதாகவும், இவ்விதழ் வெளிவராத நாள்களில், ஒரு சிறு வெற்றிடத்தை உணர்வதாகவும் கூறும் திருத்தந்தை பிரான்சிஸ்

ஜெரோம் லூயிஸ் - வத்திக்கான் செய்திகள்

1861ம் ஆண்டு, ஜூலை 1ம் தேதி, தன் முதல் இதழை வெளியிட்ட வத்திக்கான் நாளிதழ் L’Osservatore Romano, 2021, ஜூலை 1, இவ்வியாழனன்று, 160 ஆண்டுகளை நிறைவு செய்துள்ளது.

இந்த முக்கிய தருணத்தையொட்டி திருத்தந்தை பிரான்சிஸ் அவர்கள், வெளியிட்டுள்ள ஒரு குறும் காணொளிச்செய்தியில், வத்திக்கான் நாளிதழை தான் ஒவ்வொரு நாளும் வாசித்து வருவதாகவும், இவ்விதழ் வெளிவராத நாள்களில், ஒரு சிறு வெற்றிடத்தை உணர்வதாகவும் கூறியுள்ளார்.

அர்ஜென்டீனா நாட்டில் தான் இருந்த வேளையில், இவ்விதழின் இஸ்பானிய வாரப்பதிப்பை தவறாமல் வாசித்து வந்ததாகவும், அது, தன்னை, தாய் திருஅவையுடனும், திருப்பீடத்துடனும் உறவுகொண்டிருக்க உதவியது என்றும், திருத்தந்தை இச்செய்தியில் கூறியுள்ளார்.

ஜூலை 1, இவ்வியாழனன்று, L’Osservatore Romano, தன் 160வது ஆண்டு நிறைவைச் சிறப்பிக்கிறது என்பதை, ஜூன் 29, தன் மூவேளை செப உரையின் இறுதியில் குறிப்பிட்ட திருத்தந்தை பிரான்சிஸ் அவர்கள், இந்த ஊடக நிறுவனத்தில் பணியாற்றுவோர் அனைவருக்கும் தன் நன்றியைக் கூறியதோடு, அவர்கள், உறுதியுடன் தொடர்ந்து பணியாற்ற, தன் வாழ்த்துக்களையும் செபங்களையும் வழங்குவதாகக் கூறினார்.

1861ம் ஆண்டு முதல், வாரத்தின் திங்கள் கிழமை தவிர, ஏனைய ஆறு நாள்கள் தன் பதிப்புக்களை வெளியிட்டுவரும் L’Osservatore Romano இதழ், இத்தாலியம், பிரெஞ்சு, இஸ்பானியம், ஆங்கிலம், போர்த்துகீசியம், ஜெர்மன், ஆகிய மொழிகளில், வார இதழ்களையும் வெளியிட்டு வருகின்றது.

1968ம் ஆண்டு முதல் வெளியாகிவரும் ஆங்கில வார இதழ், வத்திக்கானிலும், அமெரிக்க ஐக்கிய நாட்டிலும் அச்சிடப்பட்டு வருகிறது. அத்துடன், 2009ம் ஆண்டு முதல், அது, இந்தியாவில், மலையாள மொழியிலும் வெளியிடப்பட்டு வருகிறது.

1980ம் ஆண்டு, அப்போதையத் திருத்தந்தை 2ம் யோவான் பவுல் அவர்களின் விருப்பத்திற்கேற்ப, போலந்து மொழியில், இவ்விதழ், ஒரு மாதஇதழாக வெளியிடப்பட்டு, அந்நாட்டு ஆயர் பேரவை வழியாக, மக்களை அடைந்துவருகிறது.

திருத்தந்தையரின் மறைக்கல்வி உரை, மூவேளை செப உரை மற்றும் அவர் பல்வேறு குழுக்களுக்கு வழங்கும் உரைகள் மற்றும் செய்திகள் ஆகியவை தவறாமல் இடம்பெறும் இவ்விதழில், திருத்தந்தையர் மேற்கொள்ளும் திருத்தூதுப் பயணங்களின்போது, சிறப்பான முறையில் அப்பயண விவரங்களும், உரைகளும் வெளியாகி வருகின்றன.

திருத்தந்தையர் வெளியிடும் திருமடல்களை தவறாமல் வழங்கிவரும் L’Osservatore Romano இதழ், இறுதியாக, திருத்தந்தை பிரான்சிஸ் அவர்கள், 2020ம் ஆண்டு அக்டோபர் 3ம் தேதி சனிக்கிழமை, அசிசி நகரில் கையொப்பமிட்ட 'Fratelli Tutti' திருமடல், L'Osservatore Romano இதழாக அச்சிடப்பட்டு, அக்டோபர் 4 ஞாயிறன்று, வத்திக்கான் புனித பேதுரு பெருங்கோவில் வளாகத்தில் கூடியிருந்தோருக்கு, இலவசமாக வழங்கப்பட்டது.


Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...