செய்திகள்-02.03.15

செய்திகள்-02.03.15

------------------------------------------------------------------------------------------------------

1. திருத்தந்தை : நம்மை நாமே தீர்ப்பிட கற்றுக்கொள்வதே கிறிஸ்தவத்தின் முதல்படி

2. லிபியாவில் பணிகளைத் தொடரும் திருஅவைக்கு திருத்தந்தை பாராட்டு

3. திருத்தந்தை, குர்திஸ்தான் மாநிலப் பிரதமர் சந்திப்பு

4. திருத்தந்தையின் ஞாயிறு நண்பகல் மூவேளை செப உரை

5. திருத்தந்தை - சிரியா, ஈராக் வெனிசுவேலாவில் அமைதி வேண்டும்

6. கச்சத் தீவு புனித அந்தோனியார் திருவிழாவில் 4000 இந்தியர்கள்

7. காங்கோவில் அருள்பணியாளர் ஒருவர் சுட்டுக் கொலை

8. தென் சுடானில் அரச ஆதரவு இயக்கத்தால் சிறார்கள் கடத்தப்படல்

9. மாரடைப்பால் மரணம் நிகழ்வதற்கு உடல் பருமனும் ஒரு முக்கியக் காரணம்

------------------------------------------------------------------------------------------------------

1. திருத்தந்தை : நம்மை நாமே தீர்ப்பிட கற்றுக்கொள்வதே கிறிஸ்தவத்தின் முதல்படி

மார்ச்,02,2015. மற்றவர்களைத் தீர்ப்பிடுவது நமக்கு எளிதாக உள்ளது, ஆனால் நம்மையே நாம் முதலில் தீர்ப்பிடக் கற்றுக்கொள்ளும்போதுதான், கிறிஸ்தவ பயணத்தில் முன்னேற்றம் காணமுடியும் என்றார் திருத்தந்தை பிரான்சிஸ்.

தான் தங்கியிருக்கும் சாந்தா மார்த்தா இல்லத்தின் சிற்றாலயத்தில் இத்திங்கள் காலை திருப்பலி நிறைவேற்றி மறையுரையாற்றிய திருத்தந்தை பிரான்சிஸ் அவர்கள், நாம் அனைவரும் பாவிகள் என்பதை மனதில்கொண்டு நம்மையே நாம் சரியான முறையில் தீர்ப்பிட கற்றுக்கொள்வதே கிறிஸ்தவத்தின் முதல்படி என்றார்.

நம்மை நாமே நியாயப்படுத்துவதில் நாம் தலைசிறந்து விளங்குகின்றோம், ‘அது நானில்லை’, ‘அது என் தவறில்லை’, ‘எனக்கு எதுவும் தெரியாது’ என்றெல்லாம் தவறுகளிலிருந்து தப்பிக்கப் பார்ப்பது கிறிஸ்தவ வாழ்வல்ல என்ற திருத்தந்தை பிரான்சிஸ் அவர்கள், மற்றவர்களை குற்றஞ்சாட்டுவது எளிது, ஆனால் அங்கு வித்தியாசமாகச் செயல்பட்டு, நம் தவறுகளை ஏற்கும்போது முதலில் கவலை வந்தாலும், இறுதியில் அது அமைதியையும் நலத்தையுமே நமக்கு வழங்குகின்றது என்றார்.

நம் பாவங்கள் குறித்து வெட்கப்படுதல், இறை இரக்கம் குறித்து பெருமைப்படல் போன்றவை குறித்தும் தன் மறையுரையில் விரிவாக எடுத்துரைத்தார் திருத்தந்தை பிரான்சிஸ்.

ஆதாரம் : வத்திக்கான் வானொலி.

2. லிபியாவில் பணிகளைத் தொடரும் திருஅவைக்கு திருத்தந்தை பாராட்டு

மார்ச்,02,2015 லிபியாவில் நிலவிவரும் அண்மைய பதட்ட நிலைகள் மத்தியிலும், தங்கள் பணிகளைத் தொடர்ந்துவரும் அந்நாட்டு ஆயர்கள், அருள் பணியாளர்கள், இருபால் துறவியர் மற்றும் பொதுநிலையினருக்கு தன் நன்றியை வெளியிடுவதாக அறிவித்தார், திருத்தந்தை பிரான்சிஸ்.

ஐந்தாண்டுகளுக்கு ஒருமுறை இடம்பெறும் 'அத் லிமினா' சந்திப்பையொட்டி உரோம் நகர் வந்திருந்த CERNA எனப்படும் வட ஆப்ரிக்கப் பகுதி நாடுகளின் 10 ஆயர்களை, இத்திங்களன்று  திருப்பீடத்தில் சந்தித்து உரையாற்றிய திருத்தந்தை பிரான்சிஸ் அவர்கள், லிபியாவின் இன்றைய நிலைகள் குறித்து தன் கவலையை வெளியிட்டதோடு, அங்குள்ள தலத்திருஅவை பொறுப்பாளர்களின் தன்னலமற்ற பணி குறித்த மகிழ்வையும் தெரிவித்தார்.

CERNA என்ற ஆயர் பேரவையின் கீழுள்ள Morocco, Algeria, Tunisia மற்றும் Libya வில் உள்ள துறவு சபையினர், தங்கள் நாட்டு சகோதர சகோதரிகளுக்காக தங்களையே அர்ப்பணித்து, பணிகளில் ஈடுபட்டுள்ளது, தொடரவேண்டும் என்றும் திருத்தந்தை பிரான்சிஸ் அவர்கள் ஊக்கமளித்தார்.

மதங்களுக்கிடையே கலந்துரையாடல்கள் ஊக்குவிக்கப்படவேண்டியதன் அவசியத்தையும் திருத்தந்தை பிரான்சிஸ் அவர்கள் வலியுறுத்தினார்.

ஆதாரம் : வத்திக்கான் வானொலி

3. திருத்தந்தை, குர்திஸ்தான் மாநிலப் பிரதமர் சந்திப்பு

மார்ச்02,2015. ஈராக்கின் குர்திஸ்தான் மாநிலப் பிரதமர் Nechirvan Barzani அவர்கள், திருத்தந்தை பிரான்சிஸ் அவர்களை, இத்திங்களன்று வத்திக்கானில் சந்தித்து உரையாடினார்.

இச்சந்திப்புக்குப் பின்னர், பாப்பிறை பதக்கம் ஒன்றை Nechirvan Barzani அவர்களுக்கு வழங்கினார் திருத்தந்தை.

இத்தாலியிலுள்ள குர்திஸ்தான் மாநிலப் பிரதிநிதி Rezan Kader உட்பட நான்கு ஆண் அதிகாரிகளும் குர்திஸ்தான் பிரதமருடன் திருத்தந்தையைச் சந்திக்கச் சென்றிருந்தனர். மேலும், ஐ.நா.வின் கல்வி, கலாச்சார மற்றும் அறிவியல் நிறுவனமான யுனெஸ்கோ இயக்குனர் இரினோ பொக்கோவா அவர்களும், வத்திக்கானில் இத்திங்களன்று திருத்தந்தையைச் சந்தித்து உரையாடினார்.

திருப்பீட நாடுகளுக்கு இடையேயான பொதுச் செயலர் பேராயர் Paul Richard Gallagher, இலத்தீன் அமெரிக்க பாப்பிறை பணிக்குழுவின் உதவித் தலைவர் Guzman Carriquiry ஆகியோரையும் இத்திங்களன்று சந்தித்தார் திருத்தந்தை பிரான்சிஸ்.

ஆதாரம் : வத்திக்கான் வானொலி

4. திருத்தந்தையின் ஞாயிறு நண்பகல் மூவேளை செப உரை

மார்ச்,02,2015 தன் சீடர்களை விசுவாசத்தில் உறுதிப்படுத்தவும், சிலுவையின் பாதையில் நடப்பதற்கு ஊக்கமளிக்கவும் தன் உருமாற்றம் நிகழ்வை ஒரு கருவியாக இயேசு பயன்படுத்தினார் என்றார் திருத்தந்தை பிரான்சிஸ்.

இஞ்ஞாயிறு திருப்பலியின் நற்செய்தியில் தரப்பட்டுள்ள 'இயேசுவின் உருமாற்றம்' நிகழ்ச்சி குறித்து நண்பகல் மூவேளை செப உரையில் எடுத்துரைத்த திருத்தந்தை பிரான்சிஸ் அவர்கள், உரோமையர்களின் ஆட்சியிலிருந்து தங்கள் நாட்டை விடுவிப்பதற்கு மெசியா வருவார் என்று மக்கள் கொண்டிருந்த கண்ணோட்டத்தை இயேசு விரும்பவில்லை என்று கூறினார்.

தன்னுடைய மகிமை நிறை பாடுகள் குறித்து எடுத்துரைத்தவற்றை சீடர்களாலேயே புரிந்துகொள்ள முடியவில்லை என்பதை உணரத்தான் இயேசு, தன் உயிர்ப்புக்குப் பின் வெளிப்படப்போகும் மகிமையின் முன்னோட்டத்தை தன் மூன்று முக்கியச் சீடர்களுக்கு உருமாற்றத்தின் வழி காண்பித்தார் என்று திருத்தந்தை பிரான்சிஸ் அவர்கள் கூறினார்.

இயேசுவின் உருமாற்றத்தின்போது மோசேயும், எலியாவும் தோன்றியது, சட்டம் மற்றும் இறைவாக்கினர்களின் அடையாளமாகவும், அனைத்தும் இயேசுவில் தோன்றி, அவரிலேயே முடிவடைகின்றன என்பதை சுட்டிக்காட்டுபவைகளாக உள்ளன என்றும் திருத்தந்தை பிரான்சிஸ் அவர்கள் எடுத்துரைத்தார்.

நாமும் நம் வாழ்வை இழந்து மற்றவர்களின் மீட்புக்குக் காரணமாக இருக்கும்போது, மகிமையடைவோம்; ஏனெனில், சிலுவைகளும், துன்பங்களும் இறுதியில் மகிழ்ச்சியை நோக்கியே இட்டுச் செல்கின்றன என்று தன் ஞாயிறு நண்பகல் மூவேளை செப உரையில் மேலும் எடுத்துரைத்தார், திருத்தந்தை பிரான்சிஸ்.

ஆதாரம் : வத்திக்கான் வானொலி

5. திருத்தந்தை - சிரியா, ஈராக் வெனிசுவேலாவில் அமைதி வேண்டும்

மார்ச்,02,2015 சிரியா, ஈராக் வெனிசுவேலா ஆகிய நாடுகளில், வன்முறைகளுக்கு உள்ளாக்கப்பட்டுவரும் மக்களை மறந்துவிடாமல், அவர்களுக்காகத் தொடர்ந்து செபிப்போம் என்ற அழைப்பை விடுத்தார், திருத்தந்தை பிரான்சிஸ்.

வன்முறை, கடத்தல், துன்புறுத்தல் ஆகியவற்றிற்கு கிறிஸ்தவர்கள் உள்ளாவது குறித்த செய்திகள், சிரியா மற்றும் ஈராக்கிலிருந்து தொடர்ந்து வந்து கொண்டிருக்கின்றன என்ற கவலையை வெளியிட்ட திருத்தந்தை பிரான்சிஸ் அவர்கள், "சகிக்கமுடியாத இந்தக் கொடுஞ்செயல்கள் ஒரு முடிவுக்கு வரவேண்டும் என்று நாம் தொடர்ந்து செபிக்கிறோம் என்பதையும், துன்புறுவோரை நாம் மறக்கவில்லை என்பதையும் இப்பகுதியில் வாழும் கிறிஸ்தவர்கள் உணரட்டும்" என்றும் கூறினார்.

மத்தியக் கிழக்குப் பகுதி வாழ் கிறிஸ்தவர்களுக்கு சிறப்பு செபங்களை எழுப்பியத் திருத்தந்தை, தொடர்ந்து, தென் அமெரிக்க நாடான வெனிசுவேலாவின் பதட்டநிலைகள் குறைவதற்குச் செபிக்குமாறும் அழைப்பு விடுத்தார்.

அனைவரும் வன்முறைகளை மறுப்பதோடு, ஒவ்வொரு மனிதரின் மாண்புக்கான மதிப்பைக் காட்டுமாறும் தன் அழைப்பை முன்வைத்தார், திருத்தந்தை பிரான்சிஸ்.

ஆதாரம் : / வத்திக்கான் வானொலி

6. கச்சத் தீவு புனித அந்தோனியார் திருவிழாவில் 4000 இந்தியர்கள்

மார்ச்,02,2015 இந்தியா, மற்றும் இலங்கை கடல்படை பாதுகாப்பு உதவியுடன், கச்சத் தீவு புனித அந்தோனியார் திருவிழா, சிறப்புடன் நடந்தேறியுள்ளது.

இராமேஸ்வரத்தில் இருந்து 25 கிலோ மீட்டர் தூரத்தில், பாக் வளைகுடா கடலில் அமைந்துள்ள கச்சத் தீவு புனித அந்தோனியார் திருவிழாவில் இந்தியாவிலிருந்து 110 படகுகளில் சென்ற 4003 பேரும், இலங்கையிலிருந்து 3000த்திற்கும் மேற்பட்டோரும் இச்சனிக்கிழமை மற்றும் ஞாயிறு விழாக் கொண்டாட்டங்களில் கலந்துகொண்டனர்.

ஆண்டுதோறும் பிப்ரவரி அல்லது மார்ச் மாதத்தில் இடம்பெறும் கச்சத் தீவு புனித அந்தோனியார் திருவிழாவை முன்னிட்டு, இரு நாடுகளிலுமிருந்து வந்திருந்த பக்தர்களுடன், சிலுவைப்பாதை, ஞாயிறு காலை திருப்பலி மற்றும் தேர்பவனி இடம்பெற்றன.

1974ம் ஆண்டு, கச்சத் தீவு, இலங்கைக்கு வழங்கப்பட்டதைத் தொடர்ந்து, விழா நடத்துவதில் ஏற்பட்டச் சிக்கல்கள், 2010ம் ஆண்டிற்குப்பின், ஓரளவு சுமுகமாகியுள்ளதைத் தொடர்ந்து, திருவிழாக் கொண்டாட்டங்கள் இருநாட்டு மக்களின் பங்கேற்புடன் இடம்பெற்று வருகிறது.

1913ம் ஆண்டில் இந்தியாவைச் சேர்ந்த அந்தோனிப்பிள்ளை பட்டங்கட்டி மற்றும் சீனிக்குப்பன் பட்டங்கட்டி ஆகியோர், கச்சத்தீவில் புனித அந்தோனியார் ஆலயத்தை ஓலைக் குடிசையாக எழுப்பினர்.

ஆதாரம் : / வத்திக்கான் வானொலி

7. காங்கோவில் அருள்பணியாளர் ஒருவர் சுட்டுக் கொலை

மார்ச்,02,2015. காங்கோ சனநாயக குடியரசின் Mweso நகர் அருள்பணியாளர் ஒருவர், அடையாளம் தெரியாத மனிதர்களால் கொலைச் செய்யப்பட்டுள்ளார்.

Mweso பங்குதளத்தின் நிதி நிர்வாகத்தைக் கவனித்துவந்த அருள்பணி Jean-Paul Kakule Kyalembera கொலைச்செய்யப்பட்டுள்ளதற்கு, திருட்டு முயற்சியில் ஈடுபட்டவர்களே காரணமாக இருக்கவேண்டும் என தெரிவித்தார் அப்பகுதியின் Goma ஆயர் Theophile Kaboy Ruboneka.

மாலையில் கோவிலை மூடச்சென்றபோது, அதனுள் மறைந்திருந்த திருடர்கள், அருள்பணி Kyalembera அவர்களை தலையிலும் வயிற்றிலும் சுட்டுக் கொன்றுள்ளனர்.

ஆதாரம் : FIDES / வத்திக்கான் வானொலி.

8. தென் சுடானில் அரச ஆதரவு இயக்கத்தால் சிறார்கள் கடத்தப்படல்

மார்ச்,02,2015. தென் சுடான் அரசுடன் இணைந்து செயலாற்றும் தீவிரவாதக்குழு ஒன்றாலேயே அண்மையில் அந்நாட்டுச் சிறார்கள் கடத்தப்பட்டதாக ஐ.நா. நிறுவனம் குற்றஞ்சாட்டியுள்ளது.

தென் சுடானில் அரசு ஆதரவு இயக்கத்தால் கடத்தப்பட்ட சிறார்களின் எண்ணிக்கை நூற்றுக் கணக்கில் இருக்கிறது எனவும், முன்னர் நம்பப்பட்டது போல் அது 89 அல்ல என்றும் ஐநாவின் சிறார்களுக்கான அமைப்பு, யுனிசெஃப் கூறியுள்ளது.

இவ்வாறு கடத்தப்பட்டவர்களுள் பலர் பயிற்சி முகாம்களுக்கு அழைத்துச் செல்லப்பட்டதாகவும், 12வயது வரை கொண்ட அச்சிறுவர்கள் ஆயுதம் தாங்க வைக்கப்பட்டுள்ளதாகவும், நேரில் கண்டவர்கள் தெரிவித்துள்ளனர்.

இதற்கிடையே, இந்த‌ தீவிரவாதக் குழு எவ்வகையிலும் தங்கள் கட்டுப்பாட்டின்கீழ் இல்லை என்று அரசு அறிவித்துள்ளது.

ஆதாரம் : BBC / வத்திக்கான் வானொலி

9. மாரடைப்பால் மரணம் நிகழ்வதற்கு உடல் பருமனும் ஒரு முக்கியக் காரணம்

மார்ச்,02,2015. அண்மை ஆண்டுகளின் புள்ளிவிவரங்களின்படி, இந்தியாவில் 4 கோடி பேருக்கு உடல்பருமன் பிரச்சனை இருப்பதாகவும், இது 2030ம் ஆண்டில் இரு மடங்காகும் ஆபத்து இருப்பதாகவும் எச்சரிக்கப்பட்டுள்ளது.

உடல் பருமனுக்கு, பரம்பரை, உணவுப்பழக்கம், வாழ்க்கைமுறை போன்றவற்றை முக்கியக் காரணமாகக் காட்டும் உலக நலவாழ்வு நிறுவனம், கடந்த ஆண்டு உலக அளவில் மாரடைப்பால் மரணம் அடந்தவர்களில் உடல் பருமனால் இறந்தவர்கள்தான் அதிகம் என மேலும் தெரிவிக்கிறது.

சில மாத்திரைகளின் பக்கவிளைவுகளால் உடல் எடை அதிகரிப்பதற்கான வாய்ப்பு, சில பெண்களுக்கு குழந்தை பிறந்த பின்பு ஹார்மோன்களின் அதீத விளைவுகளால் உடல் எடை அதிகரிப்பு, உடல்பயிற்சிகளின்மை, நொறுக்குத் தீனிகள் போன்றவைகளையும் உடல்பருமனுக்கான சில காரணங்களாகச் சுட்டிக்காட்டியுள்ளது, உலக நலவாழ்வு அமைப்பு.

ஆதாரம் : தி இந்து / வத்திக்கான் வானொலி

செய்திகள் - 28.02.15

செய்திகள் - 28.02.15

------------------------------------------------------------------------------------------------------

1. திருத்தந்தை - பணம் மனிதரின் சேவைக்கு உரியதாய் இருக்க வேண்டும்

2. ஒவ்வொரு நாளும் இயேசு நமக்காக இறைவனிடம் பரிந்து பேசுகிறார்

3. திருத்தந்தை திருப்பிக் கொடுத்த நன்கொடை நிதி இலங்கை ஏழைகளுக்கு விநியோகம்

4. சிரியாவில் 15 கிறிஸ்தவர்களைக் கொலையுண்டுள்ள செய்தி உண்மையல்ல

5. ஐ.எஸ்.ஐ.எல். தீவிரவாதிகள் கலாச்சார அழிவை நடத்துகின்றனர், யுனெஸ்கோ

6. உலக அபூர்வ நோய் தினம் – பிப்ரவரி 28

7. ஆசிய-பசிபிக் பகுதியில் இயற்கைப் பேரிடர்களால் எட்டு கோடிப் பேர் பாதிப்பு

8. செல்லிட பேசிகளில் சப்தமாக இசையைக் கேட்பதால் செவித்திறனுக்கு ஆபத்து

9. நேபாளம் உச்ச நீதிமன்றம்-உள்நாட்டுப்போர் குற்றவாளிகளுக்கு மன்னிப்பு மறுப்பு

------------------------------------------------------------------------------------------------------

1. திருத்தந்தை - பணம் மனிதரின் சேவைக்கு உரியதாய் இருக்க வேண்டும்

பிப்.28,2015. பணம் மனிதரின் சேவைக்கு உரியதாய் இருக்க வேண்டும், அவ்வாறு இல்லாமல் பணம் மனிதரைக் கட்டுப்படுத்தினால் அழிவைக் கொண்டுவரும் என்று இத்தாலிய கூட்டுறவு சங்கத்தினரிடம் எச்சரித்தார் திருத்தந்தை பிரான்சிஸ்.

இத்தாலிய கூட்டுறவு சங்கங்களின் கூட்டமைப்பின் ஏறக்குறைய ஏழாயிரம் உறுப்பினர்களை வத்திக்கான் ஆறாம் பவுல் அரங்கத்தில் இச்சனிக்கிழமையன்று சந்தித்து உரையாற்றிய திருத்தந்தை, மனிதர் தெரிவுசெய்வதை ஆணையிடும் தெய்வச்சிலையாக பணம் மாறும்போது ஏற்படும் ஆபத்துகள் குறித்து எச்சரித்தார்.

மனிதர் தங்களின் முழுத்திறமையில் எவ்வாறு வளர்வது என்பதை அறிந்திருக்கும் பொருளாதாரத்தின் புதிய தரம் இக்காலத்தில் நமக்குத் தேவைப்படுகின்றது என்றும், உள்ளூரிலும், பொதுச் சமூகங்களிலும் வலிமையற்றவர்களின் சார்பாக நின்று அவர்களின் முன்னேற்றத்தை ஊக்குவிப்பவர்களாகத் தொடர்ந்து செயல்பட வேண்டுமென்றும் கேட்டுக்கொண்டார் திருத்தந்தை.

கூட்டுறவு அமைப்பில் 1+ 1= 3 என்று சொன்னால் அது தோல்வியே என்று கூட்டுறவுச் சங்கத்தின் உண்மை நிலைகள் பற்றி தொகுத்து வழங்கிய திருத்தந்தை, இக்காலத்தில் வேலையின்றி இருப்போருக்கு வேலைவாய்ப்பை அமைத்துக் கொடுக்குமாறு கேட்டுக்கொண்டார்.

அநீதியான முறையில், குறைந்த ஊதியத்துக்கு பலமணி நேரங்கள் வேலைக்கு அமர்த்தும் நடவடிக்கைகள் குறித்து கண்டித்துப் பேசிய திருத்தந்தை பிரான்சிஸ் அவர்கள், 600 யூரோக்களுக்கு 11 மணி நேரம் வேலை செய்ய விருப்பமில்லாதவர்களை ஒதுக்கித்தள்ளும் நிலை குறித்து குறிப்பிட்டார்.

சட்டத்துக்குப் புறம்பே வேலைக்கு ஆள் அமர்த்துவதற்கு இவ்வுலகில் காணப்படும் பசி பற்றிக் குறிப்பிட்ட திருத்தந்தை, இன்று வீட்டுவேலை செய்வோரில் எத்தனைபேருக்கு ஓய்வூதியம் கிடைக்கும் என்ற கேள்வியையும் முன்வைத்தார்.

ஏறக்குறைய 800 அருள்பணியாளர்கள் மற்றும் பங்குத்தளங்களால் இத்தாலிய கூட்டுறவு சங்கங்கள் ஆரம்பிக்கப்பட்ட வரலாற்றையும் நினைவுகூர்ந்த திருத்தந்தை, இக்கூட்டமைப்பின்  கிறிஸ்தவ விழுமியங்கள் எல்லாருக்கும் உரியவை என்பதையும் எடுத்துச் சொன்னார்.

ஆதாரம் : வத்திக்கான் வானொலி

2. ஒவ்வொரு நாளும் இயேசு நமக்காக இறைவனிடம் பரிந்து பேசுகிறார்

பிப்.28,2015. “ஒவ்வொரு நாளும் இயேசு நமக்காக இறைவனிடம் பரிந்து பேசுகிறார்; எனவே, ஆண்டவரே, என்மீது இரக்கம் வையும்; எனக்காகப் பரிந்து பேசும்! எனச் செபிப்போம்” என்ற வார்த்தைகளை இச்சனிக்கிழமையன்று தனது டுவிட்டரில் எழுதியுள்ளார் திருத்தந்தை பிரான்சிஸ்.

மேலும், ஸ்காட்லாந்து மறைசாட்சி இயேசு சபை அருள்பணியாளர் புனித John Ogilvie அவர்கள் கொல்லப்பட்டதன் நான்காம் நூற்றாண்டு பெருவிழா நிகழ்வுகளில் தனது பிரதிநிதியாக கலந்துகொள்வதற்கு, கர்தினால் கோர்மாக் மர்ஃபி ஒக்கானர் அவர்களை நியமித்துள்ளார் திருத்தந்தை பிரான்சிஸ்.

கிளாஸ்கோவில் வருகிற மார்ச் 9, 10 தேதிகளில் நடைபெறும் நிகழ்வுகளில் இங்கிலாந்தின் வெஸ்ட்மின்ஸ்டர் பேராயர் கர்தினால் ஒக்கானர் அவர்கள், திருத்தந்தையின் பிரதிநிதியாக கலந்துகொள்வார்.

1579ம் ஆண்டில் ஸ்காட்லாந்தில் பிரபுக்கள் குடும்பத்தில் பிறந்த புனித John Ogilvie அவர்கள், Presbyterian கிறிஸ்தவ சபையிலிருந்து கத்தோலிக்கத்துக்கு மனம் மாறியவர். தனது 17வது வயதில் இயேசு சபையில் சேர்ந்த இவர், இங்கிலாந்து அரசர் முதலாம் ஜேம்ஸ் அவர்களை திருஅவையின் தலைவராக ஏற்க மறுத்தார். இதனால் அரச துரோகி எனக் குற்றம் சாட்டப்பட்டு 1615ம் ஆண்டு மார்ச் 10ம் தேதி தூக்கிலிடப்பட்டார் புனித John Ogilvie.

ஆதாரம் : வத்திக்கான் வானொலி

3. திருத்தந்தை திருப்பிக் கொடுத்த நன்கொடை நிதி இலங்கை ஏழைகளுக்கு விநியோகம்

பிப்.28,2015. கடந்த சனவரியில் திருத்தந்தை பிரான்சிஸ் அவர்கள் இலங்கைக்கு மேற்கொண்ட திருத்தூதுப் பயணத்தில், அவர் திருப்பிக் கொடுத்த நன்கொடை நிதியை, அந்நாட்டின் ஏழைகளுக்கு வழங்குவதற்கு இலங்கை ஆயர்கள் தீர்மானித்துள்ளனர்.

திருத்தந்தையின் பிறரன்புப் பணிகளுக்காக இலங்கை மக்களிடமிருந்து கிடைத்த 87 இலட்சம் ரூபாயை, கொழும்புப் பேராயர் கர்தினால் மால்கம் இரஞ்சித் அவர்கள் திருத்தந்தையிடம் அன்பளிப்பாக வழங்கினார். இலங்கைத் திருத்தூதுப் பயணத்தை முடித்துத் திரும்பும்வேளையில், திருத்தந்தையும் அந்நிதியை கர்தினால் இரஞ்சித் அவர்களிடமே திருப்பி வழங்கினார்.

இலங்கையின் 12 மறைமாவட்டங்களிலுள்ள ஏழைகளின் தேவைகளை நிவர்த்தி செய்வதற்கு அந்நிதியைச் செலவிடுவதற்கு ஆயர்கள் தீர்மானித்து அதைப் பங்கிட்டுக் கொடுத்துள்ளனர் என்று இலங்கையில் பிரசுரமாகும் ஒரு தினத்தாளில் கூறப்பட்டுள்ளது.

திருத்தந்தை பிரான்சிஸ் அவர்கள், சனவரி 15ம் தேதி காலையில் இலங்கைத் திருத்தூதுப் பயணத்தை முடித்துத் திரும்பும்வேளையில், 87,60,690.25 ரூபாய்க்கான காசோலையை கர்தினால் இரஞ்சித் அவர்கள் திருத்தந்தையிடம் கொடுத்தார்.

ஆதாரம் : வத்திக்கான் வானொலி

4. சிரியாவில் 15 கிறிஸ்தவர்களைக் கொலையுண்டுள்ள செய்தி உண்மையல்ல

பிப்.28,2015. சிரியாவில் ஐ.எஸ். இஸ்லாம் தீவிரவாதிகள் குறைந்தது 15 அசீரிய கிறிஸ்தவர்களைக் கொலை செய்துள்ளனர் என்ற செய்திகள் உண்மையல்ல என்று சிரியா கிறிஸ்தவத் தலைவர்கள் தெரிவித்துள்ளனர்.

ஜிகாதிகள் எனப்படும் ஐ.எஸ். இஸ்லாமிய அரசின் பயங்கரவாதிகள் தாங்கள் பிணையக் கைதிகளாக வைத்துள்ள ஏறக்குறைய 350 அசீரிய கிறிஸ்தவர்களைக் கொலை செய்யத் தொடங்கியுள்ளனர் என்று பல பன்னாட்டு ஊடகங்கள் செய்திகளை வெளியிட்டதையடுத்து, இச்செய்திகள் உண்மையல்ல எனத் தெரிவித்துள்ளார் அலெப்போ கல்தேய வழிபாட்டுமுறை பேராயர் Antoine Audo.

al-Hasakahல் கல்தேயக் கிறிஸ்தவர்களின் தலைவராகப் பணியாற்றும் அருள்பணியாளர் Nidala அவர்களைத் தான் தொடர்பு கொண்டு பேசியபோது, கிறிஸ்தவர்கள் கொலை செய்யப்படும் செய்தி உண்மையல்ல என்று கூறியதாக, ஆசிய செய்தி நிறுவனத்திடம் கூறினார் பேராயர் Antoine Audo.

மேலும், சிரியா கத்தோலிக்கப் பேராயர் Jacques Behnan Hindo அவர்களும், உண்மையென்று கூறமுடியாத வதந்திகளைப் பரப்புவது தவிர்க்கப்பட வேண்டியது முக்கியம் என்று, பீதெஸ் செய்தி நிறுவனத்திடம் கூறியுள்ளார்.

Khabur ஆற்றுப் பகுதியிலுள்ள கிராமங்களிலிருந்து, ஜிகாதிகள் கடத்தியுள்ள ஆசீரிய மற்றும் கல்தேயக் கிறிஸ்தவர்களின் எண்ணிக்கை ஏறக்குறைய 350 என்று சொல்லலாம் எனவும் கூறியுள்ளார் பேராயர் Hindo.

ஆயினும், சிரியாவில் பாதிக்கப்பட்டுள்ள மக்களுக்கு வழங்கப்படும் மனிதாபிமான உதவிகள் குறித்து குறை கூறியுள்ள பேராயர் Hindo, அனைத்துலக செம்பிறைச் சங்கம் இவ்வாரத்தில் 125 உணவுப் பொட்டலங்களை விநியோகித்தது என்று தெரிவித்தார்.

ஆதாரம் : Fides / வத்திக்கான் வானொலி

5. ஐ.எஸ்.ஐ.எல். தீவிரவாதிகள் கலாச்சார அழிவை நடத்துகின்றனர், யுனெஸ்கோ

பிப்.28,2015. ஐ.எஸ்.ஐ.எல். இஸ்லாமிய அரசின் தீவிரவாதிகள் மொசூல் அருங்காட்சியகத்தை தாக்கும் காணொளியைக் கண்டு தான் அதிர்ச்சியடைந்ததாகச் சொல்லி, அவ்வன்செயல்களுக்கு எதிரான கண்டனத்தை வெளியிட்டுள்ளார் ஐ.நா.வின் யுனெஸ்கோ இயக்குனர் இரினா பொக்கோவா.

ஈராக்கில் ஐ.எஸ்.ஐ.எல். தீவிரவாதிகள் கலாச்சார அழிவு நடவடிக்கைகளைச் செய்து வருவதாக, பத்திரிகையாளர் கூட்டத்தில் குற்றம் சாட்டியுள்ள யுனெஸ்கோ இயக்குனர் பொக்கோவா அவர்கள், பயங்கரவாதிகள் மக்களைக் கலங்கடிக்கும் தங்களின் யுக்திகளில் ஒன்றாக, கலாச்சாரப் பாரம்பரிய வளங்களை அழித்து வருகின்றனர் என்று கூறினார்.

ஐ.நா. பொதுச் செயலரும், பாதுகாப்பு அவையும் இதில் உடனடியாகத் தலையிட்டு கலாச்சார பாரம்பரிய வளங்கள் காக்கப்படுவதற்கு நடவடிக்கைகளை எடுக்குமாறு வலியுறுத்தியுள்ளார் பொக்கோவா.

மொசூல் அருங்காட்சியகத்தில் பழங்காலப் பொருட்களை அழிப்பதைக் காட்டுகின்ற காணொளியை ஐ.எஸ். இஸ்லாமிய அரசு வெளியிட்டுள்ளது. பெரிய சிலைகளை சுத்தியலால் இடித்து வீழ்த்தி உடைப்பதாக அதில் உள்ளது. கி.மு. 9-ம் நூற்றாண்டு அசீரிய காலத்தைச் சேர்ந்த, சிறகுகள் கொண்ட காளை மாட்டின் கலைச்சின்னமும் அழிக்கப்பட்ட பொருள்களில் உள்ளது.

ஆதாரம் : UN / வத்திக்கான் வானொலி

6. உலக அபூர்வ நோய் தினம் – பிப்ரவரி 28

பிப்.28,2015. அபூர்வ நோய்களுக்கான சிகிச்சையும், அந்நோய்கள் குறித்த ஆராய்ச்சிகளும் மேம்படுத்தப்பட வேண்டும் என்று பென்சில்வேனிய பல்கலைக்கழக கைவிடப்பட்டநோய் ஆய்வு மையம் கேட்டுக்கொண்டுள்ளது.

பிப்ரவரி 28, இச்சனிக்கிழமையன்று உலக அபூர்வ நோய் தினம் கடைப்பிடிக்கப்பட்டதை முன்னிட்டு இவ்வாறு கேட்டுக்கொண்ட இம்மையம், அறிவியலாளர்கள், மருத்துவர்கள், ஆய்வாளர்கள், நோயாளிகள் மற்றும் அவர்களின் குடும்பத்தினர், இந்நோய் குறித்த விழிப்புணர்வை ஏற்படுத்துமாறும் கேட்டுள்ளது.

கைவிடப்பட்ட நோய்கள் என்று கூறப்படும் அபூர்வ நோய்களால் அமெரிக்க ஐக்கிய நாட்டில் மட்டும் இரண்டு கோடியே ஐம்பது இலட்சத்துக்கு மேற்பட்ட மக்கள் பாதிக்கப்பட்டுள்ளனர். ஏதாவது ஓர் அபூர்வ நோயால் குறைந்தது இரண்டு இலட்சம் பேர் பாதிக்கப்பட்டுள்ளனர். இவற்றில் பல நோய்கள் பிறப்பிலேயே வருபவை. இந்நோய்களால் ஏறக்குறைய 30 விழுக்காட்டுச் சிறார் 5 வயதுக்குள்ளே இறந்து விடுகின்றனர்.

பிறவிப் பார்வையின்மை, கல்லீரல் பிரச்சனை, Duchenne Muscular Dystrophy போன்ற நோய்களைப் பட்டியலிட்டுள்ளது பென்சில்வேனிய ஆய்வு மையம்.

ஆதாரம் : Agencies /வத்திக்கான் வானொலி

7. ஆசிய-பசிபிக் பகுதியில் இயற்கைப் பேரிடர்களால் எட்டு கோடிப் பேர் பாதிப்பு

பிப்.28,2015. ஆசிய-பசிபிக் பகுதியில் இயற்கைப் பேரிடர்களால் ஏறக்குறைய எட்டு கோடிப் பேர் பாதிக்கப்பட்டுள்ளனர் மற்றும் ஆறாயிரம் கோடி டாலர் மதிப்புடைய பொருளாதார இழப்பும் ஏற்பட்டுள்ளன என்று ஐ.நா. கூறியுள்ளது.

வருகிற மாதத்தில் ஜப்பானில் கூட்டம் நடத்தவிருக்கும் ஆசிய-பசிபிக் பகுதி தலைவர்கள் இப்பிரச்சனை குறித்து விவாதிப்பார்கள் என்று, ஐ.நா.வின் ஆசிய-பசிபிக் பகுதி பொருளாதார மற்றும் சமூக அவை(ESCAP) இவ்வாரத்தில் வெளியிட்ட அறிக்கை கூறுகின்றது.

2014ம் ஆண்டில் உலகில் இடம்பெற்ற இயற்கைப் பேரிடர்களில் பாதிக்கும் மேல் ஆசிய-பசிபிக் பகுதியில் இடம்பெற்றன என்றும், சுனாமி அல்லது நிலநடுக்கம் ஏற்படாவிட்டாலும், கடும்புயல், வெள்ளம், நிலச்சரிவுகள் போன்றவற்றால் அப்பகுதிகள்  பாதிக்கப்பட்டன என்றும் அவ்வறிக்கை கூறுகின்றது.

அனைத்துப் பேரிடர்களிலும், இத்தகையப் பேரிடர்கள் 85 விழுக்காடு என்றும் கூறும்  அவ்வறிக்கை, இந்தியாவில் ஹூட்ஹூட் புயலால் 1100 கோடி டாலர் பொருளாதார இழப்பு ஏற்பட்டதையும் சுட்டிக் காட்டியுள்ளது.

ஆதாரம் : UN /வத்திக்கான் வானொலி

8. செல்லிட பேசிகளில் சப்தமாக இசையைக் கேட்பதால் செவித்திறனுக்கு ஆபத்து

பிப்.28,2015. பாடல்களைச் சப்தமாக கேட்பதால் உலகில் இலட்சக்கணக்கான இளையோர் செவித்திறனை இழக்கும் ஆபத்தை எதிர்கொள்கின்றனர் என்று உலக நலவாழ்வு நிறுவனம் எச்சரித்துள்ளது.

நடுத்தர மற்றும் அதிக வருவாய் உள்ள நாடுகளில் இந்நிறுவனம் எடுத்த ஆய்வின்படி,  12க்கும் 35 வயதுக்கும் உட்பட்டவர்களில் ஏறக்குறைய பாதிப்பேர் தங்களின் கைபேசிகளிலும், பிற இசைக் கருவிகளிலும் ஒலியின் சப்தத்தை மிக அதிகமாக வைத்து கேட்கின்றனர் எனத் தெரிய வந்துள்ளது.

இந்நிலை குறித்து எச்சரித்துள்ள உலக நலவாழ்வு நிறுவனம், இதனால் இவர்களின் கேட்கும்திறன் பாதிக்கப்படும் என்று கூறியது.

எட்டு மணி நேரத்துக்கு 85 decibelக்கு மேலும், 15 நிமிடங்களுக்கு 100 decibelலுக்கு மேலும் ஒலியின் திறன் இருந்தால் ஆபத்து அதிகம் என்றும், ஒரு நாளைக்கு ஒரு மணி நேரத்துக்குமேல் தங்களின் தனிப்பட்ட இசைக் கருவிகளில் இசையைக் கேட்காமல் இருப்பது நல்லது என்றும் பரிந்துரைத்துள்ளது ஐ.நா.வின் நலவாழ்வு நிறுவனம்.

ஆதாரம் : UN /வத்திக்கான் வானொலி

9. நேபாளம் உச்ச நீதிமன்றம்-உள்நாட்டுப்போர் குற்றவாளிகளுக்கு மன்னிப்பு மறுப்பு

பிப்.28,2015. உள்நாட்டுப் போரின்போது மனித உரிமைகளைக் கடுமையாய் மீறிய குற்றவாளிகளுக்கு மன்னிப்பு வழங்குவதற்கு நேபாள நீதி சார்ந்த சட்டவிதியில் உள்ள நிபந்தனைகளை இரத்து செய்துள்ளது நேபாள உச்ச நீதிமன்றம்.

நீதியின் கோட்பாடுகள், அரசியல் அமைப்பிலுள்ள கட்டுப்பாட்டு விதிகள், அனைத்துலக சட்டம், நீதிமன்றத்தின் முந்தைய தீர்ப்புகள் ஆகியவற்றுக்கு எதிராக மனித உரிமைமீறல் குற்றவாளிகள் செயல்படுகிறார்கள் என்று சொல்லி, இக்குற்றவாளிகளுக்கு மன்னிப்பு வழங்கும் சலுகையை இரத்து செய்துள்ளது நேபாள உச்ச நீதிமன்றம்.

உள்நாட்டுப் போரில் பாதிக்கப்பட்ட 234 பேர், 2014ம் ஆண்டு ஜூனில் பதிவு செய்த வழக்கை விசாரித்த நேபாள உச்ச நீதிமன்றம் இவ்வாறு தீர்ப்பளித்துள்ளது.

நேபாள அரசும், உச்ச நீதிமன்றத்தின் இத்தீர்ப்பை மதித்து நடப்பதாக உறுதியளித்துள்ளது.

1996க்கும் 2006ம் ஆண்டுக்கும் இடைப்பட்ட காலத்தில் நேபாள மாவோயிஸ்ட் புரட்சியாளர்களுக்கும், அரசின் பாதுகாப்புப் படைக்கும் இடையே நடந்த சண்டையில் 17 ஆயிரத்துக்கு மேற்பட்ட மக்கள் கொல்லப்பட்டனர் மற்றும் 1300 பேர் காணாமல் போயுள்ளனர்.

ஆதாரம் : AsiaNews /வத்திக்கான் வானொலி

ROBERT JOHN KENNEDY: பூமியைவிட பெரிய கருந்துளை, சீன விண்வெளி ஆய்வாளர்கள...

ROBERT JOHN KENNEDY: பூமியைவிட பெரிய கருந்துளை, சீன விண்வெளி ஆய்வாளர்கள...: பூமியைவிட பெரிய கருந்துளை , சீன விண்வெளி ஆய்வாளர்கள் கண்டுபிடிப்பு  பூமியைவிட ஏறக்குறைய 1,200 கோடி அளவிலான பெரிய கருந்துளை ஒன்று வ...

பூமியைவிட பெரிய கருந்துளை, சீன விண்வெளி ஆய்வாளர்கள் கண்டுபிடிப்பு

பூமியைவிட பெரிய கருந்துளை, சீன விண்வெளி ஆய்வாளர்கள் கண்டுபிடிப்பு

பூமியைவிட ஏறக்குறைய 1,200 கோடி அளவிலான பெரிய கருந்துளை ஒன்று விண்வெளியில் இருப்பதை சீன விண்வெளி ஆய்வாளர்கள் கண்டுபிடித்துள்ளனர். இதற்கு SDSS J0100+2802 என்றும் அவர்கள் பெயரிட்டுள்ளனர்.

"பிரபஞ்சத்தில் பெருவெடிப்பு நிகழ்ந்து ஏறக்குறைய 90 இலட்சம் ஆண்டுகளுக்குப் பிறகு இந்தக் கருந்துளையை நாங்கள் கண்டுபிடித்துள்ளோம். இதன்மூலம் கருந்துளைகள் எவ்வாறு தோன்றுகின்றன என்பது குறித்த ஆய்வு அடுத்த கட்டத்துக்கு நகர்ந்துள்ளது" என்று இதனைக் கண்டுபிடித்த ஆய்வாளர்களில் ஒருவரான சீனாவின் Peking பல்கலைக்கழகப் பேராசிரியர் Wu Xuebing கூறுகிறார்.

சீனாவில், லிஜியாங் நகரில் உள்ள‌ விண்வெளி ஆய்வாளர்கள் 2.4 மீட்டர் குறுக்களவு கொண்ட‌ தொலைநோக்கி உதவியுடன் இதனைக் கண்டுபிடித்துள்ளனர். இந்த கருந்துளை பூமியில் இருந்து 1,280 கோடி ஒளி ஆண்டுகள் தொலைவில் உள்ளது என்று தெரிவிக்கப்பட்டுள்ளது. இப்படி ஒரு கருந்துளை இருப்பதை அமெரிக்காவும், சிலி நாடும் உறுதி செய்துள்ளன.

இதுவரை கண்டுபிடிக்கப்பட்ட கருந்துளைகளிலேயே இதுதான் மிகவும் பெரியதாகவும், இதன் ஒளிக்கதிர்கள் அதீத வெளிச்சம் கொண்டதாகவும் இருப்பதாகக் கூறப்படுகிறது.

கருந்துளை என்பது விண்வெளியின் ஒரு பகுதியாகும். இது மிகவும் அடர்த்தி வாய்ந்த ஒன்று. எனவே, இதனுள் ஒளி கூட புக முடியாது. இந்தக் கருந்துளை தனக்கு அருகில் இருக்கும் அனைத்தையும் ஈர்த்துக் கொள்ளும் சக்தி கொண்டது. இதனால் ஏற்படும் வெப்பம் காரணமாக, ஒளித்துகள்கள் மின்னும் கதிர்களை வெளியிடும் தன்மை கொண்டவையாக உள்ளன. இந்த ஒளிக் கதிர்கள் 'குவாசார்' என்று அழைக்கப்படுகின்றன.

இதுகுறித்து சீன அறிவியல் அகாடெமியைச் சேர்ந்த விண்வெளி ஆய்வாளர் சென் ஜியான்ஷெங் கூறும்போது, "பொதுவாக, இதுபோன்ற ஒரு கருந்துளையைக் கண்டுபிடிக்க 10 மீட்டர் குறுக்களவு கொண்ட தொலைநோக்கிகள்தான் பயன் படுத்தப்படும். ஆனால் 2.4 மீட்டர் குறுக்களவு கொண்ட தொலைநோக்கியைப் பயன்படுத்தி இவர்கள் கண்டுபிடித்திருப்பது உண்மையிலேயே மிகப்பெரிய சாதனைதான். இது சீன விண்வெளி அறிவியலாளர்களின் அறிவுத்திறனைக் காட்டுகிறது" என்றார்.

ஆதாரம் : தி இந்து / வத்திக்கான் வானொலி