அர்ஜென்டினா மக்கள் ஒற்றுமையுடனும் நம்பிக்கையுடனும் எதிர்காலத்தைக் கட்டியெழுப்ப திருத்தந்தை அழைப்பு
ஜான்சிராணி அருளாந்து - வத்திக்கான்
நவம்பர் 08, ஞாயிறன்று, திருத்தந்தை பதினான்காம் லியோ அவர்கள் இலத்தீன் அமெரிக்க நாடுகளில் ஒன்றான அர்ஜென்டினா நாட்டிற்கு மேற்கொண்ட திருத்தூதுப் பயணத்தின் ஒரு பகுதியாக அந்நாட்டின் தலைநகர் புவனஸ் அயர்ஸில் அமைந்துள்ள பலாசியோ லிபர்டாட் கலாச்சார மையத்தில் (Palacio Libertad, Centro Cultural Domingo Faustino Sarmiento) அந்நாட்டு அரசு அதிகாரிகள், குடிமைச் சமூகப் பிரதிநிதிகள் மற்றும் தூதரகப் பிரதிநிதிகளைச் சந்தித்தார். அச்சந்திப்பின்போது திருத்தந்தை அவர்கள் ஆற்றிய உரை.
அன்பிற்குரிய சகோதரர் சகோதரிகளே,
அன்புக்குரிய அர்ஜென்டினா நாட்டிற்கு வருகை தருவதில் நான் பெருமகிழ்ச்சி அடைகிறேன். குடியரசுத் தலைவர் அவர்களே, தங்களின் அன்பான வரவேற்பிற்கு எனது நன்றியைத் தெரிவித்துக்கொள்கிறேன். அர்ஜென்டினா நாட்டு மக்கள் அனைவருக்கும் எனது அன்பான வாழ்த்துகளைத் தெரிவித்துக்கொள்கிறேன்.
புனித பேதுருவின் வழித்தோன்றலாகவும், ஒரு மேய்ப்பராகவும், இங்கு வாழும் திருஅவையைச் சந்திக்கவும், இந்நாட்டு மக்கள் அனைவரிடமும் உரையாற்றவும் நான் வந்துள்ளேன். நற்செய்தியின் ஒளியில் ஒவ்வொரு மனிதரின் மாண்பையும், குடிமக்களிடையே நல்லிணக்கத்தையும், பொது நலனையும் பாதுகாப்பதில் திருஅவை தனது பங்களிப்பை வழங்க விரும்புகிறது.
எனது இந்த வருகை தனிப்பட்ட முறையிலும் சிறப்புப் பொருள் கொண்டதாகும். திருத்தந்தை பிரான்சிஸ் அவர்களின் தாயகமான அர்ஜென்டினாவிற்கு வருகை தருவதில் நான் மகிழ்ச்சியடைகிறேன். இந்த நாட்டு மக்கள் மீதும், இங்குள்ள நம்பிக்கை வாழ்வின் மீதும் அவர் கொண்டிருந்த அன்பு என்றும் அவரது இதயத்தில் நிலைத்திருந்தது. இன்று, பேதுருவின் பணியில் அவரது வழித்தோன்றலாக, அவரது அடிச்சுவடுகளைப் பின்பற்றி இங்கு வந்துள்ளேன்.
ஒவ்வொரு தலைமுறையும் தனது வரலாறு, பண்பாடு, விழுமியங்கள் மற்றும் சவால்களைக் கொண்ட ஒரு தாயகத்தை முந்தைய தலைமுறையிடமிருந்து பெற்றுக்கொள்கிறது. அதனைப் பாதுகாத்து, மேலும் வளப்படுத்தி, அடுத்த தலைமுறையிடம் ஒப்படைப்பது அதன் பொறுப்பாகும்.
அர்ஜென்டினாவின் இலக்கியம், இசை, டாங்கோ நடனம் மற்றும் மத்தே பானத்தைப் பகிர்ந்து அருந்தும் பாரம்பரியம் ஆகியவை பல்வேறு மக்களும் பண்பாடுகளும் ஒன்றிணைந்து உருவாக்கிய செழுமையான மரபை வெளிப்படுத்துகின்றன. கிறிஸ்தவ நம்பிக்கையும் இந்தப் பாரம்பரியத்தில் ஆழமாக வேரூன்றியுள்ளது. அது மக்களுக்கு வாழ்வின் பொருளையும், நம்பிக்கையையும், சகோதரத்துவத்தையும் வழங்குகிறது.
மக்களாட்சி என்பது பாதுகாக்கப்பட வேண்டிய ஓர் அரிய கொடையாகும். உரையாடல், ஒருவருக்கொருவர் மரியாதை, சுதந்திரம், நீதி மற்றும் மாறுபட்ட கருத்துகளைக் கொண்டவர்களுக்குச் செவிசாய்க்கும் மனப்பான்மை ஆகியவற்றின் வழியாக அது வலுப்பெறுகிறது. பொது அதிகாரத்தில் இருப்பவர்கள் தங்களது அதிகாரத்தைத் தனிப்பட்ட நலனுக்காக அல்ல, அனைவரின் நலனுக்காகவும் சேவையாகவும் பயன்படுத்த வேண்டும்.
குடும்பங்களைப் பாதுகாப்பதிலும், உழைப்பின் மாண்பை நிலைநாட்டுவதிலும், ஏழைகள், முதியவர்கள் மற்றும் வேலைவாய்ப்பற்றோரைக் கவனிப்பதிலும் பொது நலம் வெளிப்பட வேண்டும். குறிப்பாக, இளைஞர்கள் தங்கள் தாயகத்திலேயே தங்களது எதிர்காலத்தைக் கட்டியெழுப்பும் வகையில் கல்வி, தொழிற்பயிற்சி, பல்கலைக்கழகங்கள் மற்றும் ஆராய்ச்சித் துறைகளை வலுப்படுத்த வேண்டும்.
மனித வாழ்வை அதன் தொடக்கத்திலிருந்து இயற்கையான முடிவு வரை வரவேற்றுப் பாதுகாக்க வேண்டும். நோய், இயலாமை மற்றும் துன்பங்களால் பாதிக்கப்பட்டவர்களுக்குத் தேவையான அக்கறையையும் துணையையும் வழங்க வேண்டும். அதேவேளையில், இறைவனின் படைப்பான இயற்கையையும் பாதுகாக்க வேண்டும். குறிப்பாக, செயற்கை நுண்ணறிவு உள்ளிட்ட தொழில்நுட்ப முன்னேற்றங்கள் மனித மாண்பையும் அறநெறிப் பொறுப்பையும் அடிப்படையாகக் கொண்டிருக்க வேண்டும்.
அர்ஜென்டினா தனது அண்டை நாடுகளுடன் ஒத்துழைப்பை வலுப்படுத்தி, திட்டமிட்ட குற்றச்செயல்கள், மனிதக் கடத்தல், போதைப்பொருள் கடத்தல் மற்றும் ஊழல் ஆகியவற்றை எதிர்கொள்ள வேண்டும். உரையாடல், சட்டத்திற்கு மதிப்பளித்தல், அமைதியை நாடுதல் ஆகியவை நாடுகளுக்கிடையிலான உறவுகளின் அடித்தளங்களாகத் தொடர்ந்து விளங்க வேண்டும்.
திருஅவை அர்ஜென்டினா மக்களுடன் தொடர்ந்து பயணிக்கவும், நற்செய்தியை அறிவிக்கவும், கல்வி வழங்கவும், நோயாளிகளைக் கவனிக்கவும், குடும்பங்களுக்கு ஆதரவளிக்கவும், ஏழைகளுக்குப் பணியாற்றவும் விரும்புகிறது. அனைவரையும் வரவேற்று, கிறிஸ்துவின் நற்செய்தியை அறிவிப்பதே அதன் பணி.
அன்பிற்குரிய நண்பர்களே, ஒவ்வொரு தலைமுறையும் முந்தைய தலைமுறையிடமிருந்து ஒரு தாயகத்தைப் பெற்றுக்கொள்கிறது. அதனைப் பாதுகாத்து, வருங்காலத் தலைமுறையினரிடம் ஒப்படைக்க வேண்டிய பொறுப்பும் அதற்கு உண்டு. உங்கள் வரலாற்றுக்கும் எதிர்கால வாய்ப்புகளுக்கும் பெருமை சேர்க்கும் வகையில், ஒன்றுபட்ட நாட்டைக் கட்டியெழுப்ப நீங்கள் அனைவரும் இணைந்து செயல்படுவீர்களாக.
இறுதியாக, அர்ஜென்டினா நாட்டை லூஜான் அன்னையின் பரிந்துரையிடம் ஒப்படைக்கிறேன். அவர் இந்த நாட்டைப் பாதுகாத்து, அதன் மக்கள் அனைவரையும் வழிநடத்தி, இயேசுவுக்கு நெருக்கமாக இருக்கத் துணைபுரிவாராக.
இறைவன் அர்ஜென்டினா நாட்டையும் அதன் மக்கள் அனைவரையும் நிறைவாக ஆசீர்வதிப்பாராக.






