Tuesday, 6 July 2021

அறுவைச் சிகிச்சைக்குப்பின் மருத்துவமனையில் திருத்தந்தை

 திருத்தந்தை பிரான்சிஸ் அவர்களுக்கு பெருங்குடல் நாளச்சுவர் பிதுக்கம் அகற்றும் அறுவைச் சிகிச்சை வெற்றிகரமாக மேற்கொள்ளப்பட்டது

கிறிஸ்டோபர் பிரான்சிஸ் - வத்திக்கான் செய்திகள்

திருத்தந்தை பிரான்சிஸ் அவர்களுக்கு பெருங்குடல் நாளச்சுவரில் உருவான நலப்பிரச்சனையைத் தீர்க்க, ஜூலை 4, ஞாயிற்றுக்கிழமையன்று மாலை, அறுவைச் சிகிச்சையொன்று வெற்றிகரமாக மேற்கொள்ளப்பட்டது.

திருத்தந்தை பிரான்சிஸ் அவர்கள், உரோம் நகரின் ஜெமெல்லி மருத்துவமனையில் நலமுடன் உள்ளார் என தெரிவித்த திருப்பீடத் தகவல் தொடர்புத் துறை, மருத்துவர் Sergio Alfieri அவர்களின் தலைமையின் கீழ், மேலும் மூன்று மருத்துவர்கள் அடங்கிய குழு, இந்த அறுவைச் சிகிச்சையை மேற்கொண்டதாகவும், திருத்தந்தை தற்போது நலமுடன் மருத்துவமனையில் ஒய்வெடுத்து வருவதாகவும் தெரிவித்தது.

வயிற்றின் இடது பக்கம் 3 மணி நேரம் இடம்பெற்ற இந்த அறுவைச் சிகிச்சையைத் தொடர்ந்து, 7 நாட்கள் திருத்தந்தை ஓய்வில் இருப்பார் என அறிவிக்கப்பட்டுள்ளது.

ஜூலை 4, இஞ்ஞாயிறு நண்பகலில் புனித பேதுரு பெருங்கோவில் வளாகத்தில் குழுமியிருந்த திருப்பயணிகளுக்கு வழக்கம்போல் மூவேளை செபவுரை வழங்கிய திருத்தந்தை பிரான்சிஸ் அவர்கள், ஏற்கனவே திட்டமிடப்பட்டிருந்த அறுவைச் சிகிச்சியை முன்னிட்டு, ஞாயிறு பிற்பகலில், உரோம் நகரின் கத்தோலிக்க மருத்துவ பல்கலைக்கழகத்தின் மருத்துமனையான ஜெமெல்லி நோக்கி பயணமானார்.

ஒவ்வோர் ஆண்டும் ஜூலை மாதத்தில் வெளிநாட்டுத் தலைவர்களைச் சந்திப்பதையும், புதன் மறைக்கல்வி உரைகளையும் ஒதுக்கிவைத்து கோடைக்கால ஓய்வை சாந்தா மார்த்தா இல்லத்திலேயே மேற்கொள்ளும் திருத்தந்தை பிரான்சிஸ் அவர்கள், அதற்கியைந்த வகையில், இம்மாதத்தில் அறுவை சிகிச்சைக்குத் திட்டமிட்டிருந்தார்.

ஜூலை 4ம் தேதி, ஞாயிற்றுக்கிழமை பிற்பகலில் மேற்கொள்ளப்பட்ட அறுவைச் சிகிச்சையில், மயக்க மருந்து வல்லுநர்கள் உட்பட, 10 மருத்துவர்கள் அடங்கிய குழு ஈடுபட்டது.

மருத்துவ சிகிச்சையில் புறக்கணிப்பு என்பதற்கே இடமில்லை

 


நாம் எந்த மதத்தைச் சார்ந்தவராய் இருந்தாலும், தடுப்பூசிகள் சமமாக விநியோகிக்கப்படும் விடயத்தில் அனைவரும் ஒருமித்து குரல் எழுப்பவேண்டும் - பேராயர் பாலியா

மேரி தெரேசா: வத்திக்கான் செய்திகள்

உலகெங்கும் மக்கள் பலர், வாழ்வைப் பாதுகாக்கும் மருத்துவ சிகிச்சைகளைப் பெறுவதற்கு இடர்களைச் சந்தித்துவரும்வேளை, உலகெங்கும் பெருந்தொற்று தடுப்பூசிகள் சமமாக விநியோகிக்கப்படவேண்டும் என்று, திருப்பீட உயர் அதிகாரி ஒருவர் கேட்டுக்கொண்டுள்ளார்.

திருப்பீட வாழ்வுக் கழகம், உலக மருத்துவ கழகம் (WMA), ஜெர்மன் மருத்துவ கழகம் (GMA), ஆகிய மூன்று அமைப்புகளும் இணைந்து, ஜூலை 01, இவ்வியாழனன்று நடத்திய மெய்நிகர் கலந்துரையாடல் பற்றி, இவ்வெள்ளியன்று கூட்டறிக்கை ஒன்று வெளியிடப்பட்டது.

உலகெங்கும் தடுப்பூசிகள் சமமாக விநியோகிப்படுவதை ஊக்குவித்துவரும் இந்த அமைப்புகளின் தலைவர்கள், தடுப்பூசிகளைப் பெறுவதற்கு நிலவும் தயக்கங்கள் பற்றிய  தங்கள் கருத்துக்களையும் எடுத்துரைத்துள்ளனர்.

இந்த கலந்துரையாடலை துவக்கிவைத்து உரையாற்றிய, திருப்பீட வாழ்வுக் கழகத்தின் தலைவர், பேராயர் வின்சென்சோ பாலியா அவர்கள், தடுப்பூசிகளை வாங்குவதற்கு வசதி இல்லாத, வருமானம் குறைவாக உள்ள நாடுகள் என்ற பாகுபாடின்றி, அவை  எல்லா நாடுகளுக்கும் சமமாக விநியோகிக்கப்படவேண்டும் என்பதை வலியுறுத்திக் கூறினார்.

மருத்துவச் சிகிச்சையில் புறக்கணிப்பு என்பதற்கே இடமில்லை என்பதையும் வலியுறுத்திய பேராயர் பாலியா அவர்கள், நாம் எந்த மதத்தைச் சார்ந்தவராய் இருந்தாலும், இந்த விடயத்தில் அனைவரும் ஒருமித்து குரல் எழுப்பவேண்டும் என்று கேட்டுக்கொண்டார்.

இந்த கலந்துரையாடலில், திருப்பீட வாழ்வுக் கழகத்தின் தலைவர் பேராயர் வின்சென்சோ பாலியா அவர்களும், ஜெர்மன் மருத்துவக் கழகத்தின் பன்னாட்டு விவிகாரத் துறையின் தலைவர் டாக்டர் Ramin Parsa-Parsi அவர்களும், உலக மருத்துவக் கழகத்தின் தலைவர் டாக்டர் Frank Ulrich Montgomery அவர்களும், இணையம் வழி நடைபெற்ற இந்த கலந்துரையாடலில் தங்களின் கருத்துக்களைப் பகிர்ந்துகொண்டனர்.

மருத்துவமனையில் உயிரிழந்த அருள்பணி ஸ்டான் சுவாமி

 

இராஞ்சியில் பூர்வீகக் குடிமக்களிடையே பணியாற்றியபோது, பயங்கரவாதச் சட்டத்தின்கீழ் கைதுசெய்யப்பட்ட அருள்பணி ஸ்டான் சுவாமி அவர்கள், இறைபதம் சேர்ந்தார்

கிறிஸ்டோபர் பிரான்சிஸ் - வத்திக்கான் செய்திகள்

மும்பை உயர் நீதிமன்றத்தின் அனுமதியின்பேரில், மே மாதம் 28ம் தேதி முதல் மும்பையின் திருக்குடும்ப மருத்துவமனையில் சிகிச்சை பெற்றுவந்த சமூக ஆர்வலர், இயேசு சபை அருள்பணி ஸ்டான் சுவாமி அவர்கள், ஜூலை 5ம் தேதி, திங்கள்கிழமையன்று, இந்திய நேரம் பிற்பகல் 1 மணி 24 நிமிடங்களுக்கு இறைபதம் சேர்ந்தார்.

பழங்குடியினர், தலித் மக்கள், மற்றும் வாழ்வின் கடைநிலைக்குத் தள்ளப்பட்டோரின் உரிமைகளுக்காகவும், வாழ்வு மேம்பாட்டிற்காகவும் உழைத்துவந்த இயேசு சபை அருள்பணி ஸ்டான் சுவாமி அவர்கள், இராஞ்சியில் பூர்வீகக் குடிமக்களிடையே பணியாற்றிவந்தபோது, NIA எனும் இந்திய தேசிய புலனாய்வு அமைப்பால் பயங்கரவாதச் சட்டத்தின்கீழ், கடந்த ஆண்டு, அக்டோபர் மாதம் 8ம் தேதி கைது செய்யப்பட்டார்.

அக்டோபர் 9ம் தேதி முதல் மும்பை டலோஜா சிறையில் அடைத்துவைக்கப்பட்டிருந்த அருள்பணி ஸ்டான் சுவாமி அவர்கள், கடினமான சட்ட போராட்டங்களுக்குப்பின் மே மாதம் 28ம் தேதி மருத்துவமனையில் அனுமதிக்கப்பட்டார்.

84 வயதான இயேசு சபை அருள்பணி ஸ்டான் சுவாமி அவர்களின் உடல்நிலை மோசமானதைத் தொடர்ந்து, ஜூலை 3ம் தேதி சனிக்கிழமை இரவு செயற்கை சுவாசக்கருவி பொருத்தப்பட்டதாக அறிவிக்கப்பட்டது.

மே மாதம் 28ம் தேதி முதல் 14 நாட்களுக்கு மருத்துமனையில் தங்கி சிகிச்சைப் பெறுவதற்கு அனுமதியளித்த மும்பை உயர்நீதிமன்றம், அருள்பணியாளரின் உடல்நிலையில் முன்னேற்றம் காணப்படாததைத் தொடர்ந்து, அவருக்கு சிகிச்சை வழங்க ஜூலை 5ம் தேதி வரை கால நீட்டிப்பை வழங்கியது, அந்த கால நீட்டிப்பின் இறுதி நாளில் இறைபதம் சேர்ந்தார், சமூக நடவடிக்கையாளர், அருள்பணி ஸ்டான் சுவாமி.

பார்க்கின்சன் என்ற நரம்புத்தளர்ச்சி நோயாலும், செவித்திறன் குறைவாலும், வயது தொடர்புடைய ஏனைய நலப்பிரச்சனைகளாலும் பாதிக்கப்பட்டிருந்த இயேசு சபை அருள்பணி ஸ்டான் சுவாமி அவர்கள், கொரோனா பெருந்தொற்றுக்கு உள்ளாகியிருந்தது, மே 29ம் தேதி தெரியவந்தது.

அருள்பணி ஸ்டான் சுவாமி அவர்களின் அடக்கச் சடங்கு விவரங்கள் விரைவில் அறிவிக்கப்படும் என இந்திய இயேசு சபை தலைவர், அருள்பணி ஸ்தனிஸ்லாஸ் டி சூசா அவர்கள் அறிவித்துள்ளார்.

அருள்பணியாளர் ஸ்டான் சுவாமி அவர்களின் வாழ்க்கை குறிப்பு

இந்திய நடுவண் அரசின் வெறித்தனமான பழிவாங்கும் முயற்சியின் விளைவாக, 84 வயது நிறைந்த இயேசு சபை அருள்பணியாளர் ஸ்டான் சுவாமி அவர்கள், ஜூலை 5, இத்திங்களன்று இறைவனடி சேர்ந்தார். 1937ம் ஆண்டு, ஏப்ரல் 26ம் தேதி, தமிழ்நாட்டின் திருச்சியில் பிறந்த ஸ்டான் அவர்கள், தன் 20வது வயதில் இயேசு சபையில் இணைந்து, 1970ம் ஆண்டு, தன் 33வது வயதில் அருள்பணியாளராக திருப்பொழிவு பெற்றார்.

கடந்த 51 ஆண்டுகளாக அவர் ஆற்றிவந்த பணிகள் அனைத்தும் சமுதாய அக்கறை கொண்ட பணிகளாகவே இருந்தன. 1971ம் ஆண்டு ஜாம்ஷெட்பூர் மற்றும் சாய்பாசா பகுதிகளில் சமுதாயப் பணிகளைத் துவக்கிய அருள்பணி ஸ்டான் அவர்கள், 1975ம் ஆண்டு முதல், 1991ம் ஆண்டு முடிய, பெங்களூரு இந்திய சமுதாய நிறுவனத்தில் பணியாற்றினார். 1993ம் ஆண்டு முதல் பழங்குடியினர் நலனில் அக்கறை கொண்டு பணியாற்றிவந்த அருள்பணி ஸ்டான் அவர்கள், 2002ம் ஆண்டு, இராஞ்சி நகரில் Bagaicha என்ற மையத்தை உருவாக்கி, ஜார்க்கண்ட் மாநிலத்திலுள்ள பழங்குடியினரின் உரிமைகளுக்காக பல்வேறு விழிப்புணர்வு முகாம்கள், பயிற்சிப் பாசறைகள், சட்ட வழி போராட்டங்களை மேற்கொண்டார்.

பழங்குடியினரின் நிலங்களை, இந்திய நடுவண் அரசு, செல்வம் மிகுந்த சுறாமீன்களுக்கும், பன்னாட்டு நிறுவனங்களுக்கும் தாரைவார்த்து வந்ததை எதிர்த்து, பழங்குடியின இளையோரை ஒருங்கிணைத்து, அவர்களது உரிமைகளுக்காகப் போராடி வந்தார் அருள்பணி ஸ்டான். மாநில அரசு, இவ்விளையோரை எவ்வித ஆதாரமும் இன்றி, சிறைகளில் அடைத்தததை எதிர்த்து, பொதுநல வழக்குகளை அருள்பணி ஸ்டான் அவர்கள் தொடுத்தார்.

அருள்பணி ஸ்டான் சுவாமி அவர்களின் நீதி வழி போராட்டங்களை நிறுத்த இயலாத நடுவண் அரசு, அவரை, 2018ம் ஆண்டு சனவரி மாதம், புனேயில் நிகழ்ந்த பீமா கோரேகான் வன்முறை நிகழ்வுகளுடன் தொடர்புபடுத்தி, அவருக்கும் மாவோயிஸ்ட் தீவிரவாதிகளுக்கும் தொடர்பு உள்ளதென்ற பொய் வழக்கைப் புனைந்து, 2020ம் ஆண்டு அக்டோபர் 9ம் தேதி மும்பையின் டலோஜா சிறையில் அடைத்தது. எவ்வித ஆதாரமும் இன்றி, இந்திய தேசிய புலனாய்வுத் துறை இவர் மீது சுமத்திய குற்றங்களை நிரூபிக்க இயலாத போதும், இவருக்கு பிணையலில் விடுதலை அளிக்க மறுத்தது.

பார்க்கின்சன்ஸ் எனப்படும் நரம்புத் தளர்ச்சி நோய், இதயம் தொடாபான குறைபாடுகள், செவித்திறன் குறைவு என்ற பல்வேறு குறைபாடுகளுடன் போராடிவந்த 84 வயதான அருள்பணி ஸ்டான் சுவாமி அவர்கள், குடிப்பதற்கு உறுஞ்சுக்குழல் பொருத்தப்பட்ட ஒரு கிண்ணம், குளிரிலிருந்து காத்துக்கொள்ளத தேவையான உடைகள் ஆகியவற்றை கேட்டபோது, அவற்றை முதலில் மறுத்தனர், சிறை அதிகாரிகள். பல மாதங்கள் சென்றே, இந்த உதவிகள் அவருக்கு வழங்கப்பட்டன.

அருள்பணி ஸ்டான் அவர்களின் உடல்நலம் வெகுவாக தளர்ந்திருந்ததை கவனத்தில் கொண்டு, மும்பை உயர்நீதி மன்றம், அவர், மும்பையின் திருக்குடும்ப மருத்துவமனையில் அனுமதிக்கப்பட உத்தரவு வழங்கியது. மே 29ம் தேதி மருத்துவமனையில் அனுமதிக்கப்பட்ட அருள்பணி ஸ்டான் சுவாமி அவர்களுக்கு கோவிட் பெருந்தொற்றின் தாக்கம் இருந்ததென கண்டுபிடிக்கப்பட்டதையடுத்து, அவருக்குத் தேவையான மருத்துவ சிகிச்சைகள் வழங்கப்பட்டன. ஜூலை 3, இச்சனிக்கிழமை முதல் அவரது உடல் நிலை மிகவும் மோசமாகி, ஜூலை 5, இத்திங்களன்று காலை அவர் இறைவனடி சேர்ந்தார்.

முதல் ‘இந்திய கிறிஸ்தவ நாள்’ சிறப்பிக்கப்பட்டது

 

பேராயர் கொர்னேலியோ : நாட்டில் கிறிஸ்தவர்களுக்கு எதிரான விரோதப்போக்குகள் அதிகரித்துவரும் சூழலில், கிறிஸ்தவர்கள் அனைவரும் ஒன்றிணைந்து செயல்படுவது கட்டாயம்

கிறிஸ்டோபர் பிரான்சிஸ் - வத்திக்கான் செய்திகள்

நாட்டின் ஓர் அங்கமாக இருக்கும் கிறிஸ்தவர்களை, வெளிநாட்டவர்கள் போல், காலனி ஆதிக்கத்துடன் வந்தவர்களாக சித்தரிக்கும் முயற்சிகள் இடம்பெற்றுவரும் வேளையில், ஜூலை மாதம் 3ம் தேதி, இந்திய கிறிஸ்தவ நாள் சிறப்பிக்கப்பட்டது, ஒவ்வொரு நாளும் சிறப்பிக்கப்பட வேண்டிய ஒன்று, என்று போபால் பேராயர் Leo Cornelio அவர்கள் கூறினார்.

கிறிஸ்தவ சபைகள் தங்களிடையே நிலவும் வேறுபாடுகளை மறந்து, கத்தோலிக்கர்கள், பிரிவினை சபையினர், ஆர்த்தடாக்ஸ் சபையினர் என அனைவரும் ஒரே குழுவாக ஜூலை 3ம் தேதியை இந்திய கிறிஸ்தவ நாளாக இணைந்து சிறப்பித்தது பற்றி, ஜூலை 5ம் தேதி திங்கள்கிழமையன்று கருத்து வெளியிட்ட பேராயர் கொர்னேலியோ அவர்கள், நாட்டில் கிறிஸ்தவர்களுக்கு எதிரான விரோதப்போக்குகள் அதிகரித்துவரும் சூழலில், கிறிஸ்தவர்கள் அனைவரும் ஒன்றிணைந்து, ஒன்றிப்பையும் அவர்களிடையே காணப்படும் கலாச்சாரப் பகிர்வையும் வலியுறுத்த வேண்டியது அவசியம் என்பதை எடுத்துரைத்தார்.

போர்த்துக்கீசியர்களோ, பிரித்தானியர்களோ இந்தியாவுக்கு வருமுன்னரே, இந்திய கலாச்சாரம், மற்றும் நாகரீகத்தின் ஓர் அங்கமாக கிறிஸ்தவம் இருந்தது என்று கூறிய பேராயர் கொர்னேலியோ அவரகள், கி.பி 52ம் ஆண்டிலேயே புனித தோமாவால் இந்தியாவில் நற்செய்தி அறிவிக்கப்பட்டுள்ளதை சுட்டிக்காட்டினார்.

இந்திய மக்கள் தொகையில் 2.3 விழுக்காட்டினராக இருக்கும் கிறிஸ்தவர்கள், நாட்டைக் கட்டியெழுப்புவதில், குறிப்பாக கல்வி, மற்றும் மருத்துவத்துறைகளில் ஆற்றியுள்ள பணி மகத்தானது, என்பதையும், இப்பணிகளால் இந்தியாவின் வறியோர் பயனடைந்து வருவதையும் சுட்டிக்காட்டினார் பேராயர் கொர்னேலியோ.

இந்திய கிறிஸ்தவ நாள், இவ்வாண்டு முதல், ஜூலை மாதம் 3ம் தேதி, இந்தியாவில் நற்செய்தி அறிவித்த திருத்தூதர் புனித தோமாவின் திருவிழாவன்று, சிறப்பிக்கப்படுகின்றது.


கொந்தகையில் 7 மனித எலும்புக்கூடுகள் கண்டெடுப்பு

அகழாய்வில் கிடைத்த வியக்க வைக்கும் கலைப்பொருட்கள்| Archaeological excava...

சிவகளை அகழாய்வில் 16 முதுமக்கள் தாழிகள் - அரிய தகவல்கள் | Sivagalai Exca...

Pope Leo XIV visits the St. Oscar Romero Chapel in Chiclayo, Peru

  Pope Leo XIV visits the St. Oscar Romero Chapel in Chiclayo, Peru During a brief private visit to the St. Oscar Romero Chapel in Chiclayo,...